#تسونامي
#الحلقة_48
.
.
.
لايك قبل تقري 😘 اخيراً وفيت بوعدي ونزلت الحلقة
.
.
.
كمال كان مغطي على نوال بظهره اول ماسمع صوت ابرار سحب يده من على يد نوال ..اللي صبت مخلوعة واعيونها يبوا يطلعوا من الخوف وجسمها بدأ كله يرجف مع بعضه
كمال استقام وتلفت عليها : ليش اتصبي بروحك ؟
أبرار شدت في باب المطبخ وهيا اتشوفلهم زين وعندها شعور غريب ..ماعرفتش شن هوا ..بس كان مؤلم أكثر من الالم العلاج اللي يحرق في جسمها 💔
أبرار بتعب ومش مركزة : سمعت شي طاح ومعاش عرفت شنو فيه ؟
كمال قرب منها وشدها من خصرها وابرار شدت فيه زين : مافي شي ..مغطاة طاحت تكسرت ..ليش تطلعي من مكانك وانتي مريضة ؟
أبرار حطت راسها على كتفه وغمضت اعيونها : كنت راقدة وطرت منفجعة على الصوت ..صبيت بدون مانحس
كمال ساندها وطلع بيها من المطبخ : معاش تطلعي وحدك بالله عليك ..تخيلي اطيح وانتي حامل تضري روحك وتضري اللي في بطنك ..تبي اي شي كلميني بس
أبرار بصوت خافت يادوب طالع من التعب : باهي
نوال واقفة بنفس الوضع وتتفرج عليهم لعند طلعوا من المطبخ ..برمت وجهها وفتحت الغسالة اطلع في التباسي وبدات اتجهز في الغداء ..وايديها يرجفوا
تحاول بقد ماتقدر ماتبكيش ..ماتتأثرش وتكون قوية ..انفاسها بدات تخنق فيها ..وغصتها العبرة ..تبلع فيها وراء بعض ..والالم في رقبتها وصدرها لايطاق ولايحتمل 💔
جهزت كل شي على الطاولة ..واخيرا خذت اللمامة ومكنسة يد وطبست اتلم في قطع المغطاة اللي تكسرت..لمتها وصبت كبتهم في الكناسة ..وحست روحها معاش تقدر خلاص ..حطت ايديها على حوض المطبخ وطبست راسها وادموعها اللي كانت حبستهم نزلوا غصبا عنها 😭
الغيرة صعبة وتنهش في صدرها....وخاصةً لو بتغير على حد مش من حقك اتغير عليه..واسوء ما في الامر أنك اتحس روحك حقير وماعندكش ضمير ..لما اتفكر في شخص مش من حقك اتفكر فيه ولا هوا الوقت المناسب للامر اصلا .
اتحس روحك معدوم الضمير برغم طيبة قلبك وبرغم كل التنازلات اللي قدمتها وخالفت جميع مباءدك وقوانين حياتك ..برغم كل الخير اللي ادير فيه ..بس اتحس انك قاعد تخدع في غيرك ومن غير قصد تكذب عليه غصبا عنك ..شعور ملخبط وقاسي ..شعور واعر وصعب تنحط فيه ..شعور بالعجز لا قادر اتقدم ولا تؤخر ..ايديك مربطين ..وصوت قلبك لاول مرة في حياتك يغلب صوت العقل عندك ..وتحس روحك اسير مشاعرك ..اللي اتقود فيك للمجهول ..شن مازال مستنيك يانوال؟ 💔
مسحت وجهها بسرعة على صوت خطوات كمال تقرب من المطبخ ..وشربت مية ..وبرمت قربت من الطاولة ترفع في الغداء
كمال خش عليها : مازال ؟
نوال نزلت اعيونها : لا خلاص كملت
كمال خذاء مفرش الاكل وطلع قدامها ..ونوال لحقاته بسفرة الغداء ..حطتها ..ورجعت للمطبخ جاءبت سفرة المشروب وقمعزت جنب ابرار
