#تسونامي
#الحلقة_3
.
.
.
.
#نرجعوا_بالوقت_قبل_كم_شهر👇
.
.
.
جمانة غسلت ايديها بعد كملت امواعين الغداء ...وخشت لدارها ..صكرت الباب ...حولت جاكة التوتة ..وقمعزت تتصل بنوال
نوال : نعم
جمانة : تغديتي والا مازال ؟
نوال : لاا ماما دايرة مكرونة ..وانا مشيت نقلي في دحي
جمانة : يعني مش فاضية ؟
نوال : غير ادوي خلاص كملت
جمانة : موضوع مهم لازم انشوفك
نوال : اممم ..تعالي انتي ..انا اخر مرة جيتك
جمانة : اوووفه ...أنشوف كمال قبل ...اليوم ساكن في الحوش مابش يطلع بكل 😤
نوال : خلاص شوفيه وتعالي
جمانة : تمام ...توا انكلمك
نوال : اوكي جوجو نستنى فيك
صكرت جمانة ..وقاعدة اتفكر تقنع كمال ...تعرفه مايحبش سريب نوال 🔥
.
.
.
اما نوال مجرد ما كملت مع جمانة ..رن فونها مرة ثانية ..وكان نفس الشخص اللي ايضايق فيها ديما ..وفي كل مرة اتحط رقمه في الحظر يرجع يكلمها برقم ثاني 🤷🏻♀️
.
.
.
طلعت جمانة من دارها ..ومشت ناحية المربوعة ..وين كان خوها كمال متكي يتفرج على مباراة
خشت وكمال رفع اعيونه فيها : كنك ؟!!
جمانة : نبي نمشي لحوش صاحبتي بعد العصر
كمال : شن تبي فيها ؟
جمانة : نبي منها دبش وحاجات
كمال : خليها مرة ثانية مش فاضي
جمانة : انكلم مجدي ايوديني
كمال بعصبية : ضروري تمشي يعني ؟
جمانة بصوت مرتفع اشوية : ضروري اها ...شنو معاش نطلع يعني
مجدي نازل من فوق يسمع في نقاشهم
كمال : ادوي بالشويا خيرلك 😡
خش عليهم مجدي : كنكم شن في ؟
جمانة : نبي نمشي لصاحبتي
مجدي : خلاص عليش اتعيطي ..توا انشيلك
جمانة : تمام ..بعد العصر نلبس ونمشوا
مجدي : من صاحبتك نعرفها انا ؟
جمانة شافت لكمال : اها تعرفها ..نوال
كمال كان ملتهي في المباراة ..بس بعد سمع اسمها طول شاف لجمانة
مجدي : خلاص وتي روحك توا ناخذك
جمانة : تمام
شافت لكمال ومشت خشت لدارها ....مجدي طلع ايولع في سيارته ...اما كمال ...معاش تريح ...صبا وطلع وراء مجدي .
.
.
.
************(( الكاتبة ام ناصر ))
.
.
.
لابست جمانة ..صلت العصر ...وخذت شنطتها وطلعت للسور ..بس مجدي مش قاعد
