تكملة باقي حلقات الجزء الرابع من أنت قلبي

الجزء الرابع /الحلقة ١٠٩

#أنت_قلبي٤
__________
الحلقة ١٠٩

في المستشفى.
ياسمين : سيف هو اللي قال لي أنا كلمته علشان أطمن على مليكة فبسأله عنك قالي طنط نزلت مصر.
سهر : اه.
فريدة : متقلقيش يا سهر دا طبيعي يا حبيبتي علشان لازم يدخل عناية مركزة بعد العملية.
سهر : بس مانعين حد يدخل عنده يا فريدة ودا اللي قلقني.
ياسمين : مش بيقولوا تمانية وأربعين يعني يومين فاتت ليلة وباقي بكرة بس.
مجدي : مامي أنا هروح اوصل زينة البيت وارجع تاني.
سهر : طيب.
تركهم مجدي ومشي.
ياسمين : انتي هتباتي هنا يا سهر؟
سهر : اه.
فريدة : هتباتي فين؟
سهر : هنا.
ياسمين : فريدة قصدها هتنامي فين؟
سهر : أنام!
أنا مش هينفع أنام.
فريدة : ازاي بس يا سهر انتي لازم تريحي جسمك يا حبيبتي مش هتقدري صدقيني روحي وحد من الولاد يبقى موجود يطمنكم وتعالي الصبح وهكذا بدلوا مع بعض يعني.
سهر : الولاد بيبدلوا مع بعض بس أنا مش هقدر.
ياسمين : طيب مش عاوزه حاجة يا سهر؟
سهر : لا يا ياسمين متشكره.
ياسمين : هكلمك الصبح تطمنيني.
سهر : ادعيلي يا ياسمين إن قلبي ميتوجعش أكتر من كدا.
وتبكي سهر..
ياسمين : يا حبيبتي بس اهدي هيبقى كويس يا سهر هيقوم منها ويبقى زي الفل انتي حاولي تجمدي علشان ولادك.
سهر بتمسح دموعها.
ياسمين : جوزك هيروحك يا فريدة ولا تيجي معانا؟
فريدة : لأ أنا جايه مع كريم بس فوق.
ياسمين : اه طيب .. عاوزين حاجة؟
فريدة : سلامتك يا ياسمين مع السلامة.

في العربية..
عُمر : نروح فين يا ياسمين دلوقت؟!
ياسمين : أكيد سمعتني بقولك نروح لنادين.
عُمر : نعمل إيه هناك؟
ياسمين : هو ايه اللي نعمل إيه هناك هنروح نشوف بنتك ونطمن عليها.
عُمر : هو انتي ليه محسساني إنها عروسة جديدة ولازم بقى نروح نبارك ونهيص ونعمل الواجب يا حبيبتي بنتك رجعت لجوزها اللي معاها منه عيلين فاهمه ولا اعيد تاني؟
ياسمين : دا على أساس إني مش عارفه يعني ولا ايه؟! هروح اقعد مع حماتها شوية الست وحشاني.
عُمر بتنهيدة : حاضر.
ياسمين : هو أنت متعملش حاجة أبدًا وأنت راضي كدا ومبسوط لازم التكشيرة دي.
عُمر : بصراحة مش فايق يا ياسمين وقلقان على الراجل اللي نايم في العناية ده.
ياسمين : تصدق أنا كمان حاطه ايدي قلبي بس حاولت اطمن سهر وأنا اصلا مش مطمنه بس لو فضلت قاعدة كدا حاطه ايدي على خدي ومستنيه التمانية وأربعين ساعة دول يعدوا أنا ممكن يجرا لي حاجة.
عُمر : امال مراته وولاده يعملوا إيه؟!
ياسمينا : اه يا حبيبتي سهر صعبانه عليه قوي.
عُمر : حبيبتي مين؟!
أنا راجل يا ياسمين.
ياسمينا : ما أنا عارفه إنك راجل أنا أقصد  سهر مش أنت.
