تكملة باقي حلقات الجزء الرابع من أنت قلبي

الجزء الرابع /الحلقة ٩٤

#أنت_قلبي٤
_________
الحلقة ٩٤

في شقة مروان.
هشام : امال فين آسر يا مجدي؟
مجدي : لسه نازل من شويه اقعد استريح يا هشام.
هشام : حاضر.. بس هو مشي بسرعة ليه دا قالي هستناك.
مجدي : معرفش هو فعلا ملحقش يقعد لاقيته مرة واحدة قام مشي.
أمل جايه ناحيتهم : هشام ياسمين متصله بتقول إن جوز عمتها توفى.
مجدي : يبقى علشان كدا آسر نزل جري.
أمل : أنا برضو شوفت سهر وهي نازله ملحقتش أفهم منها حاجة.
هشام : هو توفى فين في المستشفى؟
أمل : لأ هو خرج الصبح دي سهر كانت عندهم قبل ما تيجي على هنا.
هشام : واجب نروح نوقف معاهم يمكن يحتاجوا حاجة.
مجدي : واجب طبعا.. ثواني جاي..

في شقة هشام.
هشام : هتروحي فين دلوقت يا ياسمين خليكي للصبح أنا هبقى اخدك ونروح هناك أحضر الدفن واقعد اخد العزا معاهم.
ياسمين : معلش يا هشام مش هينفع وصلني بس هناك وابقى ارجع..
هشام : لا بقى ارجع فين خلاص غيري هدومك وأنا هطلع الولاد عند مراد ولاد شادي اشقيه.
ياسمين : بس مراد مش فوق ولا حتى مريم.
هشام : خلاص هسيبهم عند شادي اجهزي عبال ما انزل.
ياسمين : حاضر.
______
في شقة رامي.
منة اخدت سلمى في حضنها وبتحاول تخفف عنها.
سهر كانت لسه داخله ومعاها آسر..
راحت عند سلمى بتطبطب عليها : شدي حيلك يا سلمى.
رفعت سلمى رأسها ونظرت لسهر والدموع في عينها..
فقربت سهر منها وقامت منة من جنبها علشان سهر تاخدها في حضنها وهي بتبكي.
سلمى : رامي يا سهر.. رامي خلاص مات.. مات وسابني لوحدي.
سهر : يا حبيبتي حاسه بيكي..
إياد : اجمدي يا سلمى وحاولي تتماسكي احنا حواليكي انتي مش لوحدك.
سلمى : كنا مونسين بعض يا إياد أنا مليش غيره بعد ما مالك سافر وسابنا دا كان الصبح بيقولي أنا حاسس اني بقيت أحسن لما رجعت البيت متدونيش المستشفى تاني.. دا يا حبيبي ملحقش يدوب بس اتوجع كلمت الدكتور جه شافه كانت روحه خلاص خرجت..
تبكي وتنهار وسلمى وسهر ووفاء بيحاولوا يهدوها.
_______
مراد بانفعال : يعني ايه مشي أنا مش قولتلك تعطله عبال ما اجي.
ثروت : أنا عطلته يا باشا بس أنت اتأخرت مكانش ينفع اقعده أكتر من كدا كان هيشك إن في حاجة.
تركه مراد واخد العربية بسرعة وفجأة وهو في الطريق يلمح تيم واقف بالعربية عند البنزينة بيفول العربية..
خلص تيم وخارج من البنزينة لمح عربية مراد فحاول يجري بالعربية بسرعة ومراد بيجري هو كمان بالعربية علشان يلحقه.

تيم : وبعدين بقى دا مراقبني ولا إيه؟
ماشي يا مريم بعتالي جوزك.. بس هي عرفت منين إن أنا في البيت؟!
اه تلاقيه مراقبني.. بس ازاي؟!
بيجري مراد بالعربية وبيحاول يكسر عليه لكن تيم قدر يهرب منه...

في فيلا مراد..
أمل : أنت جيت يا هشام.
هشام : اه وصلت لحد هناك قعدت معاهم شوية وقالوا الدفنه بعد الضهر فجيبت بعضي وجيت وقولت ابقى اروحلهم الصبح علشان أقف مع آسر وعمار... ايه الدوشة اللي جوه دي؟
أمل : دي مريم وريان.
هشام : هما جم معاكي؟
أمل : اه.
هشام : امال فين عربية مراد مش ظاهرة بره يعني.. هو مجاش معاكم؟
أمل : لأ مراد مجاش.
هشام : مش فاهم يعني هما هيباتوا هنا ولا هو هيجي؟
أمل : معرفش يا هشام هو قال لمريم لو اتأخر تروح معايا.
هشام : راح فين ده؟
أمل : معرفش.