#تسونامي
#الحلقة_51
.
.
.
لايك قبل تقري 😘
.
.
.
وسط البكاء من الكل ..وسط الزحمة والهدرزة من الصبايا اللي كانوا ملتمات من كل مكان ...الجيران والاصحاب ..والاقارب ..وسط صوت كريمة وهي تبكي ويعزوا فيها الصبايا ..بكى جمانة وجليلة اخواته وحتى صبايا خوته
وسط هذا كله كان في صوت وحيد ..صوت مبحوح ومخنوق بغصة مابت تنبلع ..صوت مجرد ماتسمعه تحس بكمية الحزن اللي فيه ..صوت بكى جنى وكلامها اللي يقطع القلب
من اول ماروحت من المستشفى وهيا تبكي ..مرة تعيط ومرة اتخبط ...نار ما حرها في قلبها ..البنت مش مصدقة ..ومازلت في حالة صدمة ...تبكي تبكي وبعدين اطير فوق اتقول قاعدة على نار ..اتعيط على بوها وتترجى فيهم واحد ايقوللها كذبة ..ايقوللها كنا غالطين وخالد مازال حي 💔
ولكن الميت ماعاد يرجع ..واليوم الله خذا امانته ..وأصبح خالد من الماضي ..الماضي الجميل اللي عاشت فيه جنى مع بوها بدلال وخياب ..عطاها خالد اللي مايقدر حد يعطيه ليها غير سندك وظهرك في الدنيا ..اعطاها لامان والحنان ..اعطاه الثقة والقوة ..اعطاها الحب ومن غير احساب وبلا مقابل
اليوم ياجنى اصبحتي وحدك انتي وأمك ..ماعاد عندكم غير بعض ..لازم كل وحدة منكم اتحاول ادوي جرح الثانية ..والتعب الاكبر بيكون على صباح ..صعب اتحل محل خالد مهما دارت ومهما حاولت ..خالد بيخلي فجوة كبيرة في حياة جنى💔
.
.
.
جارات صباح دخلوها للحوش ادوشت وربطت على خالد ..وقعدت جوا في الحوش ...والباقي مقسومين بين الخيمة والحوش
جمانة لاحقوها عربها ..أمنة وعائشة ..ورحمة وشريفة ..وطبعا اكيد كانت معاها نوال وحميدة وندى
جمانة تبكي ونوال اتصبر فيها ...وبعيد منهم كانت أبرار مقمعزة وبقد ماكانت تتحشى في نوال ...بس ماقدرتش انها ما اتشوفلها وخاصة لما نوال مش منتبها معاها
نظرة أبرار اليوم كانت مختلفة ..كانت نظرة فاحصة ..نظرة فيها غيرة ومقارنة ..كانت تقارن بينها وبين نوال ...بس للاسف مقارنة مش عادلة ...ابرار نهكها المرض وشحب لونها ..وضعفت عن قبل زيادة ...بعكس نوال اللي بعد زواج كمال مرت بفترة صعبة وتأثرت واجد صح ...بس بعدين تعودت وتحسن حالها ..عموما حتى الصحة ليها دور ..وابرار المرض قاعد يقتل فيها بالبطيء 💔
.
.
.
ارتفع طرف الخيمة وخشت غزالة ..بس مش وحدها ..كانت معاها رودينة و وسن ..جابهن رؤوف للعزاء
وسن ترجف وخايفة ..اعيونها على طول اول ماخشت ادور عن امها وامنة 🥺 خاطرها اتشوفهم وتضمهم مرايفة عليهم
امنة كانت اول من شاف وسن من بعيد ..وكان لازم تعطي امها العلم باش ماتتفاجى قدام الصبايا
امنة تحكي بصوت خافت : أمي وسن جت
عائشة اعيونها طاشوا ادور في كل الخيمة : وينها ..وينها 😥
