تكملة باقي حلقات الجزء الرابع من أنت قلبي

الجزء الرابع /الحلقة ١٣٠

#أنت_قلبي٤
__________
الحلقة ١٣٠

في شقة إياد..
منة : عمار فين يا إياد؟
إياد : نزل مع الدكتور وقولت له يجيب الدوا من الصيدلية بالمرة.
منة : هديت بعد ما اخدت الحقنه.
إياد : أهم حاجة زي قال الدكتور ممنوع وجود أي آلة حاده معاها جوه وكمان البنات خليهم يناموا بعيد عنها الصغيرة هاتيها معانا وحور هتنام في اوضة عمار.
منة : حاضر بس كلم جوزها اللي هو السبب في اللي وصلت ليه ده.
إياد : دلوقت هو السبب يا منة؟!
اللي يسمع كدا يقول إنك مكنتيش عايشه معانا.
منة : بس الموضوع مزادش معاها غير بتجاهله ليها محاولش إنه يقعد يتكلم معاها يحتويها يخرجها بمعنى مختصر إنه يخرجها من الحاله اللي كانت فيها دي كل اللي عمله إنه نزلها مصر هي والبنات يعني بيزود المسؤلية عليها أكبر وكمان هو مش موجود معاها.
إياد : منة الحق يتقال بقى هو كلمني أكتر من مرة واشتكالي منها وأكيد قعد معاها واتكلموا ومشكلة سهر مش مسؤلية البنات لإن يعتبر المسؤلية خفت من عليها لما نزلت مصر على عكس وجودها معاه هناك هو مكانش بيعمل معاها حاجة لإن معندوش وقت لكن انتي هنا يعتبر شايله كل حاجه فهمتي بقى إن المشكلة مش في مسؤلية البنات بنتك عندها حب تملك رهيب اللي هو بحبه ومش هخلي حد تاني يقرب منه حتى لو كانت أخته.
منة : عارفه بس هو جزء من المشكلة يا إياد معرفش يتعامل معاها.
إياد : ومين فينا عرف يتعامل معاها يا منة أنا ولا انتي ولا أخوها محدش قادر يقنعها إن في مشكلة عندها بجد انتي بتتكلمي بس دلوقت كدا علشان شايفه بنتك تعبانه ومش بلومك لكن إحنا حاولنا معاها ومفيش فايدة لازم علاج زي ما قال الدكتور واحنا مش متخصصين علشان نعرف نتعامل معاها هنمشي على توجيهات الدكتور ونشوف هتتحسن ولا لأ.
منة : كلم مازن خليه يكلمها يمكن دا يحسن من نفسيتها شوية يا إياد علشان خاطري.
إياد : حاضر الصبح هكلمه الوقت متأخر دلوقت وتلاقيه راجع تعبان وعاوز ينام.
منة : وهي لما كانت معاه مكانش عنده وقت يتكلم معاها برضو يا إياد؟!
إياد : فيه ايه يا منة مالك قالبه على الولد كدا ليه؟
منة : علشان بنتي تعبانه بسبب حبها ليه وهو مش في دماغه أنا خايفه واحدة تلعب في دماغه ويتجوزها وقتها بنتك ممكن تتجنن بجد رايح فين وسايبني هكلم نفسي يعني يا إياد؟!
إياد : هدي أعصابك شوية يا منة هدخل اطمن على سهر وجاي.
منة بتنهيدة : طيب.
_________
في فيلا كريم.
زين : بجد يا بابي؟
كريم : أنت مش مصدق ليه مش قولت لك هخلص لك ورقك وتسافر؟
زين : ايوه.. بس مكنتش فاكر إن دا هيحصل بالسرعة دي.
فريدة جايه بالقهوة : مين اللي هيسافر ولا أنا سمعت غلط؟!
قام زين وطبع قُبله على رأس وخد والده : يا حبيبي يا بابي أنا متشكر قوي.
وطلع زين على فوق جري.
فريدة : ممكن تفهمني ايه اللي بيحصل بالظبط ؟
كريم : اقعدي يا فريدة علشان اقولك.
