تكملة باقي حلقات الجزء الرابع من أنت قلبي

الجزء الرابع /الحلقة ١٣٩

#أنت_قلبي٤
__________
الحلقة ١٣٩

في التليفون.. 📞
فريدة : أنت فين يا كريم؟
كريم : حاضر يا فريدة جاي.
فريدة : بقولك أنت فين؟
كريم : بشتري شوية حاجات للبيت.
فريدة : عملت إيه؟
كريم : لما اجي هقولك.
فريدة : طب بس طمني الأشعة فيها حاجة؟
كريم : لما اجي هقولك يا فريدة.
فريدة : طب ما تطمني يا كريم.
كريم : الأشعة تمام متقلقيش أنا بس قدامي نص ساعة وأكون عندك سلام بقى دلوقت.
فريدة وهي قلقانه : مع السلامة.
________
في شقة إياد.
إياد : يعني إيه يا ابني الكلام ده؟
مازن : أنا يا عمي خلاص جبت أخري مبقاش عندي استعداد احاول مرة تانية مع بنتك مستحيل تكون طبيعية.
منة : ميصحش كدا يا مازن راعي إنها بنتنا مهما كان.
مازن : يا طنط صدقيني في حاجة مش طبيعية بتحصل لإن الطبيعي إن أختي هي أختي مش حاجة تانية علشان تغير منها بالشكل ده.
خرجت سهر من جوه : أنا مش طبيعية صح لكن الطبيعي إننا نكون مسافرين اسبوع نغير جو وكل شوية أختك تتصل بيك مش كدا؟
مازن : بتتصل تطمن عليه دي إيه اللي فيها دي هو مجرد الكلام كمان بقى ممنوع يعني قولتي بلاش نتقابل وخلي الاجازة لينا قولت ماشي حقك اني اعوضك عن فترة الغياب اللي كنت فيها بعيد عنكم كلامي مع أختي في التليفون وسؤالها عني بقى فيها مشكلة كمان بس أنا اللي غلطان
ايوه.. أنا اللي غلطان علشان اللي بيتنازل في الكبيرة يتنازل في الصغيرة سكت كتير لحد ما خلاص فاض بيه.
إياد : طب اهدا يا ابني واقعد.
مازن : معلش يا عمي أنا مش هقدر اقعد ولا اتناقش معاها في أي حاجة حضرتك ابقى اتكلم معاها براحتك لكن أنا خلاص وصلت معاها للنهاية مش هتتغير ولا عندها استعداد لكدا يبقى براحتها.
سهر : يعني ايه براحتي؟
مازن : يعني عاوزه تقعدي هنا في بيت والدك براحتك عاوزه ترجعي تقعدي في شقتك برضو براحتك مفتاح الشقة أهو هروح اخد شنطتي واشوفلي مكان اقعد فيه اليومين اللي باقين ليه في الاجازة واسافر بقى اشوف مستقبلي وانتي كملي كدا براحتك.
إياد : يعني ايه يا مازن عاوز تتخلى عن مسؤليتك تجاه مراتك وبناتك ولا ايه؟
مازن : أنا مش بتخلى عنهم يا عمي كل اللي يحتاجوه أنا ملزم بيه ومش هقصر معاهم في أي حاجة لكن علاقتي ببنت حضرتك هتبقى شبه مقطوعه لإن اعصابي خلاص مبقتش مستحمله دي خلتني أكلم أختي في السر كإني بعمل حاجة غلط معيشاني في رعب طول الوقت بناقص الجوازة دي متلزمنيش.
سهر : خلاص طلقني مستني إيه؟
إياد : سهر!
سهر : حضرتك مش سامعه يا بابي بيقول إيه دا واحد بايعني خلاص وكل دا ليه علشان خاطر أخته خليها تنفعه بكرة هي كمان جوزها يقلب عليها وترجع تقعد في شقتهم لوحدها.