عُمر : طيب يا ستي متشكر.
ياسمينا : مالك يا عُمر؟
عُمر : ماليش يا ياسمين؟
ياسمينا : الظاهر نفسك حد يقولك يا حبيبي خلاص يا حبيبيي متزعلش يا حبيبي سوق بسرعة يا حبيبى خلينا نلحق بنتك قبل ما تنام يا حبيبيي.
عُمر : كرهتيني في حبيبي دي مش عاوز اسمعها تاني يا ياسمين.
ياسمينا : يا راجل ما أنت حبيبي هو أنا يعني اتنيلت على عيني وحبيت راجل غيرك؟!
عُمر : اتنيلتي على عينك!
شكرًا يا أم نادين.
ياسمينا : أنت شكلك بتتلكك الليلة والظاهر شايف لك شوفه.
عُمر : هههههههههههه
ياسمينا : ايه ما أنت عملتها قبل كدا.
عُمر : ما خلاص بقى يا ياسمين موضوع وانتهينا منه.
ياسمينا : لا بس حبيت أفكرك.
عُمر يقُبل ايدها : وأنا الاقي زيك فين بس يا أم نادين دا انتي اللي في القلب يا سمسمه.
ياسمينا : طيب يا اخويا ركز في الطريق مش خلاص الحب مقطع بعضه قوي.
عُمر : هههههههههههه
__-___-
في فيلا مراد.
أمل : طب بس اهدي يا بنتي واسمعيني.
زينة : لا يا مامي.
أمل : هو انتي لسه سمعتي هقولك إيه؟
زينة : حضرتك هتقوليلي إن ميصحش اتكلم معاه في حاجة دلوقت واستنى لما انكل آسر يخف ويقوم بالسلامة بس أنا مش هقدر يا مامي جوايا نار عاوزه انتقم لكرامتي دي بعتالي اد يعني مش فارق معاها إني اشوف صورة زي دي كإنها قاصدة تفرسني والبيه مش هامه بس أنا مش هسكت.
أمل : يا حبيبتي ما يمكن دا مش مجدي انتي إيه اللي خلاكي متأكدة كدا؟
زينة : هي نفس الساعة اللي قالي اشتراها من يومين وكمان دي ايد مجدي يا مامي أنا متأكدة.
أمل : وناويه تعملي إيه؟
زينة : هطربقها فوق دماغه.
أمل : طيب مش أحسن إنك تقولي لباباكي وهو يتصرف معاه.
زينة : خايفه بابي يصدقه أصله أكيد هيخترع كدبه علشان يخرج منها بس أنا حاسه من زمان إن في حاجة بينه وبين الست دي كانت بتبصلي من فوق لتحت واحنا في المستشفى.
أمل : قولي لباباكي وسيبيه هو يتصرف.
زينة : طيب يا مجدي بس لما اشوفك.
_______
في شقة وليد.
وليد : افتح يا ابني الباب شوف مين اللي هيكسر الباب ده.
بيفتح اللي شغال مع وليد..
وليد : حسام!
حسام : كويس إنك لسه صاحي.
وليد : فيه ايه يا حسام وبتخبط على الباب كدا ليه؟
حسام قرب منه ومسكه من لياقة البيجاما : أنت مش عاوز تتهد الغريبة إنك عايش في شقة أخوك هو اللي بيدفع لك إيجارها يعني حتى البيت معندكش.
وليد : اوعى كدا سيبني وبعدين أنت مالك احنا اخوات في بعض ملكش دعوة.
حسام : مش بقول بجح.. ولما هو أخوك رايح تهين مراته وولاده ليه مش دي تبقى قلة أصل برضو؟!
وليد : اه هي العقربة مراته راحت قالت لك.
حسام : أخرس متجبش سيرة سهر على لسانك.
وليد : ايه دا أنت كمان بتخاف عليها لتتجنن أكتر من الجنان اللي عندها.
