تكملة باقي حلقات الجزء الرابع من أنت قلبي

الجزء الرابع /الحلقة ١٣٢

#أنت_قلبي٤
________
الحلقة ١٣٢

في فيلا كريم.
كريم جاي من بره كانت جميلة قاعدة بتذاكر..
كريم : سلام عليكم
جميلة : وعليكم السلام.
كريم : ايه يا جيجي قاعدة لوحدك ليه امال فين مامي؟
جميلة : مامي فوق طلعت تنام.
كريم : ليه نايمه دلوقت؟
جميلة : معرفش كانت قاعدة هنا من شوية وبعدين قالت طالعه تنام علشان تعبانه.
كريم : طيب يا حبيبتي لو زهقانه ممكن تاخدي بريك وبعدين كملي مذاكرة.
جميلة : اوك شوية كدا اخلص الدرس دا علشان لو قومت هضطر ارجع اذاكرة من الأول.
كريم : ماشي يا حبيبتي كملي مذاكرة وأنا طالع أطمن على مامي.

بيفتح كريم باب الغرفة كانت فريدة نايمه قلق لانه مش متعود يرجع يلاقيها نايمه في الوقت ده قرب منها وهو ايده مقربه لوجهها بيتأكد إنها بتتنفس.
شعرت فريدة بحاجة قريبة منها فتحت عيونها لاقيت كريم أمامها.
فريدة : ايه يا كريم فيه ايه؟
كريم : ايه اللي منيمك في الوقت ده مش عوايدك.. انتي تعبانه ولا ايه طمنيني؟
فريدة : هي الساعة كام؟
كريم : الساعة سبعة.
فريدة : طيب يا كريم دا أنا لسه نايمه ملحقتش.
كريم : انتي تعبانه؟
فريدة : لأ.
قعد كريم يستريح لكن كان ظاهر عليه الحزن والتعب.
فريدة : مالك يا كريم؟
كريم : روحت بيتنا القديم.
فريدة : خير يا حبيبي فيه حاجة؟
كريم : روحت لاقيت الصيدلية قافله.
نظرت له فريدة بحزن.
كريم : معرفش ليه جه في دماغ أطلع فوق واخبط على الباب كان بيتهيألي إن علاء هيفتح الباب ويدخلني.
فريدة تبكي : ليه بس كدا يا كريم هو أنا ناقصه؟!
كريم : مكملتش طلوع السلم ولاقيت نفسي تحت وبشغل العربية تاني روحت المقابر ازوره هناك هو وبابا وماما وعمامي ومامتك وطنط ميرفت ورحمة لاقيت نفسي في المكان اللي كلنا في النهاية
هنوصل له لاقيت الدنيا دي بكل ما فيها متساويش لحظة واحدة تقعد تفكر إن دا هيكون مكانك ويوم ما حد يفكر فيك مش هيجيلك بيتك ولا عيادتك ولا شركتك ولا أراضيك اللي قعدت عمرك كله تحوش علشان تعملهم ويتكتب عليهم اسمك لكن اسمك بقى مكتوب في حتة تانية جسمك جواها
لاقيتني بتهز وأنا بفتكر كل اللي راحوا من الدنيا بس مرحوش من قلوبنا
البيت بقى وحش قوي يا فريدة الونس اللي فيه مبقاش موجود.
فريدة تبكي... 😢
ينام كريم على السرير زي ما هو...
فريدة تمسح دموعها : كريم...كريم.
كريم : عاوزه حاجة؟
فريدة : أنت هتنام؟
كريم : معرفش.
فريدة : طب قوم غير هدومك وخُد شاور كدا وأنا هنزل اجهز العشا علشان تاكل مع جميلة زمانها جعانه دلوقت.
كريم : حاضر بس شوية كدا.
فريدة : ما أنت بتغمض أهو شكلك عاوز تنام.
كريم : مش نايم يا فريدة أنا مريح جسمي شوية زين فين؟
فريدة : راح لمحمد.
كريم : ليه فيه حاجة ولا ايه؟
فريدة : مفيش بس كان زهقان قال هيعدي على محمد في العيادة وبعدين يعدي على واحد صاحبه هيتمشوا شوية ويرجع.
فريدة : كريم.. كريم أنت نمت؟
كان كريم نام فعلا.
_________
في شقة مراد.
مراد : تروحي فين؟
مريم : بقولك اروح لسهر أطمن عليها مازن بيقولي إنها تعبانه.
مراد : تعبانه عندها ايه؟
مريم : معرفش هو مقاليش علشان هو كمان ميعرفش.
مراد : يعني هو ميعرفش بجد!
مريم : اه أصلهم يعني شادين مع بعض شوية.
مراد : اااه وانتي بقى رايحه تصلحي ما بينهم.. صح؟
مريم : لأ أنا مالي بتدخلش بينهم هو قال لي اروح أطمن عليها واطمنه وبس أنا بقى هعمل اللي قال عليه وخلاص.
