تكملة باقي حلقات الجزء الرابع من أنت قلبي

الجزء الرابع /الحلقة ١١٨

#أنت_قلبي٤
_________
الحلقة ١١٨

في منزل عُمر وياسمينا.
نادين : أنت قايم رايح فين لسه الحلو..
سيف : لا كدا تمام قوي مبقتش قادر احط حاجة تاني في بوقي.
حلا : بابي يلا نروح عند جدو.
سيف : حاضر نقعد شوية مع عمتو.
حلا : لأ يلا نروح دلوقت.
سيف : روحي لمامي.
حلا : لأ يلا نروح عند جدو.
هدى بغضب : بنت عيب كدا باباكي قال لك هنقعد شوية يبقى تسمعي الكلام.
نظرت حلا لعمتها(هدى) بغضب.
هدى : شايف بنتك بتبصلي ازاي.. قلة أدب!
نادين : في إيه بس يا خالتو دي لسه صغيرة.
هدى : الصغير يتربى يا نادين واضح إنها مدلعه هتجيبو منين يعني ما هو أكيد مش هتجيبو من بره.
ونظرت لمليكة اللي كانت قاعدة بعيد عنهم مش سامعه الحوار اللي داير ما بينهم.
سيف : فيه إيه يا هدى ليه كل ده علشان البنت قالت عاوزه تمشي؟!
هدى : شوف مين بقى اللى مسلطها ما هو لو ليك كلمة جوه بيتك بنتك مش هتسمع الكلام وتيجي تقولهولك.
سيف : كلام إيه انتي عاوزه تتخانقني وخلاص.
فيروز جايه عليهم : خلاص يا سيف اقعد مجراش حاجة اقعدي يا هدى.
سيف : اقعد فين بقى يا فيروز أنا ماشي.
ياسمينا : هو فيه إيه حد يفهمني حصل إيه يا سيف؟
مليكة : يلا يا يوسف دخل الحاجات في الشنطة.
هدى : وانتي بقى سمعتي الكلام وقايمه ماشيه على طول مش كدا؟!
سيف : ملكيش دعوة بمليكة خالص يا هدى.
هدى : ليه يا حبيبي مليش دعوة بيها ولا هي تعمل المشكلة وتسحب نفسها منها كإن محصلش حاجة.
مليكة : أنا عملت مشكلة إيه يا طنط مش فاهمه؟!
هدى : عماله تبعتي بنتك لـ أبوها علشان تقومه من وسطينا وينزل يوصلك بيت باباكي ايه مش صابره يقعد معانا شوية.
مليكة : أنا بعت بنتي؟!
محصلش حلا تعالي هنا.
ياسمينا : خلاص يا مليكة حصل خير.
مليكة : يا طنط محصلش الكلام دا خالص أنا مبعتش حد.
سيف : خلاص يا مليكة بقى.
مليكة : خلاص إيه ما هو لازم تتأكد علشان متظلمنيش.
ياسمينا : يا بنتي حصل خير وحتى لو بعتي بنتك ايه اللي فيها يعني؟
مليكة : يا طنط صدقيني محصلش.
سيف بغضب : ما خلاص بقى يا مليكة هو لازم نبرر يعني ليها ما أنا حر امشي ولا اقعد براحتي.
هدى : جدع... واضح إنك راجل قوي في بيتك.
ياسمينا : هدى!
سيف : لحد كدا وكفاية.. أنا همشي يا هدى علشان مش عاوز اتهور.
ياسمينا : استنى يا سيف.. يا ابني تعال بقى.
هدى : سيبيه واضح إن الست هانم هي اللي ممشيه البيت.
رجع لها تاني فقامت فيروز تاني علشان سيف ميتهورش.
سيف : مين دي اللي ممشياني يا هدى أنا مفيش ست في الدنيا تمشيني سامعه؟!
هدى : لا ما هو واضح من حمقتك عليها.
ياسمينا : ما تبس بقى يا هدى عيب كدا.
هدى : ولعت فيها ونزلت شايفه! ما احنا كنا قاعدين مع بعض بنضحك دلوقت دخلت عملت مشكلة وخلعت.
سيف : هي مين دي؟!
مليكة متكلمتش أصلا انتي اللي عماله تغلطي لا هي ولا غيرها هيمشيني يا هدى سامعه.. ومتشكر قوي على كل اللي قولتيه.. سلام عليكم.