فريدة وهي بتبكي : زين مش هيسافر يا كريم.. زين مش هيسافر.. سامعني؟
كريم : هتقعديه جنبك يعني يا فريدة؟!
فريدة : قولتلك مش هيسافر ابني مستحيل اسيبه يبعد عني.
كريم : انتي جرا لك إيه مش فاهم هو انتي فاكره إنه هيفضل قاعد جنبك ما هو لو مسافرش بكرة يتجوز ويبقى له حياته زي محمد وهيتلهي في بيته ودراسته وشغله دا حال الدنيا يا فريدة.
فريدة : في فرق بين إنه يتهلي هنا في حياته ودا طبيعي وبين انه يسافر متكونش شايفه ولا قادر يجيلك في أي وقت كريم أنت بتقارن ايه بـ ايه بس.
كريم قام من مكانه وقرب قعد جنبها : اسمعيني يا فريدة دا مستقبله واذا كنتي فاهمه إن في نجاح بدون تضحيه يبقى غلطانه كل حاجة ولها مقابل لازم تستحملي شوية هو مش مسافر يلعب يا حبيبتي وبعدين هو مش أول واحد يعني
يسافر دا هيسكن مع ناس أنا أعرفهم كويس متقلقيش عليه.
فريدة : مين بقى الناس دي؟
كريم : هيسكن في بيت واحد صاحبي ومتقلقيش معندوش غير ولد واحد وزوجته متوفيه وشبه عايش لوحده لإن ابنه بيشتغل في مكان بعيد السكن بتاعه وبيجي يومين في الأسبوع بس ويرجع شغله تاني والجامعة قريبه منه وهيساعده إنه يشتغل في نفس المستشفى اللي شغال فيها أهو يكتسب خبره بجانب الدراسة أي حد يتمنى فرصة زي دي يا فريدة بلاش رفضك ده أنا فاهم ومقدر مشاعرك كويس هو مش ابني برضو وبعده عني دي حاجة هتوجعني بس دا ولا حاجة قصاد تحقيق حلمه وإنه يبقى دكتور ناجح ويرجعلك علشان تفتخري بيه وقتها هتنسي كل ده ادعيله بقى وبلاش تحسسيه إنه مهاجر دي فترة وهتعدي ويرجعلك بـ ألف سلامة.
فريدة : خايفه يا كريم خايفه عليه من العيشه هناك تغيره.
كريم : لا متخافيش انتي مربيه ولادك كويس وبعدين دا هيبقى من الجامعة للمستشفى للبيت وهيبقى مع صحابي اللي قولت لك عليه يعني هيكون معاه زيي بالظبط يتابعه ويطمني عليه متقلقيش بقى.
فريدة : نفسي اطمن بس مش قادرة.
كريم : لأ اطمني وبينا بقى نطلع ننام علشان تعبت قوي النهاردا.
فريدة بتنهيدة : طب شدني.
كريم : حاضر هاتي ايدك.
_______
في شقة سيف.
حلا بتقرأ : فـَ... تـَ... حَ
كـَ... تـَ.. بَ
أَ... كـَ.. لَ
مامي أنا جعانه.
مليكة : حاضر يا لولي كملي بس وهدخل أعمل أكل دلوقت.
حلا : حاضر
لَـ.. ـعـَ...بَ
مليكة : لا يا حبييتي ركزي حرف العين تحته كسره.. لَـ... ـعـِ..ـبَ.
حلا : لـَ.. ـعـِ.. ـبَ.
مليكة : شاطرة.
سيف : مليكة
مليكة : نعم.
سيف : اكويلي القميص ده عبال ما اخد شاور واطلع.
مليكة : قميص ايه ليه أنت رايح فين؟
سيف : خارج.
مليكة : ايوه.. ما أنا عارفه  بس رايح فين؟
سيف : حمزة مستنيني تحت هنخرج نتمشى شوية.
مليكة : طيب.
سيف : ايه مالك؟
مليكة : مفيش بس مصدعه شوية كملي يا حلا هدخل اشوف اخوكي وجايه.
سيف : كملي يا لولي شاطرة.
حلا : بابي اقعد معايا.
سيف : مستعجل يا حبيبتي كملي لما مامي تيجي... مليكة.
مليكة : حاضر يا سيف جايه.