مراد : اوك يا مريم روحي.
مريم : يعني هخرج لوحدي خلاص؟
مراد : اخرجي لوحدك يا مريم عادي.
مريم : طب بقولك إيه.
مراد : نعم يا حبيبتي.
مريم : هو أنت مقرب مني قوي كدا ليه؟!
مراد : هههههههه بلاش ابعد علشان تاخدي راحتك..
مريم : كنت عاوزه اشتري هدية للبنات كل واحدة هدية لوحدها علشان زي ما أنت عارف الاتنين مش سن واحد.
مراد : اوك يا حبيبتي اشتري براحتك.
مريم : أنا كنت عاوزه اشوف رأيك يعني اشتري ايه بالظبط؟
مراد : لا مبتسألنيش بقى علشان معنديش فكرة في المواضيع دي وخصوصا لو كانت هدايا لبنات صغيرة
ههههههههههههه
مريم : يعني معندكش أي خلفيه خالص؟
مراد بابتسامة : لأ معنديش بس ممكن تسألي زينة أو تسألي ليلى وياسمين أكيد هيكون عندهم فكرة يعني.
مريم : خلاص ماشي.
مراد : ماشي ولا بيجري؟!
مريم : ها ها ها مفروض اضحك أنا دلوقت؟!
مراد : طبعا أي حاجة يقولها جوزك تضحكي عليها على طول.
مريم : جوزي!
مراد : ايه هو أنا مش جوزك ولا ايه؟!
مريم : لا طبعا جوزي وحبيبي وأبو ولادي اللي مبحبش إلا هو..
مراد : هههههههههههه ايوه كدا اتعدلي ستات متجيش غير بالعين الحمرا.
مريم : لا يا حبيبي بقولك ايه مش معنى يعني اني مدحت فيك شوية هتشوف نفسك عليه.
مراد : هههههههه اشوف نفسي عليكي طب بلاش تقلب خناق بقى.
مريم : ايه دا هو أنا كنت أوفر قوي كدا؟
مراد : هههههههههههه اوفر قوي الصراحة.
مريم : خلاص متتكلمش معايا بقى.
مراد : بتتلككي صح.. تعالي هنا أنا مش بكلمك
ههههههههههههه
______
في شقة سيف.
سيف : لا يا مليكة ممنوع الغش قولنا.
مليكة : هههههههههههه يا حبيبي دا صغير لازم اساعده.
سيف : لأ هو اتحداني يبقى يكمل اللعبة للأخر.
يوسف : ماشي وأنا قد التحدي.
مليكة : هههههههه
سيف : بلد بحرف التاء بلد بحرف التاء؟
اه خلاص جيبتها.. استوب.
مليكة : ثواني.
سيف : لأ.
وياخد منها الورقة.
مليكة : اسمع هتتحسب علشان باقي حرف واحد مكملتش.
سيف : تمارا... تامر.. تنز!
ايه دي في بلد اسمها تنز؟
مليكة : كنت لسه هكملها تنزانيا هتتحسب سامع؟
سيف : هههههههههههه ماشي هحسبهالك.
مليكة : كتبت اسم البلد ايه؟
سيف : تايلاند.
مليكة : امممم وأنا اللي عماله أفكر ودي بس اللي كانت موقفاني.
سيف : هات بتعمل ايه؟
يوسف : لسه بس اسم الحيوان.
مليكة : تمساح.
سيف يخطف الورقة من يوسف.
سيف : لا يا حبيبي خلاص وقفنا..ايه ده حيوان تعلب!
جيبتها منين دي؟
حلا : اسمها سلعب بالسين صح يا مامي؟
مليكة : لا بالثاء.. ثعلب.
يوسف لحلا : وانتي مالك يا حشريه انتي حد قالك تلعبي؟!
سيف : يوسف!
يوسف : وهي بتدخل ليه.. ها خلاص مش هعلب تاني.
سيف : دي حجه بقى علشان خسرت.. صح؟
روح افتح الباب..
بيلم سيف الورق.
مليكة : بالراحة عليه يا سيف كدا مش عدل على فكرة احنا كبار يعني سهل نجيب الاسم على طول لكن هو لأ.
سيف : ههه مش هو اللي فتح صدري وقال لنا هلعب معاكم واكسبكم زعلان ليه دلوقت؟
هدى : سلام عليكم.
يقوم سيف ومليكة.
يرددوا : وعليكم السلام.
سيف بيقرب من هدى : أهلا يا هدى ازيك اتفضلي استريحي.
هدى : أنا بخير.. ازيك يا مليكة؟
مليكة : الحمد لله.
ودخلت مليكة جوه تعملهم حاجة يشربوها.
______
في فيلا غزل.
غزل : يستحيل اروح هناك يا ماما.
والدة غزل : لا هتروحي ورجلك فوق رقبتك لازم تصلحي الغلط اللي عملتيه وكويس إن الناس وافقوا اصلا على الحل ده بدل ما كانوا يحبسوكي.