ياسمينا : استنى يا سيف يا ابني استنى بقى.
سيف : أنا احتراما ليكي يا ياسمين ولصاحب البيت ده سكت أهو قدامكم بس من النهاردا ميجمعنيش بيها أي مكان.
ونزل سيف تحت نزلت فيروز وياسمينا وراه.
كان بيفتح باب العربية ركبت مليكة والولاد ولسه بيفتح الباب ناحيته علشان يركب كانت ياسمينا وفيروز لحقينه.
فيروز : متزعلش يا سيف بقى حقك علينا.
ياسمينا : معلش هي هدى كلامها كدا متزعلش حقك علينا يا مليكة.
مليكة : محصلش حاجة يا طنط.
فيروز : نزلهم نطلع نتفاهم فوق يا سيف.
سيف : مش طالع يا فيروز انتهى.
ياسمينا تهمس لسيف : طب خلاص ماشي براحتك بس علشان خاطري متزعلش مليكة.
سيف : مش مزعلها يا ياسمين هي معملتش حاجة.
فيروز : خلاص يا ياسمين سيبيه براحته.
سيف : علشان محدش بس يقولي إن في ست ممشياني.
ياسمينا : ما خلاص بقى زلة لسان.
سيف : متأكدة؟!
نظرت ياسمينا لفيروز.
فيروز : خلاص يا ياسمين سيبيه يمشي.
خرج عُمر من جوه كان قاعد مع ياسين وحمزة في الغرفة اللي في الدور الأرضي علشان يسيبهم فوق براحتهم.
عُمر بيمزح معاه : على فين يا سيف البلد دي أحسن من غيرها.
سيف : معلش يا بشمهندس بقى يدوب كدا دايمًا عامر.
عُمر : مش هنشوفك تاني قبل ما تسافر؟
سيف : أنا هسافر كام يوم بس مش هطول راجع على طول.
عُمر بيسلم على سيف : ماشي يا حبيبي تروح وترجع بالسلامة.
سيف : متشكر.. سلام عليكم.
يرددوا : وعليكم السلام.
_________
في شركة مراد.
هشام : صور قديمة!
مراد : ايوه.. يا بابي صور قديمة.
هشام : قصدك صور زباله مش عاوز اغلط...
مراد : يا بابي دي حاجات قديمة وتقريبا كانت على تليفون رغد وحد اخدهم.
هشام : الصور دي لو راحت لمراتك مفكرتش هيحصل ايه دا غير الشات المقرف بتاعك أنت ايه مش مكسوف من نفسك؟!
مراد : الصور والحاجات دي وصلت فعلا لمريم.
هشام : نعم!
مراد : بس أنا حاولت الم الموضوع وصالحتها وعدت على خير.
هشام : ومين بقى اللى بعت الحاجات دي؟!
مراد : هو مفيش غيره جوز أمها.
هشام : تقصد مين؟
مراد : مفيش غيره لأ ومن بجاحته بيهدد مريم إنه هينتقم لشرفه مش لما يبقى عنده شرف من الأساس يبقى يتكلم.
هشام : أنت بتقول ايه ولا مش واخد بالك من اللي بتقوله؟!
مراد : فاهم يا بابي بس دا لو فكر يعمل حاجة هشرب من دمه.
هشام : تشرب من دم مين أنت مستوعب اللي بتقوله؟!
مراد : مستوعبه ومش هسيبه.
هشام : شايف وصلتنا لـ إيه ما هو لو مشيك مظبوط مكانش حصل اللي حصل ده.
مراد : يا بابي قولت لحضرتك دي حاجات قديمة أنا بطلت كل دا من زمان وعلى يدك أهو ماشي مستقيم وحياتي هادية أنا ومراتي مفيش غير الراجل ده اللي منغص علينا حياتنا ولازم اخلص منه.
هشام : ودا هتخلص منه ازاي هتقتله؟!
مراد : يا ريت لو ينفع كنت عملتها.
هشام : امشي روح شوف شغلك.
مراد : طب ممكن الفون لحظة.
هشام بتنهيدة : اتفضل.
________
في شقة مجدي.
أمل : ما هو لازم تاكلي أنا عملتلك الأكل اللي بتحبيه.
زينة : ما هو لو قولتيلي كنت قولت لك متتعبيش نفسك أنا مش جعانه.