_______
في فيلا آسر.
سهر : مش ممكن ازاي فيه حد بالبجاحه دي هي الدنيا جرا فيها ايه؟!
آسر : الدنيا فيها كتير ومن زمان وهي كدا يا سهر مش حاجة جديدة.
سهر : ايوه.. يا حبيبي بس متوصلش لكدا تروح تتكلم معاها ويكون دا ردها!
آسر : اه عادي اللي خلاها تتبلا على ابنك هتتكسف لما اروحلها؟
سهر : آسر أنت متأكد ان مجدي مفيش بينه وبين الست دي حاجة؟
آسر : دا احساسي لكن الحقيقية ايه بقى معرفش.
سهر : طب لما أنت مش متأكد كدا روحت ليه للست دي وقولت لها الكلام ده؟
آسر : لو شوفتيها وهي بتتكلم هتعرفي إنها كدابه.
سهر : ويمكن ظالمينها والموضوع ميكنش زي ما قالت بس دا ميمنعش إن مجدي يكون غلط.
آسر : يبقى تثبت وبالدليل مش أي كلام وخلاص.
سهر : مش عارفه بس الموضوع دا مش مريحني ممكن يكون في حاجة  مخبيها علينا؟
آسر : معرفش على العموم كله هيبان قريب.. اطفي النور دا علشان ننام.
سهر بتنهيدة : حاضر.
_________
الصبح.. في التليفون.. 📞
مازن : تعبانه عندها ايه يا عمي؟
إياد : كلمها واسألها.
مازن : حاضر.
إياد : لو مش عاوز بلاش.
مازن : لا طبعا هكلمها طالما حضرتك بتقولي إنها تعبانه.
إياد : وافرض مكانتش تعبانه مش هتكلمها هو دا مش أقل حقوقها يا ابني ولا ايه؟
مازن : حضرتك يا عمي تعرف الموضوع من أوله أنا عمري ما قصرت مع سهر في أي حاجة لكن هي بتضغط على اعصابي وأنا مش قادر استحمل كدا.
إياد : براحتك بس سهر احتمال علاجها يطول شوية.
مازن : ليه هي عندها ايه؟
إياد : كلمها وأعرف منها.. مع السلامة.
وقفل إياد مع مازن.
مازن : ايه دا هو فيه ايه؟!
شكلها تعبانه بجد اما اكلمها أطمن عليها.
________
في شقة سيف.
مليكة : يلا يا سيف الفطار على السفرة.
سيف : حاضر جاي.
بيقرب سيف وهو بيزرر كم القميص : فيه ايه يا حبيبتي مالك؟
مليكة : مفيش... حلا يوسف يلا يا ولاد باص المدرسة قدامه خمس دقايق.
يوسف : حاضر يا مامي يلا يا حلا.
سيف : اقعدي يا مليكة افطري.
مليكة : حاضر.
بتقعد بتنهيدة..
سيف : مالك بقى قوليلي اللي مضايقك؟
مليكة : مفيش يا سيف.
سيف : مفيش ايه أنا شايفك من امبارح وانتي زعلانه كدا وكلامك معايا قليل اوعي بقى تقوليلي أصلك اتعصبت عليه أنا معملتش حاجة.
مليكة : بس مبقتش تساعدني زي ما كنت بتعمل من شهر كدا أول ما ولدت دا حتى شوفتني امبارح قاعدة بذاكر لحلا ويحيى جوه بيعيط وأنت جاي تقولي مليكة اكويلي القميص وبعدين الوقت كان متأخر نزلت روحت فين طب اقعد معايا بلاش حتى اقعد مع الولاد أهو دماغي ترتاح شوية.
سيف : كل ده!
وبعدين يا مليكة الوضع دلوقت تغير انتي وقتها كنتي تعبانه عارف إنك تعبانه برضو دلوقت بس أنا يدوب برجع من الشغل بكون تعبان بنام ساعة وانزل تاني ودي مرة يعني اللي نزلت فيها مع حمزة أنا مشوفتوش من فترة وقولت اشم شوية هوا وعارف لو قولت لك يلا نخرج هتقوليلي الولاد وهنشيل ونعمل وبتاع يبقى سيبيني أخرج ولو مرة واحدة في الأسبوع انتي لما بتقوليلي عاوزه اروح اشوف بابي ومامي أنا بقولك حاجة؟
مليكة : كل حاجة ليها رد عندك.. مش كدا؟!
