تكملة باقي حلقات الجزء الرابع من أنت قلبي

الجزء الرابع /الحلقة ٩٨

#أنت_قلبي٤
__________
الحلقة ٩٨

في شقة هشام..
ياسمين : مش هينفع يا ماما.
علا : هو إيه اللي مش هينفع يا ياسمين هي مش حاجتك ولا جايبها علشان ياخدها منك تاني ولا بقى هيتزنق فيهم ويبعهم أصله يا عيني فقير محلتوش حاجة..
ياسمين : لا دا ولا دا يا ماما بس أنا مش هينفع اتصرف في حاجة زي كدا من غير ما اخد رأي هشام.
علا : انتي يا بنتي للدرجة دي ملكيش شخصية هو دا مش حقك مش جايبه هدية ليكي يعني ملوش إنه ياخد هم منك تاني ولا يسألك عنهم.
ياسمين : ازاي بس يا ماما هشام لو عاوز يغير حاجة ولا يشتري حاجة جديدة لازم بيقولي وياخد رأيي مش خوف مني لكن بيستشرني يمكن أكون شايفه حاجة هو مش واخد باله منها وأنا كمان كدا ازاي ابيع حاجة من دهبي من غير ما أقوله؟!
علا : ماشي يا ياسمين حقك برضو ما هو خلاص أمك مبقاش لها لازمه بعد ما اتجوزتي بس خليكي فاكرة إن دوام الحال من المحال ولازم هتحصل حاجة تخليكي تجيني ندمانه.
ياسمين : ماما أنا تعبانه اليومين دول ادعيلي أقوم بالسلامة لولادي وبلاش تزعلي مني علشان خاطري.
علا : ادعيلك تقومي بالسلامة!
دا هفضل ادعي عليكي لحد ما ناري تبرد واشوفك مذلوله كدا زي ما ذلتيني روحي يا ياسمين متقوميش منها إلا وانتي....
وقعدت تدعي على بنتها وفتحت باب الشقة وخرجت وهي لسه بتدعي
وياسمين جوه بتبكي.
مريم فتحت باب الشقة على صوت دوشة تحت.. لمحت والدة ياسمين فدخلت جوه وقفلت الباب.
________
في فيلا كريم..
بتقعد فريدة بعد ما جات من بره.
كريم يفتح عينه وبصوت ناعس : فريدة!
فريدة : ايوه.. يا كريم.
كريم : انتي مروحتيش لندى ولا إيه؟
فريدة : لأ روحت بس وصلت لحد هناك ورجعت.
كريم : ليه رجعتي؟
فريدة : كدا يا كريم.
كريم : كدا ازاي يعني.. حصل إيه فهميني؟
فريدة : علي رجع البيت.
كريم : انتي قابلتيه؟
فريدة : منزلتش فضلت في العربية أنا وجميلة لمحته من بعيد نازل من العربية ومعاه العفش بتاعه عرفت من علاء إنه راجع يسكن في شقة عمي أكرم.
كريم : خلاص متروحيش هناك بعد كدا.
فريدة : هو دا الحل اللي عندك يعني؟!
كريم وهو منفعل : امال انتي عاوزه ايه؟
فريدة : أنت بتزعق ليه دلوقت؟
كريم : أنا بزعق!
خلاص يا فريدة روحي هناك براحتك والمرة دي لما يمسك لك السكينة متتصليش بيه.
فريدة : بقى كدا.. طيب يا كريم.
وقامت وتركته ينام..
ونزلت تحت..
جميلة قاعدة مضايقه : مامي أنا...
فريدة بانفعال : عاوزه ايه يا جميلة.. زهقانه!
أنا كمان زهقانه أكتر منك
اطلعي اوضتك اقري ولا العبي بـ التليفون اقولك اتفضلي اللاب أهو شغليه وسلي نفسك وبطلي تقوليلي زهقانه.
جميلة قامت وهي مدمعه
وطالعه فوق تقابل والدها نازل تحت : ايه يا جيجي مالك؟
جميلة : مفيش يا بابي.
وتطلع اوضتها.
