تكملة باقي حلقات الجزء الرابع من أنت قلبي

الجزء الرابع /الحلقة ٩١

#أنت_قلبي٤
________
الحلقة ٩١

في شقة شادي..
شادي : خلاص بقى يا ليلى مكنتش فاكر إن كلمة زي دي هتأثر فيكي بالشكل ده أنا مش قاصد ازعلك.. خلاص بقى حقك عليه.
ليلى : ما أنت لو كنت بتاخد بالك وبتراعي مشاعري على الأقل قدام الناس مكنتش غلطت غلطه زي دي للدرجة دي مش طايقني جنبك يا شادي؟!
شادي : مين قال كدا بس يا لوله.. مش طايقك إيه بس يا حبيبتي هو أنا في حياتي حد تاني غيرك خلاص بقى متزعليش وادي يا ستي أهو دماغك ابوسها.. فُكي بقى.
ليلى نظرت له وهي مدمعه.
شادي مسك ايدها : خلاص بقى أنا آسف مش هيحصل دا تاني ابقي اقعدي جنبي زي ما انتي عاوزه.. فُكي بقى علشان خاطري.
ليلى : لا يا حبيبي خلاص مش هقعد جنبك تاني.
شادي : خلاص متقعديش جنبي.
نظرت له ليلى وهي مضايقة.
شادي : أنا اللي هاجي اقعد جنبك وغصب عنك كمان.
وبيقرب منها أكتر.
ليلى : طب لو سمحت ابعد شوية.
شادي : لأ مش هبعد بقى في حد يبقى قاعد جنب حبيبته ويبعد عنها برضو.
ليلى : حلو الفيلم ده أداءك فيه كويس استمر استمر.. بس مع نفسك بقى.
وقامت ليلى داخله جوه.
شادي : ليلى.. ليلى رايح فين أنا جعان مطبختيش ولا إيه؟
ليلى : لأ مطبختش.
شادي : طب هاكل أنا إيه بقى دلوقت؟
ليلى : هو دا المهم عندك؟!
كل يا حبيبي أي حاجة أنا داخله أنام.
ودخلت ليلى جوه.
شادي : طب أنا هطلب أكل أطلب لك إيه معايا؟
ليلى من جوه وهي بتغطي نفسها علشان تنام : هات للولاد أنا مش جعانه.
________
في التليفون... 📞
سيف بتنهيدة : هتفضل ساكت كدا ! يا عم أخلص عاوز أروح أكل محطتش حاجة في بوقي من الصبح.
حمزة : عاوز تسمع مني ايه يا سيف؟
سيف : أكيد يعني مش عاوزك تغني لإن صوتك وحش أساساً وكمان أنا مليش في جو الأغاني والكلام الفاضي ده روح سمع نادين هههههههه
مردش حمزة.
سيف : بقولك إيه أنت هتسمع مني الكلمتين دول علشان نبقى قفلنا الموضوع ده ومنتكلمش فيه تاني.
حمزة : قول يا ستموني.
سيف : ماشي يا عم اتريق زي ما أنت عاوز ما تلاقيك واكل نص بطة لوحدك وضارب حلة محشي من إيد مامتك وفايق ورايق على واحد زيي غلبان نفسه في صباع محشي.
حمزة : معندكمش خضار ورز ولا إيه؟ لو كدا نبعتلك من عندنا.
سيف : لا مليكة تعبانه اليومين دول وأنا بصراحة مش عاوز اتقل عليها.
حمزة : لا عندك دم قوي.
سيف : يووووه كتير هههههههه مش فاكر يلا لما اتبرعتلك بدمي؟
حمزة : خلاص يا عم هي قصة هتقعد تفكرني بيها كل شوية الموضوع عدا عليه عشرين سنة أكتم بقى.
سيف : بس أنا لسه هتكلم.
حمزة : اتفضل علشان مش فاضي.
سيف : يعني حضرتك وراك الوزارة قوي ما أنت معطلني على التليفون بقالك ساعة... نبطل بقى هزار ونتكلم جد شوية.
حمزة : ما قولنا اتفضل.
سيف : نادين.
حمزة : مالها؟
سيف : الحب الأول.. مهجة الفؤاد والحاجة الحلوة اللي في حياتك.. مش دا كان كلامك؟
حمزة : كويس إنه كان.
سيف : ومازال وسيستمر لحد ما تطلع روحك.
حمزة : مش عاوز أردهالك علشان أنا مؤدب وروح شوفلك حد يعملك محشي يمكن مزاجك يتعدل.
