تكملة باقي حلقات الجزء الرابع من أنت قلبي

الجزء الرابع /الحلقة ١٠٢

#أنت_قلبي٤
__________
الحلقة ١٠٢

في المستشفى... أمام غرفة العمليات.
سهر : اقعدي استريحي يا داليا.
داليا : مش هعرف اقعد يا سهر.
سهر : متقلقيش يا حبيبتي هتقوم بالسلامة ادعيلها.
داليا : هما طولوا ليه كدا مش الدكتورة قالت إنها جايه في وقتها معنى كدا إن الطلق شغال مولدتهاش ليه؟
سهر : طب بس اقعدي.
داليا : مش قادرة يا سهر أنا هتمشى شوية ابقي رني بس وأنا هعرف.
سهر : طيب.
علي جاي ناحيتهم : اتفضلي يا طنط.
داليا : مش هقدر اشرب حاجة يا علي.
سهر : هات يا حبيبي واقعد استريح.
علي :  رايحه فين يا طنط؟
داليا : هتمشى شوية.

مجدي(الأب) قاعد قلقان.
آسر بيشاور لعلي..
علي : حاضر يا بابي جاي..
سهر : علي اسمع.
علي : نعم.
سهر : لو باباك طلب قهوة متجبش... ايوه
متبصليش كدا متجبش وخلاص.
علي : حاضر.
______
في منزل عُمر..
ياسمينا بتبكي : هو قالك كدا؟
عُمر : ايوه.
ياسمينا : امتى ولا متفقتش معاه؟
عُمر : قال بعد بكرة.
ياسمينا : أقول لها إيه يا عُمر؟
عُمر : يعني هتقوللها إيه يا ياسمين؟
ياسمينا : طب هو قالك كدا على طول ولا قالك إيه بالظبط؟
عُمر : اللي قاله يا ياسمين قولتهولك.
الباب يخبط.
ياسمينا : مين؟
نادين : أنا يا ماما.
ياسمينا : دي نادين.. هتقولها ايه؟
عُمر : ما هي أكيد حاسه بكل حاجة.. ادخلي يا بنتي.
نادين بتفتح الباب..
عُمر : تعالي يا نادين.
نادين : بابا حمزة كلمك قال لك ايه؟
عُمر نظر لياسمينا ومردش.
نادين : اه يبقى اللي في دماغي صح.. مش كدا؟
ياسمينا بتبكي.
نادين : بتعيطي ليه يا ماما أنا مش زعلانه بالعكس كدا هستريح علشان مفضلش متعلقه كدا.
عُمر : تعالي يا نادين اقعدي.
نادين وهي مدمعه وبتحاول متبانش إنها متأثرة : لأ أنا هدخل أنام تصبحو على خير.
وخرجت بسرعة ودخلت اوضتها وقفلت على نفسها.
عُمر : رايحه فين يا ياسمين سيبيها دلوقت.
ياسمينا : مش قادرة يا عُمر مش هقدر اسيبها لوحدها.
يمسك ايدها ويقعدها : متروحيش عندها دلوقت سيبيها تخرج كل اللي جواها من غير ما تكتم اللي في قلبها قدامك.
ياسمينا : بتعيط دلوقت.
عُمر : سيبيها تعيط مش هيحصل لها حاجة متقلقيش العياط هيريحها.
ياسمينا : أنت بتقول ايه؟
عُمر : بقولك إنك تسيبيها براحتها هي محتاجة تقعد لوحدها في ظرف زي ده علشان تقدر تخرج اللي جواها بدل ما تكتم في قلبها ويحصل لها حاجة اقعدي يا ياسمين متدخليش عندها.
ياسمينا بحزن وتنهيدة : حاضر.
______
في المستشفى.
سهر : يا روحي يا صغنن شيلي يا داليا.
داليا : استني يا سهر أطمن على بنتي الأول.
رُقية بصوت متعب : أنا كويسه يا مامي.
سهر : اهي قالت اهي إنها كويسه شيلي بقى هههههه
داليا : هاتي يا أختي اللي غلبنا ده.
سهر : امال فين علي؟
علي : أنا جيت أهو كنت واقف مع الدكتور بيطمنا على البيبي.
داليا : ليه يا ابني فيه حاجة ولا ايه؟
علي : لا يا طنط اطمني الولد كويس ورُقية كمان بخير.. صح يا روكه؟
رُقية : علي أنا تعبانه قوي.
داليا : شوفي البنت مش لسه قايلالي إنك كويسه.
سهر : هههههههههههه سيبيها تتدلع شوية يا داليا.
