تكملة باقي حلقات الجزء الرابع من أنت قلبي

الجزء الرابع /الحلقة ١٢١

#أنت_قلبي٤
_________
الحلقة ١٢١

في فيلا عُمر.
هشام : ومين بقى اللى قال لها الكلام ده؟!
نظرت نورهان لعُمر.
هشام : فيه ايه مالكم؟
نورهان : أنا هقول لك يا هشام اللي قال الكلام دا لـ مايا عاصم ابن عمتها.
هشام : وعاصم دا كان موجود وقتها يعني ولا ايه؟
نورهان : أكيد حد قاله يا هشام.
هشام : ااااه.. طيب شوف بقى يا عُمر مايا بنتك مش صغيرة ولا الكلام اللي قالته ده يعدي كدا.
عُمر : ايه اللي أنت عاوزه يا هشام؟
هشام : تقعد مع بنتك تفهمها الحقيقة وقبل كل دا تعتذر لمامتها.
نورهان : أنا مش عاوزه حد يعتذر لي خليها في حالها متجيش هنا والا أنا اللي همشي.
عُمر : طب اهدي بس يا نور حاضر يا هشام هعمل اللي قولت عليه وحقك عليا متزعلش.
هشام : مش حقي بس يا عُمر لو عليه أنا ممكن اسامح عادي بس اللي اتكلمت عنهم دول أموات دلوقت فهما بقى يبقوا ياخدوا حقهم منها ومن كل اللي قلب الحق لباطل من أول المحامي اللي دافع عن مجرم للقاضي اللي حكم وكل اللي ساندوه وقتها أنا كاتم في قلبي بقالي سنين طويلة وبقول حقنا هناخده ومش قلقان بالعكس مستريح من الناحية دي تماما لإننا مظلمناش حد بس يعز عليه إن بنت أختي اللي هي واحدة من ولادي تقول كلام زي ده.
عُمر : أنا آسف يا هشام حقك عليه.
هشام : الموضوع مش حقي وحقك يا عُمر في حاجة اسمها حتى احترام للي أكبر مني ما بالك دي أمها ازاي تتكلم معاها بالاسلوب ده؟!
نورهان : أنا اتصدمت البنت زي ما يكون اتعملها غسيل مخ قابلته فين ده ولا اتكلمت معاه امتى معرفش.
هشام قايم ماشي.
عُمر : رايح فين يا هشام؟
هشام : همشي يا عُمر عاوز تفهم بنتك الحقيقة وتعتذر لمامتها أو تعدي الموضوع علشان يتكرر مرة تانية أنت حر.
عُمر : لا طبعا أكيد هاخد موقف وهيبقى لينا قعده مع بعض بس أنا اتلهيت في نور فعلشان كدا مركزتش معاها وسيبتها تمشي.
هشام : سلام عليكم.
يرددوا : وعليكم السلام.
هشام : خُدي بالك من نفسك وصحتك يا نور وارمي ورا ضهرك في حساب وكل واحد هياخد حقه.
نورهان هزت رأسها وهي مدمعه.
هشام : مش عاوز اشوف دموعك علشان غاليه عندي قوي.
وحضنها فضمت نفسها ليه جامد وهي بتبكي.
_______
في فيلا آسر.
الدكتور جوه بيكشف على آسر والاولاد معاه.

تحت..
منة : ازاي يعني يا سهر امال كنتي فين؟
سهر : خرجت اشتري طلبات البيت يا منة.
منة : يا سلام!
وهي الطلبات دي محدش يقدر يشتريها غيرك يعني لو كلمتي حد من الولاد كان جالك جري وقضى كل طلباتك يا ستي كنتي كلمتيني أنا وفضلتي جنب آسر انتي عارفه لما مبتكونيش موجوده في البيت هو بيهمل في صحته.