مازن : يااااه على سواد قلبك هي عملت لك إيه علشان تتمني لها كدا بس على العموم لو دا حصل هنزل لـ أختي اقعد معاها.
سهر : شايف يا بابي الاستفزاز؟
إياد : ما تبطلي بقى ما انتي اللي بتجبيه لنفسك وفي الاخر تقعدي تعيطي مالها أخته يا بنتي مضايقاكي في إيه هتخربي بيتك علشان حاجات في دماغك مستحيل تكون حقيقية ايه يعني لما يكلم أخته ولا يروح لها هو أنا مبروحش لعمتك مامتك تقدر تكلمني كدا انتي مجنونه ولا حكايتك إيه بالظبط؟!
تركتهم سهر ودخلت جوه.
إياد : معلش يا ابني حقك عليه أنا هعقلها واوصلها بنفسي لحد عندك بس اديني ساعتين تلاته كدا واتفضل أنت روح استريح.
مازن : براحتها يا عمي مفتاح الشقة أهو أنا معايا واحد تاني وقت ما تحب ترجع براحتها كدا كدا أنا قدامي تسع أيام ومسافر.. سلام عليكم.
إياد : وعليكم السلام.
فتح مازن باب الشقة وخرج.
إياد : ايه يا منة مالك بتبصيلي كدا ليه؟
منة : مش عارفه أقولك إيه بس أنا خلاص تعبت.
ودخلت جوه يقعد إياد بتنهيدة بيفكر هيقول ايه لبنته علشان يعقلها وترجع بيتها.
_______
في شقة سيف.
سيف : يوسف ادخل لمامي قولها تعمل حاجة لنانا تشربها.
سهر : أنا شربت قهوة يا سيف مش هشرب حاجة تانية.
سيف : خلاص يبقى تتغدي معانا.
سهر : سيف أنت مزعل مليكة ليه؟
سيف : هي قالت لحضرتك كدا؟
سهر : أنا جيت لاقيتها مموته نفسها من العياط بسألها مش عاوزه تقولي مالها قولت اسألك خافت وقالت لي مش عاوزه تحصل مشكلة يا مامي فهمت بقى إن في حاجة حاصله ما بينكم.
سيف : طنط أنا عمري قصرت مع مليكة في حاجة؟
سهر : بمعنى؟
سيف : أنا طول حياتي معاها من أول ما اتجوزنا وأنا بحاول بكل وسعي اعيشها حياه قريبة من اللي كانت عيشاها في بيت باباها بكل اللي اقدر عليه صحيح مش هتبقى هي هي نفس العيشه بس اديني بحاول وقولت لها اجيب لك واحدة تساعدك دا بعد طبعا ما بقى معاها تلات ولاد أكل وشرب ورعاية وسهر ومذاكرة فقولت اخفف عنها شوية رفضت قولت تمام يبقى هي قادرة تعمل كل دا اتفاجئ إن معندهاش مانع اجيب لها بيبي سيتر تشيل عنها شوية قولت وماله.
سهر : لحد كدا وتمام إيه المشكلة بقى؟
سيف : المشكلة انها مع كل المسؤوليات اللي عندها دي عاوزه تحضر الدكتوراه.
سهر : هي حرة مين هيتعب أنت ولا هي؟
سيف : يا طنط أنا معنديش مشكلة خالص لكن هي نفسها بتشتكي إنها مش قادر تراعي الولاد وعاوزاني اساعدها وأنا برجع تعبان من الشغل دا غير إن مفيش اهتمام بيه اصلا ولما اكلمها تقولي أنت مش شايف يعني مسؤلية الولاد كلها عليه طيب منين بقى تعبانه ومنين عاوزه تكملي دراستك وأنا فين من كل ده دا حتى مفكرتش تجيب واحدة تساعدها علشان راحتي أنا جوه بيتي لأ فكرت بس في المذاكرة والدكتوراة اللي اصلا مش هتضيف لها حاجة طب فكري فيه وفي الولاد الأول.