أمل : يا حبيبتي لازم تتغذي علشان اللي في بطنك.
زينة : مش حساه يا مامي مش عارفه اعمل إيه؟
أمل : تعملي ايه فيه ايه يا زينة؟
زينة : هو طبيعي مكنش حابه الحمل ده ولما يجي أحبه ولا هفضل كدا؟
أمل : لا يا حبيبتي هتحبيه وهيبقى عندك بالدنيا بس علشان متحركش مش حاسه بيه.
زينة : أنا عاوزه اتمشى شوية.
أمل : اسمعي كلام الدكتور يا بنتي قالت لك نامي على ضهرك يبقى تعملي اللي قالت لك عليه.
زينة : مامي.
أمل : نعم.
زينة : هو في أمل إن مجدي يتغير؟
أمل : هو عامل ايه معاكي؟
زينة : كويس بس أنا الشك هيموتني.
أمل : طالما كويس معاكي خلاص لكن هتقعدي بقى تقولي شاكه ومش شاكه بدون دليل يبقى هتتعبي نفسك على الفاضي عيشي حياتك يا حبيبتي طالما جوزك كويس معاكي.
باب الشقة بيتفتح.
زينة : مجدي جه.
أمل : اه الظاهر كدا سامعه صوت الباب.
مجدي بيخبط بابتسامة : سلام عليكم.
يرددوا : وعليكم السلام.
مجدي بيقرب يسلم على حماته : ازيك يا طنط اخبارك ايه؟
أمل : تمام يا حبيبي قول لمراتك بقى تاكل وتاخد بالها من نفسها.
مجدي بابتسامة : عامله ايه يا زينة دلوقت؟
زينة : كويسه.
مجدي : أنا بقى جيبتلك أكله بتحبيها علشان يعني لو كان في وحم بقى ولا كدا.
أمل : ما هو الأكل قدامها مش عايزة تقوم تاكل.
مجدي : لا مفيناش من كدا بقى لازم ناكل ونتغذا
أنا هأكلها علشان نفسها تتفتح.
مجدي بيدوق الأكل : تسلم ايدك يا طنط الأكل لذيذ قوي.
أمل : بألف هنا وشفا.
مجدي : لا بجد حلو قوي أنا من زمان مدوقتش رز حلو كدا.
زينة : قصدك ايه بقى؟
أمل : هههههههههههه
مجدي : انتي أكلك يجنن يا حبيبتي بس بصراحة طنط يعني اللي تكسب.
زينة : طبعا مامي اللي تكسب علشان نفسها في الأكل محدش يقدر ينافسها فيه.
أمل : مش للدرجة دي يعني.
مجدي : افتحي بوقك بقى.
زينة : مليش نفس.
مجدي : وبعدين بقى أنا قربت أخلص الطبق وانتي لسه ماأخدتيش معلقة هههههههه
_________
في منزل عُمر.
ياسمينا : ليه كدا بس يا هدى ما أنتم كنتم قاعدين بتضحكوا دا أنا سيبتكم وقولت أدخل أعمل حاجة نشربها ارجع الاقيكم بالشكل ده.
هدى : أصل لك يا ياسمين مشوفتيش البنت كانت عماله تلح ازاي على سيف علشان يوديها عند جدها.
فيروز : يا هدى دي عيله صغيرة كلنا كنا كدا واحنا عيال ايه اللي حصل لكل ده وازاي تقولي لـ اخوكي مراتك هي اللي ممشياك هي كانت مليكة نطقت بكلمة.
ياسمينا : هتتبسطي يعني لما يتخانق معاها؟!
هدى : لا يا أختي متخافيش مش هيتخانق معاها ولا حاجة اخوكي من يوم ما سافر وقلبه جمد علينا ومبقاش يحب غيرها.
فيروز : دي غيره بقى.
هدى بغضب : فيروز!
فيروز : خلاص خلاص انتي هتتخانقي معايا أنا كمان ولا ايه؟
ياسمينا : ما هو لازم يحبها يا فيروز مش مراته.
فيروز : يا أختي هو أنا قولت حاجة انتي كمان يا ياسمين ؟!
ياسمينا : قصدي يا هدى معلش اتلخبطت هو انتي يعني جوزك مبيحبكيش؟!
هدى : اه بيحبني بس دا قاعد يدلع فيها واحنا قاعدين.