علي : مالك يا حبيبتي؟
رُقية : علي أنت هتحبهم أكتر مني؟
علي : هما مين؟
رُقية : ولادنا يا حبيبي.
داليا : هههههههههههه قابل بقى يا حبيبي شكل هرومانات ما بعد الولادة اشتغلت.
رُقية :"مامي بقى.
داليا : اتدلعي يا رُقية بس بالراحة يا حبيبتي علشان مرارتي على أخرها.
سهر : هههههههههههه لا اجمدي امال احنا لسه عاوزينك للمرة الجايه.
علي : كدا كويس قوي.. صح يا روكه؟
رُقية :" لا أنا خلاص عمري ما اعملها تاني.
داليا : شاطرة يا حبيبتي اتفضلي ابنك بقى خليه نايم كدا في حضنك علشان يطمن وميعطش.. ايه بتعيط ليه دلوقت؟
سهر '" هاتي اما سكته يا داليا.
علي : شكل الواد دا هيتعبنا.
سهر : هههههههههههه هو لسه نطق ولا فتح بوقه.
رُقية : فين آدم يا علي؟
علي : في البيت مع ملك.
______
في التليفون.. 📞
منة : طيب يا حبيبي ألف مبروك عقبال مليكة.
آسر : بتقولي وليد ماله يا منة؟
منة : مين قالك؟
آسر : ملك لسه قايلالي النهاردا.
منة : وليد كان تعب شوية والراجل اللي كان قاعد معاه ده بيسنده فوقع منه.
آسر : وبعدين حصل ايه؟
منة : قعد يزعق للراجل وأنت غبي مبتفهمش وكلام يعني صعب شويه قام الراجل اخد بعضه ومشي بنكلمه قال شوفوا حد غيري أنا مش جاي.
آسر : طب وبعدين؟
منة : مش عارفه أعمل إيه وليد أخلاقه بقت وحشه قوي عصبي طول الوقت والراجل كتر خيره استحمله كتير بس خلاص مبقاش قادر قفلت معاه كدا.
آسر : نشوف حد تاني يقعد معاه.
منة : هو المشكلة مش في كدا ما اللي هيقبلوا كتير المشكلة إن بعد فترة لما يشوفوا تصرفات وليد واسلوبه معاهم هيطفشوا.
آسر : نشوف يمكن نلاقي حد يستحمله.
منة : خلاص ماشي إياد أصلا بيشوف حد بس بصراحة أنا قلقانه أنت اخبارك إيه؟
آسر : كويس.
______
في التليفون.. 📞
مازن : طب ثواني يا مريم خليكي معايا.
واخد مازن التليفون وخرج من الغرفة يكلم أخته.
مازن : ها كنتي بتقولي إيه؟
مريم : كنت بقول وحشتنا ايه مش نازل قريب؟
مازن : وأنتم كمان وحشني لسه معرفش هنزل امتى.
مريم : طيب أنت عندك شغل دلوقت؟
مازن : لا أنا لسه داخل اهو البيت من عشر دقايق كدا.
مريم : طب خلاص اسيبك بقى تغير هدومك وتاكل زمانك راجع تعبان.
مازن : لا عادي خليكي معايا أهو ندردش شويه.
مريم : لا معلش بقى اسيبك تستريح.
مازن : ماشي يا حبيبتي خلي بالك من نفسك.
مريم : حاضر مع السلامة تصبح على خير.
مازن : وانتي من أهله.
قفل مازن مع مريم ودخل جوه يغير هدومه.
كانت سهر قاعدة بتقرقض في اضافرها.
مازن : في حاجة يا سهر؟
سهر : مريم دي اللي كانت بتكلمك؟
مازن : ايوه.
سهر : طب اخدت التليفون وخرجت ليه هو في أسرار يعني هتتكلموا فيها؟!
مازن : نعم!
سهر : أنا كلامي واضح ليه اخدت التليفون وخرجت تتكلم بره يا مازن ولا مش حابب تكلم أختك قدامي؟!
مازن : انتي بجد بقيتي مش طبيعية. مش طبيعية حقيقي انتي دخلك إيه اتكلم هنا اتكلم بره ما براحتي انتي تشاركيني؟!
سهر : بقى كدا.. تمام قوي كل ما تتكلم مع مريم بعدها على طول تتخانق معايا.
مازن : أنا اللي بتخانق معاكي كمان ليه مش شايفه نفسك بتقولي إيه
اسمعي يا سهر أنا هدخل اخد شاور واغير هدومي دي واخرج أنام على طول عارفه ليه؟
علشان لو طولنا أكتر من كدا في الكلام هتزعلي.