كريم ينزل تحت لفريدة.
كريم : جميلة مالها يا فريدة؟
فريدة : دايمًا زهقانه وأنا بصراحة كمان زهقت..
كريم : طب وطي صوتك بتزعقي ليه دلوقت؟
فريدة : اسمع ملكش دعوة بيه خالص علشان لما يمسك لي السكينة متصلش بيك.
كريم يقرب منها بابتسامة : خلاص متزعليش حقك عليه.
فريدة : اوعى كدا سيبني ملكش دعوة بيه.
كريم يحاوطها بذراعيه : خلاص بقى حقك عليه بقولك.
فريدة : لأ ابعد ملتمسنيش.
كريم : ما خلاص بقى متكبريش الحكاية.
فريدة : عندك حق هو موضوع تافه اصلا من الأول مكانش لازم أكلمك فيه لإن دي أخر حاجة ممكن تهتم بيها.
كريم : ازاي بقى دا انتي أهم حاجة في حياتي.
فريدة : أصدق يعني؟!
طيب حاضر اديني صدقتك ممكن تبعد بقى.
_________
في قسم الشرطة..
بعد ما سلم صبري ومنال البنت جات زينة ومجدي ياخدوا رهف.
زينة اخده بنتها في حضنها وبتبكي من الفرحه ووالدها بيطبطب عليها وهو فرحان.
زينة لمنال : أنا متشكرة قوي ليكي.
منال نظرت لصبري : على إيه يا حبيبتي احنا معملناش غير اللي مفروض نعمله.
صبري بيسلم على مجدي وياخد منال ويخرجوا من القسم بعد ما الضابط ياخد أقواله ..
آسر : يلا يا ابني.
مجدي : يلا يا بابي هاتي رهف يا زينة.
ياخد مجدي بنته ويخرج ومعاه زينة وهشام وآسر وعلي وراهم.
_______
نزلت مريم تطمن إن البوابة مقفوله كويس بعد خروج علا..
ياسمين قلقت خرجت تشوف مين اللي بره.
مريم : أنا يا ياسمين.
ياسمين : مريم!
تعالي واقفه عندك بتعملي إيه؟
مريم : كنت بقفل البوابة.
ياسمين : طب تعالي اشربي حاجة.
مريم : لا معلش هطلع بس علشان سايبه مريم وريان لوحدهم فوق.
ياسمين : نايمين مش كدا؟
مريم : اه.
ياسمين : طب تعالي اشربي حاجة وبعدين ابقي اطلعي.
مريم تقرب من ياسمين : امال الولاد فين؟
ياسمين : فوق عند ليلى..
مريم : اه طيب.. انتي مش عاوزه حاجة؟
ياسمين : لا يا حبيبتي سلامتك.
مريم : ياسمين انتي كويسه؟
ياسمين : يعني مش قوي.
مريم : ايه مالك؟
ياسمين كانت بتتألم : معرفش يا مريم صاحيه الصبح كدا حاسه بوجع في ضهري.
مريم : ودا أول مرة يحصلك؟
ياسمين : دا بيحصل لما يقرب ميعاد الولادة بس أنا لسه في السابع.
مريم : طيب ادخلي ريحي جوه على ضهرك ولا ننزل نروح للدكتور.
ياسمين : لا لا مش للدرجة دي أنا هقعد استريح أهو والوجع هيروح.
مريم : هيروح ازاي بس يا ياسمين وانتي مش قادرة توقفي.
ياسمين : أنا لا قادرة أقف ولا اقعد وجع فظيع كإني بولد يا مريم أنا تعبانه قوي.
ليلى نازله من فوق على صوت ياسمين.
ليلى : فيه ايه يا ياسمين مالك؟
ياسمين : أنا تعبانه قوي يا ليلى حاسه اني بولد.
ليلى : بتولدي ايه بس دلوقت؟!
ياسمين : آآآآآه مش قادرة.
مريم : طب ثواني هكلم مراد .. هو مش مع هشام برضو؟
ياسمين : مش عارفه.
ليلى ماسكه ايد ياسمين : كلمي هشام على طول يا مريم.
مريم : حاضر.