سيف : يا ابني أفهم مزاجي مش هيتعدل غير لما تتعدل أنت الأول وتروح تاخد ولادك في حضنك وتاخدها هي كمان بس بعد ما تكتب الكتاب احنا عيله محافظة ودي تطير فيها رقاب واخد لك بالك..
حمزة : هو مين اللي يكتب على مين؟
سيف : استهبال وعبط بقى مش عاوز ولم نفسك بدل ما اجيلك.
حمزة : لو راجل اعملها وانزل.
سيف : حمزة هههههههه أنا راجل غصب عنك بلاش تستفزني روح يا حبيبي لباباها وهات المأذون في ايدك وأنت رايح وخلص نفسك بقى علشان ترتاح أنا حاسس بيك وعارف إن كرامتك ناقحه عليك ونفسك تعملها بس متردد.. يلا يا حبيبي اهدا كدا وخُد نفس عميق وافتح الدولاب اختار اشيك بدلة عندك وروح لها عاوزين نفرح بيك يا عريس.
حمزة : يعني ابقى عريس ليلة ولا ليلتين وبعدين تبدأ المشاكل والنكد تاني لا يا عم مش عاوز أنا كدا مريح دماغي وولادي وقت ما أحب هروح اجيبهم يقضوا معايا يومين واروحلهم تاني مش شغلانه يعني.
سيف : طب مش عاوز تصحى كدا تلاقيها جنبك بتقولك صباح الخير يا حبيبي ولا تقوم تلاقي الفطار جاهز وترجع من الشغل تلاقي ابتسامتها تهون عليك تعب اليوم كله.
حمزة : ابتسامة مين؟!
دا فيلم خيال علمي صح؟
سيف : طب مش عاوز تسمع صوت دوشة العيال وترجع تعبان تدخل تنام تلاقيهم بيتخانقوا مع بعض تقوم تزعق فيهم وتمسكوا في بعض؟ هههههههه
حمزة : لا مش عاوز.
سيف : على فكرة أنا مينفعش كنت أقولك الكلام ده بس علشان أنت صاحبي واخويا ويهمني مصلحتك زي ما تهمني مصلحة بنت أختي كان لازم أقول أكتر من كدا وشكرًا يا صاحبي الظاهر مفيش نصيب بقى.
حمزة : سيف احنا هنفضل صحاب وأخوات زي ما قولت ياريت مفيش حاجة تغير كلامك ده.
سيف : ماشي يا حمزة عاوز حاجة علشان أنا وصلت البيت.
حمزة : عاوز سلامتك.. سلام.
__________
في شقة مجدي.
مجدي : خلاص بقى يا زينة أنا اعصابي تعبت احنا من امبارح في الموال ده وانتي مبطلتيش عياط خلاص بقى علشان خاطري.
زينة : ابعد عني متقربش مني.
مجدي : طب خلاص اهدي بس لازم تعرفي إني مخونتكيش والست دي أنا بيني وبينها شغل مش أكتر ودي كانت خدمة إنسانية هي معاش راجل يوقف معاها وبتعتبرني زي أخوها الصغير دي أكبر مني يا حبيبتي.
زينة : أنت مقتنع بالكلام اللي بتقوله ده.. أخوها!
صدقت أنا كدا.. أصلي عبيطه.. مكتوب على وشي إني عبيطه؟!
مجدي : لأ انتي ست البنات كلهم وأنا مكنتش أطول أقعد جنبك بس وزي ما قولتي أنا اللي جريت وراكي علشان توافقي ترتبطي بيه وأنا اللي ياما اتحايلت عليكي علشان نعجل بالجواز وتبقي في بيتي وجيبنا أحلى بنت في الدنيا.. سامحي بقى واصفي كدا واعتبريها أخر مرة ومش هتكرر تاني.
زينة : لأ وابعد بقى.. أنا مقولتش لمامي حاجة علشان صعبت عليه خوفت ازعلها وتتعب عشاني بس أنا لو عليه كان نفسي أقولها كل حاجة وجعاني منك.
مجدي : طب خلاص علشان خاطري بطلي عياط دموعك دي بتوجع قلبي.
زينة : كداب مبقتش اصدقك.
مجدي : طب اعملك ايه تاني علشان تصدقي اني مبكدبش عليكي؟
زينة : اللي تعمله إنك تخليك في حالك وتسيبني في حالي.
مجدي : ودي تبقى عيشة دي؟
زينة : هو دا اللي عندي.