فيروز : هههههههههههه
يا شيخه هو فين اللي كان بيدلع فيها ده دا اخوكي كان قاعد معانا وهي كانت قاعدة بعيد علشان ابنها كان عمال يعيط.
ياسمينا : يا ستي ميدلعها ايه اللي فيها هينقص حته يعني؟!
فيروز : انتي غلطتي يا هدى ولازم تعتذري لـ اخوكي هو سيف حد بيمشيه ما انتي عارفه طول عمره ماشي بدماغه وبمزاجه.
ياسمينا : بكرة تاخدي هدية حلوة كدا وتروحي تشوفيه اقولك نروح كلنا مع بعض علشان الولد الصغير مجبتلوش لسه هدية ايه رأيك يا فيروز؟
فيروز : أخاف من رد فعل اخوكي انتي عارفه سيف.
ياسمينا : لا مش هيعمل حاجة سيف قلبه أبيض هو بس حمقي شوية وهيدي هدى كلمتين هههههه تستحملهم وخلاص.
هدى : سيف دا أخويا الصغير أنا أكبر منه يا ياسمين.
ياسمينا : ما هو علشان كدا مينفعش كان يحصل اللي حصل دا يا هدى وهي مش بتفرق برضو بين كبير وصغير بس لو كبير كمان بيكون مطلوب منه يكون حكيم شويه في المواقف اللي زي دي خصوصا لما تبقى عيله صغيرة عارفه لو كانت مليكة كنت قولت لك ايوه.. معاكي حق علشان الست مينفعش جوزها يبقى قاعد مع أهله وتقعد تقوله يلا لكن دي عيله صغيرة.
هدى : وانتي ايه اللي عرفك بقى مش يمكن العيله الصغيرة دي مامتها اللي باعتها هو احنا بنشوفه كل قد ايه علشان مستعجله وملهوفه كدا تروح بيت أهلها ما هو هيوديها متسربعه على إيه.
فيروز : ملناش دعوة وكمان هي مجاتش قدامنا قعدت تقوله يلا يلا وديني عند بابا دا البنت الصغيرة اللي جات قالت له كدا ودا اللي ظاهر قدامنا اللي بتحكي فيه دا بقى حاجات احنا مشوفنهاش وطالما مشوفناش ومسمعناش بودننا يبقى خلاص.
ياسمينا : يا ستي برضو لو حصل مااجرمتش يعني كلنا بنغلط ودي حاجة تافهه مش مستاهله يا هدى تغلطي في أخوكي كدا هو راجل وبيعرف يمشي بيته ازاي.. الغلط يا حبيبتي ملوش لازمه.
هدى : خلاص يا جماعه أنا كنت مضايقه شويه واهي جات فيه معلش هصالحه.
فيروز : وايه اللي مضايقك بقى احكيلنا بس لو سر خلاص بلاش.
هدى : مش سر ولا حاجة.
______
في شقة علاء.
معتز : لازم تاخد بالك من صحتك يا علاء.
علاء : حاضر.
معتز : وكمان الولاد لازم يبقوا جنبك علشان لو احتاجت حاجة.
علاء : حاضر.
معتز : هما فين؟
علاء : حاضر.
معتز : حاضر ايه أنا بسألك كريم ومعتز فين؟
علاء : معرفش.
معتز : طب أنت قاعد كدا لوحدك طول الوقت؟
علاء : لأ بيجوا يقعدوا معايا شوية وبعدها كل واحد بيروح يشوف حاله
أنا مش قاعد طول الوقت يعني يا معتز بنزل اشوف شغلي تحت ولما بيغلبني النوم بطلع تاني.
معتز : خليك أنا اللي هفتح.
حازم : سلام عليكم.
يرددوا : وعليكم السلام.
حازم : ازيك يا دكتور معتز؟
معتز : الحمد لله.
حازم : عامل ايه النهاردا يا علاء؟
علاء : تمام ادخل يا حازم.
حازم بيدخل..
معتز : طيب يا علاء مش عاوز حاجة أنا هجيلك بكرة.
علاء : طيب.
معتز : عاوز حاجة يا أستاذ حازم.
حازمِ : لا متشكر تعال في أي وقت البيت بيتك.
معتز : تسلم دا من ذوقك سلام.
ويخرج معتز ويقفل باب الشقة.
