تكملة باقي حلقات الجزء الرابع من أنت قلبي

الجزء الرابع /الحلقة ٩٢

#أنت_قلبي٤
___________
الحلقة ٩٢

في فيلا مراد..
أمل : انتي جايه لوحدك؟
نورهان : اه.. هبات الليلة معاكم علشان عُمر في المستشفى.
شادي : خير يا عمتو هو عمو عُمر تعبان؟
نورهان : لأ أخته هي اللي تعبانه وهو قاعد معاها.
أمل : تعبانه قوي؟
نورهان : امال مراد فين؟
هشام : مراد كان قاعد معانا في شقتي وطلع ينام وأنا وشادي جيبنا بعضنا وجينا.
أمل : نور بقولك ريم تعبانه قوي؟
نورهان : معرفش يا أمل ومش عاوزه أعرف.
هشام : يلا يا شادي.
شادي : يلا.. هتحتاجي حاجة يا مامي؟
أمل : لا يا حبيبي.
بيسلم هشام على والدته وعمته : تصبحو على خير.
يرددوا : وأنتم من أهله.
شادي : سلام عليكم.
يرددوا : وعليكم السلام.
ويخرج شادي وهشام.

نورهان : هو هشام هيتأخر يا أمل؟
أمل : معرفش.
نورهان : هو أصلا فين؟
أمل : معرفش.
نورهان : هو انتي كل حاجة كدا معرفش!
أمل : هقولك إيه يعني ما أنا فعلا معرفش.
نورهان : طيب.
قامت نورهان تشغل التليفزيون.
أمل : بدر ومايا كويسين؟
نورهان : اه بيقولوا كدا.
أمل : يعني ايه؟
نورهان : يعني معرفش عنهم حاجة هما كل كام يوم كدا بيتصلوا احنا كويسين يا مامي ويقفلوا
أقول طيب طالما كويسين هشغل نفسي ليه.
أمل : مالك يا نور؟
نورهان : مين في الزمن ده مهتم يسأل على حد يا أمل مفكره زي زمان الناس بتخاف على بعض والواحد يروح يزور صاحب صاحبه ويطمن عليه! دلوقت حتى الأخوات مبيسألوش على بعض.
أمل : مين...تقصدي هشام؟
نورهان : لأ أنا بتكلم في العموم هشام أصلا مش محتاج يسأل لاني تقريبًا عندكم يوميًا بسبب إني حاسه بالوحدة حتى عُمر مبقاش يحب يقعد في البيت لو معندوش شغل يبقى قاعد مع أخته في شقتها وأنا أولع لوحدي عادي.
أمل : ما انتي لسه بتقولي مين في الزمن دا بيسأل على مين حتى الأخوات مبيسألوش على بعض وانتي جوزك بيسأل أهو على أخته ويطمن عليها زعلانه ليه بقى دلوقت؟!
نورهان : وعد وحشتني قوي يا أمل.
أمل وهي مدمعه : ووحشتني أنا كمان.
نورهان : وشادي كمان وحشني وبابا وماما حقيقي الواحد مفتقد ناس كتير تفتكري احنا لما نموت هنلاقي حد يفتكرنا ونوحشه كدا؟
أمل : لما الواحد بيموت مبيفكرش في حاجة غير عمله اللي هيتحاسب عليه.
نورهان : يعني محدش هيفتكرنا يا أمل؟
أمل : يا ستي مش فارقه بس أكيد حد هيفتكرنا زي ولادنا وأصحابنا.
نورهان : اه هما بس يفتكرونا لما نموت لكن طول ما احنا عايشين مبيسألوش عننا دا أنا اللي بسافر لهم علشان اشوفهم واشوف ولادهم لكن هما لأ مبيفكروش ينزلوا كان نفسي يقعدوا هنا حواليه اروحلهم ويجيلوا بس اختاروا يبقوا بعيد عننا أنا بفكر لو موت هيدفنوني قبل ما يجوا ولا مش هيهتموا أصلا إنهم ينزلوا يشوفوني.
أمل : بعد الشر عليكي يا نور وبعدين كل واحد وظروفه متعرفيش ظروفهم إيه.
نورهان : عندك حق أنا لما بابا توفى كنت هموت وانزل اشوفه بس معرفتش من يومها وأنا قلبي وجعني قوي خايفه يكون زعلان مني يا أمل.
أمل : لا مش زعلان بالعكس هو كان بيحبك قوي ومسامحك.
نورهان : بس أكيد من جواه كان زعلان.
أمل : بقولك ايه ما تيجي توقفي معايا في المطبخ نعمل حاجة نشربها.
نورهان : استني هشام شكله جه بصي كدا من عندك.
نظرت أمل من الشباك اللي بيطل على الجنينة : اه جه.
نورهان : طب استني بقى متعمليش حاجة يمكن عاوز ياكل.
أمل بابتسامة : انتي جعانه.. صح؟
نورهان : مش عارفه بس لو عندكم أكل هاكل مش هقول لأ.