سيف بابتسامة : خلاص متزعليش حقك عليه أنا هحاول اساعدك بعد كدا ممكن اخد يحيى ينام جنبي عقبال ما تخلصي مذاكرة للولاد وتعملي الأكل.
مليكة : لا هتتعب بصراحة.
سيف : هههههههههههه امال أعمل ايه طيب؟
مليكة : يلا يا ولاد بتعملي ايه يا حلا بوظتي شعرك ليه؟
حلا : مش عاوزه البتاعه دي في شعري وجعتني.
مليكة : خلاص هاتيها انزلوا معايا يلا.
وتاخد الولاد وتنزل تحت يركبوا الباص وتطلع تاني كان سيف بيستعد هو كمان علشان ينزل شغله.
سيف : مع السلامة يا حبيبتي.
مليكة : مع السلامة.
_____
في فيلا غزل..
آسر وهشام ومجدي قاعدين مع والدة غزل وخالها.
هشام : شوفي يا حاجه حضرتك ست كبيرة وليكي احترامك طبعا بغض النظر عن اللي عملته بنتك واحنا مش هنعمل زيها ولا هنشهر بحد لإن دا مش من طبعنا لكن...
يقاطعه خالها.
الخال : يا أستاذ... ااا
آسر : دكتور هشام.
الخال : يا دكتور هشام احنا لا بنشهر بحد ولا لينا في القصص دي نهائي بنتنا قالت إن الدكتور ده ابن حضرتك يا أستاذ.
آسر : اه.. كمل.
الخال : جه هنا وكانوا بيخلصوا شغل وبعدين يعني حصل منه تجاوزات مش لطيفه ضربته بالقلم لامؤاخذة يا أستاذ.
آسر : لا اتفضل كمل واحنا هنرد لما تخلص.
الخال : المهم يعني اخد بعضه ومشي.
مجدي : اسمحلي يا دكتور هشام و اسمحلي يا أستاذ آسر بعد الاحترام ليكم طبعا أرد أنا.
آسر : اتفضل يا أستاذ مجدي.
مجدي : تمام.. الفيلا فيها كاميرات زي ما أنا اخدت بالي وأنا داخل من البوابة تحدد اليوم والوقت اللي حصل فيه الموقف دا وأكيد هتفضل متذكره حاجة زي كدا لإنها مبتتنسيش خصوصا إنها كانت قريب يعني زي ما قالت.
الأم : معلش يا أستاذ أنت واللي معاك أنا لسه عارفه الكلام دا منكم دلوقت.
الخال : هي جات وقالت لي كل حاجة وأنا متزعلوش مني قولتلها جدعه إنها مسبتش حقها لكن اللي بيقول عليه الأستاذ دا طبعا لازم يحصل الحق حق.
هشام : معلش سؤال صغير وياريت سؤالي ميضايقش حد ولو إني مظنش بس دا سؤال منطقي..
الخال : اتفضل حضرتك.
هشام : هو طبيعي إن الشغل بيخلص هنا في البيت ولا في مكان الشغل معلش دي حاجة لفتت نظري في الحوار دا كله
ما هو اما إنهم متعودين يخلصوا الشغل هنا أو الكلام كله فشنك.
آسر : ومعلش بقى لو الشغل بيخلص هنا زعلانه ليه دلوقت دا لو كلامها حقيقي.
الخال : يعني ايه يا أستاذ الكلام ده؟
مجدي : على فكرة يا أستاذ احنا جايين نتكلم ونتفاهم بالعقل مش علشان موقف ابننا ضعيف بس احنا حابين نخلص الموضوع ودي ولو مدام غزل بتتهم دكتور مجدي بالباطل يكفي الاعتذار له
واحنا هنتنازل عن المحضر بتاعنا قصاد إنها تبعد خالص عنه والاعتذار دا يكون قدام اهل بيته لإن الموضوع دا فيه خراب بيوت لو هي مش عارفه.