حازم : ايه يا علاء عامل ايه؟
علاء : كويس يا حازم.
حازم : كريم كلمني قال لي إن بكرة هتروح المستشفى علشان هتبتدي تاخد العلاج.
علاء : كريم مين أخويا؟
حازم : لأ كريم ابنك.
علاء : اه طيب..
حازم : هتكلم مين؟
علاء : هكلم كريم يجيلي عاوز اشوفه.
حازم : طب استنى هنادي عليه.
علاء : لأ أنا هكلم كريم أخويا.
حازم : كدا.. طيب بقولك ايه ما تيجي نخطف رجلنا لحد هناك نقعد معاهم شوية بقالي كتير مشوفتش فريدة ايه رأيك؟
علاء : ماشي هغير هدومي وانزل معاك.
حازم : طيب أنا هنزل اشغل العربية تكون لبست.
______
في فيلا آسر.
سهر : ايه يا مليكة مبتاكبيش ليه يا حبيبتي؟
ملك : أنا عارفه مالها كدا من ساعة ما جات وهي ساكته ومسهمه يا خوفي يكون اللي في بالي.
سهر : ايه اللي في بالك ده؟
مليكة : مفيش حاجة يا مامي.
ملك : دلوقت يعني اتكلمتي امال إيه مالك شايله طاجن ستك ليه؟!
مليكة : مفيش.
_____
في الكافيه.
حمزة : كل المشاريع اللي ماشيه اليومين دول أكل يعني مطعم شغال كافيه عربية فول حتى مفيش مشكلة لكن تقولي عقارات وبتاع لا يا حبيبي ابعد عنها اليومين دول وبعدين هو أنت معاك فلوس تشتري أرض وتبني وتأجر شقق؟!
امال أحلامك راحت فين يا دكتور؟!
سيف : أحلامي اخدتها الحدايه وطارت.
حمزة : هههههههههههه
سيف : بتضحك على ايه؟
حمزة : تصدق مش عارف يمكن علشان حضرتك سيبت شغلك هنا وسافرت معرفش سافرت ليه أصلا واديك راجع اهو عاوز تبدأ من جديد هنا.
سيف : السفر دا كان تجربة بالنسبة لي أكيد استفدت منها كتير.
حمزة : بس في المقابل برضو خسرت حاجات كتير أنا مش بحبطك بالعكس أنا خايف على مصلحتك وزعلان إنك سيبت شغلك هنا رغم انهم كانوا متمسكين بيك سواء دكتور هشام ولا دكتور كريم وكنت ماشي كويس.
سيف : تفتكر ممكن دكتور هشام يقبلني عنده في الشركة تاني؟
سيف : ايش معنى دكتور هشام يعني مجبتش سيرة دكتور كريم في الحوار.
سيف : يمكن علشان دكتور كريم لين شوية في التعامل.
حمزة : هههههههههههه بالعكس أنا بحس دكتور كريم شديد شوية في شغله أنا متعاملتش معاه بس اللي يعرفوا بيقولوا كدا دكتور آدم ابن أخت مراته بيقولي إنه شديد في الشغل وفي نفس الوقت بيدي كل واحد حقه لكن مبيتهاونش أبدًا في أي غلط يحصل في المستشفى.
سيف : طب ما دا الصح هو غلط في ايه؟
حمزة : مقصدش إن دا غلط بس يكون في لين شوية احنا بشر يعني وكلنا بنغلط.
سيف : غلط عن غلط يفرق يا حمزة أظن التهاون والاستهتار في ارواح الناس مش حاجة بسيطة وتعدي.
حمزة : عندك حق وأكيد هو برضو فاهم شغله كويس بس احنا اللي ساعات بنستسهل حاجات وبنفكر إن دا الطبيعي مالك بقى كنت نازل من عند حماتي كدا شكلك مش مظبوط حد زعلك ولا ايه؟
سيف : ها.. لأ محدش زعلني.
__________
بعد مرور اسبوع من الأحداث.
في عيادة الطبيبة النفسية.
الطبيبة : علاقتك بيها كدا من البداية؟
سهر : لأ احنا كنا أصحاب من قبل ما اتجوز أخوها.
الطبيبة : لحد امتى فضلتوا أصحاب؟
سهر : لحد ما سافرت كنت حامل في بنتي الكبيرة.
الطبيبة : قعدتي كتير مسافره؟
سهر : اه لحد ما ولدت بنتي التانية من شهر ونص تقريبا.
