تكملة باقي حلقات الجزء الرابع من أنت قلبي

الجزء الرابع /الحلقة ١٠٦

#أنت_قلبي٤
__________
الحلقة ١٠٦

في التليفون.. 📞
مريم : طب بس قولي سهر قالت لك ايه؟
مازن : اتكلمي يا مريم علشان كدا كدا أنا هعرف.
مريم : أنت مصمم يعني؟
مازن : ايوه.. اتكلمي بقى.
مريم : حاضر حاضر بس اهدا هو اللي حصل يعني اني كنت عاوزه اشوف سهر والبنات فكلمتها علشان اتأكد إنها في البيت لو كدا اروحلها يعني.
مازن : كملي يا مريم حصل ايه.
مريم : كلمتها وبصراحة يعني أنا لما قالت إنها رايحه مشوار وجايه أنا اضايقت وقولت مش عاوزاني اروحلها ولا ايه قولتلها أنا أصلا رايحه مشوار فمش مهم اجيلك وقت تاني أنا برضو غلط أنا عارفه.
مازن : انتي بتكدبي يا مريم اللي حصل غير اللي قولتيه.
مريم : صدقني هو دا اللي حصل.
مازن : يعني قالت لك أنا مش هبقى موجودة في البيت؟
مريم : اه وأنا مفروض كنت اخدت الكلام عادي يعني ومزعلش بس ردي كان وحش أنا آسفة كنت هروحلها بس اتلهيت شوية مع الولاد معلش.
مازن : مش دا اللي حصل يا مريم.
مريم : مازن علشان خاطري متعملش مشكلة وانتم أحرار مع بعض بس بلاش ابقى سبب إن تحصل مشكلة ما بينكم.
مازن : احنا اصلا مبنتكلمش اتفاجئت إنها باعته فويس وبتقولي اللي حصل بينكم فأنا كنت عاوز اتأكد.
مريم : وقالت لك الكلام اللي قولتهولك صح؟
مازن : يعني بس مش زي ما حكيتي.
مريم : خلاص يا مازن حصل خير.
مازن : أنا على أخري يا مريم ومش عاوز مشاكل.
مريم : حاضر.
مازن : هقفل معاكي دلوقت وهبقى اكلمك بعدين.
مريم : ماشي مع السلامة.
______
في فيلا آسر.
هشام : هتروح امتى؟
آسر : الصبح.
ملك بتخبط على باب المكتب يقوم علي ياخد منها الصينيه.
ويقدم لهم القهوة.
علي : اتفضل يا انكل اتفضل يا بابي.
هشام لعلي : متشكر..
خلاص يا آسر الصبح هبقى عندك.
آسر : لا متتعبش نفسك الولاد هيكونوا معايا.
هشام : امال مجدي فين يا علي مجاش معاك ليه؟
علي : معرفش.. أنا أصلا مكنتش أعرف إن بابي هيعمل عملية بكرة أنا اتفاجئت لما دخلت لاقيت حضرتك بتتكلم في موضوع أنا معرفوش.
هشام : أنت مقولتش لحد من الولاد يا آسر؟
آسر : حسام كان هيجي معايا.
هشام : ايه اللي بتقوله ده أنت كنت عاوز تروح لوحدك؟
آسر : قولتلك حسام كان جاي معايا يا هشام وبعدين هما كدا كدا كانوا هيعرفوا.
علي : هنعرف امتى يا بابي.. وحضرتك في غرفة العمليات؟!
آسر : علي أنا مش حمل مناهده ولا عتاب دلوقت.
هشام : خلاص يا علي حصل خير.
علي : خير إيه بس يا انكل.
ودمع والتفت الناحية التانية.
هشام نظر لـ آسر..
آسر : محبتش اقلقهم أنا غلطان؟
خرج علي وتركهم.

قعد بره في الريسبشن..
ملك : فيه إيه يا علي مالك؟
علي : انتي كمان متعرفيش؟
ملك : أعرف إيه؟
علي : بابي هيعمل عملية بكرة.
ملك : إيه!
أنت بتقول إيه.. مين قال لك الكلام ده؟
علي : لسه دلوقت بابي وانكل هشام بيتكلموا.
قامت ملك دخلت لوالدها المكتب.
آسر : عاوزه حاجة يا ملك؟
ملك : الكلام اللي بيقولوا علي دا صحيح.. حضرتك هتعمل عملية بكرة؟
آسر : ايوه.
ملك : ازاي حضرتك مقولتليش وبعدين عملية إيه دي؟
وانهارت ملك وبتبكي.
هشام : متقلقيش يا ملك بابي هيخف ويقوم بالسلامة.
ملك : حضرتك كمان مكنتش عاوز تقول لنا.
آسر : وبعدين معاكم بقى هو كل واحد يعرف يفتح معايا تحقيق أنا تعبان ومش حمل مناهده.
ملك : طب خلاص علشان خاطري اهدا أنا آسفة.