تكملة باقي حلقات الجزء الرابع من أنت قلبي

الجزء الرابع /الحلقة ١١٦

#أنت_قلبي٤
___________
الحلقة ١١٦

مجدي بيفتح باب الشقة وعلى كتفه بنته..
بعد ما الباب اتفتح التفت لزينة.
مجدي : اتفضلي.
نظرت له ومتكلمتش ودخلت جوه..
مجدي دخل وقفل الباب..
مجدي : واقفه ليه مش هتدخلي تغيري هدومك؟
زينة : لأ.
وقعدت في الريسبشن.
مجدي : انزلي بقى يا روفه العبي.
واخد الكرسي بتاعها وقعدها وهو بيهز فيه علشان متبكيش.
ولحظات من الصمت ومجدي بيلاعب بنته وبعدها.
مجدي : ايه يا حبيبتي هتفضلي ساكته كدا؟
زينة : السكوت من دهب.
مجدي نظر لها بابتسامة : طب مش تقومي كدا تغيري هدومك علشان نقعد براحتنا.
مردتش زينة فقرب منها.
زينة : لو سمحت متقربش وخليك عندك.
مجدي : فيه ايه بس يا زينة مش مفروض يعني إننا اتصالحنا.
زينة : اللي بينك وبين بابي حاجة واللي بينا هنا حاجة تانية.
مجدي : مش فاهم.
زينة : لا أنت فاهم أنا أقصد ايه كويس قوي ولو مفكر إن رجوعي معاك هينهي كل الخلافات اللي ما بينا تبقى غلطان.
مجدي : خلافات!
حبيبتي أنا اعتذرتلك قدام بابي وانكل هشام ووعدتهم ووعدتك اني مش هزعلك تاني ليه المعاملة الوحشه دي بقى يا زينة؟!
زينة : أنا دبستك! ليه يا حبيبي هو احنا مش متجوزين ولا مفكرني ايه؟!
مجدي : يا حبيبتي أنا آسف حقك عليه غلطان يا ستي اعتبريني عيل وغلطت خلاص بقى.
زينة : والست اللي بتخرج تقابلها وتسهر معاها دي بقى وضعها ايه؟
مجدي : أولا أنا كنت بقابلها علشان الشغل وبس والسهرة اللي بتحكي عنها دي كانت مفروض برضو خاصه بالشغل ومكدبتش عليكي لما قولت لك إني اتفاجئت باللي حصل يومها واحرجت للأسف ودي كانت غلطه مني لكن أنا لا بقابل ستات ولا بسهر معاهم يا زينة.
زينة : واللي قبلها لما سمعتك بتتكلم في التليفون بتقولها حددي الوقت والمكان المناسب وأنا هجيلك دا كان إيه يا دكتور؟
مجدي : كان لعب عيال ولا كنت هنزل ولا هقابل حد دي بنت قابلتها مرة في فرح واحد صاحبي واتشدت ليه بس مفيش حاجة من ناحيتي.
زينة :وأنت كل بنت تبصلك لازم تصاحبها ويبقى في بينكم كلام؟!
مجدي : غلط طبعا وأنا آسف ودا مش هيحصل تاني بعد كدا صدقيني يا حبيبتي فُكي بقى علشان خاطري وقومي غيري هدومك خلينا نفرفش كدا شوية وننسى المشاكل دي.
زينة : انزل شوف شغلك يا مجدي.
مجدي : لا أنا قاعد معاكي مش نازل.
زينة : لا هتنزل تشوف شغلك علشان أنا ورهف هنام يلا يا رهف.
واخدت زينة رهف ودخلت جوه وتركت مجدي قاعد لوحده.
بعد شوية..
مجدي : زينة.. زينة.
زينة بصوت ناعس : نعم.
مجدي : أنا نازل مش عاوزه حاجة اجيبهالك وأنا جاي؟
زينة : لأ.
مجدي : ولا عاوزه حاجة لرهف؟
زينة : لأ.
مجدي : طيب.
وقايم ماشي رجع تاني وضم زينة ليه.
نظرت له بدهشه.
مجدي : وحشتيني... صدقيني يا زينة أنا مفيش في قلبي غيرك ولا حبيت ولا عمري هحب واحدة غيرك.
