ﻧﺎﺻﺮ ◀ ﺭﻭﺁﻳﺎﺕ ﺃﻡ ﻧﺎﺻﺮ
# ﺗﺴﻮﻧﺎﻣﻲ
# ﺍﻟﺤﻠﻘﺔ 46_
.
.
.
ﻻﻳﻚ ﻗﺒﻞ ﺗﻘﺮﻱ
.
.
.
ﺟﻨﻰ ﻓﻲ ﺍﻟﻠﻴﻞ ﻓﻲ ﺳﺮﻳﺮﻫﺎ ﻭﺗﺸﻮﻑ ﻟﺪﺑﻠﺔ ﺑﻴﻦ ﺍﺻﺎﺑﻌﻬﺎ ﻭﺍﻟﺒﺴﻤﺔ ﻣﺮﺳﻮﻣﺔ ﻋﻠﻰ ﺷﻔﺎﻓﻬﺎ ﻣﻦ ﺍﻟﺴﻌﺎﺩﺓ .. ﻭﻫﻴﺎ ﺗﺤﻜﻲ ﻣﻊ ﻋﺎﺑﺪ
ﺟﻨﻰ : ﺷﻦ ﻗﺎﻟﻮﺍ ﺍﻣﻚ ﻭﺍﺧﻮﺍﺗﻚ ﻋﻠﻴﺎ ؟
ﻋﺎﺑﺪ : ﺷﻦ ﺑﻴﻘﻮﻟﻮﺍ ؟ ﻋﺠﺒﺘﻴﻬﻢ ﻃﺒﻌﺎ .. ﻭﺧﺎﺻﺔ ﺍﻟﻮﺍﻟﺪﺓ ﻣﺶ ﻋﺎﺭﻓﺔ ﺷﻦ ﺗﺤﻜﻲ ﻋﻠﻴﻚ
ﺟﻨﻰ ﺑﺨﺠﻞ : ﺟﺪﻳﺎﺕ ؟
ﻋﺎﺑﺪ : ﺍﻛﻴﺪ .. ﻭﻳﻦ ﺑﻴﻠﻘﻮﺍ ﺑﻨﺖ ﺍﺣﻠﻰ ﻣﻨﻚ ؟
ﺟﻨﻰ : ﺑﺲ ﺍﻧﺎ ﻣﺶ ﻗﺼﺪﻱ ﻋﻠﻰ ﺍﻟﺸﻜﻞ ﻭﺑﺲ .. ﻗﺼﺪﻱ ﻋﻠﻰ ﻛﻞ ﺷﻲ .. ﺣﺴﻴﺖ ﺍﻣﻚ ﻃﻮﻝ ﺍﻟﺤﻠﻔﺔ ﻭﻫﻴﺎ ﺍﺗﺸﻮﻓﻠﻲ ﺑﻨﻈﺮﺍﺕ ﻏﺮﻳﺒﺔ .. ﺧﻔﺖ ﺍﺗﻜﻮﻥ ﻣﺶ ﻣﻮﺍﻓﻘﺔ ﻭﺍﻻ ﺷﻲ
ﻋﺎﺑﺪ ﺍﺑﺘﺴﻢ : ﻻ ﺑﺎﻟﻌﻜﺲ ﻋﺎﺟﺒﺘﻴﻬﺎ .. ﺑﺲ ﺑﺼﺮﺍﺣﺔ ﻛﺎﻧﺖ ﻣﺼﺪﻭﻣﺔ ﺍﺷﻮﻳﺎ
ﺟﻨﻰ ﻋﻘﺪﺕ ﺣﻮﺍﺟﺒﻬﺎ : ﻟﻴﺶ ؟ !!
ﻋﺎﺑﺪ ﺿﺤﻚ : ﻣﺎﻫﻮ ﻣﻦ ﺍﻭﻝ ﻣﺎﻛﻠﻤﺘﻬﻢ ﻋﻠﻴﻚ .. ﻭﻛﻴﻒ ﻗﻠﺘﻠﻬﻢ ﻋﻠﻰ ﻋﻤﺮﻙ ﻭﻛﻞ ﺷﻲ .. ﺣﺴﻴﺘﻬﺎ ﻣﺎﺩﻭﺭﺗﺶ ﻭﻋﺎﺩﻱ .. ﻭﻗﺎﻟﺖ ﺍﻫﻢ ﺷﻲ ﻋﺎﺟﺒﺘﻚ ﻭﺗﺒﻴﻬﺎ ... ﺍﻣﺎ ﻟﻤﺎ ﺷﺎﻓﺘﻚ ﻓﻲ ﺍﻭﻝ ﺯﻳﺎﺭﺓ ﻭﺣﺘﻰ ﺍﻟﻴﻮﻡ ﻓﻲ ﺍﻟﺤﻔﻠﺔ .. ﻗﺎﻟﺘﻠﻲ ﺍﻟﺒﻨﺖ ﺣﺴﻴﺘﻬﺎ ﺻﻐﻴﺮﺓ ﻭﺍﺟﺪ ﻋﻠﻴﻚ
ﺟﻨﻰ : ﻭﺍﻟﻠﻪ ﻣﺶ ﺻﻐﻴﺮﺓ ﻟﺪﺭﺟﺔ ﻫﺬﻩ .. ﻋﻤﺮﻱ 19 ﻭﺧﺎﺷﺔ ﻋﻠﻰ ﻋﺸﺮﻳﻦ ... ﺑﺲ ﺟﺴﻤﻲ ﻭﺷﻜﻠﻲ ﻫﻜﻲ ﻣﺶ ﻋﺎﺭﻓﺔ ﻛﻴﻒ
ﻋﺎﺑﺪ : ﻭﻻ ﻳﻬﻤﻚ .. ﺃﻧﺤﺒﻚ ﻭﺍﻧﺤﺐ ﺷﻜﻠﻚ ﻭﺍﻧﺤﺐ ﺟﺴﻤﻚ ﻭﻛﻞ ﺷﻲ ﻓﻴﻚ ﺯﻱ ﻣﺎﻫﻮﺍ
ﺟﻨﻰ ﺍﻧﺤﺮﺟﺖ : ﻳﺨﻠﻴﻚ ﻟﻴﺎ .. ﻭﺍﻧﺎ ﻧﻤﻮﺕ ﻋﻠﻴﻚ .. ﻭﺑﻌﺪﻳﻦ ﻣﺎﺯﺍﻝ ﺍﻟﻌﺮﺱ ﻟﻤﺎ ﺍﻧﻜﻤﻞ ﺩﺭﺍﺳﺘﻲ ﺑﻨﻜﻮﻥ ﺍﻛﺒﺮ ﻭﻗﺘﻬﺎ
ﻋﺎﺑﺪ ﺍﺑﺘﺴﻢ : ﻣﻌﺎﺵ ﺗﻔﻜﺮﻱ ﻓﻲ ﺷﻲ .. ﺍﻧﺎ ﺍﻟﻠﻲ ﺧﺬﻳﺘﻚ ﻭﻣﺶ ﻣﺼﺪﻕ ﻭﺍﻧﺘﻲ ﺭﺍﺿﻴﺔ ﺑﻴﺎ .. ﻓﻮﺗﻲ ﺍﻱ ﺷﻲ ﺛﺎﻧﻲ
ﺟﻨﻰ : ﺗﻤﺎﻡ .. ﺍﺳﺎﺳﺎ ﻣﻌﺎﺵ ﻳﻬﻤﻨﻲ ﺷﻲ ﺍﻻ ﺍﻧﺘﺎ .. ﻃﺒﻌﺎ ﺑﻌﺪ ﺑﺎﺑﺎ ﻭﻣﺎﻣﺎ
ﻋﺎﺑﺪ : ﻭﻫﺬﺍ ﺍﻟﺼﺢ .. ﺍﻟﻤﻬﻢ ﺑﺘﺠﻲ ﺑﻜﺮﺍ ﻟﺠﺎﻣﻌﺔ ؟
ﺟﻨﻰ : ﺇﻥ ﺷﺎﻟﻠﻪ
ﻋﺎﺑﺪ ﺑﻬﺪﻭﺀ : ﺭﺍﻳﻔﺖ ﻋﻠﻴﻚ
ﺟﻨﻰ : ﻋﺎﺑﺪ ﻧﺒﻲ ﻧﺸﻮﻓﻚ ﺍﻭﻝ ﻭﺍﺣﺪ ﺑﻜﺮﺍ
ﻋﺎﺑﺪ : ﺍﻛﻴﺪ .. ﺑﺘﻠﻘﻴﻨﻲ ﺍﻭﻝ ﻭﺍﺣﺪ ﻧﺴﺘﻨﻰ ﻓﻴﻚ
ﺟﻨﻰ ﺍﺑﺘﺴﻤﺖ : ﺗﻤﺎﻡ
.
.
.
))********* ﺍﻟﻜﺎﺗﺒﺔ ﺃﻡ ﻧﺎﺻﺮ ((
.
.
.
ﺛﺎﻧﻲ ﻳﻮﻡ ﺍﻟﺼﺒﺢ .. ﻭﻗﻔﺖ ﺳﻴﺎﺭﺓ ﺧﺎﻟﺪ ﻓﻲ ﺑﺎﺭﻛﻲ ﺍﻟﺠﺎﻣﻌﺔ
ﺧﺎﻟﺪ ﺍﻳﻔﺘﺶ ﻓﻲ ﺟﻴﻮﺑﻪ : ﻧﻌﻄﻴﻚ ﻓﻠﻮﺱ ؟
ﺟﻨﻰ ﻓﺘﺤﺖ ﺍﻟﺒﺎﺏ : ﻻ ﻋﻨﺪﻱ ﺗﻤﺎﻡ
ﺧﺎﻟﺪ ﺑﻴﻔﺘﺢ ﺍﻟﺒﺎﺏ ﻭﻳﻨﺰﻝ ﻣﻌﺎﻫﺎ ﺯﻱ ﺍﻟﻌﺎﺩﺓ .. ﺭﻓﻊ ﺍﻋﻴﻮﻧﻪ ﻓﻮﻕ ﻭﺷﺎﻑ ﻋﺎﺑﺪ ﻭﺍﻗﻒ ﻋﻠﻰ ﻣﻄﻠﻊ ﺍﻟﺪﺭﻭﺝ
ﺃﺑﺘﺴﻢ ﻭﺷﺎﻑ ﻟﺠﻨﻰ ﻭﺍﻓﻘﺔ ﺑﺮﺍ ﺍﻟﺴﻴﺎﺭﺓ : ﺍﻧﻀﻨﻲ ﻣﺎﻓﻴﺶ ﺩﺍﻋﻲ ﻧﻨﺰﻝ ﻣﻌﺎﻙ ﺍﻟﻴﻮﻡ ؟
ﺟﻨﻰ ﻭﺟﻬﻬﺎ ﺗﻮﺭﺩ ﻭﺍﺭﺗﺒﻜﺖ : ﺑﺮﺍﺣﺘﻚ ﺯﻱ ﻣﺎﺗﺒﻲ
ﺧﺎﻟﺪ ﻋﻘﺪ ﺣﻮﺍﺟﺒﻪ ﺑﺠﺪﻳﺔ : ﻣﺶ ﻓﺎﺿﻲ ﻋﻨﺪﻱ ﺷﻐﻞ .. ﺧﻼﺹ ﺧﺸﻲ ﺑﺮﻭﺣﻚ ﻋﺎﺩ
ﺟﻨﻰ ﻫﺰﺕ ﺭﺍﺳﻬﺎ ﻭﺻﻜﺮﺕ ﺍﻟﺒﺎﺏ : ﺗﻤﺎﻡ ﻣﺎﻧﻌﻄﻠﻜﺶ .. ﺑﺎﻟﺴﻼﻣﺔ
ﻣﺸﺖ ﺟﻨﻰ ﺑﺴﺮﻋﺔ .. ﻭﺧﺎﻟﺪ ﺍﺑﺘﺴﻢ .. ﻭ ﻭﺧﺮ ﺍﻟﺴﻴﺎﺭﺓ .. ﻭﻟﻒ ﺑﻴﻬﺎ ﻃﻠﻊ ﻣﻦ ﺍﻟﺒﺎﺭﻛﻲ
ﺟﻨﻰ ﺗﺮﻛﺐ ﻣﻦ ﺩﺭﻭﺝ ﺍﻟﺠﺎﻣﻌﺔ .. ﻭﻣﺮﺓ ﻣﺮﺓ ﺗﺮﻓﻊ ﻓﻲ ﺍﻋﻴﻮﻧﻬﺎ .. ﻟﻔﻮﻕ .. ﻭﻳﻦ ﻣﺎﻛﺎﻥ ﻋﺎﺑﺪ ﻭﺍﻗﻒ ﻭﻳﺸﻮﻓﻠﻪ ﺑﺸﻮﻕ .. ﺑﺤﺐ .. ﺑﻨﻈﺮﺓ ﻣﻠﻴﺎﻧﺔ ﻛﻼﻡ ﻭﺻﻠﻬﺎ ﻗﺒﻞ ﺣﺘﻰ ﻣﺎﺗﻮﺻﻞ ﻓﻴﻪ
ﺟﻨﻰ ﺍﺧﻴﺮﺍً ﻭﻗﻔﺖ ﻗﺪﺍﻣﻪ ﻭﻣﺪﺕ ﻳﺪﻫﺎ ﻣﻨﺤﺮﺟﺔ : ﺻﺒﺎﺡ ﺍﻟﺨﻴﺮ
ﻋﺎﺑﺪ ﺳﻠﻢ ﻋﻠﻴﻬﺎ ﻭﺿﻐﻂ ﻋﻠﻰ ﻳﺪﻫﺎ : ﺻﺒﺎﺡ ﺍﻟﻨﻮﺭ .. ﺷﻦ ﺍﺧﺒﺎﺭﻙ ؟
ﺟﻨﻰ : ﺑﺨﻴﺮ ﺍﻟﺤﻤﺪﺍﻟﻠﻪ .. ﺷﻦ ﺍﺧﺒﺎﺭﻙ ؟
ﻋﺎﺑﺪ : ﺑﺨﻴﺮ .. ﺗﻌﺎﻟﻲ ﺍﻧﺨﺸﻮﺍ
ﻗﺮﺑﺖ ﺟﻨﻰ ﻣﻨﻪ ﻭﺧﺸﻮﺍ ﻻﺛﻨﻴﻦ ﻣﻊ ﺑﻌﻀﻬﻢ ... ﻭﺳﻂ ﻧﻈﺮﺍﺕ ﺑﺎﻗﻲ ﺍﻟﻄﻠﺒﺔ .. ﻭﻫﻤﺲ ﻭﻛﻼﻡ ﻓﻲ ﺍﻟﺨﻔﻰ ﻋﻦ ﺧﻄﻮﺑﺘﻬﻢ ﺍﻟﻤﻔﺎﺟﺌﺔ
ﺧﺸﺖ ﺟﻨﻰ ﻟﻠﻤﺤﺎﺿﺮﺓ .. ﻭﻋﺎﺑﺪ ﻣﺸﻰ ﻟﻠﻤﻜﺘﺒﻪ .. ﻭﺑﻌﺪﻳﻦ ﻣﺸﻰ ﻟﻠﻘﺎﻋﺔ ﻳﻌﻄﻲ ﻓﻲ ﻣﺤﺎﺿﺮﺓ .. ﺑﺲ ﻟﺴﻨﺔ ﺍﻭﻟﻰ
.
.
.
ﺑﻌﺪ ﺍﻟﻤﺤﺎﺿﺮﺓ .. ﺟﻨﻰ ﻃﻠﻌﺖ ﻭﻣﺸﺖ ﻟﻠﻤﻜﺎﺗﺐ .. ﻭﺧﺸﺖ ﻣﻜﺘﺐ ﻋﺎﺑﺪ : ﺳﻼﻡ
ﻋﺎﺑﺪ ﻛﺎﻥ ﻣﻄﺒﺲ ﻋﻠﻰ ﺍﻭﺭﺍﻕ ﻭﻳﺸﻮﻓﻠﻬﻢ .. ﺭﻓﻊ ﻭﺟﻬﻪ ﻭﺣﻮﻝ ﻧﻈﺮﺗﻪ ﻣﺒﺘﺴﻢ : ﺍﻫﻠﻴﻦ .. ﺗﻌﺎﻟﻲ ﺗﻔﻀﻠﻲ
ﺟﻨﻰ ﺧﺸﺖ ﻭﻗﻤﻌﺰﺕ ﻋﻠﻰ ﻛﺮﺳﻲ ﺟﻨﺐ ﻣﻜﺘﺒﻪ
ﻋﺎﺑﺪ ﺻﺒﺎ : ﺗﺸﺮﺑﻲ ﻗﻬﻮﺓ ؟
ﺟﻨﻰ ﻫﺰﺕ ﺭﺍﺳﻬﺎ ﺑﺤﺰﻥ : ﻻ .. ﻟﻴﺎ ﻓﺘﺮﺓ ﻋﻠﻰ ﺍﻟﻤﻨﺒﻬﺎﺕ .. ﻋﺸﺎﻥ ﺍﻟﻨﻮﻡ ﻭﻫﻜﻲ
ﻋﺎﺑﺪ ﺯﻡ ﻓﻤﻪ ﻭﺗﻨﻬﺪ ﻭﻗﻤﻌﺰ ﺟﻨﺒﻬﺎ : ﻓﺘﺮﺓ ﻭﺗﻤﺸﻲ ﺑﺎﺫﻥ ﺍﻟﻠﻪ .. ﺍﻫﻢ ﺷﻲ ﺻﺤﻜﺘﻚ
ﺟﻨﻰ : ﻻ ﺍﻟﺤﻤﺪﺍﻟﻠﻪ ﺍﺣﺴﻦ ﻣﻦ ﻗﺒﻞ
ﻋﺎﺑﺪ ﻣﺪ ﻳﺪﻩ ﺑﻴﻤﺴﻚ ﻳﺪﻫﺎ : ﻭﺍﻧﺎ ﺍﺍﺍ
ﺟﻨﻰ ﻃﻮﻝ ﺳﺤﺒﺖ ﻳﺪﻫﺎ ﺑﺨﻮﻑ
ﻋﺎﺑﺪ ﺑﻠﻊ ﺭﻳﻘﻪ ﻭﻳﺸﻮﻓﻠﻬﺎ ﺑﺎﺳﺘﻐﺮﺍﺏ : ﺷﻨﻮ ﻓﻲ ؟ ﺷﻦ ﺻﺎﺭﻟﻚ ؟ !
ﺟﻨﻰ ﻣﻄﺒﺴﺔ ﻭﺿﺎﻣﺔ ﺍﻳﺪﻳﻬﺎ ﻟﺼﺪﺭﻫﺎ : ﻣﺎﻧﻌﺮﻓﺶ .. ﺑﺲ ﻣﺎﻧﺤﺒﺶ ﺍﻱ ﺣﺪ ﻳﻠﻤﺴﻨﻲ
ﻋﺎﺑﺪ : ﺑﺲ ﺍﻧﺎ ﻣﺶ ﺍﻱ ﺣﺪ .. ﺍﻧﺎ ﺧﻄﻴﺒﻚ .. ﻟﻴﺶ ﺧﺎﻳﻔﺔ ﻣﻨﻲ ؟ !
ﺟﻨﻰ ﺩﻣﻌﺖ : ﻭﺍﻟﻠﻪ ﻏﺼﺒﺎ ﻋﻨﻲ ﻋﺎﺑﺪ ﻣﺶ ﺑﻴﺪﻱ ... ﺍﻱ ﺣﺮﻛﺔ ﻣﻔﺎﺟﺌﺔ ﺍﻧﺨﺎﻑ ﻣﻨﻬﺎ ﻭﻧﺘﻮﺗﺮ .. ﻣﺎﺯﻟﺖ ﻣﺮﻋﻮﺑﺔ ﻣﻦ ﺍﻟﻤﻮﺿﻮﻉ
ﻋﺎﺑﺪ ﺗﻨﻬﺪ ﺑﻌﺼﺒﻴﺔ ﻭﻃﺒﺲ ﺷﺪ ﺑﻴﻦ ﺍﻋﻴﻮﻧﻪ ﻭﻧﻔﺦ : ﺍﻭﻭﻭﻓﻪ
ﺟﻨﻰ : ﻣﺎﺗﻌﺼﺒﺶ ﻣﻨﻲ ﺑﺎﻟﻠﻪ ﻋﻠﻴﻚ
ﻋﺎﺑﺪ ﺷﺎﻓﻠﻬﺎ ﻭﻓﻲ ﺍﻟﻢ ﻓﻲ ﺍﻋﻴﻮﻧﻪ : ﺍﻧﺎ ﻣﺶ ﻣﻌﺼﺐ ﻣﻨﻚ .. ﺍﻧﺎ ﻣﻘﻬﻮﺭ ﻭﻗﻠﺒﻲ ﻳﻐﻠﻲ ﻋﻠﻴﻚ .. ﻛﻞ ﻣﺮﺓ ﻧﺘﺨﻴﻠﻚ ﻓﻴﻬﺎ ﺑﻴﻦ ﺍﻳﺪﻳﻬﻢ ﻭﺍﻧﺸﻮﻑ ﻭﺿﻌﻚ ﺗﻮﺍ ﺍﻧﺰﻳﺪ ﺍﻧﻌﺼﺐ ﻭﻧﺎﻛﻞ ﻓﻲ ﺑﻌﻀﻲ ﻣﺶ ﻋﺎﺭﻑ ﺷﻦ ﺍﻧﺪﻳﺮ ﺑﺎﺵ ﺍﻧﺒﺮﺩ ﺍﻟﻨﺎﺭ ﺍﻟﻠﻲ ﻓﻲ ﺻﺪﺭﻱ .. ﻛﻞ ﻣﺎﻧﺤﻂ ﺭﺍﺳﻲ ﻋﻠﻰ ﺍﻟﻤﺨﺪﺓ ﻧﻘﻌﺪ ﺍﻧﻠﻮﻡ ﻓﻲ ﺭﻭﺣﻲ ﻭﻧﺘﺤﺴﺮ .. ﻭﻟﺴﺎﻥ ﺣﺎﻟﻲ ﻳﻘﻮﻝ .. ﻳﺎﺭﻳﺘﻚ ﺯﺩﺕ ﺻﻜﺮﺕ ﺭﺍﺳﻚ ﻋﻠﻴﻬﺎ .. ﻳﺎﺭﻳﺘﻚ ﺣﺎﻭﻟﺖ ﺍﻛﺜﺮ ﻣﻊ ﺧﺎﻟﺪ ﻟﻌﻨﺪ ﺍﻗﻨﻌﺘﻪ .. ﻳﺎﺭﻳﺖ ﻛﻨﺖ ﻗﺎﻋﺪ ﻣﻌﺎﻫﺎ ﻭﻗﺖ ﺍﻟﻠﻲ ﺻﺎﺭ .. ﺭﺍﻫﻮ ﻣﺎﻗﺪﺭ ﺣﺪ ﻳﻘﺮﺏ ﻣﻨﻬﺎ .. ﻭﻻ ﻳﻤﺲ ﺷﻌﺮﺓ ﻣﻦ ﺭﺍﺳﻬﺎ .. ﻳﺎﺭﻳﺖ ﻭﻳﺎﺭﻳﺖ ﻭﻳﺎﺭﻳﺖ ﻣﻦ ﻏﻴﺮ ﻓﺎﺋﺪﺓ .. ﻭﺍﻟﻨﺎﺭ ﻛﻞ ﻳﻮﻡ ﺍﺗﺰﻳﺪ ﻓﻲ ﻗﻠﺒﻲ
ﺟﻨﻰ ﻗﺮﺑﺖ ﻣﻨﻪ ﻭﺣﻄﺖ ﻳﺪﻫﺎ ﺗﺮﻋﺶ ﻋﻠﻰ ﻳﺪﻩ : ﺍﻫﺪﺍ ﻋﺎﺑﺪ ﻋﺸﺎﻥ ﺧﺎﻃﺮﻱ .. ﻣﺎﻧﺒﻴﺶ ﺍﻧﺸﻮﻑ ﺯﻋﻞ ﻓﻲ ﺍﻋﻴﻮﻧﻚ .. ﻣﺎﺗﺨﺎﻓﺶ ﻋﻠﻴﺎ ﻃﻮﻝ ﻣﺎ ﺍﻧﺘﺎ ﻣﻌﺎﻳﺎ .. ﻭﺍﻟﻠﻲ ﺻﺎﺭ ﻛﺎﻥ ﻏﺼﺒﺎ ﻋﻨﻲ ﻭﻋﻨﻚ ... ﻭﺍﻧﺎ ﻣﻌﺎﻙ ﺑﻨﺮﺩ ﺯﻱ ﻗﺒﻞ ﻭﺍﺣﺴﻦ
ﻋﺎﺑﺪ ﻋﺾ ﻋﻠﻰ ﻓﻤﻪ ﻭﺷﺎﻑ ﻟﻌﻴﻮﻧﻬﺎ .. ﻭﺣﻂ ﻳﺪﻩ ﻓﻮﻕ ﻳﺪﻫﺎ .. ﻭﺣﺲ ﺑﻴﻬﺎ ﻟﻤﺎ ﺭﻋﺸﺖ ﻣﻦ ﺍﻟﺨﻮﻑ .. ﺿﻐﻂ ﻋﻠﻰ ﻳﺪﻫﺎ ﺑﻘﻮﺓ : ﻣﻌﺎﻙ ﻭﻣﺴﺘﺤﻴﻞ ﺍﻧﺨﻠﻴﻚ ﻣﻬﻤﺎ ﺻﺎﺭ .. ﺍﻧﺤﺒﻚ ﻭﻣﺶ ﻣﺴﺘﻌﺪ ﻧﺨﺴﺮﻙ ﻟﻮ ﺑﻨﺨﺴﺮ ﻛﻞ ﺷﻲ ﻋﻠﻰ ﺧﺎﻃﺮﻙ .. ﺍﻟﻠﻲ ﺣﺎﺳﺲ ﺑﻴﻪ ﻧﺎﺣﻴﺘﻚ .. ﺍﻛﺒﺮ ﻣﻦ ﺧﻮﻓﻚ ﻭﻣﻦ ﻋﺼﺒﻴﺘﻲ ﻭﻣﻦ ﻛﻼﻡ ﺍﻟﻨﺎﺱ .. ﺍﻛﺒﺮ ﺣﺘﻰ ﻣﻦ ﻗﻠﺒﻲ ﻭﻣﺶ ﻋﺎﺭﻑ ﻛﻴﻒ ﺍﻧﺴﻴﻄﺮ ﻋﻠﻴﻪ
ﺟﻨﻰ ﺍﺑﺘﺴﻤﺖ ﻭﻃﺒﺴﺖ .. ﻭﺳﺤﺒﺖ ﻳﺪﻫﺎ ﺑﺎﻟﺸﻮﻳﺎ ﻣﻨﻪ
ﻋﺎﺑﺪ ﺗﻨﻬﺪ ﻭﻓﺮﻙ ﺟﺒﻴﻨﻪ .. ﻻﺯﻡ ﻳﺼﺒﺮ ﻋﻠﻴﻬﺎ .. ﻟﻌﻨﺪ ﺍﺗﺮﺩ ﺟﻨﻰ ﺍﻟﻘﺪﻳﻤﺔ ﺍﻟﻠﻲ ﻣﺎﺗﺨﺎﻓﺶ ﻣﻦ ﺷﻲ
.
.
.
))********** ﺍﻟﻜﺎﺗﺒﺔ ﺍﻡ ﻧﺎﺻﺮ ((
.
.
.
ﺍﻟﻌﺸﻴﺔ .. ﺟﻬﺎﺩ ﻛﺎﻥ ﻳﺸﺮﺏ ﻓﻲ ﻗﻬﻮﺗﻪ ﻭﺟﻤﺎﻧﺔ ﺭﺍﻗﺪﺓ ﻣﺮﻭﺣﺔ ﻣﻦ ﺍﻟﺠﺎﻣﻌﺔ ﺗﻌﺒﺎﻧﺔ ..... ﺳﻤﻊ ﺻﻮﺕ ﻫﺮﺟﺔ ﻭﺗﺨﺒﻴﻂ ﻓﻲ ﺍﻟﺸﺎﺭﻉ .. ﻓﺘﺢ ﺭﻭﺷﻦ ﺍﻟﺼﺎﻟﺔ .. ﻭﺷﺎﻑ ﻓﻴﺼﻞ ﻭﻇﺎﻓﺮ ﻳﺘﻀﺎﺭﺑﻮﺍ ﻗﺪﺍﻡ ﺍﻟﺤﻮﺵ
ﻫﺰ ﺭﺍﺳﻪ ﺑﻌﺼﺒﻴﺔ ﻭﻧﺰﻝ ﻓﻨﺠﺎﻥ ﺍﻟﻘﻬﻮﺓ ﻭﻃﻠﻊ ﻣﻦ ﺍﻟﺸﻘﺔ ﻧﺰﻝ ﺑﺴﺮﻋﺔ ﻭﻃﻠﻊ ﻟﺸﺎﺭﻉ .. ﺍﻳﻔﻚ ﺑﻴﻨﻬﻢ .. ﻣﻊ ﻃﻠﻌﺖ ﺍﻟﻤﻌﺘﺼﻢ . ﺟﻬﺎﺩ ﺳﺤﺐ ﻓﻴﺼﻞ ﻭﻋﺼﻮﻣﻲ ﺳﺤﺐ ﻇﺎﻓﺮ
ﻇﺎﻓﺮ ﺍﻳﺸﻮﻓﻠﻪ ﺑﺤﻘﺪ ﻭﺍﻧﻔﺎﺳﻪ ﻣﺘﻘﻄﻌﺔ : ﺗﺎﻓﻪ
ﻓﻴﺼﻞ ﺍﻳﻔﻚ ﻓﻲ ﺭﻭﺣﻪ ﻣﻦ ﺟﻬﺎﺩ : ﺻﻜﺮ ﻓﻤﻚ ﺍﻟﻨﻢ
ﺟﻬﺎﺩ ﺩﻑ ﻓﻴﺼﻞ ﻭﻓﻨﺺ ﻓﻲ ﻇﺎﻓﺮ : ﺗﻲ ﻛﻨﻜﻢ ﺍﻟﺰﻓﺖ ﺷﻦ ﺻﺎﺭﻟﻜﻢ ؟ ﻋﻠﻰ ﺷﻨﻮ ﺗﺘﻌﺎﺭﻛﻮﺍ ؟
ﻇﺎﻓﺮ : ﺃﺳﺎﻝ ﺍﻟﺤﻴﻮﺍﻥ ﻫﺬﺍ ﺍﻟﻠﻲ ﻣﺎﻳﺘﺤﺸﻢ ﻋﻠﻰ ﻭﺟﻬﻪ
ﻓﻴﺼﻞ ﺑﻌﺼﺒﻴﺔ ﻭﻳﺘﺤﺰﺯ ﻋﻠﻰ ﻇﺎﻓﺮ : ﺣﻴﻮﺍﻥ ﺑﻌﻴﻨﻚ .. ﺗﻲ ﺣﻮﻝ ﺍﻟﻨﻢ ﺧﻠﻴﻨﻲ ﻧﻘﺘﻠﻪ
ﺟﻬﺎﺩ ﻋﻴﻂ ﻋﻠﻴﻬﻢ : ﺗﻘﺘﻞ ﻣﻦ ﺍﻟﻬﻢ ﺷﻦ ﺻﺎﺭ ﺑﻴﻨﻜﻢ ؟
ﻓﻴﺼﻞ : ﺧﻮﻙ ﻫﺬﺍ ﻣﺶ ﻃﺒﻴﻌﻲ .. ﻫﺠﻢ ﻋﻠﻴﺎ ﻣﻦ ﻏﻴﺮ ﺳﺒﺐ
ﻇﺎﻓﺮ ﺍﻳﺪﻑ ﻓﻲ ﺍﻟﻤﻌﺘﺼﻢ ﺷﺎﺩﻩ : ﻳﺎﺭﺍﺟﻞ ﺣﻮﻝ ﻫﺬﺍ ﻻﺯﻡ ﻧﺮﺑﻴﻪ ﻣﻦ ﺟﺪﻳﺪ
ﺟﻬﺎﺩ ﺩﻑ ﻓﻴﺼﻞ ﻭ ﻭﻗﻒ ﻓﻲ ﻭﺳﻄﻬﻢ : ﺧﻼﺍﺍﺍﺍﺹ .. ﺧﻼﺹ ﺷﻨﻮ ﻫﺬﺍ ﺣﺸﻤﺘﻮﻧﺎ ﻗﺪﺍﻡ ﺍﻟﻨﺎﺱ .... ﻭﺍﻧﺘﺎ ﻳﺎﻇﺎﻓﺮ ﻋﻴﺐ ﻫﺬﺍ ﺿﻴﻒ ﻗﺎﻋﺪ ﻋﻨﺪﻧﺎ
ﻇﺎﻓﺮ : ﺿﻴﻒ ﻳﺤﺘﺮﻡ ﺍﻟﺤﻮﺵ ﺍﻟﻠﻲ ﻓﺘﺢ ﺑﺎﺑﻪ ﻟﻴﻪ .. ﻣﺶ ﺍﻋﻴﻮﻧﻪ ﻋﻠﻰ ﻃﺎﻟﻊ ﻭﺍﻟﺨﺎﺵ ﻭﻣﺎﻓﻴﺶ ﺣﺸﻢ ﻭﻻ ﺍﺣﺘﺮﺍﻡ ﻻﻫﻞ ﺍﻟﺤﻮﺵ
ﻓﻴﺼﻞ : ﺍﻧﺎ ﻣﺤﺘﺮﻡ ﻭﻏﺼﺒﺎ ﻋﻨﻚ .. ﻭﻻ ﻋﻤﺮﻱ ﻧﺮﻓﻊ ﻋﻴﻨﻲ ﺣﺘﻰ ﻓﻲ ﺣﻮﺵ ﺟﻴﺮﺍﻧﺎ .. ﻳﺎﺑﺎﻝ ﺣﻮﺵ ﻓﺘﺢ ﺑﺎﺑﻪ ﻟﻴﺎ .. ﻟﻜﻦ ﺍﻧﺘﺎ ﺍﺩﻭﺭ ﻓﻲ ﺍﻟﻤﺸﺎﻛﻞ ﻣﻦ ﺍﻭﻝ ﻣﺎﺷﻔﺘﻨﻲ ﻭﻏﻴﺮ ﻋﻠﻰ ﺳﺒﻠﺔ
ﻇﺎﻓﺮ : ﺑﺎﻟﻠﻪ ﻋﻠﻴﺶ ﺑﻨﺪﻭﺭ ﻋﻨﺪﻙ ؟ ﺑﻼ ﺩﻭﺓ ﻓﺎﺿﻴﺔ
ﺟﻬﺎﺩ : ﺧﻼﺍﺍﺹ ﻗﻠﺖ ﻛﻴﻒ ﺗﻔﻬﻤﻮﺍ ... ﺍﻧﺘﺎ ﺍﺭﻛﺐ ﻟﻠﺸﻘﺘﻚ .. ﻭﺍﻧﺘﺎ ﺧﺶ ﻟﻠﻤﻠﺤﻖ
ﻇﺎﻓﺮ : ﺍﻳﺨﺶ ﻭﻳﻦ .. ﻫﺬﺍ ﻣﻌﺎﺵ ﻳﻘﻌﺪ ﺣﺘﻰ ﺩﻗﻴﻘﺔ ﻋﻨﺪﻧﺎ
ﺟﻬﺎﺩ ﺑﻌﺼﺒﻴﺔ ﻓﻨﺺ ﻓﻴﻪ : ﻇﺎﺍﺍﺍﺍﻓﺮ
ﻓﻴﺼﻞ ﻟﻮﺡ ﺑﻴﺪﻩ ﻭﺭﻛﺐ ﺳﻴﺎﺭﺗﻪ : ﻣﺎﻧﺒﻴﺶ ﺍﻧﺨﺶ ﺍﻟﻨﻢ .. ﻣﻦ ﺍﻻﻭﻝ ﻗﺘﻠﻚ ﺧﻠﻴﻨﻲ ﺑﺮﺍﺣﺘﻲ .. ﺍﻫﻮ ﺷﻮﻑ ﺍﺧﺮﺗﻬﺎ .. ﻭﺍﺣﺪ ﻣﺘﺨﻠﻒ ﻳﻔﺘﺢ ﻓﻤﻪ ﻋﻠﻴﺎ
ﻭﻟﻊ ﻓﻴﺼﻞ ﺳﻴﺎﺭﺗﻪ .. ﻭﺧﺒﻂ ﺍﻟﺒﺎﺏ ﻭﺷﻴﻄﻬﺎ ﻣﻦ ﺍﻟﺸﺎﺭﻉ .... ﻭﺟﻬﺎﺩ ﺗﻨﻬﺪ ﻭﻧﻔﺦ ﺑﻌﺼﺒﻴﺔ ﻭﺍﻟﺘﻔﺖ ﻋﻠﻰ ﻇﺎﻓﺮ : ﺍﻛﻮﻳﺲ ﻫﻜﻲ .. ﺧﻼﺹ ﺗﺮﻳﺤﺖ ؟
ﻇﺎﻓﺮ ﻟﻮﺡ ﺑﻴﺪﻩ ﻭﺧﺶ ﻟﻠﺤﻮﺵ : ﺍﻫﺎ ﺗﺮﻳﺤﺖ .. ﻣﺸﻴﺔ ﺑﻼ ﺭﺩﺓ ﺇﻥ ﺷﺎﻟﻠﻪ
ﺭﻛﺐ ﻇﺎﻓﺮ ﻣﻌﺼﺐ .. ﻭﺟﻬﺎﺩ ﻭﺍﻟﻤﻌﺘﺼﻢ ﺧﺸﻮﺍ ﻟﻠﺤﻮﺵ ﻣﻊ ﺑﻌﻀﻬﻢ
ﺍﻟﻤﻌﺘﺼﻢ : ﻫﺎﺫﻭﻡ ﻛﻨﻬﻢ ؟ ﺷﻦ ﺻﺎﻳﺮ ﺑﻴﻨﻬﻢ ؟
ﺟﻬﺎﺩ : ﺷﻦ ﻋﺮﻓﻨﻲ ﺍﻧﺘﺎ ﻻﺧﺮ .. ﺧﺎﻳﻞ ﻓﻲ ﺧﻮﻙ ﻭﺗﻔﻜﻴﺮﻩ
ﺍﻟﻤﻌﺘﺼﻢ : ﺑﺎﻟﻚ ﺷﺎﻳﻒ ﻣﻨﻪ ﺷﻲ ؟ ﻟﻴﺶ ﻣﺎﺗﺴﺄﻟﻪ ؟
ﺟﻬﺎﺩ : ﻣﺎﻫﻮ ﻗﺪﺍﻣﻚ ﻣﺎﻳﺒﻴﺶ ﻳﺤﻜﻲ ﻟﻴﺶ ﺗﻌﺎﺭﻛﻮﺍ ؟ ﻋﻤﻮﻣﺎ ﺧﻠﻲ ﺍﻟﺠﻮ ﻳﻬﺪﺍ ﻭﺗﻮﺍ ﻧﻌﺮﻑ ﺷﻦ ﻓﻲ ﺑﻴﻨﻬﻢ
ﺍﻟﻤﻌﺘﺼﻢ ﺍﺑﺘﺴﻢ ﺑﺨﺒﺚ : ﺑﺲ ﺑﺼﺮﺍﺣﺔ ﻫﻜﻲ ﻗﻮﻝ ﺍﻟﺤﻖ .. ﻣﻊ ﻣﻦ ﺗﺒﻲ ﺗﻮﻗﻒ .. ﻣﻊ ﺧﻮﻙ ﺍﻟﻘﺪﻳﻢ ﻭﺍﻻ ﺧﻮﻙ ﺍﻟﺠﺪﻳﺪ ؟
ﺟﻬﺎﺩ ﺷﺎﻑ ﻟﻤﻌﺘﺼﻢ ﺑﻨﺺ ﻋﻴﻦ ﻭﺭﻛﺐ ﻣﻊ ﺍﻟﺪﺭﻭﺝ : ﺃﻗﺴﻢ ﺑﺎﻟﻠﻪ ﻣﺎﻓﻴﺶ ﺍﺗﻔﻪ ﻣﻨﻚ
ﺍﻟﻤﻌﺘﺼﻢ ﺿﺤﻚ ﻭﺧﺶ ﻟﻠﺤﻮﺵ ... ﻭﺟﻬﺎﺩ ﺧﺶ ﻟﺸﻘﺘﻪ ﻭﻻﻗﺎﻯ ﺟﻤﺎﻧﺔ ﻧﺎﻳﻀﺔ ﺧﺬﺍ ﻣﻨﻬﺎ ﺭﻗﻢ ﻓﻴﺼﻞ .. ﻭﻗﻌﺪ ﻳﺘﺼﻞ ﺑﻴﻪ ﺑﺲ ﻣﺎﻓﻴﺶ ﺭﺩ
.
.
.
))************ ﺍﻟﻜﺎﺗﺒﺔ ﺃﻡ ﻧﺎﺻﺮ ((
.
.
.
ﻇﺎﻓﺮ ﺧﺶ ﻟﻠﺸﻘﺔ ﻭﺧﺒﻂ ﺍﻟﺒﺎﺏ .. ﻭﺭﺣﻤﺔ ﻃﻠﻌﺖ ﻣﻦ ﺍﻟﻤﻄﺒﺦ ﺑﺴﺮﻋﺔ ﻭﺧﺎﻳﻔﺔ
ﻇﺎﻓﺮ ﺷﺎﻓﻠﻬﺎ ﻭﺧﺶ ﻟﻠﺤﻤﺎﻡ ﻃﻮﻝ ﻣﻦ ﻏﻴﺮ ﻛﻼﻡ .. ﻏﺴﻞ ﻭﺗﻮﺿﻰ ﺻﻠﻰ ﺍﻟﻌﺼﺮ .. ﻭﻃﻠﻊ ﻗﻤﻌﺰ ﻓﻲ ﺍﻟﺼﺎﻟﺔ
ﺭﺣﻤﺔ ﻃﻴﺒﺔ ﻗﻬﻮﺓ ﻭﺗﺖ ﺳﻔﺮﺓ ﺑﺎﻟﺤﻠﻮ ﻭﺍﻣﻴﺔ ﻭﻃﻠﻌﺖ ﺗﺮﺟﻒ ﻣﻦ ﺍﻟﻤﻄﺒﺦ ﻭﻗﺮﺑﺖ ﻣﻨﻪ ﻧﺰﻟﺖ ﺍﻟﺴﻔﺮﺓ ﻗﺪﺍﻣﻪ
ﻇﺎﻓﺮ ﺍﻳﺸﻮﻑ ﻟﺘﻠﻔﺰﻳﻮﻥ ﻭﺗﻜﻠﻢ : ﻣﻌﺎﺵ ﺗﺮﻓﻌﻲ ﺧﻤﺎﺭﻙ ﺍﻻ ﺟﻮﺍ ﺍﻟﺤﻮﺵ
ﺭﺣﻤﺔ ﻫﺰﺕ ﺭﺍﺳﻬﺎ ﻭﺭﻓﻌﺖ ﻓﻨﺠﻨﺎﻥ ﺍﻟﻘﻬﻮﺓ : ﺣﺎﺿﺮ .. ﺧﻮﺫ ﻗﻬﻮﺗﻚ
ﻇﺎﻓﺮ ﺧﺬﺍ ﻣﻨﻬﺎ ﻭﻗﻌﺪ ﻳﺸﺮﺏ ﻭﺳﺎﻛﺖ
ﺭﺣﻤﺔ ﻭﻗﻔﺖ ﻭﺟﺖ ﻗﺮﺑﺖ ﻣﻨﻪ ﻭﻗﻤﻌﺰﺕ ﺟﻨﺒﻪ ﻭﺍﺗﺸﻮﻑ ﻟﻮﺟﻬﻪ .. ﻭﺭﻓﻌﺖ ﻳﺪﻫﺎ ﻣﺴﺖ ﺧﺪﻩ ﻓﻴﻬﺎ ﺟﺮﺡ ﺻﻐﻴﺮ
ﻇﺎﻓﺮ ﻭﺧﺮ ﻋﻨﻬﺎ ﻭﺗﻨﻬﺪ
ﺭﺣﻤﺔ : ﺷﻦ ﺻﺎﺭ ﺑﻴﻨﻜﻢ ؟ ﻟﻴﺶ ﺗﻌﺎﺭﻛﺖ ﻣﻌﺎﻩ؟
ﻇﺎﻓﺮ ﺷﺎﻓﻠﻬﺎ ﺑﻌﺼﺒﻴﺔ : ﻣﺎﺻﺎﺭ ﺷﻲ .. ﻭﻣﺎﻧﺒﻴﺶ ﻧﺴﻤﻊ ﺳﻴﺮﺗﻪ ﻓﻲ ﺣﻮﺷﻲ
ﺭﺣﻤﺔ ﺑﻠﻌﺖ ﺭﻳﻘﻬﺎ ﺑﺨﻮﻑ .. ﺑﺲ ﺗﻤﺎﺳﻜﺖ ﻭﺗﻜﻠﻤﺖ ﺑﻬﺪﻭﺀ : ﺃﻧﺘﺎ ﻟﻴﺶ ﻣﻌﺼﺐ ؟ ﻟﻮ ﻓﻲ ﺷﻲ ﻛﻠﻤﻨﻲ ﻋﻠﻴﻪ .. ﺧﻠﻴﻨﻲ ﻧﻔﻬﻢ ﺣﺘﻰ ﺍﻧﺎ .. ﻣﺶ ﻛﻞ ﻣﻮﺿﻮﻉ ﺗﻌﺼﺐ ﻋﻠﻴﺎ ﻭﻣﺎﻧﻔﻬﻢ ﺷﻲ ﻭﻧﺴﻜﺖ ﻭﺧﻼﺹ
ﻇﺎﻓﺮ ﻧﺰﻝ ﺍﻟﻘﻬﻮﺓ ﻭﺗﻠﻔﺖ ﻋﻠﻴﻬﺎ : ﺷﻦ ﺗﺒﻲ ﺗﻔﻬﻤﻲ ؟ ﺍﻫﺎ ؟ .. ﻫﺬﺍ ﻭﺍﺣﺪ ﻣﺶ ﻣﺤﺘﺮﻡ ﻭﺍﻋﻄﻴﺘﻪ ﻋﻠﻰ ﺧﺸﻤﻪ ﺑﺎﺵ ﻳﻌﺮﻑ ﺍﺣﺪﻭﺩﻩ ﻭﻣﻌﺎﺵ ﻳﺸﻮﻑ ﻟﺤﺮﻣﺔ ﺍﻟﻨﺎﺱ
ﺭﺣﻤﺔ ﺑﺨﻮﻑ : ﺑﺲ ﻳﺎﻇﺎﻓﺮ ﺍﻟﺸﺎﺏ ﻣﺎﺩﺍﺭ ﺷﻲ ﻭﻻ ﻏﻠﻂ ﻣﻌﺎﻳﺎ
ﻇﺎﻓﺮ ﻓﻨﺺ : ﻳﻌﻨﻲ ﺍﻧﺎ ﻧﻜﺬﺏ ﺗﻲ ﺳﻤﻌﺘﻪ ﺑﻮﺫﺍﻧﻲ ﺷﻦ ﺗﺤﻜﻲ ﺍﻧﺘﻲ ؟
ﺭﺣﻤﺔ : ﻣﺶ ﻋﺎﺭﻓﺔ ﺷﻦ ﺳﻤﻌﺖ .. ﺑﺲ ﻭﺭﺑﻲ ﺍﻟﺸﺎﺏ ﻣﺎﺷﺎﻓﻨﻴﺶ ﺍﺻﻼ ﻛﺎﻥ ﻳﻠﺒﺲ ﻓﻲ ﻛﻨﺪﺭﺗﻪ .. ﻭﺍﻧﺎ ﻧﺰﻟﺖ ﺧﻤﺎﺭﻱ ﻭﺧﺸﻴﺖ ﻗﺒﻞ ﻳﻄﻠﻊ
ﻇﺎﻓﺮ : ﻛﻴﻒ ﻳﻌﻨﻲ ؟ ﻣﺶ ﻗﻠﺘﻲ ﺗﻼﻗﻴﺖ ﻣﻌﺎﻩ ﺗﺤﺖ ﻭﺷﺎﻓﻚ ؟ !
ﺭﺣﻤﺔ : ﻻ ﻣﺎﻗﻠﺘﺶ ﻫﻜﻲ .. ﺃﻧﺘﺎ ﺳﺎﻟﺘﻨﻲ ﻟﻮ ﺷﻔﺘﻲ ﺣﺪ ﺗﺤﺖ ﻭﺍﻧﺎ ﻗﺘﻠﻚ ﺷﻔﺖ ﺍﺥ ﺟﻬﺎﺩ .. ﻟﻜﻦ ﻫﻮﺍ ﻛﺎﻥ ﻣﻄﺒﺲ ﻳﻠﺒﺲ ﻓﻲ ﻛﻨﺪﺭﺗﻪ ﻭﺍﻧﺎ ﺍﻭﻝ ﻣﺎﺷﻔﺘﻪ ﺧﺸﻴﺖ ﻃﻮﻝ .. ﻳﻌﻨﻲ ﻣﺎﺷﺎﻓﻨﻴﺶ ﺑﻜﻞ
ﻇﺎﻓﺮ : ﻟﻴﺶ ﻣﺎﻗﻠﺘﻲ ﻫﻜﻲ ﻣﻦ ﺍﻻﻭﻝ
ﺭﺣﻤﺔ : ﺍﻧﺘﺎ ﻣﺎﻋﻄﻴﺘﻨﻲ ﻓﺮﺻﺔ ﻧﺘﻜﻠﻢ ﻣﻌﺎﻙ .. ﻧﺰﻟﺖ ﻃﻮﻝ ﻣﻌﺼﺐ .. ﻭﻣﺎﻋﺮﻓﺘﺶ ﻛﻨﻚ ؟
ﻇﺎﻓﺮ ﺗﻨﻬﺪ ﺑﻌﺼﺒﻴﺔ ﻭﺯﻡ ﻓﻤﻪ : ﺍﻟﻠﻲ ﺻﺎﺭ ﺻﺎﺭ .. ﻭﺑﻌﺪﻳﻦ ﺣﺘﻰ ﻭﻟﻮ ﻣﺎﺷﺎﻓﻚ .. ﺍﻟﻤﻔﺮﻭﺽ ﻣﺎﻳﻄﻠﻌﺶ ﻭﻳﺨﺶ ﺯﻱ ﻣﺎﻳﺒﻲ .. ﻭﺍﻧﺎ ﻣﻦ ﺍﻻﻭﻝ ﻣﺶ ﻣﺘﺮﻳﺢ ﻟﻘﻌﺪﺗﻪ ﻣﻌﺎﻧﺎ ﻓﻲ ﺣﻮﺵ ﻭﺍﺣﺪ
ﺭﺣﻤﺔ : ﺑﺲ ﻋﻴﺐ ﻋﻠﻰ ﺧﺎﻃﺮ ﺟﻬﺎﺩ ﻫﺬﺍ ﺥ ...
ﻇﺎﻓﺮ ﻗﺺ ﻋﻠﻴﻬﺎ : ﺧﻼﺹ ﺻﻜﺮﻱ ﺍﻟﻤﻮﺿﻮﻉ .. ﻣﺎﻧﺒﻴﺶ ﻧﺤﻜﻲ ﻓﻴﻪ ﺍﻛﺜﺮ ﻣﻦ ﻫﻜﻲ
ﺭﺣﻤﺔ ﻛﺸﺖ : ﺑﺎﻫﻲ ﺗﻤﺎﻡ
ﻇﺎﻓﺮ ﺗﻨﻬﺪ ﻭﺭﺟﻊ ﻳﺘﻔﺮﺝ .. ﻭﻳﻬﺰ ﻓﻲ ﺭﺟﻠﻪ ﺑﻌﺼﺒﻴﺔ .. ﺑﻌﺪ ﻛﻼﻡ ﺭﺣﻤﺔ ﺣﺲ ﺍﻧﻪ ﻏﻠﻂ .. ﺑﺲ ﻓﻲ ﺷﻲ ﻣﺨﻠﻴﻪ ﻳﻨﻔﺮ ﻣﻦ ﻓﻴﺼﻞ .. ﻣﺶ ﻓﺎﻫﻤﻪ ﺷﻨﻮ ؟ !
ﺭﺣﻤﺔ ﻗﺮﺑﺖ ﻣﻨﻪ ﻭﺷﺪﺕ ﻭﺟﻬﻪ ﺑﻴﻦ ﺍﻳﺪﻳﻬﺎ : ﻭﺟﻬﻚ ﻛﻠﻪ ﺗﺨﺒﻴﻂ ﻭﺗﺠﺮﻳﺢ
ﻇﺎﻓﺮ ﻧﺰﻝ ﺍﻋﻴﻮﻧﻪ : ﺯﻱ ﺍﻟﺠﻦ ﺍﻟﻔﺮﺥ .. ﺍﻧﺸﺪﻩ ﻣﻦ ﻫﻨﺎ ﻳﻨﻂ ﻣﻦ ﻫﻨﺎ ... ﺑﺲ ﺣﺘﻰ ﻫﻮﺍ ﻛﻼ ﻃﺮﻳﺤﺔ ﺳﻤﺤﺔ
ﺭﺣﻤﺔ ﺍﺑﺘﺴﻤﺖ ﺑﺎﻟﺸﻮﻳﺎ ﻭﺣﺮﻛﺖ ﺻﺒﻌﻬﺎ ﻋﻠﻰ ﻓﻤﻪ : ﻓﻲ ﻣﺮﻫﻢ ﻣﻄﻬﺮ ﺗﻮﺍ ﺍﻧﺪﻳﺮﻟﻚ ﻣﻨﻪ
ﻇﺎﻓﺮ ﺭﻓﻊ ﺍﻋﻴﻮﻧﻪ ﻋﻠﻰ ﻣﻼﻣﺢ ﻭﺟﻬﻬﺎ ﻭﻧﺰﻟﻬﻢ ﺍﺧﺮ ﺷﻲ ﻋﻠﻰ ﻓﻤﻬﺎ .. ﻭﺗﻜﻠﻢ : ﻣﺎﻧﺒﻴﺶ ﺩﻭﺍﺀ ... ﻣﺎﻧﺤﺒﺶ ﺍﻻﺩﻭﻳﺔ
ﺭﺣﻤﺔ ﻟﻔﺖ ﺍﻳﺪﻳﻬﺎ ﻋﻠﻰ ﺭﻗﺒﺘﻪ ﻭﻗﺮﺑﺖ ﻭﺟﻬﻬﺎ ﻣﻦ ﻭﺟﻪ : ﺍﻣﺎﻻ ﺷﻦ ﺗﺒﻲ ؟
ﻇﺎﻓﺮ ﺷﺎﻑ ﻟﻌﻴﻮﻧﻬﺎ .. ﻭﺑﻌﺪﻳﻦ ﻧﺰﻝ ﻭﺟﻬﻪ ﺣﺮﻙ ﺧﺸﻤﻪ ﻋﻠﻰ ﺧﺸﻤﻬﺎ ﻣﻦ ﻏﻴﺮ ﻣﺎﻳﺘﻜﻠﻢ
ﺭﺣﻤﺔ ﺭﻓﻌﺖ ﺍﻳﺪﻳﻬﺎ ﻣﻊ ﺭﻗﺒﺘﻪ ﺑﺨﻔﺔ .. ﻭﺷﺪﺕ ﻭﺟﻬﻪ ﺑﻴﻦ ﺍﻳﺪﻳﻬﺎ ﻭﺗﺤﺮﻙ ﻓﻴﻬﻢ ﻋﻠﻰ ﻭﺟﻬﻪ ﻭﻟﺤﻴﺘﻪ .. ﻭﻇﺎﻓﺮ ﻳﺤﺮﻙ ﻓﻲ ﺍﻋﻴﻮﻧﻪ ﻋﻠﻰ ﻣﻼﻣﺤﻬﺎ .. ﻭﻏﻤﻀﻬﻢ ﺍﻭﻝ ﻣﺎ ﺭﺣﻤﺔ ﺑﺪﺍﺕ ﺗﻄﺒﻊ ﻓﻲ ﺑﻮﺳﺎﺕ ﺧﻔﻴﻔﺔ ﻭﻧﺎﻋﻤﺔ ﻋﻠﻰ ﻛﻞ ﻣﻜﺎﻥ ﻓﻲ ﻭﺟﻬﻪ ﻓﻴﻪ ﺿﺮﺑﺔ ﺍﻭ ﺧﺒﺶ ﺻﻐﻴﺮ .. ﻭﺍﺧﺮ ﺷﻲ ﺑﺎﺳﺘﻪ ﺑﻮﺳﺔ ﻋﻠﻰ ﻛﻞ ﻋﻴﻦ
ﻭﺧﺮﺕ ﻋﻨﻪ .. ﻭﻇﺎﻓﺮ ﻓﺘﺢ ﺍﻋﻴﻮﻧﻪ ﻭﺣﻂ ﻳﺪﻩ ﻋﻠﻰ ﺭﻗﺒﺘﻬﺎ ﻣﻦ ﺍﻟﺨﻠﻒ ﻭﺷﺪﻫﺎ ﻟﻴﻪ .. ﻭﻧﺰﻝ ﻭﺟﻬﻪ ﺍﻳﺒﻮﺱ ﻓﻴﻬﺎ ﺑﺸﻐﻒ ﻋﻠﻰ ﺷﻔﺎﻓﻬﺎ
.
.
.
))************ ﺍﻟﻜﺎﺗﺒﺔ ﺍﻡ ﻧﺎﺻﺮ ((
.
.
.
ﻓﻴﺼﻞ ﻓﻲ ﺳﻴﺎﺭﺗﻪ .. ﻭﻳﺸﺮﺏ ﻓﻲ ﻗﻬﻮﺓ ﻭﻳﺤﺮﻕ ﻓﻲ ﺩﺧﺎﻥ ... ﻭﺑﻌﺪﻳﻦ ﻓﻮﻧﻪ ﻗﻌﺪ ﻳﺮﻥ
ﻓﻴﺼﻞ ﻧﻔﺦ ﻭﻓﺘﺢ ﺍﻟﺨﻂ : ﺍﻟﻮ
ﺟﻬﺎﺩ : ﺍﻟﻮ .. ﺗﻲ ﻭﻳﻨﻚ ﻟﻴﺶ ﻣﺎﺗﺮﺩ ﻣﺎﺑﺪﺭﻱ ﻧﺘﺼﻞ ﺑﻴﻚ؟
ﻓﻴﺼﻞ ﻋﺮﻓﻪ ﺟﻬﺎﺩ : ﻣﺶ ﻗﺘﻠﻚ ﺳﻜﺎﻥ ﺍﻧﺘﺎ ﻧﻌﻢ ﺷﻦ ﺗﺒﻲ ؟
ﺟﻬﺎﺩ : ﻭﻳﻨﻚ ﻓﻴﺼﻞ ؟ ﻭﻳﻦ ﻣﺸﻴﺖ ؟
ﻓﻴﺼﻞ : ﻣﺸﻴﺖ ﻭﻳﻦ ﻣﺎ ﻣﺸﻴﺖ .. ﺷﻦ ﺗﺒﻮﺍ ﻣﻨﻲ .. ﻣﺶ ﻃﻠﻌﺖ ﻣﻦ ﺣﻮﺷﻜﻢ
ﺟﻬﺎﺩ : ﻳﺎﻓﻴﺼﻞ ﻫﺬﺍ ﻇﺎﻓﺮ ﻋﺼﺒﻲ ﻭﺑﺴﺮﻋﺔ ﻣﺎﻳﺘﻌﺼﺐ .. ﻭﺍﻛﻴﺪ ﻓﻲ ﺷﻲ ﻧﺮﻓﺰﻩ ﻭﺧﻼﻩ ﺩﺍﺭ ﻫﻜﻲ .. ﺍﻧﺘﺎ ﺷﻦ ﺩﺭﺕ ﻣﻌﺎﻩ ؟
ﻓﻴﺼﻞ : ﻣﺎﺩﺭﺕ ﺷﻲ .. ﻛﻨﺖ ﻃﺎﻟﻊ ﻭﻫﻮﺍ ﻣﺮﻭﺡ ﻣﻦ ﺑﺮﺍ .. ﺭﻛﺒﺖ ﺳﻴﺎﺭﺗﻲ ﻭﻣﺎﺯﻟﺖ ﻧﺴﺨﻦ ﻓﻴﻬﺎ ﺭﺟﻊ ﻃﻠﻊ ﻣﻦ ﺍﻟﺤﻮﺵ ﻭﺑﺪﺍ ﻓﻴﺎ ﻃﻮﻝ ﻣﺎﻓﻬﻤﺘﺶ ﺷﻦ ﺻﺎﺭﻟﻪ ﺍﻟﻬﻢ
ﺟﻬﺎﺩ : ﺣﺼﻞ ﺧﻴﺮ . ﺍﻛﻴﺪ ﻓﻲ ﺳﻮﺀ ﻓﻬﻢ ﻓﻲ ﺍﻟﻤﻮﺿﻮﻉ .. ﺗﻌﺎﻟﻰ ﺭﻭﺡ ﻟﻠﺤﻮﺵ ﻧﺒﻴﻚ
ﻓﻴﺼﻞ : ﻻ ﻣﻌﺎﺵ ﺑﻨﺮﻭﺡ ﻋﻨﺪﻛﻢ .. ﺍﻋﻄﻴﻨﻲ ﻓﻠﻮﺳﻲ ﺧﻠﻴﻨﻲ ﻧﻤﺸﻲ
ﺟﻬﺎﺩ : ﻭﺍﻧﺎ ﻗﻠﺖ ﻣﺎﻓﻴﺶ ﻓﻠﻮﺱ ﺗﻮﺍ .. ﺭﻭﺡ ﻟﻠﺤﻮﺵ ﺑﺴﺮﻋﺔ
ﻓﻴﺼﻞ : ﺑﻨﺠﻲ ﻧﺎﺧﺬ ﺩﺑﺸﻲ ﻭﻧﻤﺸﻲ .. ﻭﺍﻧﺘﺎ ﻻﺯﻡ ﺗﺤﻞ ﻗﺼﺔ ﻟﻔﻠﻮﺱ ﺑﺴﺮﻋﺔ
ﺟﻬﺎﺩ : ﺭﻭﺡ ﻗﺒﻞ ﻭﺑﻌﺪﻳﻦ ﺳﺎﻫﻞ
ﻓﻴﺼﻞ : ﻫﻴﺎ ﺍﻭﻛﻲ
ﻭﻟﻊ ﻓﻴﺼﻞ ﺳﻴﺎﺭﺗﻪ ﻭﺭﺟﻊ ﻟﻠﺤﻮﺵ .. ﻻﻗﻰ ﺟﻬﺎﺩ ﻳﺮﺟﻰ ﻓﻴﻪ ﻗﺪﺍﻡ ﺍﻟﺤﻮﺵ ﻓﻲ ﺳﻴﺎﺭﺗﻪ .. ﺍﻭﻝ ﻣﺎﺷﺎﻑ ﻓﻴﺼﻞ ﻧﺰﻝ ﻣﻨﻬﺎ .. ﻭﻣﺸﻰ ﺷﻮﺭﻩ
ﺟﻬﺎﺩ ﺟﺎﺀﻩ ﻣﻦ ﺍﻟﺮﻭﺷﻦ : ﻫﻴﺎ ﺍﻧﺰﻝ
ﻓﻴﺼﻞ ﺑﺮﻡ ﻭﺟﻬﻪ : ﻣﺎﻧﺒﻴﺶ .. ﺍﻋﻄﻴﻨﻲ ﺩﺑﺸﻲ ﺧﻠﻲ ﻧﻤﺸﻲ
ﺟﻬﺎﺩ : ﺑﻼ ﺗﺼﻜﻴﺮ ﺩﻣﺎﻍ ﻭﺍﻧﺰﻝ ﺧﻠﻴﻨﺎ ﻧﺘﻔﺎﻫﻤﻮﺍ ﻗﺒﻞ
ﻓﻴﺼﻞ : ﺗﺆ .. ﻣﺎﻧﺒﻴﺶ
ﺟﻬﺎﺩ ﺍﺳﺘﻘﺎﻡ : ﺍﻳﻴﻴﻴﻪ ﻋﻠﻰ ﺭﺍﺣﺘﻚ .. ﺍﻧﺘﺎ ﺍﻟﺨﺎﺳﺮ .. ﺑﻨﺨﺶ ﺍﻧﺠﻴﺐ ﺩﺑﺸﻚ ﻭﻧﺨﻠﻴﻚ ﺗﻤﺸﻲ .. ﺑﺲ ﺑﻌﺪﻫﺎ ﻣﻌﺎﺵ ﺑﻨﺸﻮﻑ ﻭﺟﻬﻚ ﻣﺮﺓ ﺛﺎﻧﻴﺔ .. ﻭﻻ ﺗﻜﻠﻤﻨﻲ ﻋﻠﻰ ﻓﻠﻮﺳﻚ ﻭﻻ ﻏﻴﺮﻫﻢ
ﻓﻴﺼﻞ ﺑﻌﺼﺒﻴﺔ : ﺗﻠﻮﻱ ﻓﻲ ﺫﺭﺍﻋﻲ ﺑﺎﻟﻔﻠﻮﺱ
ﺟﻬﺎﺩ : ﺍﺣﺴﺒﻬﺎ ﺯﻱ ﻣﺎﺗﺒﻲ .. ﻳﺎ ﺍﻣﺎ ﺍﻋﻘﻞ ﻭﺍﻧﺰﻝ ﻭﺍﻟﻌﻦ ﺍﻟﺸﻴﻄﺎﻥ ﻭﻧﻔﻬﻢ ﻣﻨﻜﻢ ﺷﻦ ﺻﺎﺭ .. ﻳﺎ ﺍﻣﺎ ﺍﻣﺸﻲ ﺯﻱ ﻣﺎﺗﺒﻲ ﻭﺍﻧﺎ ﻣﺎﻟﻴﺶ ﻋﻼﻗﺔ ﺑﻴﻚ
ﻓﻴﺼﻞ ﺷﺎﻑ ﻟﻌﻴﻮﻥ ﺟﻬﺎﺩ .. ﻭﺑﻌﺪﻳﻦ ﺗﻨﻬﺪ ﻭﺣﻂ ﻳﺪﻩ ﺑﺘﻮﺗﺮ ﻋﻠﻰ ﺭﻗﺒﺘﻪ ﻭﻳﺸﻮﻑ ﻟﺒﻌﻴﺪ : ﻧﻨﺰﻝ .. ﺑﺲ ﻣﺎﻧﺒﻴﺶ ﻧﺤﻜﻲ ﻣﻊ ﺍﻟﻠﻲ ﺍﺳﻤﻪ ﻇﺎﻓﺮ ﻭﻻ ﻧﺸﻮﻓﻪ .. ﺍﻳﻮﺍﺍﺍ
ﺟﻬﺎﺩ ﺷﺪ ﺿﺤﻜﺘﻪ ﻭﻓﺘﺢ ﻋﻠﻴﻪ ﺍﻟﺒﺎﺏ : ﺍﻧﺰﻝ .. ﺍﻧﺰﻝ .. ﺍﻧﺰﻝ ﺑﻼ ﺣﺮﻛﺎﺕ ﻫﻴﺎ
ﻓﻴﺼﻞ ﻗﻠﺐ ﺍﻋﻴﻮﻧﻪ ﻭﻧﺰﻝ .. ﻭﺧﺶ ﻣﻊ ﺟﻬﺎﺩ ﻟﻠﻤﻠﺤﻖ
ﻏﺴﻞ ﻭﻏﻴﺮ .. ﻭﺟﻬﺎﺩ ﺧﻼﻩ ﻳﺮﺗﺎﺡ ﺍﺑﺮﻭﺣﻪ .. ﻭﻧﺰﻝ ﻋﻠﻴﻪ ﻭﻗﺖ ﺍﻟﻌﺸﺎﺀ ﻣﻊ ﺳﻔﺮﺓ ﻓﻴﻬﺎ ﻋﺸﺎﺀ .. ﻭﺧﺶ ﻋﻠﻴﻪ ﺗﻌﺸﻮﺍ ﻣﻊ ﺑﻌﻀﻬﻢ
ﺟﻬﺎﺩ ﺷﺮﺏ ﺍﻣﻴﺔ : ﺍﻟﺤﻤﺪﺍﻟﻠﻪ
ﻓﻴﺼﻞ ﻧﺰﻝ ﻛﺎﺷﻴﻜﻪ ﻭﺷﺎﻑ ﻟﺠﻬﺎﺩ .. ﻭﺑﻌﺪﻳﻦ ﺻﺒﺎ ﻣﻴﺔ ﻭﻳﺸﺮﺏ
ﺟﻬﺎﺩ : ﺯﻳﺪ ﺗﻌﺸﻰ
ﻓﻴﺼﻞ ﺩﻑ ﺍﻟﺴﻔﺮﺓ : ﺍﻟﺤﻤﺪﺍﻟﻠﻪ ﺷﺒﻌﺖ .. ﺳﻠﻢ ﺍﻳﺪﻳﻬﻢ
ﺟﻬﺎﺩ : ﺗﺴﻠﻢ
ﻭﻗﻒ ﺟﻬﺎﺩ ﺭﻓﻊ ﺍﻟﺴﻔﺮﺓ ﻭﺑﺤﺖ ﻓﻴﻪ : ﺑﻨﻤﺸﻲ ﺍﻧﺠﻴﺐ ﺷﺎﻫﻲ ﻭﻧﺮﺟﻊ .. ﺑﺲ ﺑﻨﺠﻴﺐ ﻇﺎﻓﺮ ﻣﻌﺎﻳﺎ ﻋﺸﺎﻥ ﺗﺘﺼﺎﻟﺤﻮﺍ
ﻓﻴﺼﻞ ﻭﻟﻊ ﺳﺒﺴﻲ ﻭﺻﺒﻰ ﺍﺗﻜﻰ ﻋﻠﻰ ﺍﻟﺴﺮﻳﺮ ﺑﺪﻭﻥ ﺍﻫﺘﻤﺎﻡ : ﺩﻳﺮ ﺷﻦ ﺗﺒﻲ
ﺟﻬﺎﺩ ﺷﺎﻓﻠﻪ ﺯﻳﻦ .. ﺗﻨﻬﺪ ﻭﻃﻠﻊ ﻭﻫﻮﺍ ﻓﻲ ﺑﺎﻟﻪ ﻓﻲ ﺷﻲ ﻣﻦ ﻓﻴﺼﻞ ﻳﺬﻛﺮ ﻓﻴﻪ ﺑﺄﻳﺎﻡ ﻣﺮﺍﻫﻘﺘﻪ .. ﺑﺮﻏﻢ ﻣﺎﻓﻴﺶ ﺍﻱ ﻣﺸﺎﻋﺮ ﻧﺎﺣﻴﺘﻪ ﺯﻱ ﺍﻻﺧﻮﺓ .. ﺑﺲ ﺟﻬﺎﺩ ﻗﺎﺩﺭ ﻳﺘﻮﻗﻊ ﺍﻟﻌﻴﺸﺔ ﺍﻟﻠﻲ ﻛﺎﻥ ﻋﺎﻳﺸﻬﺎ ﻓﻴﺼﻞ ﻣﻊ ﺧﻠﻴﻞ
.
.
ﻃﻠﻊ ﺟﻬﺎﺩ ﻓﻮﻕ ﻋﻄﻰ ﺟﻤﺎﻧﺔ ﺍﻟﺴﻔﺮﺓ .. ﻭﺧﺬﺍ ﻣﻨﻬﺎ ﺳﻔﺮﺓ ﺍﻟﺸﺎﻫﻲ ﻭﻃﻠﻊ ﻣﻦ ﺷﻘﺘﻪ ﻭﺩﻕ ﺷﻘﺔ ﻇﺎﻓﺮ
ﻇﺎﻓﺮ ﻓﺘﺢ : ﺗﻔﻀﻞ
ﺟﻬﺎﺩ : ﻻ ﻣﺮﺓ ﺛﺎﻧﻴﺔ .. ﺗﻌﺎﻟﻰ ﻧﺒﻴﻚ ﻟﻮﻃﻰ
ﻇﺎﻓﺮ : ﻟﻮﻃﻰ ﻭﻳﻦ ؟
ﺟﻬﺎﺩ : ﻟﻮﻃﻰ ﻓﻲ ﺍﻟﻤﻠﺤﻖ ﻋﺸﺎﻥ ﺗﺘﻔﺎﻫﻢ ﻣﻊ ﻓﻴﺼﻞ ﻭﻧﻌﺮﻑ ﺷﻦ ﺳﺒﺐ ﺍﻟﻠﻲ ﺻﺎﺭ ﺑﻴﻨﻜﻢ
ﻇﺎﻓﺮ ﺑﺮﻡ ﻭﺟﻬﻪ : ﻣﺎﻧﺒﻴﺶ ﻧﺘﻜﻠﻢ ﻣﻌﺎﻩ
ﺟﻬﺎﺩ ﻗﺮﺏ ﻣﻨﻪ : ﻭﺭﺑﻲ ﻳﺎﻇﺎﻓﺮ ﻟﻮ ﺗﺤﺮﺟﻨﻲ ﻗﺪﺍﻣﻪ ﻭﻣﺎﺗﻨﺰﻝ ﻭﺭﺍﻳﺎ ﺑﻌﺪ ﺷﻮﻳﺎ ﻭﺗﻠﺤﻘﻨﻲ ﻟﻠﻤﻠﺤﻖ ﻣﺎﻋﺎﺩ ﻧﺤﻜﻲ ﻣﻌﺎﻙ ﻭﻻ ﻧﻜﻠﻤﻚ ﻭﺍﻧﺘﺎ ﺗﻌﺮﻓﻨﻲ ﻛﻮﻳﺲ
ﻭﻧﺰﻝ ﺟﻬﺎﺩ ﻣﻌﺼﺐ ﻣﻨﻪ . ﻭﻇﺎﻓﺮ ﻧﻔﺦ : ﻣﺎﻧﻴﺶ ﻧﺎﺯﻝ ... ﻭﺧﺶ ﺧﺒﻂ ﺍﻟﺒﺎﺏ
.
.
.
ﺟﻬﺎﺩ ﺧﺶ ﻋﻠﻰ ﻓﻴﺼﻞ ﻭﻗﻤﻌﺰ .. ﻭﻓﻴﺼﻞ ﻛﺎﻥ ﺭﺍﻗﺪ ﺳﺎﻭﻯ ﻗﻌﺪﺗﻪ : ﻭﻳﻦ ﺧﻮﻙ ﺍﻟﻌﺼﺒﻲ ﺍﻟﻤﻌﺘﺼﺐ
ﺟﻬﺎﺩ ﺷﺎﻓﻠﻪ ﻭﻫﺰ ﺭﺍﺳﻪ ﻭﺗﻨﻬﺪ : ﺍﻧﺎ ﺷﻦ ﺟﺎﺑﻨﻲ ﻭﺳﻄﻜﻢ ﺍﻟﻬﻢ
ﻓﻴﺼﻞ ﺭﻓﻊ ﺍﻟﺠﻬﺎﺯ ﺍﻳﻐﻴﺮ ﻓﻲ ﻗﻨﻮﺍﺕ ﺍﻟﺘﻠﻔﺰﻳﻮﻥ .. ﻭﺟﻬﺎﺩ ﺑﺪﺍ ﻳﺼﺐ ﻓﻲ ﺍﻟﺸﺎﻫﻲ .. ﻭﺍﻻﺛﻨﻴﻦ ﺍﻟﺘﻔﺘﻮﺍ ﻋﻠﻰ ﺻﻮﺕ ﺑﺎﺏ ﺍﻟﻤﻠﺤﻖ ﺍﻧﻔﺘﺢ ﻭﺧﺶ ﻇﺎﻓﺮ ﻋﺎﻗﺪ ﺣﻮﺍﺟﺒﻪ
ﻇﺎﻓﺮ : ﺳﻼﻡ
ﻓﻴﺼﻞ ﺑﺮﻡ ﻭﺟﻬﻪ ﻭﻣﺎﺭﺩﺵ
ﺟﻬﺎﺩ ﺍﺑﺘﺴﻢ : ﺍﻫﻠﻴﻦ .. ﺗﻌﺎﻟﻰ ﺧﺶ ﺍﺷﺮﺏ ﻣﻌﺎﻧﺎ ﺷﺎﻫﻲ
ﻇﺎﻓﺮ ﺧﺶ ﻭﻣﺸﻰ ﻗﻤﻌﺰ ﺑﻌﻴﺪ ﻣﻨﻬﻢ .
ﺟﻬﺎﺩ ﺧﺒﻂ ﻓﻴﺼﻞ : ﻧﺰﻝ ﺭﺟﻠﻴﻚ ﻭﻗﻤﻌﺰ ﺍﻛﻮﻳﺲ
ﻓﻴﺼﻞ ﺷﺎﻓﻠﻬﻢ ﻻﺛﻨﻴﻦ ﻭﻧﻔﺦ ﻭﻧﺰﻝ ﺭﺟﻠﻴﻪ ﻭﺳﺎﻭﻯ ﻗﻌﺪﺗﻪ
ﺟﻬﺎﺩ ﻣﺪ ﻃﺎﺳﺔ ﻟﻈﺎﻓﺮ : ﺗﻌﺎﻟﻰ ﻗﻤﻌﺰ ﻫﻨﺎ ﻟﻴﺶ ﻗﻌﺪﺕ ﺑﻌﻴﺪ ؟
ﻇﺎﻓﺮ ﺧﺬﺍ ﺍﻟﻄﺎﺳﺔ ﻭﺷﺎﻑ ﻟﻔﻴﺼﻞ : ﻻ ﻣﺘﺮﻳﺢ ﻣﻜﺎﻧﻲ .. ﺍﺻﻼً ﻧﺒﻲ ﻧﻤﺸﻲ .. ﺟﻴﺖ ﺑﻨﻘﻮﻝ ﻛﻠﻤﺘﻴﻦ ﻭﺑﺲ .. ﺃﻧﺎ ﺍﻧﺴﺎﻥ ﻣﺤﺎﻓﻆ ﻭﻣﺎﻧﺤﺒﺶ ﺍﻟﻐﻠﻂ .. ﻭﻣﻤﻜﻦ ﺍﻟﻠﻲ ﺻﺎﺭ ﺍﻟﻌﺸﻴﺔ ﺳﻮﺀ ﻓﻬﻢ ﻣﻨﻲ .. ﺑﺲ ﻫﺬﺍ ﻣﺎﻳﻤﻨﻌﺶ ﺍﻥ ﻓﻴﺼﻞ ﻏﻠﻂ
ﻓﻴﺼﻞ ﺑﻌﺼﺒﻴﺔ : ﻏﻠﻄﺖ ﻓﻲ ﺷﻨﻮ ﺗﺮﺍ ﻓﻬﻤﻨﻲ ؟ .. ﺭﺍﺟﻞ ﻗﺎﻋﺪ ﻓﻲ ﺳﻴﺎﺭﺗﻲ ﻭﻓﻲ ﺣﺎﻟﻲ ﺍﻧﺘﺎ ﺍﻟﻠﻲ ﺟﻴﺖ ﻣﺶ ﻋﺎﺭﻑ ﺷﻦ ﺧﻄﺮﻟﻚ ﻭﺑﺪﻳﺖ ﺍﺗﺴﺐ ﻭﺗﻐﻠﻂ ﺍﺑﺮﻭﺣﻚ
ﻇﺎﻓﺮ : ﻻ ﻣﺶ ﺑﺮﻭﺣﻲ .. ﺍﻧﺎ ﺳﻤﻌﺖ ﺍﻟﻜﻼﻡ ﺍﻟﻠﻲ ﻛﻨﺖ ﺗﻘﻮﻝ ﻓﻴﻪ ﻟﻤﺎ ﻃﻠﻌﺖ ﻣﻦ ﺍﻟﺤﻮﺵ .. ﻭﺍﻧﺎ ﻣﺎﻧﺤﺒﺶ ﺍﻟﺪﻭﺓ ﻫﺬﻩ
ﻓﺎﺭﺱ : ﺍﻟﻜﻼﻡ ﺍﻟﻠﻲ ﻗﻠﺘﻪ ﻛﻨﺖ ﻧﻬﺪﺭﺯ ﻣﻊ ﺭﻭﺣﻲ ﻭﻧﻘﺮﺍ ﻓﻲ ﺭﺳﺎﻟﺔ .. ﺍﻧﺘﺎ ﻟﻴﺶ ﻣﺮﻛﺰ ﻣﻌﺎﻳﺎ ؟
ﻇﺎﻓﺮﺭ : ﻻﻥ ﺍﻟﺤﻮﺵ ﻓﻴﻪ ﺻﺒﺎﻳﺎ ﻭﻻﺯﻡ ﺗﺤﺘﺮﻡ ﺣﺮﻣﺘﻪ ﻭﺗﻌﺮﻑ ﺍﻣﺘﻰ ﺗﻄﻠﻊ ﻭﺷﻦ ﺗﺤﻜﻲ
ﻓﻴﺼﻞ : ﻭﺍﻧﺎ ﻣﻠﺘﺰﻡ ﺑﺤﺮﻣﺔ ﺍﻟﺤﻮﺵ ﻭﻻ ﺷﻔﺖ ﺻﺒﺎﻳﺎ ﻭﻻﺟﻴﺖ ﻧﺎﺣﻴﺘﻬﻢ ﻭﻻ ﺣﺘﻰ ﻧﺮﻓﻊ ﻓﻲ ﺍﻋﻴﻮﻧﻲ ﺷﻮﺭ ﺍﻟﺤﻮﺵ ﻻ ﺍﻧﺎ ﺧﺎﺵ ﻭﻻ ﺍﻧﺎ ﻃﺎﻟﻊ .. ﻭﺑﻌﺪﻳﻦ ﺧﻮﻙ ﺟﺎﺑﻨﻲ ﻫﻨﺎ ﺑﺎﻟﻐﺼﺐ ﻟﻮ ﻋﻠﻴﺎ ﻣﺎﻧﺒﻴﺶ ﺍﻟﻘﻌﺪﺓ ﻭﺳﻄﻜﻢ
ﺟﻬﺎﺩ ﻗﻄﻊ ﻋﻠﻰ ﻇﺎﻓﺮ : ﺧﻼﺍﺍﺹ ﺗﻜﻠﻤﻮﺍ ﺑﺎﻟﺸﻮﻳﺎ .. ﺍﻧﺎ ﺟﺒﺘﻜﻢ ﻫﻨﺎ ﺑﺎﺵ ﺗﺘﻔﺎﻫﻤﻮﺍ ﻭﻧﺤﻠﻮﺍ ﺍﻟﻘﺼﺔ ﻣﺶ ﻋﺸﺎﻥ ﺗﺘﻌﺎﺭﻛﻮﺍ ﻣﻦ ﺟﺪﻳﺪ .. ﻭﺍﻧﺎ ﺷﺎﻳﻒ ﺍﻥ ﻓﻲ ﺳﻮﺀ ﺗﻔﺎﻫﻢ ﺻﺎﺭ ﺑﻴﻨﻜﻢ .. ﺧﻼﺹ ﻣﺎﻓﻴﺶ ﺩﺍﻋﻲ ﻟﺪﻭﺓ ﻫﺬﻩ ﻛﻠﻬﺎ .. ﺍﻧﺘﻮﺍ ﺷﺒﺎﺏ ﻭﻣﺶ ﺻﻐﺎﺭ ﻋﻠﻰ ﺍﻟﻜﻼﻡ ﻫﺬﺍ
ﻇﺎﻓﺮ ﺻﺒﺎ ﻭﻧﺰﻝ ﺍﻟﻄﺎﺳﺔ : ﻭﺍﻧﺎ ﺑﺎﻟﻨﺴﺒﺔ ﻟﻴﺎ ﺍﻟﻤﻮﺿﻮﻉ ﺍﻧﺘﻬﻰ .. ﻭﺣﺼﻞ ﺧﻴﺮ
ﺟﻬﺎﺩ ﺷﺎﻑ ﻟﻔﻴﺼﻞ .. ﻭﺍﻻﺧﻴﺮ ﺑﺮﻡ ﻭﺟﻬﻪ : ﺣﺘﻰ ﺍﻧﺎ ﺍﺣﺒﺎﻝ ﺳﻮﺀ ﻭﻃﺎﺣﻮﺍ ﻓﻲ ﺷﺎﻫﻲ
ﻇﺎﻓﺮ ﻓﻨﺺ ﻓﻴﻪ ﻭ ﺗﻨﻬﺪ ﺑﻌﺼﺒﻴﺔ ﻭﻃﻠﻊ ﻣﻦ ﺍﻟﻤﻜﺎﻥ
ﺟﻬﺎﺩ ﺷﺎﻑ ﻟﻔﻴﺼﻞ ﺑﻌﺘﺎﺏ : ﻣﺎﺗﻌﺮﻓﺶ ﺗﺘﻜﻠﻢ ﺯﻱ ﺍﻟﻨﺎﺱ ﺍﺳﻜﺖ
ﻓﻴﺼﻞ : ﻣﺎﻋﻨﺪﻛﻤﺶ ﺑﺌﺮ ﺷﻦ ﺑﻨﺪﻳﺮﻟﻜﻢ ؟ ﻭﺑﻌﺪﻳﻦ ﻗﺎﻋﺪ ﺗﺼﺎﻟﺢ ﻓﻴﻨﺎ ﻋﻠﻰ ﻃﺎﺳﺔ ﺷﺎﻫﻲ ؟ ! ﺍﻟﻤﻔﺮﺽ ﺩﺭﺕ ﺫﺑﻴﺤﺔ ﻣﻄﻨﻄﻨﺔ ﻭﺟﺒﺖ ﻫﻠﻚ ﻛﻠﻬﻢ ﺑﺎﺵ ﻧﺮﺿﻰ ﻋﻠﻴﻜﻢ
ﺟﻬﺎﺩ ﺻﺒﺎ ﻭﺭﻓﻊ ﺍﻟﺴﻔﺮﺓ : ﺑﺮﻛﺎﺗﻚ ﻳﺎﺳﻲ ﻓﻴﺼﻞ ! ﺍﻧﻘﻮﻝ ﺳﻠﻢ ﺧﻮﻱ ﺍﺭﻗﺪ ﻭﺗﺮﻳﺢ ﺍﻟﻠﻴﻠﺔ ﻟﻠﻴﻞ ﻭﺑﻜﺮﺍ ﻧﺘﻜﻠﻤﻮﺍ ﺍﻛﺜﺮ
ﻓﻴﺼﻞ : ﻭﺭﺑﻲ ﻛﺎﻥ ﺗﺴﻤﻊ ﻛﻼﻣﻲ ﻭﺗﻌﻄﻴﻨﻲ ﻓﻠﻮﺳﻲ ﻭﺗﺨﻠﻴﻨﻲ ﻧﻤﺸﻲ ﻋﻠﻰ ﺣﺎﻟﻲ .. ﺍﻳﻜﻮﻥ ﺧﻴﺮ ﻟﻴﻚ ﻭﻻﻫﻠﻚ .. ﻻﻧﻲ ﺍﻧﺴﺎﻥ ﺷﺆﻡ ﻣﻦ ﻳﻮﻣﻲ ﻭﺻﺪﻗﻴﻨﻲ ﺑﻴﺠﻴﻚ ﻭﺟﻊ ﺭﺍﺱ ﻣﻨﻲ ﻭﺗﻨﺪﻡ ﻋﻠﻰ ﺍﻟﻴﻮﻡ ﺍﻟﻠﻲ ﺟﺒﺘﻨﻲ ﻓﻴﻪ ﻟﺤﻮﺷﻜﻢ
ﺟﻬﺎﺩ ﻃﻠﻊ : ﺍﺭﻗﺪ .. ﺍﺭﻗﺪ ﻭﺗﻐﻄﻰ ﺍﻛﻮﻳﺲ ﺍﻟﻠﻴﻞ ﻣﺼﻘﻊ .. ﻓﻮﺕ ﺍﻟﺪﻭﺓ ﻫﺬﻩ
.
.
.
))*********** ﺍﻟﻜﺎﺗﺒﺔ ﺍﻡ ﻧﺎﺻﺮ ((
.
.
.
ﺑﻌﺪ ﻛﻢ ﻳﻮﻡ .. ﻭﻳﻮﻡ ﺍﻟﺨﻤﻴﺲ ﺑﺎﻟﺬﺍﺕ ﻓﻲ ﺍﻟﻠﻴﻞ .. ﺷﻔﻨﺎ ﺍﻟﺤﻠﻘﺔ ﺍﻟﻠﻲ ﻓﺎﺗﺖ .. ﻛﻴﻒ ﺟﻬﺎﺩ ﻛﺸﻒ ﺣﻤﻞ ﺟﻤﺎﻧﺔ .. ﻭﺗﺼﺎﻟﺤﻮﺍ ﻣﻊ ﺑﻌﻀﻬﻢ ﻧﺮﺟﻌﻮﺍ ﻟﻨﻔﺲ ﺍﻟﻠﻴﻠﺔ
.
.
ﺟﻬﺎﺩ ﺭﻓﻊ ﻭﺟﻬﻪ ﻣﻦ ﻋﻠﻰ ﻭﺟﻬﻪ ﺟﻤﺎﻧﺔ ﺑﻌﺪ ﺑﻮﺳﺔ ﻃﻮﻭﻭﻳﻠﺔ ﻭﻧﺎﻋﻤﺔ .. ﺷﺎﻑ ﻟﻌﻴﻮﻧﻬﺎ ﻭﻣﻼﻣﺢ ﻭﺟﻬﻬﺎ ﺑﻜﻞ ﺩﻗﺔ .. ﻛﺎﻥ ﻳﺒﺤﺖ ﻓﻲ ﻛﻞ ﺟﺰﺀ ﻣﻦ ﻭﺟﻬﻬﺎ ﻭﻛﺄﻧﻪ ﺍﻭﻝ ﻣﺮﺓ ﺍﻳﺸﻮﻓﻪ .. ﻛﺄﻧﻪ ﻛﺎﻥ ﻳﻤﻼ ﻓﻲ ﻋﻴﻮﻧﻪ ﻭﻳﺸﺒﻊ ﻓﻲ ﺣﻨﻴﻨﻪ ﺍﻟﻠﻲ ﻃﺎﻝ ﺷﻬﻮﺭ ﻭﻟﻴﺎﻟﻲ .. ﻭﺑﻌﺪﻳﻦ ﺧﺬﻫﺎ ﻓﻲ ﺣﻀﻨﻪ ﻭﺿﻤﻬﺎ ﺑﻘﻮﺓ ﺑﻴﺪﻳﻪ .. ﻭﻧﺰﻝ ﻭﺟﻬﻪ ﺑﻴﻦ ﻛﺘﻔﻬﺎ ﻭﺭﻗﺒﺘﻬﺎ .. ﺍﻳﺒﻮﺱ ﻭﻳﺸﻢ .. ﻭﻳﺮﺟﻊ ﻳﻀﻤﻬﺎ ﻣﻦ ﺟﺪﻳﺪ
ﻳﺤﺮﻙ ﻓﻲ ﻳﺪﻳﻪ ﻋﻠﻰ ﻇﻬﺮﻫﺎ ﻭﺩﺍﺧﻞ ﺷﻌﺮﻫﺎ .. ﻳﻮﺧﺮ ﻋﻨﻬﺎ ﺍﺷﻮﻳﺎ ﻭﻳﺒﻮﺱ ﻓﻲ ﻭﺟﻬﻬﺎ .. ﺍﻋﻴﻮﻧﻬﺎ .. ﻓﻤﻬﺎ .. ﻃﺮﻑ ﺧﺸﻤﻬﺎ .. ﺍﻳﺒﻮﺱ ﻋﻠﻰ ﺷﻌﺮﻫﺎ .. ﺍﻳﺪﻳﻬﺎ .. ﺑﻮﺳﺎﺕ ﻓﻲ ﻛﻞ ﻣﻜﺎﻥ .. ﺑﻮﺳﺎﺕ ﺯﻭﺝ ﻋﺎﺷﻖ .. ﺯﻭﺝ ﻣﺸﺘﺎﻕ .. ﺯﻭﺝ ﻣﻠﻬﻮﻑ ... ﻭﺑﻌﺪﻳﻦ ﻳﺮﺟﻊ ﻳﻀﻤﻬﺎ ﺑﻘﻮﺓ ﻣﻦ ﺟﺪﻳﺪ
ﺟﻤﺎﻧﺔ ﺣﻄﺖ ﺭﺃﺳﻬﺎ ﻋﻠﻰ ﺻﺪﺭﻩ .. ﻭﺍﺧﻴﺮﺍً ﺗﻨﻔﺴﺖ ﺑﺮﺍﺣﺔ .. ﻫﻨﺎ ﺣﻴﺚ ﻧﺒﻀﺎﺕ ﻗﻠﺒﻚ ﺗﺴﻤﻊ ﺑﻮﺿﻮﺡ .. ﻫﻨﺎ ﺣﻴﺚ ﺍﺩﻓﻦ ﻭﺟﻬﻲ ﺑﻴﻦ ﺿﻠﻮﻋﻚ .. ﻻﺟﺪ ﺭﺍﺣﺘﻲ .. ﻻﺟﺪ ﺿﺎﻟﺘﻲ .. ﻻﺟﺪ ﺍﻻﻣﺎﻥ .. ﻫﻨﺎ ﺣﻴﺚ ﺃﺳﻤﻊ ﺻﻮﺕ ﺃﻧﻔﺎﺳﻚ ﻭﻫﻲ ﺗﺘﺼﺎﻋﺪ ﻣﺘﻼﺣﻘﺔ ﺑﻮﺗﻴﺮﺓ ﺳﺮﻳﻌﺔ .. ﻟﺘﺨﺮﺝ ﻭﺗﻠﻔﺢ ﻭﺟﻬﻲ ﻭﺭﻗﺒﺘﻲ .. ﻟﺘﻐﻤﺮﻧﻲ ﺑﺪﻑﺀ .. ﻫﻨﺎ ﺣﻴﺚ ﺍﻗﻒ .. ﺣﻴﺚ ﺃﻧﺘﻤﻲ ﺍﻟﻴﻚ .. ﻫﻨﺎ ﻫﻮ ﻣﻜﺎﻧﻲ .. ﻣﻜﺎﻧﻲ ﺑﻴﻦ ﺫﺭﺍﻋﻴﻚ
ﺟﻬﺎﺩ ﻭﺧﺮ ﻋﻨﻬﺎ ﻭﺣﻂ ﻳﺪﻩ ﻋﻠﻰ ﺧﺪﻫﺎ ﻳﺤﺮﻙ ﻓﻲ ﺻﺒﻌﻪ ﺑﺨﻔﺔ ﻋﻠﻰ ﻭﺟﻨﺘﻬﺎ : ﺑﺎﻟﻠﻪ ﻋﻠﻴﻚ ﻣﺎﻋﺎﺩ ﻧﺒﻲ ﺯﻋﻞ ﻭﻻ ﻓﺮﺍﻕ .. ﻭﻻ ﻧﺒﻲ ﻋﺮﺍﻳﻚ ﻭﺗﺠﺮﻳﺢ ﻓﻲ ﺑﻌﺾ .. ﻭﻻ ﻋﺎﺩ ﻧﺒﻲ ﺍﻧﺸﻮﻑ ﺍﺩﻣﻮﻋﻚ ﻣﺮﺓ ﺛﺎﻧﻴﺔ .. ﻧﺒﻲ ﺍﻧﺸﻮﻓﻚ ﺑﺲ ﺗﻀﺤﻜﻲ .. ﻧﺒﻴﻚ ﺩﻳﻤﺎ ﻣﻌﺎﻳﺎ ﻭﻓﻲ ﺣﻀﻨﻲ .. ﻣﻌﺎﺵ ﺗﺨﻠﻲ ﺷﻲ ﻳﻔﺮﻕ ﺑﻴﻨﺎ
ﺟﻤﺎﻧﺔ ﻫﺰﺕ ﺭﺍﺳﻬﺎ : ﻣﺎﻓﻴﺶ ﺷﻲ ﻳﻘﺪﺭ ﻳﻔﺮﻕ ﺑﻴﻨﺎ .. ﺃﻧﺎ ﻭﺃﻧﺘﺎ ﺑﻌﺪ ﻛﻞ ﺷﻲ ﺻﺎﺭ ﻓﻴﻨﺎ ﻭﻣﻌﺎﻧﺎ ﻭﺑﻌﺪ ﻛﻞ ﻫﺎﻟﻌﺬﺍﺏ .... ﻣﻌﺎﺵ ﻓﻲ ﺷﻲ ﻳﻘﺪﺭ ﻳﻔﺮﻗﻨﺎ ﺍﺑﺪﺍ
ﺟﻬﺎﺩ ﻧﺰﻝ ﻳﺪﻩ ﻋﻠﻰ ﺭﻗﺒﺘﻬﺎ ﻭﻳﺤﺮﻙ ﻓﻲ ﺍﺻﺎﺑﻌﻪ ﻋﻠﻰ ﻋﻠﻴﻬﺎ : ﺻﺎﺭ ﻃﻠﻌﺘﻲ ﺣﺎﻣﻞ ؟ ..! ﺍﺑﺘﺴﻢ ﻭﻫﺰ ﺭﺍﺳﻪ .. ﺗﻲ ﻗﺮﻳﺐ ﺍﻧﺠﻨﻴﺖ ﻭﺭﺑﻲ ﻭﺍﻧﺎ ﻗﺎﻋﺪ ﺍﻧﺸﻮﻑ ﻓﻴﻚ ﻣﺎﺷﺎﻟﻠﻪ ﻋﻠﻴﻚ ﻛﻞ ﻳﻮﻡ ﺗﺤﻠﻲ ﻋﻦ ﻗﺒﻞ ﻭ ﺗﺘﻐﻴﺮﻱ ﻭ ﺃﻧﺎ ﺑﻨﻬﺒﻞ ﻋﻠﻴﻚ ﺑﻨﻀﻤﻚ ﺑﻨﺒﻮﺳﻚ ﻭﺑﻨﻘﻤﻌﺰ ﻧﻬﺪﺭﺯ ﻣﻌﺎﻙ .. ﺑﻨﺸﺒﻊ ﻣﻦ ﺍﻋﻴﻮﻧﻚ .. ﻭﺍﻧﺘﻲ ﺷﻲ ﻋﻨﺎﺩ ﻭﺭﺃﺱ ﻣﺼﻜﺮ
ﺟﻤﺎﻧﺔ ﺿﺤﻜﺖ ﻭﺷﺎﻓﺖ ﻟﻌﻴﻮﻧﻪ : ﺗﻌﺒﺖ ﻭﺗﻌﺒﺘﻚ ﻣﻌﺎﻳﺎ .. ﻧﺤﻨﺎ ﻻﺛﻨﻴﻦ ﻣﻌﺎﺵ ﺧﻠﻴﻨﺎ ﻓﺮﺻﺔ ﻟﺒﻌﺾ .. ﻛﻞ ﻭﺍﺣﺪ ﻣﻨﺎ ﻛﺎﻥ ﻳﺒﻌﺪ ﻓﻲ ﺍﻟﺜﺎﻧﻲ ﺑﺎﻱ ﻃﺮﻳﻘﺔ .. ﻭﻛﻞ ﻭﺍﺣﺪ ﻓﻴﻨﺎ ﻛﺎﻥ ﻳﻈﻠﻢ ﻓﻲ ﺍﻟﺜﺎﻧﻲ ﻭﻳﻈﻠﻢ ﻓﻲ ﻧﻔﺴﻪ .. ﻣﺎﻓﻴﺶ ﻭﺍﺣﺪ ﻣﻨﺎ ﺣﺐ ﻳﺘﻨﺰﻝ ﻭﻳﻌﻄﻲ ﻓﺮﺻﺔ ﻭﻳﺴﻤﻊ ﻭﻳﻔﻬﻢ ﺷﻦ ﺻﺎﺭ ﻭﻟﻴﺶ .. ﻫﻮﺍ ﻫﺬﺍ ﺍﻳﺼﻴﺮ ﻋﺎﺩﻱ ﻻﺛﻨﻴﻦ ﺍﻟﻤﻔﺮﻭﺽ ﺍﻳﺤﺒﻮﺍ ﺑﻌﻀﻬﻢ ﺑﺎﻟﺸﻜﻞ ﻫﺬﺍ ؟
ﺟﻬﺎﺩ ﺗﻨﻬﺪ ﻭﻗﺮﺹ ﺧﺪﻫﺎ : ﺍﻟﺤﺐ ﺯﻱ ﺗﺴﻮﻧﺎﻣﻲ .. ﻳﺮﻋﺪ ﻭﻳﺒﺮﻕ ﻭﻳﺪﻣﺮ ﻛﻞ ﺷﻲ ﻓﻲ ﻃﺮﻳﻘﻪ ﻟﻤﺎ ﺍﺗﺠﻴﻪ ﺳﺤﺎﺑﺔ ﻛﺒﻴﺮﺓ ﻣﻠﻴﺎﻧﺔ ﻋﻮﺍﺻﻒ .. ﺑﺲ ﻣﻬﻤﺎ ﻋﺼﻒ ﻭﻣﻬﻤﺎ ﺿﺮﺏ ﻋﻠﻰ ﺍﺳﻮﺍﺭ ﻫﺎﻟﺤﺐ ... ﻣﺼﻴﺮﻩ ﺑﻴﻨﺘﻬﻲ ﻭﻳﺨﺘﻔﻲ .. ﻭﻳﺮﺟﻊ ﺍﻟﻬﺪﻭﺀ ﻭﻳﻌﻤﺮ ﺍﻟﺤﺐ ﻣﻦ ﺍﻟﺠﺪﻳﺪ
ﺟﻤﺎﻧﺔ ﻋﻴﻮﻧﻬﺎ ﺩﻣﻌﻮﺍ ﻭﺧﺸﺖ ﻓﻲ ﺣﻀﻨﻪ ﺿﻤﺎﺗﻪ ﺑﻘﻮﺓ ﻭﺧﺬﺕ ﻧﻔﺲ ﻗﻮﻱ : ﺃﻧﺤﺒﻚ ﺟﻬﺎﺩ ﻭﻣﺎﻧﺒﻴﺶ ﺍﻧﻌﻴﺶ ﻳﻮﻡ ﻣﻦ ﻏﻴﺮﻙ .. ﺧﻠﻴﻚ ﻓﻲ ﺣﻴﺎﺗﻲ ﻋﻠﻰ ﻃﻮﻝ
ﺟﻬﺎﺩ ﺩﻓﻦ ﻭﺟﻬﻪ ﻓﻲ ﺷﻌﺮﻫﺎ : ﻣﻌﺎﻙ ﻋﻠﻰ ﻃﻮﻝ ﻣﺎﺗﺨﺎﻓﻴﺶ .. ﺭﺑﻲ ﻳﻘﺪﺭﻧﻲ ﻭﻧﺨﻠﻴﻚ ﺍﺳﻌﺪ ﻣﺮﺍﺓ ﻓﻲ ﺍﻟﺪﻧﻴﺎ
ﻭﺧﺮ ﻋﻨﻬﺎ ﻭﺷﺎﻑ ﻟﻌﻴﻮﻧﻬﺎ : ﺳﺎﺩ ﻛﻼﻡ .. ﺗﻌﺎﻟﻲ ﻧﺸﺮﺣﻠﻚ ﻋﻤﻠﻲ ﺑﺎﺵ ﺗﻔﻬﻤﻲ ﺍﻛﺜﺮ
ﺟﻤﺎﻧﺔ ﺿﺤﻜﺖ ﻭﺍﻧﺤﺮﺟﺖ : ﻧﻌﺮﻓﻚ ﺍﺣﺴﻦ ﺩﻛﺘﻮﺭ ﻭﺗﻌﺮﻑ ﻛﻴﻒ ﺗﺸﺮﺡ ﺍﻛﻮﻳﺲ .. ﺑﺲ ﺧﻠﻴﻨﻲ ﻧﻨﻬﻲ ﺷﻐﻠﻲ ﻫﻨﺎ .. ﻭﻧﺪﻭﺵ ﻭﺗﻮﺍ ﺍﻧﺠﻴﻚ
ﺟﻬﺎﺩ ﺍﺑﺘﺴﻢ : ﺗﻤﺎﻡ .. ﻣﺎﻃﻮﻟﻴﺶ ﻋﻠﻴﺎ ﺑﺲ
ﻟﻢ ﺟﻬﺎﺩ ﺍﻭﺭﺍﻗﻪ ﻭﺷﻐﻠﻪ .. ﻭﻣﺸﻰ ﺧﺶ ﻟﺪﺍﺭ ﺍﻟﻨﻮﻡ .. ﻭﺟﻤﺎﻧﺔ ﻛﻤﻠﺖ ﺷﻔﻂ ﺍﻟﺼﺎﻟﺔ .. ﻭﺭﺟﻌﺖ ﺍﻟﻤﻜﻨﺴﺔ ﻟﻤﻜﺎﻧﻬﺎ .. ﻭﻇﻠﻤﺖ ﺍﻟﺸﻘﺔ .. ﻭﺧﺸﺖ ﺍﺩﻭﺷﺖ ﻭﻻﺑﺴﺖ ﺭﻭﺏ ﻗﻄﻨﻲ ﻗﺼﻴﺮ ﻟﻔﻮﻕ ﺍﻟﺮﻛﺒﺔ ﺑﺸﻮﻳﺎ ﻣﺘﺎﻉ ﺣﻮﺍﻣﻞ ﻃﻠﻊ ﻋﻠﻴﻬﺎ ﺍﻳﺠﻨﻦ .. ﻭﻓﺮﺩﺕ ﺷﻌﺮﻫﺎ
ﺧﺸﺖ ﻋﻠﻰ ﺟﻬﺎﺩ ﺩﺍﺭ ﺍﻟﻨﻮﻡ .. ﺳﺎﻭﻯ ﻗﻌﺪﺗﻪ ﻭﺑﻠﻊ ﺭﻳﻘﻪ .. ﻭﻫﻮ ﺍﻳﺸﻮﻑ ﻟﺠﺴﻤﻬﺎ ﻛﻴﻒ ﻣﺒﺮﻭﻡ ﻣﻊ ﺑﻌﻀﻪ .. ﻭﺑﻄﻨﻬﺎ ﺍﻟﻠﻲ ﺩﻭﺑﻬﺎ ﺑﺎﺭﺯﺓ .. ﻛﺎﻥ ﺷﻜﻠﻬﺎ ﺍﻳﺠﻨﻦ
ﺟﻤﺎﻧﺔ ﺟﺖ ﻣﻦ ﺍﻟﺠﻴﻬﺔ ﺍﻟﺜﺎﻧﻴﺔ ﻭﻗﻤﻌﺰﺕ ﺟﻨﺒﻪ .. ﻭﺟﻬﺎﺩ ﻗﺮﺏ ﻣﻨﻬﺎ
ﺟﻬﺎﺩ : ﺍﻭﻝ ﻣﺮﺓ ﺍﻧﺸﻮﻓﻪ ﻋﻠﻴﻚ ؟
ﺟﻤﺎﻧﺔ ﺿﺤﻜﺖ : ﻛﻨﺖ ﻧﺸﺮﻱ ﻓﻲ ﺍﻟﺪﺑﺶ ﺍﻟﻠﻲ ﺍﻳﺠﻲ ﻓﻲ ﺧﺎﻃﺮﻱ ﺑﺎﻟﺴﺮﻗﺔ ﻋﻠﻴﻚ ﻭﻧﺪﺱ ﻓﻴﻬﻢ ﻣﺎﻧﻘﺪﺭﺵ ﻧﻠﺒﺴﻬﻢ
ﺟﻬﺎﺩ ﺣﻂ ﻳﺪﻩ ﻋﻠﻰ ﺑﻄﻨﻬﺎ : ﻛﻴﻒ ﻗﺪﺭﺗﻲ ﺍﺗﺤﻤﻠﻲ ﺑﺮﻭﺣﻲ ﻛﻞ ﻫﺬﺍ ؟
ﺟﻤﺎﻧﺔ : ﻣﺶ ﻋﺎﺭﻓﺔ .. ﻛﻞ ﻣﺎﻳﺨﻄﺮ ﻋﻠﻰ ﺑﺎﻟﻲ ﻛﻞ ﺷﻲ ﺻﺎﺭ ﻓﻴﺎ .. ﻭﻛﻴﻒ ﻛﻨﺖ ﻧﻌﺎﻧﻲ ﻭﺣﺪﻱ .. ﻧﻘﻮﻝ ﻭﺍﻟﻠﻪ ﺍﻧﺎ ﻇﺎﻟﻤﺔ ﻭﻣﺶ ﻣﻈﻠﻮﻣﺔ
ﺟﻬﺎﺩ : ﻛﻢ ﻋﻤﺮ ﺍﻟﺤﻤﻞ ﺑﺎﻟﻀﺒﻂ ؟
ﺟﻤﺎﻧﺔ : ﻓﻲ ﺑﺪﺍﻳﺔ ﺍﻟﺨﺎﻣﺲ
ﺟﻬﺎﺩ ﻗﺮﺏ ﻣﻨﻬﺎ ﻭﺷﺪﻫﺎ ﻟﻴﻪ : ﻣﺎﺗﻌﺮﻓﻴﺶ ﻛﻴﻒ ﻣﺤﻠﻴﻚ ﻭﻃﺎﻟﻊ ﻋﻠﻴﻚ
ﺟﻤﺎﻧﺔ : ﻛﻠﻬﻢ ﺍﻳﻘﻮﻟﻮﻟﻲ ﺳﺎﻣﻨﺔ ﻭﻣﺶ ﻋﺎﺭﻓﺔ ﺷﻨﻮ .. ﻭﺍﻧﺎ ﺑﻨﻤﻮﺕ ﻣﻦ ﺍﻟﺨﻮﻑ
ﺟﻬﺎﺩ ﺍﺑﺘﺴﻢ ﻗﺮﺹ ﺧﺸﻤﻬﺎ : ﺍﻟﻤﻬﻢ ﻃﻠﻌﺘﻲ ﺧﺒﻴﺜﺔ ﻭﻗﻠﺒﻚ ﺍﺳﻮﺩ
ﺟﻤﺎﻧﺔ : ﺣﺮﺍﻡ ﻋﻠﻴﻚ
ﺟﻬﺎﺩ ﺑﺮﻡ ﻭﺟﺎﺀ ﻗﺪﺍﻣﻬﺎ ﻗﺎﺑﻠﻬﺎ .. ﻭﺳﺤﺒﻬﺎ ﺗﺤﺖ ﺑﺎﻟﺸﻮﻳﺎ .. ﻭﺟﺎﺀ ﻓﻮﻗﻬﺎ ﻃﺒﺲ ﻋﻠﻴﻬﺎ : ﺣﺮﺍﻡ ﻋﻠﻴﻚ ﺍﻧﺘﻲ ﺗﺤﺮﻣﻴﻨﻲ ﻣﻨﻚ .. ﺗﺤﺮﻣﻲ ﺍﻋﻴﻮﻧﻲ ﻣﻦ ﺍﻟﺸﻮﻓﺔ ﻫﺬﻩ .... ﺣﻂ ﻳﺪﻩ ﻋﻠﻰ ﺧﺪﻫﺎ ﺗﺤﺮﻣﻲ ﺍﻳﺪﻳﺎ ﺗﻠﻤﺴﻚ .. ﻗﺮﺏ ﻓﻤﻪ ﻋﻠﻰ ﻓﻤﻬﺎ ﻭﻳﺤﻜﻲ ﺑﺼﻮﺕ ﺧﺎﻓﺖ : ﺗﺤﺮﻣﻲ ﺍﻧﻔﺎﺳﻲ ﺍﺗﺨﺎﻟﻂ ﺍﻧﻔﺎﺳﻚ .. ﺗﻼﻣﺴﺖ ﺷﻔﺎﻓﻬﻢ .. ﻭﺟﻤﺎﻧﺔ ﺭﻋﺸﺖ .. ﺑﺪﺍ ﺍﻳﺒﻮﺱ ﻓﻴﻬﻢ .. ﺑﻨﻌﻮﻣﺔ .. ﻭﺑﻌﺪﻳﻦ ﺭﻓﻊ ﻭﺟﻬﻪ ﻭﺗﻜﻠﻢ ﺑﺼﻮﺕ ﻣﻐﻤﻮﻡ ﻭﺍﻧﻔﺎﺳﻪ ﻣﺮﺗﻔﻌﺔ : ﺗﺤﺮﻣﻨﻲ ﻧﺮﻭﻯ ﻣﻨﻚ ﻭﺍﻧﺎ ﻋﻄﺸﺎﻥ ﻭﺗﺎﻳﻪ ﺑﻌﻴﺪ ﻋﻨﻚ
ﺟﻤﺎﻧﺔ ﻃﻠﻌﺖ ﻣﻨﻬﺎ ﺗﻨﻬﻴﺪﺓ ﻣﻊ ﻻﻣﺴﺖ ﺍﻳﺪﻳﻪ ﻭﺷﻔﺎﻳﻔﻪ ﻋﻠﻰ ﺭﻗﺒﺘﻬﺎ .. ﻭﺷﺪﺕ ﻓﻲ ﺗﻴﺸﺮﺗﻪ ﺑﻴﺪﻳﻦ ﺗﺮﻋﺶ
ﺟﻬﺎﺩ ﺣﻂ ﻳﺪﻩ ﻋﻠﻰ ﺑﻄﻨﻬﺎ .. ﻭﻧﺰﻝ ﻭﺟﻬﻪ ﻋﻠﻰ ﻭﺫﻧﻬﺎ : ﺗﻌﺮﻓﻲ ﻻﻭﻻ ﺍﻟﺤﻤﻞ ﻭﺧﺎﻳﻒ ﻋﻠﻴﻚ .. ﻣﺶ ﻋﺎﺭﻑ ﺷﻦ ﻛﻨﺖ ﺩﺭﺕ ﻓﻴﻚ .. ﺑﺲ ﻧﺤﺎﻭﻝ ﻧﻤﺴﻚ ﺭﻭﺣﻲ ﻋﻠﻴﻚ
ﻭﻧﺰﻝ ﻋﻠﻴﻬﺎ .. ﺍﻳﺒﻮﺱ ﻓﻴﻬﺎ ﺑﺤﻨﻴﺔ .. ﻭﻳﻠﻤﺲ ﻓﻲ ﻭﺟﻬﻬﺎ ﻭﺷﻌﺮﻫﺎ .. ﻭﻛﻞ ﺟﺴﻤﻬﺎ .. ﻭﻏﺎﺏ ﻣﻌﺎﻫﺎ ﻓﻲ ﺍﺣﻠﻰ ﻟﻠﺤﻈﺎﺕ
.
.
.
.
ﺍﻟﺼﺒﺢ ﺟﻤﺎﻧﺔ ﻓﺘﺤﺖ ﺍﻋﻴﻮﻧﻬﺎ ﺑﺎﻟﺸﻮﻳﺎ .. ﻛﺎﻧﺖ ﺗﺤﺴﺎﺏ ﺭﻭﺣﻬﺎ ﺗﺤﻠﻢ .. ﻟﻌﻨﺪ ﺷﺎﻓﺖ ﺟﻬﺎﺩ ﺭﻗﺪ ﺟﻨﺒﻬﺎ .. ﺭﺍﻗﺪ ﻋﻠﻰ ﺑﻄﻨﻪ ﻭﺷﻌﺮﻩ ﻧﺎﺯﻝ ﻋﻠﻰ ﻭﺟﻬﻪ ... ﻏﺎﻁ ﻓﻲ ﻧﻮﻡ ﻣﺮﻳﺢ .. ﺑﺎﻳﻦ ﻋﻠﻰ ﺗﻔﺎﺻﻴﻞ ﻭﺟﻬﻪ ﺍﻟﻮﺳﻴﻢ
ﻛﺎﻧﺖ ﺭﺍﻗﺪﺓ ﻋﻠﻰ ﺟﻨﺒﻬﺎ .. ﻭﻣﺨﺪﺓ ﻓﻲ ﺣﻀﻨﻬﺎ .. ﻣﺪﺕ ﻳﺪﻫﺎ ﺷﻮﺭﻩ .. ﻭﺑﺪﺍﺕ ﺗﺮﻓﻊ ﻓﻲ ﺷﻌﺮﻩ ﻋﻦ ﻭﺟﻬﻪ .. ﺗﻤﺮﺭ ﻓﻲ ﺍﺻﺎﺑﻌﻬﺎ ﻋﻠﻰ ﻓﻤﻪ .. ﻭﺑﻌﺪﻳﻦ ﻟﻠﺤﻴﺘﻪ .. ﺗﺮﺳﻢ ﻓﻲ ﺧﺸﻤﻪ ﺍﻟﻤﺴﺘﻘﻴﻢ .. ﺑﻄﺮﻑ ﺻﺒﻌﻬﺎ .
ﻧﺰﻟﺖ ﺑﺼﺒﻌﻬﺎ ﻋﻠﻰ ﻛﺘﻔﻪ ﻭﺑﻌﺪﻳﻦ ﻋﻠﻰ ﻃﻮﻝ ﺫﺭﺍﻋﻪ .. ﺗﻠﻤﺴﺖ ﺍﻋﺮﻭﻕ ﻳﺪﻩ ﺍﻟﺒﺎﺯﺍﺕ .. ﻭﺑﻌﺪﻳﻦ ﺍﺑﺘﺴﻤﺖ ﺑﺸﻘﺎﻭﺓ .. ﻭﺷﺪﺕ ﺍﻟﺸﻌﺮ ﻋﻠﻰ ﺫﺭﺍﻋﻪ
ﺟﻬﺎﺩ ﺗﺤﺮﻙ ﻓﻲ ﺍﻟﺒﺪﺍﻳﺔ .. ﻭﺑﻌﺪﻳﻦ ﻓﺘﺢ ﺍﻋﻴﻮﻧﻪ ﺑﺎﻟﺸﻮﻳﺎ .. ﺷﺎﻓﻬﺎ ﻭﺍﺑﺘﺴﻢ .. ﻭﺭﺟﻊ ﻏﻤﺾ ﺍﻋﻴﻮﻧﻪ .. ﺑﺮﻡ ﻭﺟﻬﻪ ﻟﺠﻴﻬﺔ ﺍﻟﺜﺎﻧﻴﺔ .. ﻭﺟﻤﺎﻧﺔ ﺣﻄﺖ ﻳﺪﻫﺎ ﻋﻠﻰ ﺷﻌﺮﻩ ﺗﻠﻌﺐ ﺑﻴﻪ
ﺗﻨﻬﺪ ﻭﺭﺟﻊ ﺷﺎﻓﻠﻬﺎ .. ﻭﻳﺪ ﺟﻤﺎﻧﺔ ﺟﺖ ﻋﻠﻰ ﺧﺪﻩ .. ﺭﻓﻊ ﻳﺪﻩ ﻭﺷﺪ ﺍﺻﺎﺑﻌﻬﺎ ﻳﺒﻮﺱ ﻓﻴﻬﻢ .. ﻭﺍﺑﺘﺴﻢ ﺑﻌﻴﻮﻥ ﻧﺎﻋﺴﺔ
ﺟﻤﺎﻧﺔ ﺗﻨﻔﺴﺖ ﺑﺮﺍﺣﺔ ﻭﺭﻗﺪﺕ ﻋﻠﻰ ﻇﻬﺮﻫﺎ ﻭﺷﺎﻓﺘﻠﻪ : ﺻﺒﺎﺡ ﺍﻟﺨﻴﺮ
ﺟﻬﺎﺩ ﻓﺘﺢ ﺍﻋﻴﻮﻧﻪ : ﺻﺒﺎﺡ ﺍﻟﻨﻮﺭ
ﺟﻤﺎﻧﺔ ﺍﺑﺘﺴﻤﺖ ﻭﺗﺜﺎﻭﺑﺖ
ﺟﻬﺎﺩ ﻗﺮﺏ ﻣﻨﻬﺎ ﻭﺣﻂ ﺭﺍﺳﻪ ﻋﻠﻰ ﻛﺘﻔﻬﺎ : ﺗﻌﺮﻓﻲ ﺍﻥ ﻟﻠﻴﻠﺔ ﺍﻣﺒﺎﺭﺡ ﻛﺎﻧﺖ ﺍﺣﻠﻰ ﻟﻠﻴﻠﺔ ﻓﻲ ﺣﻴﺎﺗﻲ ﻛﻠﻬﺎ
ﺟﻤﺎﻧﺔ ﻭﻳﺪﻫﺎ ﻓﻲ ﺷﻌﺮﻩ : ﺳﺒﺤﺎﻥ ﺍﻟﻠﻪ ﻧﻔﺲ ﺍﻟﺸﻌﻮﺭ .. ﻟﻴﺎ ﻗﺮﻳﺐ ﺳﻨﺘﻴﻦ ﺍﻣﻌﺎﻙ .. ﻣﺎﻋﺸﺘﺶ ﻟﻠﻴﻠﺔ ﻃﻮﻟﻴﺔ ﻭﻣﻠﻴﺎﻥ ﻛﻼﻡ ﻭﺣﺐ ﺯﻱ ﻟﻠﻴﻠﺔ ﺍﻣﺲ ... ﺍﻭ ﻣﻤﻜﻦ ﻻﻓﺮﺍﻕ ﻛﺎﻥ ﻃﻮﻳﻞ ﺍﻟﻤﺮﺓ ﻫﺬﻩ
ﺟﻬﺎﺩ ﺑﺎﺱ ﻋﻈﻤﺔ ﻛﺘﻔﻬﺎ : ﻻﻓﺮﺍﻕ ﻛﺎﻥ ﻃﻮﻳﻞ .. ﻭﺍﻟﺸﻮﻕ ﻛﺎﻥ ﺍﻛﺒﺮ .. ﺑﺲ ﺍﻟﻔﺮﺣﺔ ﺍﻟﻤﺮﺓ ﻫﺬﻩ ﻛﺎﻧﺖ ﻓﺮﺣﺘﻴﻦ .. ﺣﻂ ﻳﺪﻩ ﻋﻠﻰ ﺑﻄﻨﻬﺎ
ﺟﻤﺎﻧﺔ ﺭﻓﻌﺖ ﺍﻋﻴﻮﻧﻬﺎ ﻟﺴﺎﻋﺔ ﻋﻠﻰ ﺍﻟﺤﻴﻂ : ﺣﻲ ﺗﺎﺧﺮﻧﺎ ﺍﻟﻴﻮﻡ
ﺟﻬﺎﺩ : ﺧﻠﻴﻨﺎ ﻳﻮﻡ ﻓﻲ ﺍﻟﻌﻤﺮ ﺍﻧﻮﺿﻮﺍ ﻋﻠﻰ ﻣﻬﻠﻨﺎ .. ﻭﺑﻌﺪﻳﻦ ﺟﻤﻌﺔ ﻣﺎﺯﺍﻝ ﺑﺪﺭﻱ
ﺟﻤﺎﻧﺔ ﻗﻤﻌﺰﺕ ﻣﺮﺓ ﻭﺣﺪﺓ : ﻧﻤﺸﻲ ﺍﻧﺪﻳﺮ ﻑ ... ﺍﺍﺍﺍﺍﻩ
ﺟﻬﺎﺩ ﺭﻓﻊ ﺭﺍﺳﻪ ﺑﺨﻮﻑ : ﺷﻦ ﻓﻴﻚ ؟
ﺟﻤﺎﻧﺔ ﺍﺗﻤﺸﻲ ﻓﻲ ﻳﺪﻫﺎ ﻋﻠﻰ ﺣﻮﺿﻬﺎ ﻭﻣﻐﻤﻀﺔ ﺍﻋﻴﻮﻧﻬﺎ : ﺍﺍﺍﺍﺍﻣﻤﻤﻢ ﺍﺍﺍﺍﻩ
ﺟﻬﺎﺩ ﻗﻤﻌﺰ ﻭﻗﺮﺏ ﻣﻨﻬﺎ : ﺷﻦ ﺻﺎﺭ ﺟﻤﺎﻧﺔ ؟ ﺍﺗﺤﺴﻲ ﺑﺸﻲ ؟
ﺟﻤﺎﻧﺔ ﻓﺘﺤﺖ ﺍﻋﻴﻮﻧﻬﺎ ﻭﺍﺑﺘﺴﻤﺖ ﺑﺪﻫﺸﺔ ﻭﻣﺪﺕ ﻳﺪﻫﺎ : ﻫﺎﺕ ﻳﺪﻙ
ﺟﻬﺎﺩ : ﺷﻨﻮ ؟ !
ﺟﻤﺎﻧﺔ : ﻫﺎﺕ ﻳﺪﻙ ﺑﺲ
ﺟﻬﺎﺩ ﻣﺪ ﻳﺪﻩ ﻟﻬﺎ .. ﻭﻫﻴﺎ ﺧﺬﺗﻬﺎ ﺣﻄﺘﻬﺎ ﺍﺳﻔﻞ ﺑﻄﻨﻬﺎ .. ﻭﺿﻐﻄﺖ ﻋﻠﻴﻬﺎ ﺑﺎﻟﺮﺍﺣﺔ
ﺟﻬﺎﺩ ﻣﺶ ﻓﺎﻫﻢ : ﺍﺗﺤﺴﻲ ﺑﺸﻲ ؟
ﺟﻤﺎﻧﺔ : ﺍﺷﺸﺶ ﺟﻬﺎﺩ .. ﺧﻠﻴﻚ ﺍﺷﻮﻳﺎ ﺑﺲ ﻣﺎﺗﺘﺤﺮﻛﺶ
ﺟﻬﺎﺩ ﺗﻨﻬﺪ ﻭﻳﺸﻮﻑ ﻟﺒﻄﻨﻬﺎ .. ﻭﺑﻌﺪﻳﻦ ﺍﻳﺸﻮﻑ ﻟﻮﺟﻬﻬﺎ .. ﻭﺍﻋﻴﻮﻧﻬﺎ ﻛﻴﻒ ﻓﻴﻬﻢ ﻻﻣﻌﺔ .. ﻭﻓﺎﺗﺤﺘﻬﻢ ﺑﺤﻴﺮﺓ ﻭﺗﺮﻗﺐ ﻛﺎﻧﻬﺎ ﺗﺴﺘﻨﻰ ﻓﻲ ﺷﻲ ﺑﻴﺼﻴﺮ
ﺟﻤﺎﻧﺔ ﺍﻟﺘﻔﺖ ﻋﻠﻴﻪ ﻭﻋﻴﻮﻧﻬﺎ ﺿﺤﻜﻮﺍ : ﺣﺴﻴﺖ ﺑﻴﻬﺎ ؟
ﺟﻬﺎﺩ ﺣﺮﻙ ﻳﺪﻩ ﻋﻠﻰ ﺑﻄﻨﻪ : ﺣﺮﻛﺔ ﺑﺴﻴﻄﺔ
ﺍﻟﺒﻴﺒﻲ ﺍﻧﺘﻔﺾ ﻣﻦ ﺟﺪﻳﺪ .. ﻭﺟﻤﺎﻧﺔ ﺿﺤﻜﺖ ﺑﻔﺮﺣﺔ ﻭﺷﺎﻓﺖ ﻟﺠﻬﺎﺩ .. ﺍﻟﻠﻲ ﻧﻔﺮﺝ ﻓﻤﻪ ﻋﻠﻰ ﺿﺤﻜﺔ ﺑﺼﺪﻣﺔ .. ﺷﺎﻑ ﻟﻌﻴﻮﻧﻬﺎ .. ﻭﺑﻌﺪﻳﻦ ﺿﺤﻚ ﻣﻌﺎﻫﺎ .. ﻭﻗﺮﺏ ﻣﻨﻬﺎ ﺣﻀﻨﻬﺎ ﻭﻟﻒ ﺍﻳﺪﻳﻪ ﻋﻠﻰ ﺑﻄﻨﻬﺎ
ﺟﻤﺎﻧﺔ ﺭﻓﻌﺖ ﻳﺪﻫﺎ ﻋﻠﻰ ﺧﺪﻩ : ﺗﻌﺮﻑ ﻫﺬﻩ ﺍﻭﻝ ﻣﺮﺓ ﺍﻧﺤﺲ ﺑﻴﻪ ﻳﺘﺤﺮﻙ
ﺟﻬﺎﺩ ﺍﻳﺒﻮﺱ ﻓﻲ ﺭﻗﺒﺘﻬﺎ : ﻣﺶ ﻣﻨﻪ ﺍﻟﻤﺴﻜﻴﻦ ﺧﺎﻳﻒ ﻣﻨﻚ
ﺟﻤﺎﻧﺔ ﺿﺮﺑﺘﻪ ﻋﻠﻰ ﻳﺪﻩ ﻭﺿﺤﻜﺖ
ﺟﻬﺎﺩ : ﻣﺎﻋﺮﻓﺘﻴﺶ ﺟﻨﺴﻪ ؟
ﺟﻤﺎﻧﺔ : ﻻ .. ﻣﺎﺣﺒﻴﺘﺶ ﻧﻌﺮﻑ ﺗﻮﺍ
ﺟﻬﺎﺩ : ﺻﺒﻲ ﺃﻏﺴﻠﻲ ﻭﺻﻠﻲ ﻭﺍﻧﺎ ﺑﻨﻤﺸﻲ ﺍﻧﺪﻳﺮ ﻓﻄﻮﺭ ﻻﺣﻠﻰ ﻣﺮﺍﺓ ﺣﺎﻣﻞ ﻓﻲ ﺍﻟﺪﻧﻴﺎ ﻛﻠﻬﺎ .. ﻭﺗﻘﻌﺪﻱ ﺗﺤﻜﻴﻠﻲ ﻛﻞ ﺷﻲ ﺑﺎﻟﺘﻔﺼﻴﻞ
ﺟﻤﺎﻧﺔ ﺑﺎﺳﺘﻪ ﻋﻠﻰ ﻟﺤﻴﺘﻪ : ﻳﺨﻠﻴﻚ ﻟﻴﺎ ﻭﻻ ﻳﺤﺮﻣﻨﻲ ﻣﻨﻚ
.
.
.
))************ ﺍﻟﻜﺎﺗﺒﺔ ﺍﻡ ﻧﺎﺻﺮ ((
.
.
.
ﻋﻨﺪ ﻋﻴﺖ ﻣﺆﻣﻦ ﻭﻋﻠﻰ ﻏﺪﺍﺀ ﺍﻟﺠﻤﻌﺔ .. ﻛﺎﻧﺖ ﻭﺳﻦ ﺗﺎﻛﻞ ﻭﺑﻌﺪﻳﻦ ﺷﺎﻓﺖ ﻟﺮﻭﺩﻳﻨﺔ : ﺭﺅﻭﻑ ﻭﻳﻦ ؟ ﻟﻪ ﻓﺘﺮﺓ ﻏﺎﻳﺐ ﻋﻦ ﺍﻟﺤﻮﺵ ؟ !
ﺍﻟﺒﻨﺎﺕ ﺷﺎﻓﻮﺍ ﻟﺒﻌﻀﻬﻢ .. ﻭﺑﻌﺪﻳﻦ ﺷﺎﻓﻮﺍ ﻟﻐﺰﺍﻟﺔ ﺑﺤﻴﺮﺓ ﻭﻣﺎﻋﺮﻓﻮﺵ ﺍﻳﺮﺩﻭﺍ
ﻏﺰﺍﻟﺔ : ﺭﺅﻭﻑ ﻗﺎﻋﺪ ﻓﻲ ﺣﻮﺵ ﺍﻟﻤﺮﺣﻮﻡ ﻳﻜﻤﻞ ﻓﻴﻪ
ﻭﺳﻦ ﺍﺳﺘﻐﺮﺑﺖ : ﻭﻟﻴﺶ ﻳﻜﻤﻞ ﻓﻴﻪ ﺗﻮﺍ ؟
ﻏﺰﺍﻟﺔ : ﻋﺸﺎﻧﻚ ﻭﻋﺸﺎﻥ ﺑﻨﺘﻚ .. ﻫﺬﺍ ﺣﻮﺷﻜﻦ
ﻭﺳﻦ ﺧﺎﻓﺖ : ﺑﺲ ﺍﻧﺎ ﻣﺎﻧﻘﺪﺭﺵ ﻧﻘﻌﺪ ﻓﻴﻪ ﺑﺮﻭﺣﻲ .. ﺇﺑﺮﺍﻫﻴﻢ ﻣﺮﺓ ﻗﺎﻟﻲ ﻓﻲ ﻣﻜﺎﻥ ﻓﺎﺿﻲ ﻭﻣﺎﻓﻴﺶ ﺟﻴﺮﺍﻥ ﻭﺍﺟﺪ
ﻏﺰﺍﻟﺔ : ﺯﻣﺎﻥ .. ﻟﻜﻦ ﺗﻮﺍ ﺑﻨﻮﺍ ﻳﻼﻛﻢ ﻧﺎﺱ ﺍﺧﺮﻯ ﻭﻓﻲ ﻧﺎﺱ ﻣﺎﺯﻟﺖ ﺗﺒﻨﻲ .. ﻭﺑﻌﺪﻳﻦ ﻣﺎﺯﺍﻝ ﻣﺶ ﺗﻮﺍ ﺗﺴﻜﻨﻲ ﻓﻴﻪ
ﻭﺳﻦ ﻫﺰﺕ ﺭﺍﺳﻬﺎ ﻭﺧﻼﺹ ﻭﺑﻠﻌﺖ ﺭﻳﻘﻬﺎ .. ﻣﻌﺎﺵ ﻋﺮﻓﺖ ﻣﺘﻀﺎﻳﻘﻴﻦ ﻣﻨﻬﺎ ﻭﻳﺒﻮﻫﺎ ﺗﻤﺸﻲ ﻟﺤﻮﺷﻬﺎ .. ﺑﺲ ﻫﻴﺎ ﻣﺎﺗﻘﺪﺭﺵ ﺗﻘﻌﺪ ﻓﻴﻪ ﺍﺑﺮﻭﺣﻬﺎ ﺍﺗﺨﺎﻑ .. ﻭﻣﻌﺎﺵ ﻋﺮﻓﺖ ﺷﻲ
ﺑﻌﺪ ﺍﻟﻐﺪﺍﺀ .. ﻭﺍﻟﺒﻨﺎﺕ ﻏﺴﻠﻦ ﻟﻤﻮﺍﻋﻴﻦ ﻭﻣﻘﻤﻌﺰﺍﺕ ﻳﺘﻔﺮﺟﻦ ﻭﻏﺰﺍﻟﺔ ﺍﻃﻴﺐ ﻓﻲ ﺷﺎﻫﻲ
ﻏﺰﺍﻟﺔ : ﻭﺳﻦ ﺗﻌﺎﻟﻲ ﻗﻤﻌﺰﻱ ﺣﺬﺍﻳﺎ ﻫﻨﺎ ﻧﺒﻲ ﻧﺘﻜﻠﻢ ﻣﻌﺎﻙ ﻛﻠﻤﺘﻴﻦ
ﻭﺳﻦ ﺗﺤﺮﻛﻦ ﻋﻴﻮﻧﻬﺎ ﻋﻠﻰ ﺍﻟﺒﻨﺎﺕ ﻭﺻﺒﺖ ﺑﺘﻮﺗﺮ ﻭﻣﻮﻧﻲ ﻓﻲ ﻳﺪﻫﺎ .. ﻭﺟﺖ ﻗﻤﻌﺰﺕ ﺟﻨﺐ ﻏﺰﺍﻟﺔ : ﻧﻌﻢ ﻳﺎﻋﻤﻴﻤﺔ
ﻏﺰﺍﻟﺔ : ﺍﻧﺘﻲ ﻳﺎﺑﻨﺘﻲ ﺑﻌﺪ ﺇﺑﺮﺍﻫﻴﻢ ﻣﺎﻋﺎﺩ ﻋﻨﺪﻙ ﺣﺪ ﻓﻴﺖ ﺑﻨﺘﻚ ﻫﺬﻩ ﻭﻣﺎﺯﻟﺖ ﺻﻐﻴﺮﺓ ﺍﺗﺮﻳﺪ ﻣﻌﺎﻧﺎﺓ ﻭﺳﺮﻳﺐ ﻭﺍﺟﺪ ﻭﻣﺼﺎﺭﻳﻒ ﻟﻌﻨﺪ ﺗﻜﺒﺮ .. ﻭﺣﺘﻰ ﻟﻤﺎ ﺗﻜﺒﺮ ﻣﺼﺮﻳﻔﻬﺎ ﺍﻳﺰﻳﺪﻭﺍ .. ﻭﺗﺒﻲ ﺣﺪ ﻳﺮﻋﺎﻫﺎ ﻭﻳﺮﺩ ﺑﺎﻟﻪ ﻣﻨﻬﺎ ﻃﻮﻝ ﺍﻟﻮﻗﺖ
ﻭﺳﻦ ﺑﺎﺳﺖ ﺑﻨﺘﻬﺎ : ﻭﺍﻧﺎ ﺑﻨﺮﺑﻴﻬﺎ ﻭﺍﻧﺪﻳﺮ ﺑﺎﻟﻲ ﻣﻨﻬﺎ ﻣﺎﻓﻴﺶ ﺍﻏﻠﻰ ﻣﻨﻬﺎ ﻋﻠﻰ ﻗﻠﺒﻲ
ﻏﺰﺍﻟﺔ : ﻋﺮﻓﺘﻚ ﺍﻣﻬﺎ ﻭﺗﺤﺒﻴﻬﺎ .. ﻟﻜﻦ ﻳﺪ ﻭﺣﺪﺓ ﻣﺎﺗﺼﻔﻜﺶ .. ﻭﺍﻟﺘﺮﺑﻴﺔ ﺗﺒﻲ ﻣﺴﺎﻋﺪﺓ .. ﻭﺍﻧﺘﻲ ﺣﺘﻰ ﻭﻇﻴﻔﺔ ﻣﺎﻋﻨﺪﻙ .. ﻭﻻ ﺑﻮﻫﺎ ﺳﻴﺐ ﻣﺮﺗﺐ ﺗﺼﺮﻓﻲ ﺑﻴﻪ .. ﻭﺍﻧﺎ ﻣﺎﻓﻲ ﺍﻟﻌﻤﺮ ﺍﻛﺜﺮ ﻣﻦ ﺍﻟﻠﻲ ﻣﻀﻰ .. ﻭﻟﻴﺔ ﻛﺒﻴﺮﺓ ﻭﻣﺮﻳﻀﺔ ﻣﺎﻧﺒﻴﺶ ﺍﻧﻌﻴﺶ ﺍﻛﺜﺮ ﻣﻦ ﻣﺎ ﻋﺸﺖ ... ﻭﺣﺎﻝ ﻏﺎﻳﺘﻲ ﻧﻄﻤﻦ ﻋﻠﻴﻜﻦ ﻗﺒﻞ ﺭﺑﻲ ﻳﺎﺧﺬ ﺍﻣﺎﻧﺘﻪ
ﻭﺳﻦ : ﺭﺑﻲ ﻳﻄﻮﻝ ﻓﻲ ﻋﻤﺮﻙ ﻭﻳﻌﻄﻴﻚ ﺍﻟﺼﺤﺔ .. ﻭﻟﻮ ﻣﺘﻀﺎﻳﻘﺔ ﻣﻦ ﻣﺼﺎﺭﻳﻔﻲ ﺍﻧﺎ ﻭ ﻣﻮﻧﻲ .. ﺍﻧﺎ ﺑﻜﺮﺍ ﺍﻧﺸﻮﻑ ﺷﻐﻞ
ﻏﺰﺍﻟﺔ : ﻣﺶ ﻣﺘﻀﺎﻳﻘﺔ ﻣﻨﻜﻦ ﺍﻟﻠﻪ ﻳﻬﺪﻳﻚ .. ﻟﻜﻦ ﻧﺎ ﻧﻨﻈﺮ ﻟﻠﺒﻌﻴﺪ .. ﻣﺎﻧﺒﻴﺶ ﺗﻌﺒﻲ ﻋﻠﻴﺎ ﻭﺑﻜﺮﺍ ﺍﺗﺼﻴﺮ ﻓﻴﺎ ﺣﺎﺟﺔ ﺗﻘﻌﺪﻱ ﺑﺮﻭﺣﻚ .. ﻭﺍﻧﺘﻲ ﻫﻠﻚ ﺗﺒﺮﻭﺍ ﻣﻨﻚ .. ﻭﺧﻮﺗﻚ ﻛﺎﻥ ﺍﻳﺸﻮﻓﻚ ﻳﻘﺘﻠﻮﻙ .. ﻭﺑﻌﺪﻳﻦ ﺍﻱ ﺷﻐﻞ ﺍﻟﻠﻲ ﺗﺒﻲ ﺗﺸﺘﻐﻠﻴﻪ .. ﻛﻴﻒ ﺗﻄﻠﻌﻲ ﻣﻦ ﺍﻟﺤﻮﺵ ﻗﺪﺍﻡ ﺧﻮﺗﻚ
ﻭﺳﻦ ﻧﺰﻟﺖ ﺍﻋﻴﻮﻧﻬﺎ : ﻣﺶ ﻋﺎﺭﻓﺔ ﻧﺸﺘﻐﻞ ﺍﻱ ﺷﻲ .. ﺣﺘﻰ ﻓﻲ ﺍﻟﺤﻮﺵ ﺍﻧﺪﻳﺮ ﺍﻱ ﻣﺸﺮﻭﻉ ﺯﻱ ﺍﻟﺼﺒﺎﻳﺎ
ﻏﺰﺍﻟﺔ : ﺍﻧﺘﻲ ﺻﻐﻴﺮﺓ ﻭﺑﻨﺘﻚ ﺻﻐﻴﺮﺓ .. ﻭﺍﻟﺸﻐﻞ ﻳﺒﻲ ﻭﻗﺖ ﻭﻳﺒﻲ ﻣﺴﺎﻋﺪﺓ ﻭﺍﻟﺒﻨﺎﺕ ﻭﺣﺪﺓ ﻓﻲ ﺍﻟﺸﻐﻞ ﻭﻻﺧﺮﻯ ﻓﻲ ﺍﻟﺠﺎﻣﻌﺔ .. ﻣﺎﺣﺪ ﻓﺎﺿﻲ ﻳﺴﺎﻋﺪﻙ .. ﺍﻧﺘﻲ ﻣﻌﺎﺵ ﺗﻘﺪﺭﻱ ﺗﻘﻌﺪﻱ ﺑﺮﻭﺣﻚ .. ﻻﺯﻡ ﺍﻳﻜﻮﻥ ﻓﻲ ﺭﺍﺟﻞ ﻣﺴﺆﻝ ﻣﻨﻚ ﻭﻋﻴﻨﻪ ﻋﻠﻰ ﺑﻨﺘﻚ
ﻭﺳﻦ ﻣﺶ ﻓﺎﻫﻤﺔ : ﻛﻴﻒ ﻳﻌﻨﻲ ؟ !
ﻏﺰﺍﻟﺔ ﺷﺎﻓﺖ ﻟﺒﻨﺎﺗﻬﺎ ﻭﺑﻌﺪﻳﻦ ﺗﻨﻬﺪﺕ : ﻳﻌﻨﻲ ﻻﺯﻡ ﺗﺘﺰﻭﺟﻲ
ﻭﺳﻦ ﺍﻋﻴﻮﻧﻬﺎ ﻃﻠﻌﻮﺍ : ﺷﻨﻮ ؟
ﻏﺰﺍﻟﺔ : ﺍﻳﻮﺍ ﻳﺎﺑﻨﺘﻲ .. ﺍﻧﺘﻲ ﻻﺯﻡ ﺗﺘﺰﻭﺟﻲ ﺑﺎﺵ ﻧﺘﺮﻳﺢ ﻋﻠﻴﻚ ﻭﻋﻠﻰ ﻣﻮﻧﻲ ﻭﺗﻜﻮﻧﻲ ﻋﻨﺪ ﺭﺍﺟﻞ ﻳﺤﻤﻴﻚ ﻭﻳﺨﺎﻑ ﻋﻠﻴﻚ ﻭﻳﺪﻳﺮ ﺑﺎﻟﻪ ﻋﻠﻰ ﺍﻟﺒﻨﺖ
ﻭﺳﻦ ﺍﺗﻬﺰ ﻓﻲ ﺭﺍﺳﻬﺎ ﻭﺿﻤﺖ ﺑﻨﺘﻬﺎ : ﻻ ﻻ ﻣﺎﻧﺒﻴﺶ .. ﻣﺎﻧﺒﻴﺶ ﺗﺰﻭﺝ ﺑﻌﺪ ﺇﺑﺮﺍﻫﻴﻢ ﺧﻼﺹ .. ﺍﻧﺎ ﺍﻧﻔﻜﺮ ﺍﻧﺮﺑﻲ ﺑﻨﺘﻲ ﻭﺍﻧﻌﻴﺶ ﻋﺸﺎﻧﻬﺎ ﻣﻌﺎﺵ ﻧﺒﻲ ﻻﺯﻭﺍﺝ ﻭﻻ ﺷﻲ
ﻏﺰﺍﻟﺔ : ﺍﻟﺰﻭﺍﺝ ﺳﺘﺮﺓ ﻟﻠﺒﻨﺖ ﻭﺣﻤﺎﻳﺔ ﻟﻬﺎ ﻭﻟﺴﻤﻌﺘﻬﺎ .. ﻭﺍﻧﺘﻲ ﻣﺎﺯﻟﺘﻲ ﺻﻐﻴﺮﺓ ﻭﺍﻟﻠﻲ ﻛﻴﻔﻚ ﺗﻘﻌﺪ ﻣﻄﻤﻊ ﻭﺍﻟﻌﻴﻦ ﻋﻠﻴﻬﺎ .. ﻳﺎﺑﺎﻝ ﺍﻧﺘﻲ ﻗﺼﺘﻚ ﻗﺼﺔ .. ﻭﻇﺮﻭﻓﻚ ﻏﻴﺮ .. ﻭﺍﻱ ﺣﺮﻛﺔ ﻣﺤﺴﻮﺑﺔ ﻋﻠﻴﻚ
ﻭﺳﻦ : ﻟﻜﻦ ﺍﻧﺎ ﻣﺎﻧﺒﻴﺶ ﻧﺘﺰﻭﺝ .. ﺍﻧﺘﻲ ﻛﻴﻒ ﺗﺒﻴﻨﻲ ﻧﺘﺰﻭﺝ ﺭﺍﺟﻞ ﻏﻴﺮ ﻭﻟﺪﻙ ﻳﺎﻋﻤﻴﻤﺔ ؟ ! ﻛﺎﻥ ﻣﺶ ﻋﺸﺎﻧﻲ .. ﻋﺸﺎﻥ ﻣﻮﻧﻲ ﻋﻠﻰ ﺍﻻﻗﻞ
ﻏﺰﺍﻟﺔ : ﻣﺎﻫﻮ ﻧﺎ ﺷﻦ ﻗﺎﻃﻊ ﻇﻬﺮﻱ ﻏﻴﺮ ﻣﻮﻧﻲ ... ﻭﻣﺎﻧﺒﻴﺶ ﺍﻧﺰﻭﺟﻚ ﻏﻴﺮ ﻻﻧﻲ ﺧﺎﻳﻔﺔ ﻋﻠﻴﻚ ﻭﻋﻠﻴﻬﺎ .. ﻭﺑﻌﺪﻳﻦ ﻣﺎﻫﻮﺵ ﺭﺍﺟﻞ ﻏﺮﻳﺐ ﻋﻠﻴﻚ ﻭﻋﻠﻴﻬﺎ .. ﺑﻴﺮﺩﻙ ﺭﺅﻭﻑ ﻭﻟﺪﻱ
ﻭﺳﻦ ﻣﻦ ﺍﻟﺼﺪﻣﺔ ﻟﻌﻨﺪ ﺻﺒﺖ ﺑﺒﻨﺘﻬﺎ ﻭﺿﻤﺘﻬﺎ ﺯﻳﻦ : ﻣﺴﺘﺤﻴﻞ
ﻏﺰﺍﻟﺔ : ﻏﻴﺮ ﻗﻤﻌﺰﻱ ﻳﻬﺪﻳﻚ ﺍﻟﻠﻪ .. ﻧﺎ ﻋﺎﺭﻓﺔ ﺍﻟﻤﻮﺿﻮﻉ ﻭﺍﻋﺮ ﻭﻣﺶ ﺳﺎﻫﻞ .. ﻟﻜﻦ ﻓﻲ ﺍﻻﺧﻴﺮ ﺣﻼﻝ ﻭﻣﺎﻧﺒﻮﺵ ﺍﻧﺤﺮﻣﻮﺍ ﺍﻟﻠﻲ ﺣﻼﻟﻪ ﺭﺑﻲ
ﻭﺳﻦ : ﻻ ﺣﻼﻝ ﻻﺷﻲ .. ﻭﺭﺑﻲ ﺍﻧﻤﻮﺕ ﻭﻻ ﻧﺘﺰﻭﺝ ﺭﺅﻭﻑ ﻭﻻ ﻧﺒﻲ ﻧﺘﺰﻭﺝ ﻏﻴﺮﻩ .. ﺍﻟﻠﻪ ﻳﺨﻠﻴﻚ ﺧﻠﻴﻨﻲ ﻓﻲ ﺣﺎﻟﻲ ﺍﻧﺎ ﻭﺑﻨﺘﻲ .. ﺍﻟﻤﻮﺿﻮﻉ ﻫﺬﺍ ﻓﻜﻴﻨﺎ ﻣﻨﻪ
ﻏﺰﺍﻟﺔ : ﺍﻧﺘﻲ ﻏﻴﺮ ﻣﻨﺼﺪﻣﺔ ﺗﻮﺍ ﻭﻣﺶ ﻋﺎﺭﻓﺔ ﻣﻌﻨﻰ ﻛﻼﻣﻲ .. ﻟﻜﻦ ﺑﻜﺮﺍ .. ﺗﻬﺪﻱ ﻭﻭﺗﻔﻜﺮﻱ ﻭﺗﻌﺮﻓﻲ ﺍﻧﻪ ﻛﻼﻣﻲ ﻛﻠﻪ ﺻﺎﺡ ﻭﻓﻲ ﻣﺼﻠﺤﺘﻚ
ﻭﺳﻦ ﺍﺩﻣﻮﻋﻬﺎ ﻧﺰﻟﻮﺍ : ﻣﺴﺘﺤﻴﻞ .. ﻣﺎﺗﻔﻜﺮﻳﺶ ﻓﻴﻪ ﺍﻟﻤﻮﺿﻮﻉ ﻫﺬﺍ .. ﻻ ﺭﺅﻭﻑ ﻭﻻ ﻏﻴﺮﻩ .. ﺍﻟﻐﻴﻬﺎ ﺍﻟﻔﻜﺮﺓ ﻻﻧﻲ ﻣﺴﺘﺤﻴﻞ ﻧﺘﺰﻭﺝ ﻣﺮﺓ ﺛﺎﻧﻴﺔ .. ﻭﻛﺎﻥ ﻣﺘﻀﺎﻳﻘﺔ ﻣﻨﻲ ﺍﻧﺎ ﻭﺑﻨﺘﻲ .. ﻣﻦ ﺑﻜﺮﺍ ﻧﻤﺸﻲ ﻟﻠﻤﻠﺠﺎ
ﻭﻣﺸﺖ ﻭﺳﻦ ﺗﺒﻜﻲ ﻭﺧﺸﺖ ﺟﻮﺍ ﻗﻌﺪﺕ ﻓﻲ ﺩﺍﺭﻫﺎ .. ﺩﺍﺭ ﺇﺑﺮﺍﻫﻴﻢ ﻣﻦ ﻗﺒﻞ ..
ﺭﻭﺩﻳﻨﺔ ﺻﺒﺖ ﻭﺗﻨﻬﺪﺕ : ﻻ ﺣﻮﻝ ﻭﻻ ﻗﻮﺓ ﺍﻻ ﺑﺎﻟﻠﻪ .. ﻳﺎﻣﺎﻣﺎ ﻓﻜﻴﻨﺎ ﻣﻦ ﻫﺎﻟﻤﻮﺿﻮﻉ ﺑﺎﻟﻠﻪ ﻋﻠﻴﻚ
ﻭﻣﺸﺖ ﺧﺸﺖ ﻋﻠﻰ ﻭﺳﻦ ﺍﻟﺪﺍﺭ .
ﻏﺰﺍﻟﺔ ﺗﻨﻬﺪﺕ ﺑﺤﺰﻥ ﻭﻣﺴﺤﺖ ﻭﺟﻬﻬﺎ ﻭﻣﻌﺎﺵ ﻋﺮﻓﺖ ﺷﻦ ﺍﺩﻳﺮ .. ﻭﻛﻴﻒ ﺗﺘﺼﺮﻑ : ﺍﻟﻠﻪ ﺍﻟﻤﺴﺘﻌﺎﻥ ﻭﺧﻼﺹ
ﺭﻫﻒ ﻣﺘﻜﻴﺔ ﻭ ﺗﺒﺮﻱ ﻓﻲ ﺃﻇﺎﻓﺮﻫﺎ : ﺍﺗﻌﺒﻲ ﻓﻲ ﺭﻭﺣﻚ .. ﺭﺅﻭﻑ ﻣﺴﺘﺤﻴﻞ ﻳﺎﺧﺬﻫﺎ ﺣﺘﻰ ﻛﺎﻥ ﻫﻴﺎ ﻭﺍﻓﻘﺖ
ﻏﺰﺍﻟﺔ ﻋﺰﻗﺖ ﻓﻴﻬﺎ ﻣﻐﻄﺔ ﺍﻟﺴﻜﺮ : ﺍﻧﻌﻨﻲ ﺑﻼﻙ ﻳﺄﻡ ﻟﺴﺎﻥ .. ﺻﺒﻲ ﺑﻼ ﻗﻄﺎﻑ ﻓﺎﺿﻲ ﻣﺎﻧﺎﻗﺼﻨﻲ ﻏﻴﺮ ﺍﻧﺘﻲ .. ﺻﺒﻲ ﻟﻤﻲ ﺍﻟﻌﺎﻟﺔ ﻭﺍﻏﺴﻠﻴﻬﺎ
ﺭﻫﻒ ﺻﺒﺖ ﺍﺗﺨﺒﻂ ﻭﺗﺸﻴﻞ ﻓﻲ ﺍﻟﻌﺎﻟﺔ : ﻣﺎﺣﺪ ﻳﻘﺪﺭ ﻳﻘﻮﻝ ﺍﻟﺤﻖ ﻓﻲ ﺍﻟﺤﻮﺵ ﻫﺬﺍ
ﻏﺰﺍﻟﺔ : ﻳﻨﻘﺎﻝ ﻗﻮﺍﻟﻚ ﺇﻥ ﺷﺎﻟﻠﻪ .. ﻟﻤﻲ ﺍﻟﺤﻮﺳﺔ ﻭﺍﻧﺘﻲ ﺳﺎﻛﺘﺔ
.
.
.
))******** ﺍﻟﻜﺎﺗﺒﺔ ﺍﻡ ﻧﺎﺻﺮ ((
.
.
.
# ﺗﺴﺮﻳﻊ _ ﻟﻼﺣﺪﺍﺙ
.
.
ﺑﻌﺪ ﻛﻢ ﻳﻮﻡ .. ﻛﺎﻧﺖ ﻓﻴﻬﻢ ﻭﺳﻦ ﻏﻴﺮ ﺗﺒﻜﻲ ﻭﺗﻔﻜﺮ ﻓﻲ ﻛﻼﻡ ﻋﻤﺘﻬﺎ .. ﻭﺧﺎﺻﺔ ﺍﻥ ﻏﺰﺍﻟﺔ ﻓﻲ ﻛﻞ ﻟﻠﺤﻈﺔ ﺍﺗﺤﺼﻠﻬﺎ ﺗﻘﻌﺪ ﺗﻘﻨﻊ ﻓﻴﻬﺎ
ﻭﺑﻌﺪ ﻛﻞ ﻫﺎﻟﺮﻓﺾ ﻭﺍﻟﺼﺪ ﻣﻦ ﺭﺅﻭﻑ ﻭ ﻭﺳﻦ ﻭﺑﻨﻔﺲ ﺍﻻﺻﺮﺍﺭ .. ﻏﺰﺍﻟﺔ ﻗﻠﺒﻬﺎ ﺗﻌﺐ ﻭﻣﻌﺎﺵ ﻗﺪﺭﺕ ﺗﺘﺤﻤﻞ .. ﻭﻫﺎﺫﻙ ﺍﻟﻴﻮﻡ ﻣﺮﺿﺖ ﻭﻣﺎﺻﺒﺖ ﻣﻦ ﻣﺮﻗﺪﻫﺎ
ﻭﺳﻦ ﻓﻲ ﺍﻟﻠﻴﻞ ﻃﺎﻟﻌﺔ ﺍﺩﻳﺮ ﻓﻲ ﺭﺿﺎﻋﺔ ﻻﺑﻨﺘﻬﺎ .. ﻣﺸﺖ ﻟﻠﻤﻄﺒﺦ ﻏﻠﺖ ﻻﻣﻴﺔ ﻭﺩﺍﺭﺕ ﺭﺿﺎﻋﺔ .. ﻭﻫﻴﺎ ﺭﺍﺟﻌﺔ ﺗﺴﻤﻊ ﻓﻲ ﺭﻭﺩﻳﻨﺔ ﻭﺭﻫﻒ ﻳﻬﺪﺭﺯﻥ ﺍﺣﺬﺍﺀ ﻏﺰﺍﻟﺔ ﺭﺍﻗﺪﺓ
ﺭﻭﺩﻳﻨﺔ : ﺣﺮﺍﻡ ﻋﻠﻴﻚ ﺭﺍﻫﻮ .. ﺗﺎﺧﺬﻱ ﻓﻲ ﺫﻧﺐ ﻋﻠﻰ ﺍﻛﺘﺎﻓﻚ .. ﺍﻟﺒﻨﺖ ﺷﻦ ﺫﻧﺒﻬﺎ ؟
ﺭﻫﻒ : ﻭﺍﻟﻠﻪ ﻣﺎﻗﻠﺘﺶ ﺣﺎﺟﺔ ﻛﺬﺏ ﺍﻭ ﻏﻠﻂ .. ﻟﻜﻦ ﺑﺼﺮﺍﺣﺔ ﻣﻦ ﻳﻮﻡ ﺧﺸﺖ ﺣﻴﺎﺗﻨﺎ ﻭﻛﻞ ﺷﻲ ﻣﺎﺷﻲ ﻻﻭﺭﺍﺀ ﻭﻣﻦ ﻣﺸﻜﻠﺔ ﻟﻤﺸﻜﻠﺔ .. ﻫﺮﺑﺖ ﻣﻊ ﺇﺑﺮﺍﻫﻴﻢ ﻭﺗﺰﻭﺟﺘﻪ ﻭﻣﺸﺖ ﺑﻌﻴﺪ ﻭﺧﻠﺘﻨﺎ ﻓﻲ ﻭﺟﻪ ﺍﻟﻤﺪﻓﻊ ... ﻫﻠﻬﺎ ﺩﺍﺭﻭﺍ ﻓﻴﻨﺎ ﺍﻳﺎﻡ ﻭﻃﻠﻌﻨﺎ ﺣﺘﻰ ﻣﻦ ﺣﻮﺷﻨﺎ ﻭﺍﺷﺮﺩﻧﺎ .. ﻭﺑﻌﺪﻳﻦ ﻗﻌﺪﺕ ﻣﺸﺎﻛﻞ ﻣﻊ ﺧﻮﻙ ﻭﻛﻞ ﻳﻮﻡ ﻣﺎﻣﺎ ﺗﺠﺮﻱ ﻋﻠﻴﻬﻢ ﻟﻌﻨﺪ ﺧﻼﺹ .. ﻭﻓﻲ ﺍﻻﺧﻴﺮ ﺟﺘﻨﺎ ﻫﻨﺎ ﻭﻗﻌﺪﺕ .. ﻭﻗﻌﺪ ﺇﺑﺮﺍﻫﻴﻢ ﺍﻳﺠﻲ ﻭﻳﻬﺪﺩ ﻓﻴﻨﺎ ﻭﻣﺎﻏﻴﺐ ﻋﻠﻴﻨﺎ ﻛﻠﻤﺔ ﻋﻠﻰ ﺧﺎﻃﺮﻫﺎ .. ﻭﺑﻌﺪﻫﺎ ﺧﺬﺍﻫﺎ ﺧﻮﻫﺎ .. ﻭﺇﺑﺮﺍﻫﻴﻢ ﺿﺮﺑﻪ ﺑﺴﻼﺡ .. ﻭﺑﻌﺪﻳﻦ ﻫﺮﺑﺖ ﻣﻌﺎﻩ ﺍﺧﺮﻯ .... ﻭﺍﺧﺮ ﺷﻲ ﻣﺎﺕ ﺇﺑﺮﺍﻫﻴﻢ ﻭﺍﻧﻀﻨﻲ ﻣﻘﺘﻮﻝ ﻭﻣﺶ ﻏﺮﻳﺒﺔ ﻗﺎﺗﻠﻴﻨﻪ ﺧﻮﺗﻬﺎ .. ﻭﺍﺧﺮ ﺍﻟﻤﺘﺎﻣﺔ ﺳﺒﺒﺖ ﻓﻲ ﻋﺮﻛﺔ ﺑﻴﻦ ﺭﺅﻭﻑ ﻭﻣﺎﻣﺎ ﻋﻠﻰ ﺧﺎﻃﺮﻫﺎ .. ﻭﺭﺅﻭﻑ ﻫﺞ ﻣﻦ ﺍﻟﺤﻮﺵ ﺑﺴﺒﺒﻬﺎ .. ﻭﺷﻮﻓﻲ ﻣﺎﻣﺎ ﻗﺪﺍﻣﻚ ﻛﻴﻒ ﻣﺮﻳﻀﺔ ﻭﻫﻴﺎ ﻻ ﺗﺤﺲ ﻭﻻ ﺗﻤﺲ ... ﻭﻻ ﻣﻌﺒﺮﺗﻨﺎ
ﻭﺳﻦ :
ﺭﻭﺩﻳﻨﺔ : ﻧﻬﺎﺭﻙ ﺍﺳﻮﺩ ﻋﻠﻴﻚ ﻗﻠﺐ ﺍﺳﻮﺩ ﻓﻴﻚ .. ﻗﺎﻋﺪﺓ ﺗﺤﺴﺒﻲ ﻟﻠﺒﻨﺖ ﻭﺗﻌﺪﺩﻱ ﻋﻠﻴﻬﺎ .. ