#تسونامي
#الحلقة_11
.
.
.
لايك قبل تقري 😘
.
.
.
ظافر منحرج ايشوف لشارع بخوف ..ويرفع في رحمة بين ايديه : نوضي شن صارلك الهم ؟
رحمة مرتخية في حضنه ..وظافر خاف حد يطلع من هلها او من الجيران ويشوفهم ...شدها من خصرها بقوة ..ومشى بيها لعند سيارته ..ركبها ..ولع السيارة وطلع بيها .
.
.
.
.
نوال بخوف وخرت للخلف : ماجد افتح الباب واطلع برا
رفع ماجد ايديه : أهدي ..اهدي واسمعيني كلمتين بس ونطلع ..ماتخافيش
نوال : شن تبي تكلم بسرعة
.
.
.
جمانة : اااها فارس ..اهلين كيف حالك ؟
فارس : الحمدالله بخير ..شن اخبار العيلة ؟
جمانة : الحمدالله ..خير إن شالله ..تالين فيها شي ؟
فارس : لا اكويسة الحمدالله ..متأسف لاني اتصلت بيك في وقت زي هذا
جمانة : لا عادي ولايهمك ..تفضل كيف نقدر نساعدك
فارس : كنت بنتصل بجهاد ...بس للاسف نسيت ناخذ رقمه امس ..اختي قالتلي عندها رقمك
جمانة : ااها ..تبي رقم جهاد يعني ؟
فارس : اكيد نبيه ..بس الحق متصل نبيك في موضوع يخصك انتي
جمانة : أيخصني أنا ؟!! شن هوا ؟
فارس : ياريت لو نقدر انشوفك ونتكلموا وجه لوجه افضل
جمانة انحرجت : ااء شن بنقولك ...بصراحة مانقدرش انشوفك ابروحي ومن غير علم زوجي ...بس لو تبي اي مساعدة ممكن اتقولي على الفون
تنهد فارس : مش مشكلة ...عندك حق مانبيش نحرجك ...شوفي بنخش في الموضوع طول انا عندي مكتب استيراد وتصدير ...وكان معايا محاسب مالي واضطر ايسيب العمل عندي لانه بيسافر ...وبصراحة لما عرفت أنك خريجة اقتصاد ..وعندك ماجستير ادارة اعمال ومالية ...فكرت انك تخدمي معايا ..محتاج حد ثقة وفاهم شغله اكويس
جمانة : اممم ..مش عارفة الحق ..بس انا عندي عمل في الجامعة واليوم كيف بديت فيه
فارس : بس في فرق بين العملي والنظري ..وحتى المكسب المادي
جمانة : شن قصدك ؟!
فارس : قصدي الدراسة شي ..والخدمة شي اخر ...حتستفيدي اكثر من شهادتك وتبدا عندك خبرة ..طبعا من غير المكسب المادي واللي هوا المرتب
جمانة : والله الجانب المادي مش مهم عندي واجد ...بس صاح عندك حق بالنسبة لخبرة والاستفادة ...لكن للاسف مضطرة نرفض عرضك ..نبي نبدا في الجامعة قبل
زم فارس فمه وصبا من على مكتبه : براحتك ...خسارة كان مجرد عرض للاستفادة ليا وليك ...واكيد لاخسارة ليا انا ...كنت محتاج حد نعرفه ..وايكون شاطر في شغله ...بس مش مشكلة ..خيرها في غيرها