غزل : محدش يقدر يحبسني.
والدة غزل : اسمعي يا غزل أنا خلاص تعبت منك ومن تصرفاتك ودي أخر مرة هقف معاكي بعد كدا لو حصل ايه مليش دعوة بيكي فلمي الدور بقى وتيجي معايا نعتذر للراجل اللي كنتي عاوزه تخربي بيته وتفضحيه وسط أهله ومعارفه أحسن لو مجتيش أنا اللي هروح لهم واقولهم يحبسوكي.
غزل : بتعملي معايا كدا ليه كإني مش بنتك.
والدة غزل : لأ بنتي واللي عملتيه ده في وشي علشان للأسف انتي تربيتي والظاهر معرفتش اربي.
غزل : أنا مش رايحه لحد.
تشدها والدتها من شعرها : هتيجي لو حكمت كمان اكتفك هعمل كدا المهم تتنيلي تروحي هناك علشان نلخص من الموضوع ده.
غزل : آي سيبي شعري.. خلاص هروح بس سيبيني.
______
في شقة سيف.
سيف : لا وهزعل منك ليه يا هدى؟
هدى : أصل لما روحت لفيروز كنت مفكره إني هلاقيك هناك قالتلي إنك مش جاي وأنا كنت رايحه لوحدي معتز مكانش رايق يروح أي مكان.
سيف : أصل فيروز قالت لي مش هتقدر يعني تعزمنا كلنا في يوم واحد فقولت خلاص خلينا احنا في يوم تاني.
هدى : اه طيب.. أهم حاجة إنك متكونش زعلان مني.
سيف : لا مش زعلان.
________
في فيلا مراد.
هشام : خلاص بقى يا نور.
نورهان : لأ مش خلاص يا هشام أنا مش مسامحه خصوصا في الموضوع ده لو أي حاجة تانية كنت عدتها لكن يتقال على اخواتي الكلام ده
واسامحها لأ.
هشام : خلاص أنا مسامحها طالما اعتذرت وفهمت إن إن كل الكلام اللي اتقالها ده محصلش.
مايا : أنا آسفة يا مامي سامحيني بقى علشان اسافر وأنا مستريحه ضميري وجعني قوي.
نورهان : ضمير!
انتي عندك ضمير انتي؟
مايا تبكي.
هشام : خلاص بقى يا نور لو مش هتسامحي بلاش الكلام اللي يوجع ده.
نورهان : أنا برضو يا هشام تشوف هي قالت ايه الأول.
مايا ماشيه.. أمل تمسك ايدها وتمنعها تخرج.
أمل : خلاص بقى يا نور ميبقاش قلبك قاسي قوي
كدا على بنتك.
نورهان تبكي : أنا يا أمل؟!
تجري مايا وتحضن والدتها : حقك عليه يا مامي أنا آسفة سامحيني علشان خاطري ابوس ايدك.
نورهان تبكي وبنتها تبكي معاها.
نظرت أمل لهشام وهي مدمعه.
هشام : خلاص بقى يا نور دي بنتك ولو احنا مستحملنهمش مين بس اللي هيستحملهم.
نورهان : ما هم علشان ولادنا يا هشام كان عشمي فيها أكبر من كدا مش تقول الكلام الفارغ ده.
مايا : أنا آسفة حقك عليه.
نورهان : خلاص بس ابعدي بلاش التلزيق ده.
تسمح أمل دموعها بابتسامة : خلاص يا مايا سيبي مامي براحتها.
مايا : لأ أنا بحب التلزيق دا قوي.
نورهان : دا انتي لزقه بقى.
مايا بابتسامة : اه.
هشام لـ أمل : جهزيلنا العشا بقى يا اموله من ايدك الحلوين دول.
أمل بابتسامة : حاضر.
نورهان : ادخلي ساعدي مرات خالك يلا.
مايا : حاضر.
أمل : سيبيها تقعد معاكي علشان تشبعوا من بعض دي مسافرة بكرة.
هشام بابتسامة : سيبيها يا نور أمل اصلا مبتعرفش تعمل حاجة وحد واقف معاها في المطبخ.
____________
عند باب شقة سيف.
سيف : شرفتي ونورتي.
هدى : البيت منور بيك
يا اخويا مش هتشرفنا قريب بقى ولا ايه؟
سيف : حاضر يا هدى هيجيلك.
هدى : ومعاك الولاد ومليكة.
سيف : حاضر.
هدى : طيب.. سلام عليكم.
سيف : وعليكم السلام.
هدى : رايح فين خليك أنا هاخد تاكس..
سيف : هوصلك يا هدى يلا.. مليكة أنا نازل.
مليكة : مع السلامة تعال يا يوسف هنا.
سيف : خليك يا يوسف هنزل اوصل عمتك وهاجي على طول.
_______
تاني يوم الصبح..
بتركن غزل العربية أمام عمارة آسر وتنزل والدتها فتلف بسرعة علشان تساعدها.