حسام : لو بتحس ولا عندك دم كنت عرفت إن كلامك على أي حد يخص أخوك بيزعله كنت سكت بس البعيد مبيفهمش اسمع يا وليد أنا لا إياد جوز أختك هتهور  واموتك واروح في داهيه ولا هشام هتكسف منك وهعمل حساب إنكم نسايب ولا أنا حد من ولاد أخوك هيعمل حساب إنك عمي وواجب احترمك ولا كل الكلام دا خالص هي حاجة بس توديك في داهيه شايف دول؟
وخرج ورق من جيب البنطلون.
وليد : ايه ده؟
حسام : دول صور من وصلات الأمانة اللي أنت ماضي بنفسك عليهم أخوك قبل ما يدخل العمليات وصاني اسدد كل الديون اللي عليك ووصلات الأمانة دي كانت من ضمن الديون المتلتله اللي عليك.
وليد : آسر اللي قالك كدا؟
حسام : اه كان بيفكر فيك وهو تعبان وداخل يعمل عملية وأنت بتفكر ازاي تأذي مراته وولاده ورايح تقول كلام عبيط ملوش أي لازمه غير إنك تجرحها وتهينها قدام ولاده ثم أنت مالك آسر يكتب لمراته نص الشركة ولا حتى كلها أنت مالك فمتخليك في خيبتك وشركتك وفلوسك اللي ضيعتها ولا أنت عينك من اللي عند أخوك طب دا جابهم بمجهوده لكن أنت ضيعت شقا ابوك العمر كله هتشبع امتى يا وليد؟
وليد : لما تشبع أنت يا حسام؟
حسام : أنا شبعان يا حبيبي وعمري ما اخدت جنيه من حد الدور والباقي عليك أنت عايش مديون ومفلس واخوك هو اللي عمال يسدد ديونك ويدفعلك إيجار الشقة ومخصص لك مرتب شهري عايز إيه تاني يا وليد.. عاوز إيه تاني ابعد عن آسر وولاده وخصوصا سهر علشان أنت عارف هي غاليه عنده قد ايه فلم نفسك بقى متخليش شكلك وحش قدام الناس
ومتخلنيش اعملها ومسددش اللي عليك في الوقت المناسب علشان ساعتها هتشرف في السجن.. سمعتني ولا أقول تاني؟
وليد : ماشي يا حسام ليك حق تعمل أكتر من كدا ما آسر سايب كل حاجة تحت ايدك بيع واشتري فيه براحتك.
حسام : أخوك سايب لي كل حاجة علشان هو عارف إن اللي سايبه هيقوم يلاقيه زايد مش ناقص.. فاهم؟
وبلاش تصطاد في المياه العكره ولاد آسر كلهم واحد مفيش حاجة اسمها دول ولاد سهر ودول ولاد هايدي كلهم ولاد أخوك وعيب اللي أنت عملته النهاردا ده أنا لو كنت موجود كان هيبقى ليك رد فعل تاني خالص مكانش هيعجبك.
وليد : خلصت الكلمتين بتوعك.. اتفضل بقى من غير مطرود.
حسام : حاضر يا وليد بس خليك فاكر الكلام اللي قولتهولك كويس علشان لو حصل منك حاجة تاني هنفذ تهديدي وأنت عارف أنا مبهزرش في الحاجات دي.
وليد : خُد الباب في ايدك وأنت خارج.
ودخل وليد جوه.. قرب حسام وفتح باب الشقة وخرج.
________
في منزل والد حمزة.
ياسمينا : تسلم ايدك يا نادين اقعدي يا بنتي هنا جنبي.
نادين : حاضر يا ماما.
ياسمينا : عامله إيه يا أم حمزة؟
والدة حمزة : الحمد لله
يا أم نادين عاملين إيه يا حبيبتي وفريدة وولادها أخبارهم إيه؟
ياسمينا : كلنا كويسين.
والدة حمزة : دايمًا يا حبيبتي.. اشربي العصير بتاعك.
ياسمينا : حاضر يا حبيبتي دايمًا عامر.
