تكملة باقي حلقات الجزء الرابع من أنت قلبي

الجزء الرابع /الحلقة ١٣٣

#أنت_قلبي٤
___________
الحلقة ١٣٣

في شقة مجدي.
مجدي : بس بصراحة عجبتيني قوي وحسيت إن دا أكتر حاجة ردت لي اعتباري لما قربتي مني ومسكتي ايدي وقولتي جوزي ملوش في الكلام ده هههههههه
زينة : أنا كنت برد اعتباري قدامها علشان متفكرش إني اتكسرت باللي عملته واللي أنت كنت سبب فيه.
مجدي : ايه اللي بتقوليه دا يا زينة؟
زينة : ايوه.. يا مجدي أنت اللي أدت لها فرصة إنها تعمل كدا أنت بسكوتك على تصرفاتها رغم إنك راجل وعارف إن الحاجات دي ملهاش غير معنى واحد لكن تماديت معاها وسكت علشان تخلص شغلك ويمكن مفيش مانع اتبسط شوية بـ إهتمام ست بيه متبصليش كدا أنا متأكدة من كل كلمة بقولها لاني فاكرة كويسه قوي في الليلة اللي اتعمل لك فيها عيد الميلاد من حضرتها طبعا ودا اللي عرفته بعدين لكن فاكرة لما كنت راجع مبسوط قوي من بره حتى الهدية اللي هادتك بيها محاولتش تخبيها وكنت فرحان بيها لدرجة إنك لبستها وجيت لي بيها كل دا دليل على إنك كنت فرحان بحب واهتمام الست بيك زعلان ليه بقى منها دلوقت؟!
مجدي : زينة أنا منكرش ان في جزء في كلامك صح إني مصدتهاش من الأول لكن حكاية إني كنت فرحان دي مش صح تقدري تقولي إني كنت بتصنع الفرحه قدامها.
زينة : ميهمنيش لإن المهم في الموضوع إنك اللي فتح لها الباب ودلوقت زعلان لأ هي كانت عارفه بتعمل ايه كويس وأنا كنت محتاجة أرد كرامتي قدامها لإنها اعتبرت فرحتك بحبك ليها إني مقصرة معاك أو مبتحبنيش كنت محتاجة احسسها إن لأ جوزي بيحبني وطبعا دي كانت  حاجة صعبه عليه.
وتبكي زينة..
مجدي يضمها ليه : صدقيني يا حبيبتي أنا محبتش عمري كله غيرك عاوزك تنسي أنا معاكي إنها كانت غلطه واوعدك عمرها ما هتتكرر.
زينة : لو مكانش كل حاجة اتكشفت ليه يا مجدي كنت هتكمل؟
مجدي : لأ.
زينة : مش قادرة اصدقك مش عارفه.
بيمسح دموعها : صدقيني أنا اتصدمت زيك كدا حتى عيد الميلاد متبسطش بيه زي ما انتي متخيله بس أنا المفاجأة خلتني مرتبك مش عارف اتصرف فخلص الموقف بالصورة اللي شوفتيها دي لكن أنا من جوايا مكنتش أحب إن دا يحصل أنا مش عاوز الحب والاهتمام غير منك انتي بس مش من حد تاني.
زينة : مقصره معاك مش كدا؟
مجدي : لا يا حبيبتي أنا عارف إنك تعبانه علشان كدا هجيب لك حد يساعدك.
زينة : هتتجوز عليه؟
مجدي : لأ طبعاً
ههههههههههههه هجيب لك واحدة تساعدك في شغل البيت وتريحك من زن رهف شوية.
زينة : طيب.
مجدي : لسه زعلانه مني؟
زينة : مش عارفه بس يمكن مع الوقت انسى.
مجدي يضمها ليه مرة تانية : أنا آسف إن سيبت لك ذكرى وحشه تفتكريني بيها.
زينة : بس ياريت تكون اتعلمت حاجة من اللي حصل ده.
مجدي : اتعلمت واتربيت من أول وجديد.
زينة : طب وطي صوتك لباباك ومامتك يكونوا سمعينا.
مجدي : سمعينا ازاي هههههههه
زينة : مش عارفه.
مجدي : هههههههههههه
_______
في البلد.
حامد يدخل البيت يلاقي ناس كتير جوه قاعدين في الدور الأرضي يقرب
يلاقي أزواج عماته مع ولادهم متجمعين وبيدردشوا مع بعض.
ابن صباح : اهو حامد جه أهو.
يقوم والده (زوج صباح) وهو ابن عمها : اهلاااا اتفضل يا حامد.
حامد : سلام عليكم..
يرددوا : وعليكم السلام..
حامد : خير يا جماعة شرفتوا ونورتوا بس خير برضو؟
زوج كوثر : خير يا حامد اقعد اتفضل البيت بيتك برضو.
محمود : بيتنا كلنا يا عمي.
