تكملة باقي حلقات الجزء الرابع من أنت قلبي

الجزء الرابع /الحلقة ١٤٠

#أنت_قلبي٤
____________
الحلقة ١٤٠

في التليفون.. 📞
فريدة بصوت ناعس : ألو.
كريم : ايه يا فريدة مبترديش ليه؟
فريدة بصوت ناعس : كريم!
كريم : انتي نايمه؟
فريدة : اه كنت نايمه.
كريم : جميلة فين؟
فريدة : جات من المدرسة نامت.
كريم : مأكلتش؟
فريدة : دخلت تشوفني كنت نايمه وقتها قولت لها تاكلي قالت مليش نفس هنام شوية فسيبتها بس هدخل اصحيها دلوقت.
كريم : صحيها علشان تاكلوا مع بعض ومتنسيش الدوا اللي قبل الأكل.
فريدة : حاضر.. كنت عاوز حاجة؟
كريم : اه حازم هنا أهو عاوز يطمن عليكي..
فريدة : ماشي ادهولي.
كريم : حازم فريدة عاوزه تكلمك.
ياخد حازم التليفون من كريم.
حازم : ايوه.. يا فريدة بتصل مبترديش ليه؟
فريدة : معلش يا حازم مسمعتش التليفون كنت نايمه.
حازم : نوم العافيه يا فراولة انتي عامله ايه النهاردا؟
فريدة : الحمد لله.
حازم : كنت جاي اقعد معاكي شوية بس الظاهر  مسمعتيش صوت جرس الباب.
فريدة : لا مسمعتش أنت جيت امتى؟
حازم : من حوالي تلت ساعة كدا أنا لما محدش رد قولت بقى اجي لكريم على المستشفى اطمن منه.
فريدة : طب أنا قومت أهو تعال نقعد مع بعض شوية.
حازم : حاضر مسافة السكة أكون عندك كريم معاكي..
_______
في البلد.. في منزل كامل.
حامد : متباتوش تروحو دلوقت قبل ما الدنيا تليل.
نظر مازن لمريم.
حامد : اني بس عاوزكم تروحوا في النور.
مازن : هنقعد شويه ونمشي متقلقش.
قام مازن يوصل حامد وبيفتح الباب..
محمود بابتسامة : سلام عليكم.. ازيك يا ابن عمي البلد كلها نورت ازيك يا بنت عمي اخباركم إيه؟
مازن واقف ناظر لمحمود ومردش.
حامد : جاي عاوز ايه يا محمود؟
محمود : جاي اسلم على ولاد عمي وأطمن عليهم أنت اللي بتعمل ايه هنا؟
حامد : طب يلا قدامي.
محمود : استنى بس واخدني على فين عاوز اسلم على الدكتور ابن عمي ازيك يا دكتور عامل ايه مصر كلها نورت.
مازن : أنت جاي ليه يا محمود مفروض تتكسف من نفسك ومتورناش وشك دا تاني.
محمود : ليه بس دا اني جاي وفرحان وقولت زمانهم نسيوا اللي فات وكمان عاوز اعزيكم شدوا حيلكم مرات عمي كانت ست طيبة وبنت ناس.
مازن : علينا الكلام ده أنت عندك زهايمر تاريخك كله معانا وبصراحة كان مشرف قوي بلاش نفاق بقى واتفضل ارجع مكان ما جيت.
محمود : ليه بس كدا يا ابن عمي دا أنا بقول عليك بتفهم في الأصول وراجع مجدع يعني.
مازن : في ناس كدا متستحقش إن الواحد يحترمها اتفضل امشي من هنا.
محمود : ازيك يا مريم اخبارك ايه؟
مازن بغضب وانفعال : ولاه امشي من هنا أنت مالك ومالها غور بقى يلا.
حامد ياخد محمود من ايده ويشده يبعده عن الباب فيقفل مازن باب البيت.
محمود : اوعى أنت ماسك ايدي كدا ليه ماسك حرامي هيهرب منك اوعى بقى يا أخي.
حامد : أنت خلاص مبقاش عندك دم ولا احساس عاوز منهم ايه ما تخليك في حالك وجاي تكلم بنت عمك وقدام اخوها كمان ايه خلاص بقيت بجح ومش هامك حد.
محمود : ما هم دخلوك جوه ولا هو وحش ليه اني.
حامد : اه يا محمود هما يدخلوني اني لكن أنت لأ وأنت عارف ليه.
محمود : طب امشي بقى وسيبيني ملكش دعوة بيه.
حامد : هتيجي معايا يا محمود بدل ما اروح اخبط على ابن عمك دلوقت واقوله على تهديدك لـ أخته وإنك مش سايبها في حالها وشوف ساعتها بقى هيعمل فيك إيه.
محمود : أنت بتهددني فاكرني بخاف ولا إيه اني عارف إنك مش هتقدر تعمل كدا علشان هتخاف على ابن عمك أكتر مني يلا روح قوله اني واقف اهو مستني اشوف هيعمل فيه إيه.
حامد : لا أنت مبقاش يحوق فيك حاجة على العموم خليك واقف كدا بس يكون في علمك لو مسيت شعره من حد فيهم اني هيبقى عليه وعلى أعدائي يا محمود وأنت عارف اما الحركات اللي بتعملها بقى علشان تطفشنا من البيت فيكون في معلوم برضو اني قاعد على قلبك مش طالع من البيت ومسيري اطفشك أنت وهتشوف.
محمود : هههههههههههه
حامد : اضحك براحتك بس الشاطر اللي يضحك في الاخر.