زينة كانت بدأت تلين لكن بعدها قالت له : مجدي انزل شوف شغلك.
مجدي : لو قولتيلي اقعد خليك هنا جنبي مش هنزل.
زينة : انزل شوف شغلك يا مجدي.
مجدي : متقسيش عليه يا زينة أنا بحبك.
زينة : انزل شوف شغلك بقولك.
مجدي : طيب لما ارجع هنتصالح ولا هتفضلي قافله كدا مني؟
زينة : مجدي أنا بقالي كام يوم مبنامش بسببك سيبني أنام ولما أقوم هنشوف.
مجدي بابتسامة : اوك هسيبك تنامي بس لما أرجع لازم نتصالح.. مش كدا ولا ايه؟
غطت زينة نفسها علشان تنام.. خرج مجدي وقفل الباب.. وبعد ما اطمنت إنه نزل قامت بسرعة خرجت تروق الشقة وتشوف هتعمل أكل ايه علشان لما مجدي يرجع يتعشوا مع بعض.
________
في المستشفى.. وتحديدًا في عيادة الطبيب.
كان علاء نايم وبيتم الكشف عليه وكريم قاعد على الكرسي بعيد.
الدكتور : اتفضل..
علاء : خلصت كشف يا دكتور؟
الدكتور : اه خلصت..
وقعد الدكتور على كرسي المكتب وكريم قاعد قصاده وعلاء كان بيقفل زرارير القميص قام كريم يساعده يقوم.
علاء : متشكر.
نظر له كريم ومتكلمش.
ورجع قعد مكانه وعلاء قاعد قصاده.
الدكتور : شوف يا دكتور علاء احنا هنعمل شوية فحوصات كدا علشان نقيم الحالة العامة يعني وعلى أساسها نبدأ العلاج.
علاء : ايوه يا دكتور ما أنا عملت قبل كدا تحاليل أكتر من مرة ودكتور كريم...
قاطعه الدكتور : معلش الفحوصات دي استكمال للي تم قبل كدا لازم يبقى نفسك طويل معانا شوية ودا كله لمصلحتك.
كريم : نيجي تاني امتى يا دكتور؟
الدكتور : بكرة التأخير ملوش أي لازمة بالعكس كل أما خلصنا أمورنا أسرع بيكون أفضل.
علاء : دكتور أنا عارف حالتي كويس وعارف كمان إن نسبة الشفاء ضعيفه وفهمت أكتر سبب وجع معدتي ولما اتقالي القولون بس فيه شوية مشاكل عرفت إنها مش مشاكل عادية لكن كنت بحاول ابعد نفسي عن الأوهام اللي بتجيلي دي فعلشان خاطري أنا مش عاوز ادخل في الموال ده لإني عارف نهايته.
الدكتور : غلط اللي بتقوله ده كان من أول ما حسيت بالتعب ده كنت لجأت لدكتور متخصص وهو كان هيقولك تعمل ايه ويمكن كان سهل علينا خطوات كتير دلوقت حضرتك دكتور صيدلي وأكيد فاهم النقطة دي مهمه ازاي في العلاج لكن الإهمال اللي حصل هو حقيقي خلا نسبة الشفاء تضعف شوية لكن مفيش حاجة مستحيله متيأسش وقول أنا هعافر لـ أخر نفس فيه ومحدش فينا عارف ايه اللي ممكن يحصله بس ادينا عايشين كلنا بنعافر في الدنيا لحد ما تيجي نهاية كل واحد فينا الخلاصه يا دكتور علاء مش عاوزك تيأس أبدًا الحياه دي نعمه خليك فاكر إن من حقنا نتمسك بيها.. أنت هتسمع الكلام وتعمل اللي هنقولك عليه دا بس اللي نقدر نعمله.. ساكت ليه يا دكتور كريم؟
كريم : بسمع لحضرتك يا دكتور.
الدكتور : أنت كمان عليك مسؤلية كبيرة الراجل ده ميهملش في صحته لو لزم الأمر تاخده عندك وتتابعه بنفسك.
كريم : ياريت بس هو يقبل.
علاء : ليه كل ده يعني أنا هعمل اللي هتقول عليه يا دكتور متقلقش.