#تسونامي
#الحلقة_62
.
.
.
لايك قبل تقري 😘
.
.
.
طلع من الدار وبيخش الحمام عشان يغسل ...شاف دار ابرار ضيها والع وبابها مفتوح
توجه لدار وخش ..لاقى ابرار مقمعزة على السرير وهيا لابسة عباتها ومجهزة شناطيها حذاها ..وحاطة يدها على خدها ودموعها ينزلوا ..وسارحة
اول ماخش انتبهت عليه ساوت قعدتها ..ومسحت وجهها بسرعة
كمال يحرك في اعيونه بينها وبين الشناطي : صباح الخير
أبرار صبت : صباح النور 😥
كمال : ليش لابسه وين ماشية على الصبح ؟!
بلعت ريقها وقربت منه : نبي نمشي لاجديدة
كمال شاف لساعته : الوقت هذا ؟! مازال صبح ..خليها بعد الغداء
ابرار مطبسة : نبي نمشي توا ..اجديدة اتنوض بدري عادي
كمال : باهي تمام ..خليني نغسل ونصلي الصبح بس
وجاء يبي يطلع . أبرار وقفته : كمال
تلفت عليها : نعم
قربت منه : أنا لاميت دبشي وحاجتي كلها ..و نبي نمشي لاجديدة بالمرة مش مروحة
عقد حواجبه : بالمرة كيف يعني ؟ شن قصدك ؟
ابرار : امبارح طول الليل وانا انفكر ..وبصراحة مانقدرش انعيش معاك ومع نوال 😥
كمال : مافيش داعي تمشي لاحد ..لان نوال نبي نطلعها في شقة ابروحها ..وانتي بروحك ..يعني مش شورك
ابرار دموعها نزلوا : بس انا مش هذا قصدي ..حتى لو نوال ابروحها وانا بروحي ..مانقدرش نقعد بينكم 😭
كمال قرب منها : تقعدي بينا كيف بس ؟! انتي مراتي وهيا مراتي ..مافيش بينكم فرق
ابرار وهيا تبكي : لا في فرق ..أنتا اتحب نوال اكثر مني وهذا قاعد واضح مهما حاولت تخفيه ...وممكن اصلا انتا ماتحبنيش بكل ولا عمرك حبيتني ..وانا مانرضاش انكون معاك مجرد شفقة والا زواج تقليدي ..كان ممكن نرضى لو كنت زوجتك انا وبس ..لكن نقعد مركونة على الرف ونشوف فيكم كيف عايشين جوكم ...معناها بنموت بالبطيء وانا نتحسر على روحي 😭
قرب منها وحط يده على كتفها : من قال اني تزوجتك شفقة ..اخترتك زمان لانك بنت هادية ومحترمة
ابرار : بس ماتحبنيش ..ولايمكن في يوم تحبني ..لانك اتحب نوال ومستحيل تنساها ...أنا قبل مانعرف بقصة نوال.. درت كل شي على خاطر اتحبني .. ..ومع هذا فشلت انخليك اتحبني وماتشوفش لغيري ..وكنت ديما انقول زعما شن السبب اللي مخليك بعيد عني ومش حاس ولا مهتم بحبي لك ...ولما عرفت بقصتك مع نوال ...فهمت ليش حبيتها وليش مش قادر تنساها ..والاهم ليش مازلت اتحبها لتوا ...أنا بنت ولما تعرفت على نوال وتقربت منها حبيتها واجد وكانت ديما تعجب فيا ..فا مش لايمة عليك انتا الراجل اتحبها بالشكل هذا 😥