الطبيبة : طول الفترة دي مكانش في أي تواصل ما بينكم؟
سهر : قليل خالص كل واحد انشغل بحياته.
الطبيبة : هي بتتدخل بينك وبين زوجك؟
سهر : لأ وبرضو معرفش لإننا مبنتجمعش مع بعض.
الطبيبة : لكن زوجك مبيحكيش حاجة تخصه مثلا ويقولك إن دا رأيها؟
سهر : لأ.
الطبيبة : طيب علاقتك بزوجك توترت امتى؟
سهر : كان من قبل أخر مشكلة بتحصل مناوشات كدا يعني لكن أخر مرة كانت مختلفه.
الطبيبة : برأيك كدا يا سهر مين صاحب المشكلة؟
سهر : معرفش.
الطبيبة : متأكدة؟
سهر : هو بصراحة اوقات بحس إن أنا مزوداها يعني شوية وأوقات لأ.
الطبيبة : طب ايه وجهة نظرك إنك مش صاحبة المشكلة خالص؟
سهر : ان مازن مبيتعاملش معايا كويس مبقتش حاسه بحبه ليه.
الطبيبة : امتى حسيتي الاحساس ده؟
سهر : من بعد ولادتي الأولى في بنتي..
الطبيبة : محاولتيش تعرفي منه ايه السبب ولا متكلمتوش؟
سهر : أنا بصراحة رومانسية وجوزي عملي قوي يعني الشغل والدراسة أهم حاجة في حياته.
الطبيبة : معندوش وقت ليكم دا اللي تقصديه؟
سهر : اه على عكس لما يتكلم مع أخته بيكون كويس خالص ودايمًا لما يتكلم معاها يناديها حبيبته.
الطبيبة : انتي عاوزه الكلمة اللي زي دي تبقى ليكي  انتي بس مش كدا؟
سهر : اه ونبهته للموضوع دا أكتر من مرة علشان ياخد باله لكن هو كإنه بيتعمد يقولها قدامي كتير علشان يضايقني.
الطبيبة : ليه بتقولي كدا مش يمكن هو متعود على كدا يعني دي لازمه في كلامه بدل ما يناديها بـ اسمها يقولها حبيبتي عادي ملهاش علاقة بالحب اللي بين الست والرجل دا حب أخوي.
سهر : يعني المشكلة عندي أنا يا دكتور؟
الطبيبة : بالظبط كدا والا مكنتيش جيتي عندي لو شايفه إن كل دا طبيعي.
سهر : ما يمكن هما اللي مش طبيعيين؟!
الطبيبة : مش طبيعيين ازاي تقصدي إيه؟
___________
في شقة إياد.
إياد : ياريت يا ياسمين بس انتي عارفه إن دي تاني مرة أأجل السفر ومش هينفع اتأخر أكتر من كدا انتي ميعادك امتى؟
ياسمين : يمكن اعملها الاسبوع الجاي.
إياد : معلش يا حبيبتي تقومي بالسلامة كان بودي ابقى جنبك وقتها بس ظروف شغلي بقى انتي عارفه.
ياسمين : عارفه يا إياد قفل الشنط بقى علشان متتأخرش أنا ماشيه يا دينا عاوزه حاجة؟
دينا : ما انتي قاعدة يا ياسمين.
ياسمين : معلش بس علشان سايبه الولاد مع ليلى كفاية عليها ولادها مجننها.
دينا بابتسامة : ماشي يا ياسمين سلميلي عليها.
ياسمين : حاضر يوصل يا حبيبتي.
إياد : استني يا ياسمين هوصلك.
ياسمين : لا معلش خليك علشان تشوف حاجتك ومتتنساش حاجة وأنت ماشي.
إياد : لا متقلقيش احنا خلصنا حاجتنا مش كدا يا دينا؟
دينا : اه خلصنا.
إياد : دا مين بقى اللى جايلنا ده؟
دينا : تلاقي باباك ومامتك.
إياد : لأ أنا معرف بابا إننا هنعدي عليهم واحنا ماشيين.
بيفتح إياد باب الشقة يلاقي والدته.
علا : ايه مالك زيارة غير سعيدة أنا عارفه.
إياد : لا أبدًا يا ماما اتفضلي.
كانت ياسمين بتاخد شنطتها وماشيه.