أمل : هههههههههههه طب مقولتيش ليه؟
نورهان : مستنيه هشام هو بيعمل ايه كل دا بره؟
أمل : بيركن العربية.
نورهان : كل ده؟!
__________
في فيلا كريم.
فريدة بانفعال : بتعيطي ليه دلوقت ما عنهم ما صاحبوكي انتي خلاص هتوقفي حياتك عليهم.
جميلة بتبكي : يا مامي دول صحابي.
فريدة : لأ مش صحابك ولا عمرهم كانوا صحابك علشان لو بيحبوكي مش هيعملوا كدا دول قاصدين يستفزوكي علشان تخرجي معاهم من ورانا وتبقي زيهم.
جميلة بتبكي..
فريدة : ما خلاص بقى يا جميلة بطلي عياط محدش يستاهل دموعك دي.
_______
في شقة سيف.
سيف : ايه يا مليكة اللي مصحيكي لغاية دلوقت؟
مليكة بصوت مخنوق كإنها كانت بتبكي : مفيش بس مش جيلي نوم.
جه قعد جنبها : انتي مالك فيه حاجة ولا إيه؟
مليكة : مفيش يا سيف.
سيف : ايه دا يا مليكة انتي معيطه؟!
مليكة : لأ.
سيف : امال إيه الدموع اللي في عينك دي ووشك باين عليه  إنك كنتي بتعيطي فيه إيه بقى؟
مليكة : مفيش يا سيف.
سيف بيقوم : كدا طيب براحتك أنا داخل أنام تصبحي على خير.
مليكة : وأنت من أهله.
__________
في شقة مجدي.
مجدي : أنا متأكد إنها هي أم الواد ده اللي مات واللي أكدلي ده أكتر لما جريت أكيد عارفه أنا مين لما اخدت بالها اني شوفتها طلعت تجري بس للأسف اختفت وسط الناس معرفش زي ما يكون الأرض اتشقت وبلعتها.. زينة انتي مبتتكلميش ليه؟
زينة : هتكلم أقول إيه.
مجدي : انتي شوفتيها قبل كدا.. صح؟
زينة : اه شوفتها.
مجدي : مقولتليش ليه؟
زينة : أنا داخله أنام.
مجدي : بسألك مقولتليش ليه؟
زينة : لاقيته موضوع مش مهم.. ها عاوز إيه تاني؟
مجدي : احنا هنفضل كدا يعني؟
زينة : اه.. مش عاجبك براحتك.
مجدي : على فكرة باللي بتعمليه ده بدل ما تصلحي اللي بينا هتزودي المشكلة أكتر وانتي اللي هتندمي.
زينة : حلو التهديد ده!
متقلقش أنا فعلا ندمت.
مجدي : ندمتي على إيه.. على انك اتجوزتيني؟!
زينة مردتش...
مجدي : أوك يا زينة اعملي اللي يريحك بس متجيش بعد كدا تلوميني.
زينة : بتبرر لنفسك الخيانة.. مش كدا؟
بتسبق صح.. علشان متفاجئش.. دا إيه البجاحه دي.
مجدي بغضب : زينة! خُدي بالك من كلامك مش معنى إني ساكت ابقى ضعيف ومعرفش ازاي اوقفك عند حدك.
زينة : معاك حق.. أنا اللي غلطانه إني لسه عايشه معاك.. ليك حق تعمل ما بدالك..
وتركته ودخلت جوه.
مجدي وهو بيزعق بره : دي مبقتش عيشه دي.. نكد وقرف وخصام ليه كل ده دا انتي لو قفشاني مع واحدة مش هتعملي كدا.
مردتش وغطت نفسها ونامت.
_______
في غرفة كريم وفريدة.
كريم : غلط طبعا.. اللي عملتيه غلط يا فريدة ازاي محترمتيش مشاعر بنتك وبدل ما تاخديها في حضنك وتطبطي عليها وتحتويها وتفهمي إن طبيعي إنها تضايق وتزعل وتبكي كمان علشان صحابها اتعاملوا معاها كدا تقعدي تزعقلها وتحسسيها إنها اللي غلطانه علشان عرفت أصحاب بالأخلاق دي.
فريدة : أنت مشوفتهاش بتعيط ازاي دي زي ما يكون حد مات لها عياط بشكل هستيري أنا مبحبش كدا الدنيا مش هتقف على دول..
كريم : يا حبيبتي دا طبيعي جدًا إنها من صدمتها فيهم تبكي وتزعل انتي اللي بجد غريبة قوي وطريقتك غلط.
فريدة : خلاص أنا طريقتي غلط اتعامل معاها بقى بطريقتك الصح وسيبني أنام.
كريم : انتي زعلانه ليه دلوقت.. علشان بفهمك تتعاملي مع بنتك بطريقة تانية غير الطريقة بتاعتك دي؟
فريدة : ما خلاص أنا قولت لك اتعامل معاها بطريقتك الصح.. تصبح على خير.
