تكملة باقي حلقات الجزء الرابع من أنت قلبي

الجزء الرابع /الحلقة ١٤٥

#أنت_قلبي٤
___________
الحلقة ١٤٥

واقف كريم مع حازم أمام المنزل القديم..
كريم : هي عربية علاء بتعمل ايه هنا؟
حازم : معتز قال لكريم إنه هياخدها؟
كريم : اه.. طيب عاوز حاجة؟
حازم : لأ سلامتك بس طمني على فريدة هي كويسه دلوقت؟
كريم : اه أحسن من قبل كدا.
التفت حازم الناحية التانية كان كريم ومعتز(ولاد علاء) نازلين من فوق.

كريم ص : معتز عمك كريم واقف هناك.
معتز : اعمله ايه يعني؟!
كريم ص : مش هتيجي معايا نسلم عليه؟
معتز : لأ.
كريم ص : طيب أنت حر.

كريم ص : سلام عليكم.
يرددوا : وعليكم السلام.
كريم ص : ازيك يا عمي اخبارك إيه؟
كريم : الحمد لله
يا كريم أنت عامل ايه؟
كريم ص : أنا كويس طنط فريدة وجميلة بخير وزين بيتصل يطمنكم عليه؟
كريم : اه يا حبيبي كلنا بخير.
كريم ص : دايمًا يا عمي طب ايه مش هتطلع معانا فوق تشرب حاجة؟
كريم : معلش مرة تانية علشان بس هعدي على المستشفى قبل ما اروح البيت.
كريم ص : تشرف وتنور يا عمي في أي وقت.
كريم : حبيبي تسلم عاوزين حاجة؟
حازم : لا سلامتك ابقى سلملي على فريدة هاجي اقعد معاها بالليل شوية.
كريم : تشرف وتنور يا حازم.. سلام عليكم.
يرددوا : وعليكم السلام.
يركب كريم العربية ويمشي.

معتز : ايه يا كريم مش يلا؟
كريم : جاي.. حاضر.
حازم راح لمعتز : ايه يا معتز خير؟
معتز : خير يا عمي فيه حاجة؟
حازم : إيه يا حبيبي أنت مش واخد بالك إن عمك كان واقف معايا ولسه ماشي ولا ايه؟
معتز : اه اخدت بالي.
حازم : طب مش واجب برضو كنت تيجي تسلم عليه دا في مقام والدك ولا ايه؟
معتز : معلش مستعجل يلا يا كريم.
حازم : عندك حق أصل الواجب والأصول محدش بيعلمهم لحد هو الواحد كدا بيتولد بيهم.
معتز : شكرا يا عمي بس مجراش حاجة يعني لما مسلمتش هو يعني كان كلمني؟!
حازم : معلش اصل اليومين دول الكبير هو اللي بيروح للصغير يسلم عليه.
معتز : يلا يا كريم.
كريم : حاضر جاي فيه ايه مالك متسربع على ايه؟!
معتز : هتيجي نروح المشوار ده ولا ايه نظامك بالظبط؟!
كريم : بعد اذنك يا عمي.
حازم : اتفضل يا ابني.
كريم : يلا يا أخويا واقف ليه؟
معتز : مش كنت مستني حضرتك!
_________
في التليفون.. 📞
هشام(الأب) : تمام يا فندم متشكر.
أمل : ها يا هشام قال لك إيه؟
هشام(الأب) : بيقولوا قبضوا على الراجل ده.
ياسمين : بجد قبضوا عليه يا عمي؟
هشام(الأب) : ايوه.. يا بنتي اتقبض عليه.
هشام(الابن) : لقيوا معاه الحاجة؟
هشام(الأب) : لأ باعها.
ياسمين : إيه!
هشام(الأب) : متقلقوش هو راح علشان يبيعها...

فلاش باك..
الصايغ بيشاور للشاب اللي شغال معاه..
الصايغ لربيع : ثواني وجاي.
ربيع : اتفضل.
كان ربيع بيتلفت يمين وشمال وشوية يخرج بره يراقب الطريق ويدخل تاني في الوقت ده كان الصايغ معاه مكالمة تليفونية.
في التليفون.. 📞
الضابط : اسمع متخلهوش يشك فيك اتعامل معاه عادي جدًا تمن الدهب بقيمته الحقيقية وادفعله الفلوس وخليه يمشي وسيب الباقي علينا.
الصايغ : تمام بس أنا معييش المبلغ كامل.
الضابط : هنبعتلك حد بباقي الفلوس بس اشغله شوية.
الصايغ : حاضر.