فرج(زوج كوثر) : طبعا يا ابني اقعد يا حامد علشان احنا عاوزينك في كلمتين.
حامد : وادي قعدة.. خير يا جماعة؟
زوج صباح : بقى يصح يا حامد تمسك في ابن عمك في الغيط وعاوز تضربه وكل ده ليه علشان بنت هنادي؟!
حامد : اسمها بنت عمك طارق يا عمي زي ما إني كدا لما حد بيجي يقولي إلحق ابن عمتك صباح حد ماسك فيه بقولهم لأ هو ابن عمتي صحيح بس قول ابن عمك محمود جوز عمتك واهي عمتي مش تقول لي بنت هنادي.
زوج كوثر : انتي جاي تعرفنا الأصول يا حامد ولا ايه طب أنت ابن هدى بقى ايه رأيك؟
حامد : مقبوله منك يا عم فرج وطالما قولتها في وشي وفي بيتي اني مش هتكلم لكن بنت عمي مش موجودة ولو مش هتزعل اني مش هتكلم بس بلاش الكلام ده هما ولاد عمي من صلبه مش من راجل تاني علشان نقول كدا.
زوج صباح : أنت ايه مشكلتك دلوقت وليه ماسك في ابن عمك وولاد عمتك يا حامد هي دي الأصول برضو وصلة الرحم يا ابن الغالي؟
حامد : الأصول وصلة الرحم اتقطعت من زمان يا عمي ولا مش واخدين بالكم وأنتم جايين كلكم كدا بربطة المعلم علشان تقولولي ليه بحامي على بنت عمي يعني واقفين مع الراجل ضد بنت ومحدش قال للراجل ده عيب لم نفسك وابعد عنها دي بنت عمك لحمك وعرضك ولا علشان عمي مات فكرتوا رجالة العمدة كلها ماتت دا لو جدي كان عايش كان مسك العكاز بتاعك كسره فوق نفوخه.
محمود : متتكلمش كلام أكبر منك يا حامد.
فرج(زوج كوثر) : احنا قعدنا مع بعض واتفقنا إن الحل لكل المشاكل اللي بينك وبين ابن عمك إن كل واحد يعيش لوحده.
حامد : تمام مفيش مشكلة.
محمود : لا أنت مش فاهم اني هشتري البيت وأنت اتفضل بقى شوفلك حتة تانية اسكن فيها.
حامد : هههههههههههه لا ضحكتني يا ابن عمي اسيب ايه يا حبيبي أنت مش عاجبك نبقى شركا في بيت واحد يبقى أنت اللي تسيب البيت مش اني مش عاجبك خليك قاعد اني مقولتش تمشي.
زوج صباح : بس اني كبير العيله يا حامد وبقولك تسيب البيت علشان أنت اللي عامل مشاكل.
حامد : صح اني اللي عامل مشاكل علشان واقف ضدكم مش كدا.
زوج كوثر : أنت مش واقف ضدنا أنت واقف في صف ولاد هنادي.
حامد : اسمهم ولاد طارق ابن العمدة اللي هما ولاد عمي وشايلين اسم العيله لكن نقول ايه بقى حتى دي بتنكروها.
زوج صباح : احنا عمرنا ما اعتبرنا إنهم ولاد طارق أول حاجة أمهم لما حملت في الواد الكبير ده كان عمك عامل حادثة ومكانش بيتحرك أنت كنت صغير وقتها متوعاش للكلام ده وجات أمها هنا وبلفت ستك بكلمتين وطلعت عملت حوار على عمك فوق وهو صدقهم والواد لما اتولد اتكتب بـ اسم عمك و البنت اتولدت في مصر و...
حامد يقاطعه : لا هتكمل تقول ايه بقى بعد الكلام اللي اتقال ده اسمع يا جوز عمتي أنت مش هتبقى أغلى عندي من عمي وولاده واللي هيجيب سيرتهم بكلمة هقطع لسانه.
زايد : أنت بتقول ايه يا واد أنت؟!
حامد : اني مش واد اني بفهم في الأصول وعارف إن رمي الناس بالباطل دي حسابها كبير قوي
ستي مش هتوالس في الغلط يا عمي وابويا وعمي هما كمان مش هيداروا على حاجة زي كدا دا غير إن صاحب الشأن متكلمش يبقى انتو هتعرفوا أكتر منه شرفتوا ونورتوا.
زوج صباح : أنت بتطردنا يا حامد من بيت عمي؟!
حامد : بيت العمدة ده يشرف وينور بالناس اللي تحترم أهل البيت ده لكن اللي يخوضوا في أعراضهم يبقى يتفضلوا من غير مطرود.
زوج صباح : أنت اتجننت ياله ولا ايه؟
حامد : أكيد متجننتش يا عمي لدرجة إني اسب الناس في بيوتهم واستغرب إنهم يطرودني.
وتركهم وطلع فوق.