وتركها ودخل ياخد شاور.
_________
في التليفون.. 📞
سيف بانفعال : نادين مش لعبة في ايدك يا حمزة احسم أمرك لتتصالحوا لـ اما يا ابن الناس كل واحد يروح لحاله لكن مينفعش اللي بتعمله ده.
حمزة : أطمن يا سيف أنا كلمت باباها ورايح لهم بعد بكرة.
سيف : رايح تعمل إيه؟
حمزة : رايح علشان نخلص هطلق نادين رسمي علشان يبقى معاها ما يثبت إننا انفصلنا وتقدر تتجوز براحتها.
سيف : أنت بتتكلم جد؟!
حمزة : ايه متعرفش إن نادين جايلها عريس ولا إيه؟
سيف بانفعال : أنت مش خلاص نويت تخلص يهمك في إيه بقى جالها عريس ولا مجاش ولا أنت عاوزها تفضل قاعدة من غير جواز علشان تبقى مستريح.
حمزة : فيه إيه يا سيف أنت بتكلمني كدا ليه؟
سيف : بكلمك كدا علشان أنت واحد مصنتش العيش والملح أنت لو صاحبي بحق وحقيقي كنت خلصت من زمان طالما دا اللي في نيتك لكن تعلقها كل ده واقعد أكلم حضرتك وباباها يكلمك مكانش ناقص غير إننا نروح نتحايل عليك واحنا واخدينها في ايدنا ومروحينها عندك بالعافية.
حمزة : سيف بنت أختك مبقتش تنفعني وأنا قولت لك الكلام دا من زمان.
سيف : ولما هو كدا مروحتش خلصت ليه بقالك سبع شهور عمال تماطل ليه بتذلها يعني اللي عاوز يفارق يفارق بالمعروف مش بالطريقة بتاعتك دي.
حمزة : كنت بشاور عقلي يا أخي ايه المشكلة؟
سيف : المشكلة إنك معملتش حساب لحد يا حمزة من أول ما طلقتها في بيت أختي لحد ما روحت خطبت وأنت لسه مخلصتش اللي بينكم وقعدت كل الشهور دي تماطل في الموضوع وجاي تقولي خلاص أنا نويت اخلص.. يا أخي خلصت...
ولا بلاش علشان خاطر العيال اللي ملهاش ذنب دي.. سلام.
وقفل سيف مع حمزة وهو متعصب جامد ينادي على يوسف.
مليكة : عاوز حاجة يا سيف؟
سيف : أنا بنادي على يوسف هو فين؟
مليكة : يوسف تعال بابي عاوزك.
سيف : وهو ميجيش غير لما تقوليله؟!
مليكة : فيه ايه يا سيف هو مسمعش.
سيف : امال سمعتيني ازاي؟!
مليكة : كنت داخله المطبخ سمعتك وأنت بتنادي.
سيف : نعم يا مامي.
سيف : تعال هنا مش بنادي عليك؟!
يوسف : نعم يا بابي.
سيف : اللعب دي بتعمل ايه هنا وإياك تكدب وتقول حلا علشان دي اللعب بتاعت حضرتك.
يوسف : حلا كانت بتجري ورايا فخبتهم هنا علشان متشوفهمش.
سيف: شيلهم يلا ومش عاوز لعب هنا مرة تانية.. سامع؟
يوسف : طيب.
سيف : اسمها طيب؟!
يوسف : حاضر.. كدا كويس؟
سيف : اتكلم كويس يا ولد.
يوسف نظر لوالدته : حاضر.
واخد اللعب وخرج من الغرفة.
مليكة : هو في ايه يا سيف حصل ايه لكل ده؟
سيف : بربي ابني يا مليكة وبعلمه النظام مفروض انتي اللي تعلميه الحاجات دي.
مليكة :"يعني ايه الكلام ده.. شايفني مبعلموش حاجة يعني؟
سيف : انتي هتردي عليه الكلمة بالكلمة؟!
نظرت مليكة لسيف بدهشه وخارجة من الغرفة يمسك ايدها بغضب : رايحه فين أنا مش بكلمك؟
مليكة وهي مدمعه : سيب ايدي علشان بتوجعني.
بعد ايده عنها.. خرجت وتركته لوحده.
______
في التليفون.. 📞
نادين : لأ كنت نايمه.
فريدة : نايمه بدري يعني.
نادين : وهو كدا بدري؟!
فريدة : مالك يا نادين.