مليكة : مامي قالت لي قبل ما تخرج إن ميعاد الأدوية بتاعت بابي بعد نص ساعة دخلت كلمته وقتها قالي حاضر هقوم بس غلطتي إني مقعدتش جنبه لحد ما اتأكدت إنه أخد الدوا معلش نسيت  واتلخمت مع الولاد.
منة سكتت بتنهيدة.
سهر كانت قاعدة قلقانه وكل شوية ترفع رأسها ناحية السلم منتظرة خروج الدكتور من عند آسر.

الدكتور : ما أنت كويس أهو امال قلقنا عليك ليه يا أخي.
مجدي : بجد يا دكتور؟
الدكتور : اه أهو زي الحصان بس شكله كدا عاوز يعرف معزته عندنا فكل شوية بقى يقعد ماسك قلبه واه يا قلبي وكلام الأفلام ده.
علي : طب إيه اللي ممكن نعمله علشان نتجنب إن دا ميحصلش مرة تانية.
الدكتور بمزح : تجوزوه هههههه
نظر مجدي لوالده.
آسر : بلاش الكلام دا يا سامح.
الدكتور : ههه ايه الولاد بيزعلوا ولا إيه؟
بابكم كويس وزي الفل هو بس عاوز شوية دلع واهتمام مش أكتر.
نظر علي لمجدي.
آسر : متشكرين يا سامح مع ألف سلامة.
سامح : أنا بتطرد بقى!
علي : اتفضل يا دكتور استريح.
سامح : استريح ايه بقى مش سامع أبوك بيقول ايه؟!
مجدي : بابي بيهزر.
سامح : وأنت يا دكتور مش عندك جهاز كدا باباك يمشي رجله عليه بدل قعدته دي ولا كسلان ومش عاوز تقوم تفُك نفسك شوية؟!
مجدي : بابي عنده كل الأجهزة تحت ولو عاوز اجيبله.
سامح : فاتح صالة جيم يعني الراجل بطل كمال أجسام هههههه
علي : بابي كان كدا فعلا زمان.
سامح : ودلوقت كمان ايه اللي يمنع يعني شوية تعب بسيطة وهتروح لحالها يمارس شوية رياضة خفيفه كدا على قده بس مش تاخدك الحماسة وتروح شايل وزن تقيل وبعدين تتصل تقولي الحقني قلبي وجعني.
آسر : اشيل ايه بس يا سامح أنت متفائل قوي.
سامح : هههههههههههه
وسع كدا أنت وهو عاوز أقول لبابا كلمتين في ودنه..
علي : اتفضل يا دكتور..
قرب الدكتور وبيتكلم مع آسر.
آسر يرد عليه : شرفت ونورت يا دكتور.
الدكتور : هههههههههههه بقى كدا طيب براحتك على العموم أنت الخسران.. اسمع كلامي وأنت تكسب.
آسر : شرفت ونورت يا دكتور لما أكلمك متجيش.
الدكتور : كدا.. طيب هههههههههههه
سلام عليكم.
يرددوا : وعليكم السلام.
ونزلوا الولاد يوصلوا الدكتور وطلعت منة مع سهر ومليكة فوق عند آسر يطمنوا عليه.
_________
في شقة مراد.
مريم : حاضر يا عمتي بس اشربي القهوة بتاعتك الأول.
نرمين : اتصلي بيه دلوقت وأنا قاعدة.
مريم : كلمته مردش الظاهر نايم.
نرمين : معلش اتصلي تاني.
مريم : حاضر.
بتتصل بمازن مرة واتنين أخر مرة رد عليها.
في التليفون.. 📞
مازن : ايوه.. يا مريم حصل ايه؟
مريم : أنا آسفة شكلي صحيتك من النوم.
مازن : خير يا مريم بتكلميني عاوزه حاجة مهمه؟
مريم : عمتي هنا وعاوزه تكلمك.
مازن : عاوزه تكلمني ليه؟
مريم : معرفش اهي معاك.. عمتي مازن عاوز يكلمك.
