تكملة باقي حلقات الجزء الرابع من أنت قلبي

الجزء الرابع /الحلقة ١٠١

#أنت_قلبي٤
_________
الحلقة ١٠١

في فيلا مراد..
مجدي : متقلقش يا هشام هي أصلا مكانش قدامها غير إنها تتنازل لإنها كانت هتروح في داهيه بعد ما يكتشفوا اتهامها لهشام بالكذب.
هشام : بجد؟
مجدي : اه بجد.
هشام : طب مقولتليش ليه وقتها؟
مجدي : قولت لك بس أنت ماأخدتش بالك وخلاص بقى أهو اللي حصل لو حاولت تبتز هشام مرة تانية هو يقلب الطربيزة عليها ويقولها إنه هيروح يبلغ عنها علشان اتهمته بحاجة محصلتش وسهل يثبت ده الستات اللي جم ميعرفوش هشام أصلا.
هشام : كتر خيرك يا مجدي تعبناك معانا النهاردا.
مجدي : تعب إيه بس يا هشام احنا اخوات وهشام زي مروان ابني بالظبط.. سلام عليكم.
هشام : وعليكم السلام..  بس اقعد هنشرب حاجة.
مجدي : تسلم يا حبيبي أنا شربت قهوة مش هتخليني أنام الليلة.
هشام : ماشي  تصبحي على خير..
مجدي : وأنت من أهله.
راح هشام مع مجدي يوصله ورجع كانت أمل قاعدة ايدها على دماغها ومغمضة.
هشام : أمل انتي نايمه؟
أمل : لأ صاحيه يا هشام.
هشام : امال مالك قعدة كدا ليه؟
أمل : مصدعه شويه.
هشام : طب قومي نطلع ننام.
أمل : طيب.
مشي هشام خطوتين والتفت لاقى أمل لسه قاعدة مكانها.
هشام : أمل مش هتطلعي تنامي؟
أمل : هاه.. اه قايمه أهو.
رجع ليها : ايه مالك مش قادرة تقومي؟
أمل : لأ هقوم لوحدي.
هشام : هاتي بس ايدك  يلا.
أمل تمد ايدها فيشدها تقوم.
______
في شقة شهاب.
شهاب لصاحبه اللي كان بيخبط من شوية : يا عم خلي الفلوس دلوقت أنا مش محتاجهم.
صاحبه : لا معلش خُد فلوسك علشان هتتصرف وأنا مصدقت الفلوس جاتني قولت اردهم بقى لصاحبهم وكتر خيرك يا حبيبي نردهالك في الأفراح.
شهاب : كدا.. ماشي بس نفرح بيك الأول.
صاحبه : أنا وأنت هههههههه ولا تزعل نفسك تصبح على خير.
شهاب : وأنت من أهله.
ويفتح صاحبه باب الشقة ويخرج.
تيم يخرج من جوه..
شهاب : ايه مالك؟
تيم : فكرتك عملتها وبلغت عني.
شهاب : اتفضل بقى من غير مطرود.
تيم قرب من شهاب : دفعلك كام؟
شهاب : هو مين؟
تيم : هنستعبط بقى.. ما أنت عارف مين.
شهاب : ماأخدتش منه حاجة ومش ناوي اخد.
تيم : تبقى عبيط لازم تسحب منه على قد ما تقدر بُص أنت تنيمه شوية كدا وبعدين تكلمه تقوله إني عندك ويجي بقى ميلاقنيش وكل مرة تعمل فيه الحركة دي تكون جمعت منه مبلغ محترم.
شهاب : هو فين الاحترام اللي في الموضوع ده؟!
تيم : مغفل.
شهاب : اسمع يا تيم أنت لسه الفرصة قدامك ارجع عن الطريق اللي أنت ماشي فيه ده آخرته وحشه.
تيم : طيب شكرًا على النصيحه سلام.
________
في التليفون.. 📞
إياد : طب اهدي بس يا ياسمين وأنا هتصرف.
ياسمين منهاره وبتبكي : تتصرف تعمل إيه؟!
أنت تنزل تشوفلك حل معاها تاخدها معاك تقعد بيها هنا أنت حر بس تبعدها عني خالص إياد مامتك عاوزه تخرب بيتي هشام لسه متخانق معايا ومش عاوز يكلمني بسببها ما هو اللي عملته مش شوية وهو ليه حق يعمل أكتر من كدا كمان.
إياد : أنا معرفش ماما بتعمل كدا ليه أنا لسه باعت ليها فلوس من فترة قريبه.
ياسمين : بتعمل كدا علشان تهد اللي بابا عمله عاوزة تخرب بيتنا علشان تقوله شوف أهم ولادك اللي أنت فرحان بيهم ماما عاوزه فلوس من تحت الأرض ومش مهم منين ولا ازاي المهم يكون معاها وخلاص.
إياد : وانتي لما قولتلها هتتصرفيلها في الفلوس اللي طلبتها كتعويض كان قصدك هتتصرفيلها منين؟
ياسمين : عندي الدهب بتاعي بفكر ابيع جزء منه بس مش دي المشكلة
المشكلة إن ماما مش هتسكت ولا هتكون أخر مرة وأنا زهقت وتعبت بصراحة عاوزه أروق والتفت لبيتي وولادي هشام مش وحش يا إياد بالعكس بيعاملني كويس هو وأهله بس للأسف ماما كسرتني قوي قدامهم النهاردا.. وهما علشان ناس كويسه كانوا عاملين خاطر ليه رغم اللي عملته ماما ولو أنا مكانهم مكنتش هسكت.
إياد : مش عارف أعمل إيه يا ياسمين.
