#تسوماني
#الحلقة_37
.
.
.
لايك قبل تقري 😘 الباين بتقعد عادة ..كل خميس حلقتين 🔥
.
.
.
جهاد يوم وفاة إبراهيم في الليل مقمعز مع عابد في خيمة العزاء ويهدرزوا ...وعابد حس بنعاس وفرك اعيونه وتثاوب
عابد : نعست معاش فيها ..بنمشي نرقد
جهاد : مازال بدري
عابد صبا : وربي ماعاد نقدر حاس روحي بنطيح من طولي ..وبكرا عندي يزن يبني انطلعه مشوار .وقصص ثانية
جهاد صبا : مازلت عمليته يزن؟
عابد : مازل ..ممكن السنة الجاية بأذن الله
جهاد : إن شالله خير ..بالك يفتك من سماعته ويرد سمعه طبيعي
عابد طالع من الخيمة : إن شالله ..بنمشي انا
جهاد يمشي وراءه : تمام ...ارجى ناخذ تليفوني من سيارتك
عابد : هيا
فتح عابد سيارته وركب ..وجهاد قرب وخذا فونه من على طبلوني السيارة : تعال بكرا بعد اتكمل مشوارك مع يزن
عابد يحرك في يده على شعره بحركة سريعة : خليها على الجو ..مش فايق اليومين هذين
جهاد بغمزة عين وهزة من راسه بتسأل : شن فيك ..حاس بيك مش تمام ؟
عابد نفخ بقل صبر : مش عارف والله ..بس لها كم يوم تليفونها مقفل ومعاش اتكلم فيا ..وانا بصراحة خفت عليها
جهاد : مافيش كيف تطمن عليها ؟
عابد شاف لجهاد زين : مافيش الا طريقة وحدة ..نسأل عمتها عليها
جهاد : عمتها منو ؟
عابد زم فمه ورفع حواجبه : ااااها هذا موضوع اخر لازم نحكيلك عليه قبل ..هوا بصراحة المفروض قتلك عليه من قبل ..بس ماصارش منه ...المهم بكرا او بعده نتلاقوا ونحكيلك بالتفصيل
جهاد عقد حواجبه : قصدك انا نعرفها البنت ؟!
عابد : تقريبا ..يعني ..المهم لما ندويلك عليها توا تفهم
جهاد صكر باب السيارة : تمام ..مانعطلكش توا ..تصبح على خير
عابد : وانتا بخير ..سلام
وخر جهاد ..وعابد طلع بسيارته من الشارع ...وجهاد ولع فونه وتوجه ناحية الحوش بيخش ويركب فوق ..لكن شي في تليفونه خلاه وقف في مكانه ..وقعد ايشوفله زين ...عرم مكالمات من رقم غريب ..ورسالة
جهاد فتح الرسالة 👇
(( لو سمحت انتا اخ وسن ..ياريت اترد عليا ضروري اختك في المستشفى ))
جهاد رفع شعره ..وطول اتصل برقم منى ..يضرب في الطرف الثاني
منى اتحرك بتوتر في ممر المستشفى وتحاول تتصل بواحد من الرقمين اللي عطتهم لها وسن ..وتسمع في وسن اتألم وتبكي من وجع المخاض ...رن فونها وكان جهاد