نرمين : طب ادهولي...ايوه يا مازن ازيك يا حبيبي اخبارك ايه؟
مازن : أنا تمام يا عمتي حضرتك عامله ايه؟
نرمين : بخير يا حبيبي.. بقولك ايه يا مازن.
مازن : نعم.
نرمين : بخصوص يعني البيت وحتة الأرض اللي كان خالك كلمك فيهم وصلت لـ إيه؟
مازن : أنا قولت لخالي يا عمتي لو لازمه البيت ياخده ونصيبنا ناخده كله في الأرض اللي ورا البيت.
نرمين : طب وليه مش تاخد تمنهم وتسيبهم هما لازمينك في ايه؟!
مازن : حتى لو مش لازمني يا عمتي سؤال بس دا حقنا ولا مش حقنا؟
نرمين : حقكم طبعا بس في حاجة اسمها كدا تراضي يعني ازاي هتاخد حته من البيت وأختك حته وخالك حته دا كدا مسموش بيت يا حبيبي.
مازن : ما أنا يا عمتي قولت لخالي ياخد البيت ويدينا الأرض.
نرمين : ولو لازمينه ومش عاوز يفرط لا في دي ولا دي نعمل إيه؟
مازن : معلش يا عمتي مفيش حاجة اسمها كدا احنا كلنا مشتركين في مكان واحد اما خالي ياخد الجزء اللي هيطلع من نصيبه ويسيب لنا الباقي أو بقى يفضل الوضع على ما هو عليه كدا.
نرمين : أنت دماغك طالعه ناشفه لمين ما تبيع يا ابني وابقى اشتري في أي حته أقولك في حته جنب بيت جدك ابقى اشتريها.
مازن : جدي مين؟
نرمين : جدك العمدة.
مازن : جدي العمدة!
يعني أنا اسيب بيت أمي واروح اسكن جنب الناس اللي اذتها؟!
نرمين : ملوش لازمة الكلام دا يا مازن دلوقت.
مازن : حاضر يا عمتي بس أنا مش هبيع نصيبي في البيت خالي يوافق على الاقتراح اللي أنا قولته أو يفضل البيت كدا بقى زي ما هو.
نرمين : بتحط العقدة في المنشار يعني؟!
مازن : أنا قولت الحل اللي عندي يا عمتي لكن خالي عاوز ياخد الحته كلها يبقى مين اللي بيحط العقدة في المنشار دلوقت؟!
نرمين : ماشي يا مازن على العموم متشكره قوي لذوقك وإنك عملت لي اعتبار وقدرتني.
مازن : وايه المشكلة لما ياخد نصيبه ويديني نصيبي أنا وأختي حته أرض دي فيها ضرر لحد؟!
نرمين : معروف إن الولد بياخد البيت والأرض والبنت بتاخد حقها فلوس أو تسيبه بقى.
مازن : طب هسأل حضرتك يا عمتي سؤال هو لما جيتوا تقسموا انتي واعمامي بيعتي نصيبك ليهم برضو ولا اخدتي حقك زيهم؟!
نرمين سكتت.
مازن : احنا مسلمين ودا شرع ربنا الولد بياخد الضعف وبس مش بيضغط على أخته تبيع له بالعافية.
نرمين : ماشي يا مازن مع السلامة بقى علشان مصدعه مريم معاك.
مريم : ايوه يا مازن.
مازن : معدتيش تصدعي دماغي يا مريم.
مريم : أنا!
مازن : ايوه.. انتي لما يجيلك خالك عمتك الجن الأزرق متتصليش بيه و تقوليلي كلمهم.
مريم : حاضر بس ممكن تهدا شوية.
مازن : مش هادي يا مريم علشان متصله بيه ست مرات كل دا ليه علشان اسمعلي كلمتين من عمتك؟!