بتقرص ياسمينا نادين.
نادين : آي.. ايه يا ماما فيه ايه؟
ياسمينا : قومي ادي حماتك كوبايتها في ايدها.
نادين : ليه يعني ما هي بتعرف تمد ايدها لوحدها على فكرة.
ياسمينا : يا بنت قومي بس.
نادين : حاضر.
وقامت نادين واخدت الكوباية : اتفضلي يا طنط.
والدة حمزة : حبيبتي متحرمش منك اقعدي استريحي.
نادين : بألف هنا وشفا
يا كنده يا فارس.
بتقعدها ياسمينا.
نادين : ايه يا ماما فيه ايه بنادي على العيال علشان يجو يشربوا العصير الجو حر.
ياسمينا : ما بالراحة صوتك خرم ودني.
والدة حمزة : هههههههههههه
يا أختي سيبيها يفضل حسها في البيت دايمًا وميتقطعش.
نادين : متشكرة يا طنط.
ياسمينا : الواحد مبقاش زي زمان يا أم حمزة أي صوت بقى بيوترني.
نادين : على فكرة يا ماما حضرتك من زمان كدا تعدي توطي التليفزيون تدخلي تنامي وطوا صوتكو مش عارفه أنام حتى المذاكرة كنتي بتخلينا نذاكر جوه في الاوضة وتقفلي الباب.
والدة حمزة : بكرة تعملي كدا مع عيالك.. منوره يا أم نادين.
ياسمينا : البيت منور بـ أصحابه.
والدة حمزة : ونور كمان لما نادين رجعت بيتها العيال عاملين حس للبيت أنا كنت بقعد هنا وابُص للباب أقول في عقل بالي محدش ناوي يفتح الباب ولا العيال تجري على السلم ويدخلوا يستخبوا هنا من بعض البيت كان وحش قوي من غيرهم.
ياسمينا : يا حبيبتي دايمًا مفتوح بحسك طب استأذن أنا بقى.
والدة حمزة : على فين ما لسه بدري.
ياسمينا : معلش علشان بس أبو نادين هيصحى بدري عنده مشوار مهم الصبح.
والدة حمزة : ماشي يا حبيبتي تصبحو على خير.
ياسمينا : وأنتم من أهله.. ابقي تعالي مع نادين أهو تمشي رجلك وتفُكي عن نفسك شوية.
والدة حمزة : ماشي يا حبيبتي شرفتوا ونورتوا.
ياسمينا : حبيبتي تسلمي.
وخرجت نادين توصل مامتها كان عُمر سبقهم بيشغل العربية وواقف يدردش مع حمزة شوية.
__________
في شقة مراد.
في التليفون... 📞
وائل : دا عربون القيراط بتاع البيت يا دكتور.
مازن : ايوه.. يا خالي بس أنا مش موجود.
وائل : وماله أنت ومريم واحد أنا قولت تاخدوا فلوسكم تعملوا بيها أي مصلحة بدل ما هي مروكنه كدا ولما تنزل ابقى تعالى خدهم من مريم.
مازن : بس أنا قولت لحضرتك يا خالي لو عاوز البيت اتفضل خُده مفيش مانع ونصيبي أنا ومريم هناخده في الأرض اللي ورا البيت.
وائل : ما كنا خلصنا من الموضوع دا يا دكتور.
مازن : لا معلش يا خالي مخلصناش وقولت لحضرتك وقتها إني لا اخد نصيبي أنا ومريم في البيت لـ اما في الأرض حضرتك متمسك بالبيت وقولت هتبنيه قولنا خلاص مفيش مشكلة ناخد نصيبنا بقى في الحته التانية لكن كدا الاتفاق اختلف.
وائل : احنا متفقناش على حاجة.
مازن : تمام كان نهاية الكلام اللي قولته لحضرتك وقولت هتفكر دلوقت مريم هتاخد الفلوس دي على أساس إيه؟
كان وائل فاتح السبيكر ومريم قاعده جنبه.
