تكملة باقي حلقات الجزء الرابع من أنت قلبي

الجزء الرابع /الحلقة ١١٩

#أنت_قلبي٤
__________
الحلقة ١١٩

كريم داخل جري غرفة جميلة وفريدة بعده.
كريم : فيه ايه حصل إيه؟
زين : سيبي الفون دا بقولك.
جميلة : ملكش دعوة سيبه الفون بتاعي.
كريم : أنت عاوز تليفون أختك في إيه؟
زين : هي بقى تقول لحضرتك.
جميلة بتبكي : بابي أنا..
وسكتت جميلة.
كريم لزين : أخرج دلوقت.
زين : بابي أنا هفهم حضرتك.
زين : مش عاوز أفهم منك حاجة اتفضل يلا يا فريدة لو سمحتي اتفضلي واقفلي الباب.
نظرت له فريدة بدهشه.
كريم : أظن سمعتي أنا قولت إيه.
فريدة بتنهيدة : حاضر يا كريم.

خرج زين وتبعته فريدة وقفلت الباب.
كريم : اقعدي يا جميلة.
جميلة : بابي هو اللي اتصل أنا مكلمتوش ومعرفش جاب رقمي منين.
كريم : هو مين؟
جميلة : فراس.
كريم : الولد ده بتاع النادي؟
جميلة : اه لاقيته بالصدفه النهاردا قدام المدرسة.
كريم : وبعدين؟
جميلة : أنا فكرته جاي لواحد صاحبه جوه بس مكنتش عارفه إنه جاي...
وسكتت جميلة.
كريم : كملي يا جميلة.. هو كلمك؟
جميلة : اه اتكلم معايا بس أنا مردتش عليه.
كريم : كان عاوز إيه؟
جميلة : قعد يعتذر وقال كلام كتير كدا مسمعتوش كويس وكمان مش فاكرة حتى اللي سمعته.
كريم : جاب رقمك منين؟
جميلة : معرفش.
كريم : كلمك قال لك إيه؟
سكتت جميلة..
كريم : خلاص براحتك طالما مش عاوزه تقولي بس ممكن الفون لحظة.
جميلة : اتفضل.
كريم : هو دا الرقم؟
جميلة : ايوه.. أنا معرفش إن هو ودي غلطه مني اني أرد على رقم معرفوش.
كريم : زين دخل وهو بيكلمك؟
جميلة : بابي أنا لو في حاجة بجد بيني وبينه مكنتش فتحت الاسبيكر.
كريم : مين قال إن في حاجة بينك وبينه؟!
جميلة : ما حضرتك هتفتكر كدا.
كريم : لا أنا مش هفتكر حاجة علشان أنا واثق فيكي.
جميلة : متشكره.
كريم : اعمليله بلوك بقى لحد ما اجيبلك خط جديد.
جميلة بابتسامة : حاضر.
كريم قايم افتكر يقولها : لو جه تاني قدام المدرسة متتكلميش معاه وادخلي جوه لو صمم يكلمك اتكلمي مع حد من المدرسين يتعاملوا معاه وتيجي تقوليلي.
جميلة : حاضر يا بابي.
كريم بيلتفت وخارج حضنته جميلة.
جميلة : بابي أنا بحبك قوي.
كريم : وأنا بحبك وعاوزك تركزي في دراستك وبس.
جميلة هزت رأسها بابتسامة.. طبع قُبله على رأسها وخرج.