وبعدين لما مردتش أول مرة تاني مرة افهمي بقى اني لا اما مشغول أو نايم متفضليش تقفلي وتتصلي.
مريم وهي مدمعه : حاضر حقك عليه.
مازن بتنهيدة : مع السلامة.
وقفل مازن مع مريم.
نرمين : أنا نازله يا مريم عاوزه حاجة؟
مريم : لا يا عمتي سلامتك بس كنتي قعدتي معانا شوية.
نرمين : معلش بقى علشان لسه هنزل البلد.
وفتحت نرمين باب الشقة وخرجت واتفتحت بعدها مريم في العياط.
_______
في المستشفى..
وفاء : يا روحي شوف يا عمار النونو.
عمار : عامله ايه يا ياسمين دلوقت؟
ياسمين : الحمد لله
يا بابا.
وفاء : شايفه باباكي بقوله شوف النونو مش معبرني ازاي!
عمار : مش بطمن على بنتي الأول يا وفاء.
وفاء : في دي بقى معاك حق امسك كدا بس بالراحة.
عمار يُقبل جبين الولد..
وفاء : ها يا ياسمين هتسموا إيه يا بنتي؟
ياسمين : هشام بيقول عبد الله.
عمار : اسم حلو وكمان مش موجود في العيله.
وفاء : ايوه هههههههه فتح يا عبد الله.. بقى علشان جدو مجهز لك هدية.
ياسمين : متتعبش نفسك يا بابا.
عمار : وأنا كدا هتعب في ايه يا بنتي عقبال ما تشوفيه راجل وتجوزيه.
وفاء : هههههههههههه قبل اخواته كدا يزعلوا امال ريتاج ويمان فين يا ياسمين؟
ياسمين : في البيت سيبتهم مع ليلى.
وفاء : كتر خيرها عقبال ما تردهالها قريب.
هشام يدخل بابتسامة : ها يا ياسمين عامله ايه دلوقت؟
ياسمين : كويسه يا هشام ياريت بس تكلم الدكتور متخلهوش يبيتني هنا.
وفاء : ما تصبري يا بنتي يمكن قعادك له لازمه.
ياسمين : أنا هاخد الأدوية في بيتي وأنا نايمه في سريري يا ماما مبحبش نومة المستشفى دي خالص وكمان علشان الولاد.
هشام : لسه هنشوف هتقول ايه خليكي في نفسك بس دلوقت ملكيش دعوة بالولاد هما شوية مع ليلى وشوية مريم هتاخدهم عندها متقلقيش مامي مشيت كانت بتقولك هتحتاجي حاجة؟
ياسمين : محستش خالص.
هشام : اه ما انتي كنتي نايمه مراد راح يوصلها.
_______
في شقة علاء.
راجعين من المستشفى بعد ما أخد علاء العلاج بتاعه.
علاء : قعدني هنا يا كريم.
كريم : طب ما تنام جوه أحسن.
علاء : لأ أنا عاوز أقعد هنا.
كريم : طيب استريح.
معتز : بابا أنا دخلت حاجتك كلها جوه.
علاء : طيب يا ابني.
كريم(ابنه) : ادخلي يا تالا.
تالا : سلام عليكم.
يرددوا : وعليكم السلام.
كريم(ابن علاء) : هاتي عنك.
واخد منها صنية الأكل وضعها على السفرة وبيوزع الأطباق : يلا يا عمي يلا يا معتز اغسل ايدك وتعال يلا يلا هات ايدك يا بابا.
كريم : كريم باباك مش هياكل من الأكل ده.
كريم ص : ما أنا عارف يا عمي تالا هتجيب أكل بابا بس هيقعد معانا علشان نفتح نفس بعض.
علاء : مليش نفس يا ابني دلوقت سيبني بس قاعد مستريح كدا وهبقى أقوم لوحدي.
كريم : سيب باباك براحته يا كريم.
معتز : طب اتفضل يا عمي.
كريم : حاضر.