مجدي : خلاص أنا هسيبك مع نفسك كدا لحد ما تهدي وتصفي خالص وبعدين نبقى نتكلم أنا نازل عاوزه حاجة؟
زينة بحده : لأ.
_______
تحت أمام العمارة واقفه سوسن في الشارع حد يعدي يعطيها عشرة جنية.
سوسن : ايه دول أنا مبشحتش يا عم أنت..
وتشوف الفلوس :حلو أهو أحسن من مفيش.. اروح اجيبلي حاجة أكلها.
تلمح مجدي نازل من فوق ووصل للعربية بيشغلها.
سوسن : اه هو الواد جوزها.. نزل وسابها فوق لوحدها أطلع اخلص عليها دي ولا أعمل معاها إيه؟
لا أصبري شوية أكيد في حاجة أحسن من كدا تحرقي قلبهم بيها.. ايوه الضنا غالي ودي لازم تتوجع وتشرب من نفس الكاس اللي شربتهولي.. هتعملي ايه يا بت يا سوسن هتعملي إيه؟
اه أنا أروح اجيب لي حاجة أكلها واحبس بكوباية شاي وبعدين امخمخ لها على رواقه كدا.
________
في منزل عُمر..
ياسمينا من المطبخ : كنده جدو جه؟
كنده : لا يا تيته دي ماما..
ياسمينا خارجة من المطبخ : إيه يا نادين اللي أخرك كدا؟
نادين : كنت بشتري شوية حاجات للولاد.. تعالي يا كنده قيسي اللبس ده.
كنده : حلو قوي يا ماما كل دا ليه؟
نادين : اه يا حبيبتي ادخلي جوه قسيه وتعالي وريني كدا علشان مش متأكدة من المقاس.
كنده : حاضر.
ياسمينا : مستنتيش ليه يا بنتي ننزل مع بعض بدل ما تروحي لوحدك؟
نادين : أنا مكانش في دماغي اشتري حاجة النهاردا بس وأنا جايه على هنا لاقيت اللبس ده في محل جنب الشركة عندنا وكانت كنده نفسها في الاستايل ده قولت اجيبه واشوفها عليها لو معجبهاش ارجعهم.
ياسمينا : لا هيعجبها دي حاجات فارس بقى؟
نادين : اه ايه رأيك أنا كمان جيبت لولاد فريدة شوفي كدا الوانتهم أنا جيبت كلهم استايل واحد بس ألوان مختلفه.
ياسمينا : حلوين خالص.
خرجت كنده وهي لابسه الفستان الجديد.
ياسمينا : يا أختي على القمر.. كبرنا أهو يا كوكي نلبس بقى حاجات طويلة من دي.
نادين : لسه بدري خليها تعيش سنها.. أنا هغيره واجيب حاجة أقصر من كدا.
كنده : لا حلو يا ماما متغيرهوش.
نادين : خلاص قيسي دا اشوفه عليكي.
كنده : حاضر.
بتقعد نادين تستريح..
ياسمينا : أنا عامله سمك لو مش هتاكلي منه اعمليلك مكرونة أنا متبله بانيه في التلاجة خرجيه اعمليه.
نادين : لا هاكل سمك معاكم هو بابا فين؟
ياسمينا : نزل من بدري ولسه مجاش معرفش راح فين.
كنده خارجة من الغرفة وبتلف بالفستان : ها إيه رأيكم؟
_______
في العربية..
فريدة : ثواني يا جميلة بابا بيتصل.. ايوه يا كريم.
كريم : انتي فين يا فريدة؟
فريدة : ما أنا قولتلك الصبح إني هاخد جميلة ونروح النادي فيه حاجة ولا إيه؟
كريم : لا يا حبيبتي مفيش حاجة
أنا بس رجعت ملقتش حد في البيت وكنت ناسي خالص إنك في النادي مع جميلة.
فريدة : خلاص ماشي احنا مسافة السكة هنكون عندك.
كريم : طيب أطلب أكل ولا عامله حسابك؟
فريدة : لا الأكل موجود طابخه الصبح على التسخين بس لما اجي.
كريم : خلاص ماشي تيجو بالسلامة.
فريدة :"متنامش علشان نتغدا مع بعض.
كريم : حاضر اديني قاعد على الكنبه مستني.
فريدة : اشغل نفسك بحاجة.
كريم : معايا كتاب بقرا فيه.
فريدة : مبتضيعش وقت أبدًا طالع لبنتك.
جميلة : لا أنا اللي طالعه لبابي.
فريدة : انتي ودنك معانا!
كريم : هههههههههههه حبيبتي دي روح قلبي.
فريدة : اممم طيب.
كريم : وانتي حياتي يا فراولة.
فريدة :"إحم إحم في ناس ودنها معانا.
كريم : فاتحه السبيكر؟
فريدة : لأ بس معرفش الصوت بيوصلهم ازاي!
جميلة : على فكرة أنا مش سامعه بابي بس أكيد سامعه صوت حضرتك يا مامي.
فريدة : طيب سلام بقى دلوقت عاوز حاجة نجيبها معانا واحنا جايين؟
كريم : لا عاوز سلامتك خُدي بالك من الطريق.. سلام.
_______
محمد بيفتح باب الشقة يسمع دوشة في المطبخ..
ميرا تخرج بابتسامة : أنت جيت يا حبيبي؟
محمد مردش وقعد يستريح.
ميرا : طب حتى
سلم على أهل البيت اللي أنت داخله.
محمد : سلام عليكم.
ميرا قربت منه وبابتسامة : وعليكم السلام...غير هدومك الأكل استوا دقيقة أجهز السفرة.
محمد : أكلت بره...هدخل أنام.
ميرا : اوك نام ساعة وقوم تاني علشان تاكل أكيد هتكون جوعت.
محمد : ريحي نفسك أنا لما بجوع باكل لوحدي اتعودت على كدا اليومين اللي فاتوا.
ميرا : محمد أنا آسفة..
محمد : اه معلش نسيت ان دي شقتك وأنا ضيف هنا علشان كدا مسموح لك تخرجي وترجعي زي ما انتي عاوزه...
ميرا : قولت أنا آسفة بلاش تبقى قاسي قوي كدا.
محمد : اتعلمت دا منك مع أول مشكلة بتجري وتسبيني وتهربي كإن العلاقة دي لها طرف واحد وهو انتي وأنا وجودي فيها ملوش أي تلاتين لازمه.
ميرا : لا وجودك له لازمه طبعا وإلا مكنتش جيت.
محمد : لا كتر خيرك تعبتي نفسك بصراحة كنتي خليكي عندك مش فارقه.
ميرا : محمد أنا هعتبر الكلام ده تفريغ عن شحنة الغضب اللي جواك وبعدها هتهدا ونبقى كويسين مع بعض عشان أنا...
يقاطعها محمد : تفريغ ها مش كدا؟!
لا يا مدام مش تفريغ ولا حاجة وانتي مش هتمشيني على مزاجك.
ميرا : الحياه مبتمشيش كدا يا محمد.
محمد : ولا بتمشي بطريقتك دي لازم تعرفي يا هانم إنك متجوزه ومسؤلة من بيت وزوج وابن من حقه يعيش في هدوء واستقرار مش كل من هب ودب يتدخل في حياته وحياة عيلته.
ميرا : مامي المقصودة مش كدا؟ على العموم أنا سيبت كل حاجة وجيتلك ياريت يبقى عندك فكرة ازاي تحتويني علشان...
يقاطعها محمد : علشان إيه.. متهربيش مني تاني مش كدا؟!
ميرا : مش هروب أنا سيبتك لحد ما تهدا.
محمد : كدا بدون إذن! يعني في بيت بابا كنتي بتخرجي كدا من غير ما حد يعرف؟!
ميرا : لأ أكيد كانوا بيعرفوا.
محمد : اه وجوزك بقى ملوش حق يعرف مش كدا؟
ميرا قربت من محمد ووضعت ذراعها على كتفه : لأ له حق ونص علشان كدا أنا رجعت لحبيبي مقدرتش ابعد أكتر من كدا.
محمد : حلو.
ميرا بابتسامة : هو ايه اللي حلو؟
محمد : المسلسل اللي شغال ده بس للاسف أنا راجع تعبان ومرارتي مش مستحمله أكتر من كدا.
ميرا : خلاص بقى يا محمد أعمل إيه تاني علشان تهدأ وتصفا بقى؟
محمد : تسبيني أنام.
ميرا : كدا.. طيب هسيبك تنام يمكن تقوم رايق ونعرف نتكلم.
دخل محمد جوه وتركها لوحدها.
______
في شقة هشام.
هشام جاي من بره يلاقي دوشة في المطبخ.
هشام : بتعملي ايه يا ياسمين؟!
ياسمين : هشام!
اخص عليك خضنتي.