زين : لا أنا دخلت بالصدفه لاقيته بيقولها أنا بحبك ومليش أي غرض وحش.
فريدة : سمعت ازاي؟
زين : الاسبيكر كان شغال وطبعا صوته واضح أنا عرفته لإني قابلته قبل كدا وقت المشكلة إياها مع البنت صاحبتها.
كريم : ولما سمعت كدا مردتش أنت عليه ليه؟
التفت زين لوالده اللي اتفاجئ بيه نازل من فوق.
كريم : تزعق مع أختك ليه من غير ما تفهم؟
زين : أفهم إيه حضرتك هو اصلا جاب رقمها منين؟!
كريم : طب ما كنت سألتها قبل ما تزعق معاها وتاخد التليفون منها بالعافية.
زين : كنت منتظر مني ابقى هادي وحضرتك بترد على واحد هي متعرفوش دا على حسب كلامها لكن هي بتكدب.
كريم : أختك مش كذابه وأنا مصدقها.
فريدة : هو إيه الحوار بقى بالظبط علشان أنا مش فاهمه حاجة؟
كريم : الموضوع انتهى يا فريدة وهي عملتله بلوك وهغيرلها الخط بتاعها.
زين : ايوه يعني هو جاب رقمها منين؟
كريم : هي متعرفش.
زين : هي قالت لحضرتك كدا وصدقتها؟!
كريم : أختك مبتكدبش وخلاص انتهى الموضوع على كدا متتكلمش معاها تاني في الموضوع ده.
زين : كدا.. طيب.
فريدة : رايح فين؟
زين : طالع اوضتي.
كريم : متروحش لجميلة سامع؟
زين : حاضر.
__________
في المطار.
سيف : ليه بس كدا.. طيب متعيطيش.
مليكة بتمسح دموعها.
سيف : أنا مش هتأخر عليكم خلي بالك من الولاد وأنت يا يوسف لازم تبقى راجل وتاخد بالك من مامي وأخواتك.. ماشي؟
يوسف : متقعدش كتير هناك.
سيف : حاضر.. وبعدين أنا سايب راجل في البيت مش كدا؟
يوسف : كدا 👍
سيف بابتسامة : خُدي بالك من نفسك يا مليكة.
مليكة : حاضر تروح وترجع بالسلامة خلي بالك أنت من نفسك.
حمزة يشاور لسيف : يلا بقى خلاص خلصنا حطلك الشنط وكله تمام.. مع السلامة.
ويحضن صاحبه ويسلم عليه ويدخل سيف جوه.
مجدي : يلا يا مليكة؟
مليكة : يلا.
مجدي : هات ايدك يا يوسف.
يوسف : أنا همشي لوحدي.
مليكة : يوسف اسمع الكلام.
يوسف : حاضر.
حمزة : محتاجين حاجة يا جماعة؟
مجدي : لا متشكر.
حمزة : طيب سلام عليكم.
يرددوا : وعليكم السلام.
مليكة : يلا يا يوسف علشان سايبه أخوك مع نانا وحلا زمانها بتسأل علينا.
يوسف : هو بابي هيغيب كتير؟
مليكة : لأ.. ادعي إنه يجي بالسلامة.
مجدي : يلا يا مليكة اركبي.. تعال هنا يا يوسف.
_______
في شقة معتز(ابن علاء)
رنا : أنت بتقول إيه يعني ايه شهر عندنا وشهر في شقته لأ يا معتز احنا متفقناش على كدا.
معتز : احنا متفقناش على حاجة اصلا دا بيتي ودا والدي انتي فاهمه أصلا كلامك دا معناه ايه؟
مش عاجبك براحتك.
رنا : يعني إيه براحتي؟
معتز : يعني دا أبويا لو مامتك ولا باباكي في نفس الموقف دا كنتي قولتي الكلام ده؟
رنا : كل واحد بيته أولى بيه باباك مش هيستريح هنا زي بيته يا معتز.
معتز : بيتي هو بيته ومتحاوليش.
رنا : باباك لو معندوش مكان أنت تشيله فوق دماغك لكن ايه فايدة إنه يقعد معانا هنا وهو عنده شقته ثم أنت كمان هتبقى في شغلك وأنا مينفعش اقعد مع باباك لوحدنا.
معتز : انتي مجنونه انتي بتقولي ايه؟!
رنا : بقول إني بسمع مشاكل كتير من النوعيه دي وأنا في غنى عن المشاكل دي.
معتز : رنا ياريت تسكتي خالص متتكلميش في الموضوع ده الحاجات دي مش عندنا يا ماما.
رنا : معلش الاحتياط واجب برضو.