#تسونامي
#الحلقة_44
.
.
.
لايك قبل تقري 😘
.
.
.
خش كمال وجليلة وجمانة في جرته على ابرار اللي كانت مقمعزة وسط اهله وبجنبها أجديدتها واتهدرز امعاهن
أبرار رفعت وجهها وابتسمت لكمال ..اللي ابتسم بتوتر ..وبلع ريقه بصعوبة وجاء قمعز جنبها وهوا يطربق في اصابعه وعقله مشوش مش عارف من وين يبدأ ؟!
عنده حق ..كيف تبي اتبلغ انسان انه مريض بمرض خطير ..مافيش كلمات اتسهل الموضوع او اتخليه غير مخيف ..او اطمن الشخص مهما حاولت اتهون او تقلل من فزعت الخبر 💔
كريمة : شن اخبارك ياكمال ؟
كمال شاف لامه : بخيرالحمدالله
كريمة : وجه أبرار مش عاجبني ياوليدي ..ليش ماتجوا عندي لعند اتفوت الثلاث شهور ..شكله الوحم مبهدلها
ابرار شافت لكمال من غير ماترد
وكمال شاف لجليلة وجمانة ..وتنهد وساوى قعدته وهوا يحاول يختار كلماته قبل ينطق بيهم
كمال : أبرار الحمل امتعبها وهيا بالاساس مريضة ..وانا اليوم جمعتكم هنا باش تقنعوها معايا اتشوف لصحتها قبل لانها اهم من كل شي
ابرار بخوف : مش تكلمنا واجد في الموضوع هذا ؟! وقتلك اكثر من مرة مش منزلة 🥺
جليلة بحزن : لكن يا ابرار صحتك اهم وكمال لانه خايف عليك بس ..وحتى نحنا نبوا انشوفك اكويسة وترجعي زي زمان
ابرار : صدقوني انا اكويسة ونقدر نتحمل لعند اتم الثلاث شهور وبعدين نبدا في العلاج ..لكن كان نزلت البيبي مش حنقعد كويسة ونفسيتي تتعب ونمرض اكثر 😥
كمال قرب منها : بس يابرار العلاج ضروري تبدي فيه توا...الوقت والتأخير مش في صالحك
جمانة : كلام كمال صاح ..وبعدين انتي مازلتي صغيرة وتوا تحملي مرة ثانية بعد تقعدي اكويسة
ابرار شافت لجمانة بصدمة : انتي ياجمانة اتقولي في الكلام هذا ؟! خسارة مانك مجربة التنزيل وذقتي الويل منه ..بالله شن حسيتي وقت خسرتي البيبي وقتها ؟ 😥
جمانة حست بغصة ونزلت اعيونها : انا صاح خسرت البيبي وكان غصبا عني😥 ..وماننكرش اني حزنت واجد عليه وقتها ..بس اهو عادي عشت حياتي وكملت وماوقفتش وانا متاكدة ربي بيعوضني خير ..وانتي لازم اتكوني قوية ..وتبدي في علاجك على الاقل على خاطر كمال ..شوفي كيف خايف عليك ومش عارف شن ايدير باش يطمن عليك
ابرار شافت لكمال : وانا مقدرة خوفه عليا وفاهمة عليه ..بس مش قادرة نقتنع ومهما تحكوا مش حيتغير موقفي 😥
كمال تنهد بقل صبر وشاف لاخواته ..وكأنه يعطي فيهم إشارة انه معاش فيها ..ولازم يحكي معاها بصراحة ..ويقول الحقيقة
تحرك من مكانه وقرب منها اكثر وشد ايديها ..وابرار انحرجت منهم ..كمال مش من عوايده يتقرب منها قدام هله او اي حد ..يتحشم زي اغلب الشباب الليبي