وانفجرت نادين بالبكاء : حمزة كلم بابا علشان ياخدني نخلص كل حاجة عند المأذون.
فريدة : يااااه كل دا علشان برضو ينهي اللي ما بينكم؟! ما كان عمل كدا من بدري.
نادين : أنا صعبان عليه بس عشرة السنين دي كلها أنا مش هقدر أكمل مع حد تاني يا فريدة ولو عملت كدا هبقى علشان اغيظه.
فريدة : لا يا نادين اوعي انتي كدا هتعذبي نفسك وهتظلمي الراجل اللي معاكي.. بس طالما بتحبيه كدا ليه محاولتيش يعني..
وسكتت فريدة مكملتش.
نادين : حاولت يا فريدة على قد ما كرامتي كانت تسمح أنا روحت البيت هناك تفتكري روحت ليه مثلاً وكمان ماما كلمت خالك كتير وهما على تواصل مع بعض وبابا راح قاله على حوار العريس ده وكل ده ومحاولتش؟!
فريدة : طب بس اهدي وكل حاجة هتتحل يمكن تيجي على أخر لحظة.
نادين : معقول يا فريدة عاوزاني افضل متعلقه كدا لحد ما حضرته يحن عليه ويقول لي تعالي نرجع؟!
فريدة : ما هو قالهالك يا نادين قبل كدا.
نادين : قالها يا فريدة وهو خاطب وهيتجوز تفتكري أنا بعد ما كنت الزوجة الأولى والوحيده أقبل إن يبقى ليه ضره لأ وتسكن معايا في نفس البيت ويخطبها اثناء ما احنا متخانقين يعني كان لسه في أمل في الرجوع لكن هو فضل يعيش حياه تانية بجانب حياته معايا تفتكري أنا اقبل وضع زي ده حمزة ذلني يا فريدة قدر يهين كرامتي ويعذبني شهور طويلة ما بين أمل في الرجوع وقهر وحسرة على سنين عمري اللي ضيعتها معاه.
فريدة : أنا عارفه إن مش وقته بس هقولك كدا في الظروف دي بالذات علشان يمكن الكلام دا ينفعك ويخليكي تاخدي بالك من إنك كنتي سبب في اللي حصل ده أنا اه أصغر منك لكن كمان أعرف إن الراجل مبيتعاندش يا نادين وانتي ياما كابرتي ووقفتي قصاده وحطيتي مامته ما بينهم فكان لازم يختار مامته لإنها ببساطه معملتش حاجة تستحق كل اللي عملتيه ده.
نادين : يااااه يا فريدة جايه توجعيني بالكلام ده وفي الظروف اللي أنا فيها دي دا أنا مكسورة ومحتاجة اللي يطبطب عليه..
فريدة : أنا آسفة يا نادين بس اقعدي مع نفسك وفكري حمزة غلط في ايه وانتي كمان غلطتي في ايه يمكن لما تعرفي غلطك وتحاولي تصلحيه الأمور ما بينكم ترجع زي الأول وهو يبدأ يحس إنك اتغيرتي أصلا هو هيبدأ معاكي من جديد ازاي والنسخه القديمة هي هي متغيرتش يعني هيحصل نفس اللي حصل دا مرة واتنين وتلاته والولاد اللي هيتظلموا ما بينكم حاولي يا نادين تعرفي المشكلة وتحاولي تعالجيها لنفسك صدقيني قبل أي شيء علشان حتى لو ليكي نصيب مع حد غيره متوصليش لنفس النتيجة اللي وصلتيها مع حمزة.
نادين : كبرتي يا فريدة وانتي اللي بقيتي تديني نصايح كمان.
فريدة : مش عيب نتعلم ونسمع لغيرنا حتى لو أصغر مننا أنا اسمع منك وانتي تسمعي مني وكل واحدة فينا تشوف الصح فين وتعمله.
نادين : تصبحي على خير يا فريدة.
فريدة : وانتي من أهله.
________
الصبح في التليفون.. 📞
أمل بفرحه : مبروك ما جالكم نيجي بقى نبارك.
سهر : يا سلام تشرفي وتنوري يا أمل.
أمل : حبيبتي متشكرة رُقية رجعت البيت ولا لسه في المستشفى؟
سهر : مش عارفه أنا في البيت دلوقت علي كان قالي إنها هتخرج الصبح من المستشفى.
أمل : خلاص أكلم زينة كدا اتأكد منها.
سهر : ماشي يا أمل مع السلامة.
بتقفل أمل مع سهر وتتصل بزينة.