#تسونامي
#الحلقة_24
.
.
.
لايك قبل تقري 😘والحلقة كانت طويلة قسمتها جزئين هذا جزء والجزء الثاني ينزل بعدين ..انكمله وانزله
.
.
.
رحمة روحت للحوش باللهفة ..تبي تعرف شن جاب ظافر هدية عشان نجاحها ..بس كانت خايفة لهفتها تنتهي بخيبة امل 😥 لان ظافر مش رومنسي وممكن ايكون جاب اي هدية وخلاص
خشت للحوش وطول مشت للمطبخ وين ماكانوا خواتها وأمها ...خشت تضحك وقعدت اتضم في غزالة وتبكي : نجحت ياماما ..نجحت 😭
غزالة اتضم فيها وزغردت : الف الف مبروك ياحومي ..ماشالله ربي ايدوم علينا الفرحة
رودينة اتبارك لاختها : مبروك حومي ...عقبال انشوفك احلى عروسة
رحمة : يبارك فيكن ..وربي مش مصدقة ..اااه كملت وافتكيت من سريب لاقراية
رهف خشت عليهن : كنكم شن صاير ؟!
رودينة : اختك نجحت ..باركيلها
رهف : صاح ..ماشالله ..الف الف مبروك حومي
رحمة اتسلم على اختها : ايبارك فيك والعقبالك
رهف : إن شالله
كملت رحمة مع خواتها وامها ومشت بسرعة لدارهن..خشت وصكرت الباب ..حولت خمارها والوشاح .. وقمعزت على سريرها ..وحطت بوكس الهدية قدامها
طلعت البوكس من الكيس وقعدت تفتح في التغليف بالشويا ..لاقت علبة فيها انواع شكلاطة ..وعلبة صغيرة في وسطهم ..فتحت العلبة وكان فيها انسيال بسيط ذهب ..في نصه قلب صغير ...لانسيال اللي من نوع يركبوا فيه قطع صغيرة ((خربش زي مانقولوا ))
طلعته رحمة ورفعاته بين اصابعها اتشوفله ..فرحت بيه برغم بساطته ..بس حست كأنه ناقص ..ليش ظافر مازاد حتى قطعتين ثانيات باش يقعد منظره حلو 🥺
والا يمكن ايكون بخيل ؟!! الفكرة ابروحها خوفتها ...هزت راسها ..لا ياربي ماساد انه جاف معايا يقعد بخيل اخرى 😥
شافت لكوم الشكلاطة ..لو بخيل ماجابش هذين كلها ومن احلى واغلى نوعية ..باهي ليش الانسيال كان بسيط وخفيف من غير باقي الخربش اللي فيه 🤔
السنين هذه كلها وهيا اتحبه ومش قادرة تفهم طبعه ..بتعرف في شنو كان ايفكر لما شراء الهدية هذه ؟!!...ممكن الاجابة ساهلة ومش محتاجة التفكير هذا كله ..على الاغلب اول هدية جت قدامه شراءها وخلاص 💔
كانت هذه اخر فكرة جت في بالها قبل ماتصبي وتبدا اتلم في هديتها ..واتغير دبشها
.
.
.
***********(( الكاتبة ام ناصر ))
.
.
.
جهاد شدها من اكتافها ويهز فيها : متفقين عليا أنتي وخوك وهذا ليش تزوجتيني😡
جمانة : اتفاق شنو ؟ ..ماتنساش انك انتا جيت وطلبتني من هلي
جهاد بصوت عالي : لان خوك عرضك عليا ...والا انا من وين نعرفك 😡