علا : ايه دا هي ياسمين كمان هنا!
ياسمين : ازيك يا ماما؟
علا : أحسن منك.
ياسمين : طيب دايمًا... أنا ماشيه يا إياد عاوز حاجة؟
إياد : استني بس يا ياسمين هوصلك.
ياسمين : لا معلش خليك التاكسي واقف تحت.
وخرجت ياسمين وقفلت الباب.
علا : تعال أختك ميتخافش عليها قلبها جمد خلاص.
دينا : تشربي ايه يا طنط؟
علا : مش عاوزه حاجة خليكي مستريحه ولا أقولك اتفضلي جوه علشان عاوزه ابني في كلمتين.
نظرت دينا لـ إياد ودخلت جوه.
إياد : خير يا ماما؟
علا : خير يا حبيبي بقولك ايه أنا شقتك دي تلزمني.
إياد : نعم!
علا : اسمع بس بدل ما تدفع إيجار شقة وأنت قافل شقتك دي تفكر بالعقل كدا اقعد أنا في الشقة وتوفر فلوسك.
إياد : لا متقلقيش يا ماما أنا مستعد ادفع إيجار شقتين مش شقة.
علا : طب وليه مش أنت أولى بالفلوس دي برضو وبعدين الشقة مش هتخس ولا هيتاكل منها حته دا أنا هفتحها واهويها وانضفها واروقها كل كام يوم بدل ما بترجع بتلاقيها معبيه تراب وتجيب اللي تنضف وتعمل أنا بقى هوفر عليك كل ده.
إياد : معلش يا ماما مش هينفع.
علا : كدا.. طيب أنا برضو كنت عارفه إنك مش هتوافق وهتسمع كلام مراتك.
إياد : دينا ملهاش علاقة بالموضوع دا يا ماما أنا لو عاوز كدا كنت عملت دا من الأول بس أنا حابب امشي وأنا قافل شقتي.
علا : هسرقها يعني يا إياد!
إياد : لا يا ماما مش كدا أنا بس...
تقاطعه علا : ماشي على العموم براحتك ولو مش عاوز تدفعلي كمان إيجار الشقة برضو براحتك أنا هشتغل واصرف على نفسي.
إياد : مين قال الكلام دا بس يا ماما أنا قولت لك إن إيجار الشقة وأي مصاريف تحتاجيها عليه.
علا : طب والفلوس اللي كنت قولت لك عليها.
إياد : مش هقدر ادفع أنا مبلغ زي ده أنا لو معايا كنت قعدت وبطلت سفر أحسن.
علا : ماشي اهو أنت وأختك لؤمه الواحد مش عارف طالعين لمين؟!
إياد : شكرًا يا ماما.
علا : لا شكر على واجب يا حبيبي.. سلام.
_________
في شقة سيف..
بياخد شاور جوه ومليكة بتقفل الشنطة اللي هياخدها معاه وهو مسافر.
مليكة : سيف في حاجة تاني هتحطها في الشنطة دي؟
سيف : خرجتي حاجة من عندك؟
مليكة : لأ.
سيف : خلاص اقفلي الشنطة على كدا.
مليكة : حاضر.
بتقفل مليكة الشنطة وقايمه جرس الباب يرن..
مليكة : حاضر يا يوسف أنت يا ابني.. ايش معنى دلوقت مسمعتش جرس الباب؟
كانت بتلبس حاجة مناسبة وخارجة تفتح باب الشقة كان يوسف وحلا الاتنين بيجروا ويتخانقوا مين يفتح الباب.
مليكة : وسع أنت وهي كان من الأول لسه فاكرين.
ويتفتح باب الشقة.
ياسمينا بابتسامة : سلام عليكم.
مليكة : وعليكم السلام.. اتفضلي يا طنط.
فيروز : طنط بس؟!
مليكة : اتفضلوا.
دخلت ياسمينا وفيروز وهدى.
فيروز : هو سيف مشي ولا ايه؟
يوسف : لأ بابي جوه هدخل اقوله.
مليكة : يوسف تعال هنا.
يوسف : حاضر.
ياسمينا : لولي ازيك يا حبيبتي عامله ايه؟
حلا : كويسه يا عمتي انتي حلوة؟
مليكة : قولنا ايه؟
حلا : حضرتك حلوة؟
فيروز : هههههههههههه اه حلوة انتي كمان حلوة؟
حلا : ايوه.
