#تسونامي
#الحلقة_7
.
.
.
لايك قبل تقري 😘 واسفة لو في اخطاء أملائية مالاحقتش نعدل
.
.
.
جهاد بعد سلم على اهله وجمانة طلع لرجالة ...وقعد اغلب الوقت برا ...وقبل العشاء ركب للشقة ادوش ونزل من جديد
اما جمانة مايعلم بيها غير ربي ...من جيهة مضطرة اتجامل عربها والصبايا ..وكانت منحرجة ..ومن جيهة ثانية ..اتفكر في جهاد وحياتها امعاه ..كيف بتكون ..وهل جهاد حيتذكرها والا بيقعد طول عمره ناسيها 💔
.
.
.
على وقت العشاء العيلة ملتمة كلها ..وأمنة وشريفة حطوا العشاء .
خش جهاد من برا : السلام عليكم
كلهم : وعليكم السلام
جت عينه في عين جمانة ..اللي مقمعزة وخاشة في بعضها ...طول نزل اعيونه ..وقمعز جنب ظافر
حطوا سفر العشاء ...وكلهم قربوا ...الحاج فضيل والمعتصم وادم على سفرة ..وظافر وجهاد بسفرة ابروحهم
وعائشة وامنة وشريفة وجمانة على سفرة ...استغربت جمانة ليش جهاد وظافر قمعزوا ابروحهم ..فكرت انهم عشان يوسعوا على بعضهم
مسك جهاد كاشيكه ..وبعدين شاف لامنة : كيف وين وسن ..ماشفتهاش بكل ؟!!
كلهم شافوا لبعضهم بخوف 😰
.
.
.
.
منال حطت العشاء لاعيالها ..وقمعزت تاكل مع مجدي : تكلمت مع جمانة ؟
مجدي : لا مازال
منال : شن اتراجي ؟ كلمها
رد مجدي اللقمة من يده : تي باهي توا انكلمها ...البنت كيف جت ..خليها اول زيارة انقوللها
منال : هيا البيعة صارت وخلاص ...بس لازم تعلم مانبوش مشاكل بعدين
مجدي : إن شالله خير ...بس مرات اتقولك نبي حقي من حوش باتي
منال : شن تبي فيه ؟ خلاص تزوجت وعندها شقة كبيرة 😒
مجدي : بس هذا حقها الشرعي ..حتى ولو تزوجت
منال : لا شرعي لا شي ..اهي جليلة سامحت في حقها عشان خوتها
مجدي : جليلة متزوجة من زمان ..وعندها حوش واعيال ..ولو مهما صار مع راجلها ..الحوش من حقها هيا واعيالها ...بس جمانة توا كيف تزوجت .
منال : راجلها كويس ..وحالته كويسة ..شن تبي اتزاحم فينا على اشوية فلوس ..غير إن شالله ايسدوك انتا وخوتك وامك عشان اتكملوا بناء
تنهد مجدي بقل صبر : اوووفه خلاص ...خلينا انتعشوا ولكل حادث حديث
.
.
.
***************(( الكاتبة أم ناصر ))
.
.
.
كلهم ايشوفوا لبعضهم ومسكتين ..وظافر كاظم غيضه ومنزل راسه 😤
الحاج فضيل تذكر كلام عابد عن حالة جهاد النفسية وانه بعد الحادث نسى اشوية تفاصيل ..تنحنح وتكلم
الحاج فضيل : وسن تزوجت
جهاد : عارف انها تزوجت ..قصدي ليش ماجت اتسلم عليا ؟!