اتنهد كريم وبعدها : وانتي من أهله.
وقام يشوف جميلة.
____________
في الصباح.. في شقة مراد.
مراد بصوت ناعس : مريم.. مريم.
دخلت مريم بسرعة : إيه فيه حاجة يا مراد؟
مراد : شوفي ريان.. انتي منيماه جنبي ليه؟
مريم : أصل قومت اجهز فطار وخوفت يصحى يعيط لوحده جوه.
مراد : قومتي نيمتيه جنبي! هي الساعة كام؟
مريم : سبعة ونص.
مراد : وانتي ايه اللي مصحيكي دلوقت؟
مريم : قولت اقوم اجهزلك الفطار علشان تلحق تفطر قبل ما تنزل الشغل.
مراد : ايش معنى؟
مريم : علشان متروحش جعان وتعرف تركز في شغلك.
مراد : غريبة يعني!
مريم : خلاص أنا الحق عليه.
مراد : لأ متشكر طبعا بس شيلي ريان من جنبي.
مريم : هو أنت هتنام لسه؟!
مراد يضع الوسادة على رأسه : صحيني الساعة تمانية.
مريم : بعد نص ساعة يعني! طب ما تقوم مفرقتش يعني.
مراد : مريم خُدي ريان واخرجي وسبيني أنام.
مريم : حاضر.
_____
في شقة هشام.
هشام : صباح الخير يا ياسمين.
ياسمين : صباح النور.
هشام : انتي ايه اللي مصحيكي بدري كدا؟
ياسمين : هو كدا صاحيه بدري؟! الساعة تمانية.
هشام : اه بس ريتاج خلصت امتحانات صاحيه دلوقت تعملي ايه؟
ياسمين : يعني مش عاوز تفطر قبل ما تنزل؟
هشام : لأ.
ياسمين : ليه؟
هشام : مش عاوز اتعبك.
ياسمين : تعبك راحة يا اتش.
هشام قرب وقعد جنبها.
ياسمين : ايه مالك بتبصلي كدا ليه؟
هشام : ياسمين أنا عاوز أقولك كلام كتير قوي بس مبعرفش.
ياسمين : هههههههههههه كلام ايه ده احنا لسه  الصبح حد قادر يتكلم..
هشام : عاوز اشكرك من كل قلبي.
ياسمين : على إيه؟
هشام : على وجودك في حياتي.
ياسمين : لا بقى مقدرش على الكلام الحلو ده.
يُقبل ايدها..
هشام : انتي جميلة قوي واصيلة وبتهتمي بحاجات أنا نفسي مببقاش واخد بالي منها قومتي امبارح من بدري تجهزي وتعملي عشا لـ اخواتي مع إني مطلبتش منك كدا ورحبتي بمراد ومريم كإنهم كانوا راجعين من السفر هههههههه
ياسمين : مش بقالهم فترة بعيد عن البيت وبعدين مريم بعد وفاة مامتها مبقاش ليها غيرنا وبصراحة بتصعب عليه أنا بتعزم عند بابا وماما وفاء بتكون طايرة بيه وكمان عندي منى أختي لما بزهق بروحلها أو هي بتجيني لكن مريم حتى اخوها الوحيد مسافر وأهلها في البلد كل واحد في حاله منبقاش احنا بقى أهلها وعزوتها؟!
هشام : ياسمين انتي جميلة قوي.
ياسمين : وليلى كمان زيها بس الفرق إن باباك بيحاول يعوضها عن فراق باباها ومامتها وكمان طنط نورهان وعبدالرحمن بصراحة دايمًا جنبها لكن مريم معندهاش كل دول أنا بحبهم هما الاتنين
وبحسهم اخواتي زي منى بالظبط.
هشام : خلاص بقى خلتيني ادمع من طيبتك وحنيتك وبصراحة هبتدي اغير.
ياسمين : أنت حبيبي يا هشام ودنيتي كلها.
هشام : كدا بقى مش هنزل الشغل هههههههه
ياسمين : متزعلش مني.
هشام : ازعل منك هههههههه ازاي بقى يعني بعد كل اللي قولتيه واللي بتعمليه ده ازعل منك يا أم عتريس هههههههه
ياسمين : مين عتريس ده؟
هشام : امال نسمي إيه؟
ياسمين : مش عارفه.
هشام : لما تقومي بالسلامة نبقى نشوف الموضوع ده.. هقوم اغير هدومي.
ياسمين : مش قولت مش نازل الشغل.
هشام : لا دا أنا كنت بهزر هههههههه ياريت دكتور هشام يدينا إجازة بس هنقول ايه بقى هههههههه
_________
في النادي..
هاجر : مش دا فراس؟
ميرنا : اه.. هو ايه اللي جايبه الواد ده مش عنده امتحانات؟!
هاجر : أنا عارفه!
تعالي هنا انتي رايحه فين؟
ميرنا : ثواني جايه.
هاجر : استني هنا.. ميرنا بلاش تهور.