مليكة جايه : خلاص خلصت كلامك ولا لسه في حاجة تانية عاوز تقولها؟
سيف : خلصت يا مليكة شوفي انتي عاوزه تقولي إيه.
سهر : أنا شايفه يا بنتي إنه مغلطش انتي زعلانه ليه دلوقت؟
مليكة : علشان أنا غلطت نفسي وقولت مذاكرة إيه دلوقت لما يحيى يكبر شوية واقتنعت بكلامه رجعت اقوله أنا فعلا محتاج حد يساعدني رفض وقال بمزاجي قولت له خلاص ساعدني أنا تعبانه رفض كمان يعني دلوقت أعمل إيه أنا تعبانه يا مامي وهو مش مقدر كل ده.
سيف : أنا مش مقدر؟!
مليكة : ايوه.. عاوزني صاحيه أربعة وعشرين ساعة اجيب أعصاب منين أنا دلوقت دا أنا بعمل لنفسي قهوة طول الليل علشان افضل سهرانه بيحيى وبرضو لازم اصحى الصبح بدري علشان اصحى الولاد للمدرسة واحضر فطار يحيى بيكون صحي باجي أخر النهار بس ارتاح ساعة ولا حاجة ودا لو يحيى نام اصلا بتضايق وتقولي برجع الاقيكي نايمه.
سهر : طيب يا حبيبتي لما انتي تعبانه كدا مذاكرة إيه بقى يا مليكة وسط المهرجان اللي عايشه فيه ده؟!
مليكة : ما أنا قولت خلاص مش هكلم دراستي دلوقت اللي خلاني أفكر في كدا اني استغل وجود الست اللي هتساعدني وفي الوقت دا اقدر اكمل دراستي بس لاقيت صعب دا غير رفض سيف لكن هو دلوقت رافض يجيب حد يساعدني وأنا تعبانه.
سهر : لا خلاص متقلقيش هيجيب حد يساعدك.
سيف : بس أنا مقولتش كدا يا طنط.
سهر : هتجيب واحدة تساعدها علشان خاطري وخاطر مليكة أنا عارفه مش هيهون عليك تعبها وقلة راحتها بالشكل ده.
نظر سيف لمليكة..
مليكة : خلاص يا مامي براحته.
سيف : ما أنا كنت هعمل كدا انتي اللي استفزتيني.
سهر : خلاص بقى.
سيف بتنهيدة : حاضر يا طنط.
سهر : خلاص بوس راسها بقى وقولها حقك عليه علشان عيطت كتير.
سيف : ابوس راسها بس؟!
قبل راسها وايدها وضمها ليه.
سهر : أنا قولت راسها بس.
مليكة بخجل تبعد نفسها عنه وسيف يضمها ليه : خلاص بقى.
مليكة : طب سيبني هشوف الأكل علشان مامي تتغدا معانا قبل ما تنزل.
سهر : لا يا حبيبتي كُلوا أنتم بألف هنا وشفا أنا عندي ميعاد مش فاضيالكم.
مليكة : ميعاد إيه ده؟
سهر : عازمه نفسي على الغدا على حساب بابي.
سيف : هههههههههههه
طب اوصلك يا طنط.
سهر : لأ خليك علشان تتغدا براحتك.. ها
ومتزعلهاش تاني.
سيف : حاضر يا طنط مليكة في عينيه بس تسمع الكلام.
سهر : مليكة بتسمع الكلام بس أنت بالراحة عليها شوية.
سيف : حاضر يا طنط.
سهر : سلام عليكم.
سيف : وعليكم السلام.
_________________
في فيلا كريم .. في المطبخ.
كريم : جميلة خلصتي السلطة؟
جميلة : خلصتها يا بابي اظبط السفرة بقى؟
كريم : اه خُدي الأطباق دي وأنا هحصلك.