مريم : أنا مكنتش هاخد حاجة غير لما اخد رأيك الأول يا مازن علشان كدا كلمتك اشوف رأيك ايه واللي هتقوله أنا موافقة عليه.
مازن : تمام كدا مختلفناش يبقى يا خالي تسيب لنا دي أو دي.
وائل : يا ابني هتاخد الأرض تعمل بيها إيه ملكش حد هناك تروحله خُد فلوسك اعمل بيهم أي مصلحه افيدلك من حتة أرض مش هتستفيد منها حاجة.
مازن : ليه مش تتبني الأرض دي؟
وائل : ايوه.. تتبني بس أنت هتسيب القاهرة هنا وتروح تسكن في الارياف يا دكتور ولا اختك هتسيب شقتها دي وتروح تقعد هناك برضو ما تفكر يا ابني بالعقل كدا أنا لما فكرت ابني البيت دا بس علشان له ذكريات عندي وكمان من ريحة جدك إنما أنت لا سكنت هناك ولا تعرف حد في البلد أخرك ولاد اعمامك وعمامتك وأنت عارف بقى مفيش ود ما بينكم هتروح لمين هناك قولي؟
مازن : الأرض تلزمني يا خالي اظن دا حقنا.
وائل : مفيش فايدة دماغك ناشفة مش عارف طالع لمين مامتك مكانتش كدا ولا أبوك.
مازن : مريم متاخديش حاجة.
وائل : كدا طيب براحتك بس أنا ههد البيت وابنيه وبخصوص حتة الأرض اللي ورا البيت لما ترجع بالسلامة نبقى نتفاهم.
مازن : لا يا خالي معلش طالما هتهد وتبني يبقى كدا حقنا هيبقى في الأرض الفاضيه يعني مبقاش فيها تفاهم خلاص.
وائل : أنت ماسك في الأرض دي ليه مش فاهم دي أرض أبويا أنت وأختك بيعتوا نصيبكم في الأرض والبيت اللي ادتهالكم ستكم أم أبوكم جايين متمسكين بالحته دي ليه؟
مازن : علشان دي اللي فاضللنا وأنا لو مكنتش محتاج الفلوس وقتها مكنتش بيعت حاجة بس حضرتك عارف إني اشتريت في المقابل الشقة اللي اتجوزت فيها.
وائل : خلاص هديك فيها سعر أعلى من كل الأراضي اللي حواليها.
مازن : يا خالي الأرض تلزمني.
وائل : أنا قايم ماشي عاوزه حاجة يا بنتي؟
مريم : ما أنت قاعد يا خالي.
وائل : لا معلش علشان مسافر الصبح عاوز حاجة يا دكتور؟
مازن : لا خالي سلامتك تصبح على خير عاوزه حاجة يا مريم؟
مريم : لا يا مازن سلامتك مع السلامة.
وقفلت مريم مع مازن وراحت توصل خالها لباب الشقة كان مراد بيفتح الباب.
مراد بابتسامة : اهلااا... سلام عليكم.
وائل : وعليكم السلام.
بيسلموا على بعض.
مراد : على فين يا عمي اتفضل استريح.
وائل : لا معلش أنا هنا من بدري يا ابني ولازم اروح بقى علشان مسافر اسماعيلية الصبح.
مراد : طب وايه المشكلة بات حضرتك معانا والصبح هوصلك اسماعيلية.
وائل : لا يا حبيبي متشكر كتر خيرك أنا معايا عربيتي وبعدين حاجتي كلها في الشقة ابات هنا فين.. سلملي على باباك هو كويس؟
مراد : كويس اه.. طيب نشرب حاجة مع بعض مريم اعملي حاجة نشربها.
وائل : مريم عملت الواجب يا حبيبي متشكر.. تصبحو على خير.
مراد : خلاص طالما حضرتك مصمم كدا تمشي من غير ما نقعد مع بعض يبقى انزل معاك.
ونزل مراد مع وائل.