#تسونامي
#الحلقة_58
.
.
.
لايك قبل تقري 😘
.
.
.
قاعد ايشوفله ومش مستوعب الكلام اللي سمعه : أنتا كيف خوهم ؟!! كيف ادير الحاجات هذه كلها ؟! عقلك وين ؟ هذا لو عندك عقل بالاساس 😑
طبس راسه منحرج : ضحكوا عليا واستغلوا طيشي وهبالي ..كانوا يعرفوا نقطة ضعفي ..وعرفوا يلعبوها صاح معايا 😔
فيصل هز راسه : بالله بعد كل شي سمعته منك معاش اتحط اللوم على غيرك ..نقصك عقل واعيوني باش اتشوف الخطأ هذا كله وتسكت؟
المعتصم بصوت يرجف : مش لايم عليك وتقدر اتقول عليا شن تبي ..ونستاهل كل شي ايصير فيا ..مش عارف كيف كنت معمي عليهم وماشي في جرتهم من غير تفكير 😥
فيصل : ماهو من السم الهاري اللي تشرب فيه ريح عقلك وذهب شيرتك ..وخلاك اتضيع عمرك وحياتك وتخشش هلك في دوامة كبيرة ..ابصر كيف بيطلعوا منها توا؟😑
شافله بندم : مستعد اندير اي شي ونصلح غلطي ..مستعد انسلم روحي لشرطة من الليلة هذه ونقوللهم انا اللي كنت انسوق في سيارة ظافر ومش هوا ..ونخليهم يطلقوه 🥺
فيصل عقد حواجبه وهز راسه : لا مازال مش توا ..في شي انفكر فيه ..وبعدين ساهل
المعتصم : اتفكر في شنو ؟
فيصل تلفت عليه : مقطع الفيديو فيه شي مش تمام ....أنتا تعرف اسم الشخص اللي كان يهدد فيكم بالفيديو ؟
المعتصم : نعرف اسمه بس ..لكن عمري ماشفته ..كان يتواصل مع كريم مش معايا انا
شاف لعيونه وتكلم بصوت اكثر جدية : شوف شن نبيك ادير ...اول شي لازم نعرف اسم الشخص اللي مصور الفيديو هذا بأسرع وقت ..وثاني شي نبيك تقعد هنا في المزرعة ماتتحركش لاي مكان مهما صار ..لعند انا انجي ونقولك ..تمام ؟
المعتصم : تمام ..بس انتا على شنو ناوي ؟
فيصل ايفكر ويشوف لبعيد : خليني نتاكد من اللي في راسي ..وبعدين توا تعرف ..اهم شي نبي اسم الشخص هذا بسرعة
المعتصم : مش مشكلة ..نقدر نعرف اسمه من واحد من الجماعة
فيصل بتحذير : بس خلي بالك من كريم يعرف انك تسأل عليه
المعتصم : أنتا ليش خايف من جيهة كريم ؟!
فيصل : من اول يوم شفته فيه ..حسيته مش تمام ...وبعد كلامك اليوم تاكدت انه انسان حقير ومالهاش امن ..والا كيف ايخليك في المعمعة هذه ابروحك وهوا كان معاك وقتها ...في شي مش مفهوم ..وقاعد واضح ان كريم يبي يطلع منها ويدبسك وحدك فيها
المعتصم بعصبية : كلامك مزبوط ...اساسا هوا رفع ايديه ورخاني وماباش ايساعدني وخلا الفيديو ينتشر ..لانه ماشوره شي وطلع منها 😤
فيصل : ماتخافش ..مصيرهم ايطيحوا كلهم ...بس كل شي في وقته ..خلينا نمشوا خطوة خطوة
المعتصم متحشم : شن اخبار ظافر ؟ قدرت اتشوفه صاح ؟ 🥺