هشام : بقولك بتعملي إيه؟
ياسمين : أنت شايف إيه؟
هشام : شايف فراخ وحمام وبط وايه دا كمان ديك رومي!
ليه كل دا يا حبيبتي؟
ياسمين : مش قولنا امبارح إننا هنعزم شادي وليلى ومراد ومريم.
هشام : الكلام دا كان بالليل وأنا قولت الصبح هترجعي في كلامك.
ياسمين : لا يا حبيبي طالما قولت حاجة لازم انفذها.
هشام : طب مش كنتي خليتي العزومة دي لما تقومي بالسلامة.
ياسمين : وماله يا هشام يبقى في عزومة قبل وبعد وكل كام يوم كمان.
هشام : لا كل كام يوم إيه انتي محتاجة تستريحي اليومين دول.
ياسمين : بس أنا كويسه.. كلمت مريم قالت جايه بس ليلى كانت نايمه شادي اللي رد عليه قولتلهم العزومة بقى هتكون على العشا علشان محدش يبقى ليه حجه.
هشام : هههههههههههه لا متقلقيش محدش هيتحجج دول ما يصدقوا أصلهم بيعجبهم أكلك قوي.
ياسمين : طب روح افتح الباب بقى.
هشام : معقول جايين من دلوقت!
ياسمين : وماله يا حبيبي يشرفوا وينوروا البيت بيتهم.
هشام بيفتح باب الشقة ويمزح : ايوه.. طمعيهم بقى أكتر من كدا..
ويتفاجئ بمريم.
مريم : سلام عليكم.
هشام : وعليكم السلام.
مريم : ياسمين جوه؟
هشام : اه جوه اتفضلي يا مريم ياسمين مريم جات ادخلي واقفه ليه؟
ياسمين : مريم!
تعالي اما الولاد فين؟
مريم : نايمين فوق.
ياسمين : وسايباهم وجايه؟!
مريم ' ما أنا قولت انزل اساعدك ولو ان مكنش له لزوم تتعبي نفسك.
ياسمين : تعب ايه بس وبعدين أنا خلصت كل حاجة هدخل بس الفرن الفراخ والحمام ياخدوا لون بس شوية كدا علشان يبقى سُخن.
مريم : معقول خلصتي بسرعة كدا انتي لسه مكلماني.
ياسمين : بيني وبينك قومت الفجر كدا خرجت الحاجة وبدأت أجهز بقى علشان اخلص نفسي بدري بدري كدا.
مريم : طول عمرك شاطرة يا ياسمين.
ياسمين : طب تعالي شوفي كدا أعمل حاجة تانية جنب دول؟
مريم : هههههههههههه معقول بتاخدي رأيي هو أنا هعرف أكتر منك يا شيف.
ياسمين : هههههههه ادينا كلنا بنتعلم من بعض.
_____
في فيلا كريم.
كريم مشغول في قراءة الكتاب منتظر فريدة تخلص الغدا وجميلة قاعدة جنبه ساكته نظر لها بابتسامة : ايه يا جميلة قاعدة ساكته ليه يا حبيبتي؟
جميلة : اديني قاعدة.
رجع كريم وانشغل في القراءة مرة تانية..
جميلة : بابي.
كريم : نعم يا حبيبتي.
جميلة : ممكن بعد ما تخلص قراية في الكتاب ده اخده من حضرتك اقراه.
كريم بابتسامة : مفيش مانع بس انتي هتفهمي اللي هتقريه هنا ده؟
جميلة : هحاول أفهم ولو في حاجة صعبة هسأل حضرتك.
كريم : واهو كذلك.
جميلة : ممكن كمان أطلب من حضرتك حاجة؟
كريم : اتفضلي يا حبيبتي.
فريدة : جميلة تعالي خُدي الأطباق يلا.
جميلة : حاضر يا مامي.. بعد الأكل نبقى نكمل كلامنا.
كريم بابتسامة : أوك مفيش مشكلة.
تجري جميلة على المطبخ.
جميلة : أنا جيت.
فريدة : طيب على مهلك خُدي اطباق السلطة وبعدين ارجعي خُدي الباقي.
جميلة : حاضر.
فريدة : زين جه؟
جميلة : اه جه وطلع يغير هدومه بابي قاله متنامش انزل علشان تاكل.
فريدة : ماشي روحي انتي.
كريم : فريدة حازم بيتصل.
فريدة : حاضر جايه.
كريم : ادي التليفون دا لمامي يا جميلة.
جميلة : حاضر.