ياسمين : لأ بقولك ايه أنت قولت هتتصرف يبقى تتصرف يا إياد علشان خاطري.
إياد : حاضر يا ياسمين هتصرف هكلمك بكرة سلام.
ياسمين بتنهيدة : مع السلامة.
_____
في عيادة الطبيب صديق آسر.
آسر : عملية إيه؟
سامح : عملية بسيطة متقلقش.
آسر : سامح أنا مبقتش حمل عمليات تاني خالص اتأكد من الأشعة اللي قدامك متتعبش اعصابي.
سامح : اتأكد من إيه بس يا آسر.. أنا يعني هكدب عليه ولا هغشك.
آسر : طيب العملية دي ضروري يعني تتعمل؟
سامح : بقولك ايه بلاش دلع بقى أنا بقولك هنعملها هنا يعني لا هتروح ولا تيجي هتبقى جنبنا هنا وابسط يا عم انا هبقى واقف جنبك في العملية.
آسر : ما هو دا اللي مخوفني.
سامح : هههههههههههه
آسر : والعملية دي مفروض هتتعمل امتى؟
سامح : ياريت في أقرب وقت يكون أفضل.
آسر : شكلها مش سهله وأنت بتكذب عليه.
سامح : متقلقش بسيطة هتنام شوية وتقوم بعدها زي الحصان.
آسر : ولو مقومتش؟
سامح : ما تتفائل خير بقى يا أخي.
آسر بابتسامة وهو بيحاول يداري الخوف اللي جواه : لو جرا لي حاجة ولادي مش هيسيبوك.
سامح : وبعدين معاك بقى ما قولتلك اتفائل خير يا أخي.
_______
في شقة سلمى.
سلمى بانفعال وغضب : هي الست دي مش عايزة تتلم وتتهد بقى إيه قلة الأدب بتاعتها دي وانتهيتوا على ايه يا عمار؟
عمار : اتنازلت عن المحضر وهشام خرج بالسلامة.
سلمى : وكان لازمتها إيه من الأول المحاضر والبهدله في الأقسام اصلا علا لو ليها حق عمرها ما كانت سابته.
عمار : عندك حق.. ادعي لياسمين جوزها يهدا عليها وميتخانقوش مع بعض.
وفاء : لا هشام طيب وابن ناس.
سلمى : وابن الناس دا يا أختي مش من حقه يتخنق ويزهق من القرف اللي بتعملوا الست هانم فيه ولا ملوش حق؟!
وفاء : بس ياسمين ذنبها إيه يا سلمى؟
سلمى : أمها يا أختي عارفه يعني إيه أمها.
وفاء : عارفه...
عمار : يلا يا وفاء.
وفاء : يلا.
عمار : سلمى ما تشاوري نفسك تاني كدا وتفكري تيجي تقعدي معانا أنا قاعد أنا ووفاء في الشقة لوحدنا وزهقانين عاوزين حد يونسنا.
سلمى : ما تقول لوفاء تجيبك عيل ونسكم.
وفاء : هههههههه هم يبكي وهم يضحك يا سلمى خلتيني اضحك واحنا في الظروف دي.
سلمى : اضحكي محدش واخد منها حاجة هنروح فين يعني ادينا كلنا هنموت.
عمار : اخلف ايه في السن ده يا سلمى انتي كمان.
سلمى : بهزر يا أخي أنت ما صدقت شكلك عاوز تعملها وتتجوز على وفاء.
نظرت له وفاء..
عمار : لا بقولك ايه سلمى بتهزر.. مش كدا يا سلمى ولا إيه؟
سلمى : خايف منها؟
عمار : يلا بينا يا وفاء تصبحي على خير يا سلمى وابقي فكري في اللي قولتهولك.
_______
في فيلا آسر.
سهر قاعدة أمام المرايا بتلف شعرها وتدهن كريم على ايدها.
سهر : مش عارفه إيه اللي في ايدي ده يا آسر..
كان آسر قاعد سرحان
وبيفكر.
سهر : آسر أنا بكلمك.
آسر : ها يا سهر بتقولي حاجة؟
سهر : لا أنت مش معايا خالص.. مالك في إيه؟
آسر : عرفتي اللي حصل النهاردا؟
سهر : اه تقصد هشام؟
مجدي قال لي روحت كلمت أمل طمنتني إنه خرج.
آسر : وأنا كمان كلمت هشام طمني.. كنتي بتقولي ايه بقى؟
سهر : مليكة كلمتني النهاردا عاوزاني اسافرلها الاسبوع الجاي.
آسر : إيه!
قصدي يعني براحتك يا حبيبتي شوفي انتي عاوزه تسافري امتى.
سهر : بصراحة مليكة والولاد واحشني بس برضو كل ما يقرب ميعاد السفر اقلق واتوتر.
آسر : ليه؟
سهر : مش عارفه هسيبك الفترة دي كلها ازاي؟
آسر : عادي يا سهر ما هنبقى نتكلم مع بعض وتطمنوني عليكم..
سهر : آسر أنت كويس؟.
آسر : اه صحتي بمب..
سهر : بس أنا مسألتكش عن صحتك ليه قولتلي كدا؟
آسر : فيه إيه بس يا سهر عادي يا حبيبتي توقعت إنك بتسألي عن صحتي.
سهر : يعني موافق اسافر لها الاسبوع الجاي؟
آسر : سافري يا حبيبتي وقت ما تحبي اطفي النور ده علشان ننام.
سهر : حاضر تصبح على خير.
_______
بعد يومين..
في شقة هشام..
هشام : ريتاج.
ريتاج : نعم يا بابي.
هشام : قولي لمامتك تجهز علشان رايحين عند جدو.
ريتاج : حاضر.