تقرص ياسمينا هدى علشان تتكلم.
هدى : ازيك يا مليكة؟
مليكة : الحمد لله.
بعد اذنكم.
فيروز : متتعبيش نفسك يا مليكة احنا جايين نسلم بس على سيف قبل ما يسافر.
مليكة : ثواني بس يا طنط جايه.

ودخلت الغرفة كان سيف خرج وبيكمل لبس.
سيف : مين اللي بره يا مليكة ؟
مليكة : اخواتك.
سيف : اه طيب هلبس وجاي... ايه مالك واقفه ليه؟
مليكة : مفيش.
سيف : طيب اعملي لهم حاجة يشربوها.
مليكة : حاضر.
وخرجت مليكة على المطبخ.

هدى : شايفه مقابلتها لينا منتهى قلة الذوق.
ياسمينا : هدى خليها تعدي على خير احنا جايين نصلح الأمور مش نعقدها.
فيروز : بس سيف جه.
سيف بابتسامة بيسلم عليهم وجه لحد هدى بتمد ايدها.
ياسمينا : الصلح خير بقى يا سيف وأنت قلبك كبير سلم على أختك قبل ما تسافر بالسلامة.
مد سيف ايده لهدى اللي بكت لما شعرت إنه مش عاوز يكلمها.
فيروز : حصل ايه بس يا هدى لكل ده؟
هدى : انتي مش شايفه دا أنا جايه له لحد عنده يقابلني كدا.
سيف : اسمعي يا هدى أنا معملتش حاجة تخليكي تعيطي ولو شايفه ان أنا غلطان يبقى غلطك في بيت ياسمين دا كان إيه؟!
ياسمينا : خلاص يا سيف احنا جايين نسلم عليك ونقولك تروح وتيجي بالسلامة مش جايين نتعاتب.
سيف : ماشي يا ياسمين.
مليكة جايه بالعصير : اتفضلوا.
ياسمينا : تسلم ايدك يا مليكة تعالي اقعدي هنا جنبي.
راحت مليكة تقعد بجانب ياسمينا.
ياسمينا : حقك علينا كلنا يا مليكة.
مليكة : ليه يا طنط محدش غلط فيه.
ونظرت مليكة لهدى..
هدى : حقك عليه يا مليكة ودا بس علشان خاطر سيف.
سيف : ماشي هعديها بس علشان مسافر.
فيروز : تروح وتيجي بالسلامة يا أخويا.
نظر سيف لهدى : متشكر يا فيروز.
هدى : مع السلامة يا سيف خلي بالك من نفسك.
_______
في شقة مجدي..
في منزل معتز(ابن علاء).
بيدخل هو ووالده..
معتز : رنا.. رنا.
في التليفون.. 📞
رنا : الظاهر معتز جه يا ماما.
والدة رنا : طيب يا بنتي روحي شوفي جوزك يمكن يعوز حاجة.
رنا : لأ هو جايب والده وجاي أصل أنا كنت ناقصه.
والدة رنا : معلش يا بنتي استحملي.
رنا : هعمل إيه يا ماما لازم استحمل علشان معتز مش طايق نفسه اليومين دول ولو اتكلمت معاه بالذات في الموضوع ده هيتخانق معايا أكيد.
والدة رنا : وهي سلفتك مبقتش عاوزه تخدمه ولا ايه؟
رنا : معرفش بقى بس ما اعتقدش معتز هو اللي عاوز يشيل باباه شوية زي ما أخوه شايله.
والدة رنا : طيب يعني فترة بسيطة ويرجع شقته مش كدا؟
رنا : معرفش.. ادعي إنه ميطولش هنا علشان أنا مش هستحمل كتير.
معتز : رنا.. انتي فين؟
رنا : حاضر جايه مع السلامة يا ماما.
وقفلت مع والدته وراحت جري تشوف معتز عاوز منها ايه.
_______
في فيلا كريم.
فريدة : طب مقولتلوش ليه يجي هنا يا كريم.
كريم : مرضيش يا فريدة.
فريدة : طب والعمل؟
كريم : معرفش بقى بس ولاده مش هيقدروا يخدموا.
فريدة : ايه الدوشة دي؟
كريم : معرفش.
قام كريم وفريدة جري.
_____
نكمل الحلقة الجايه.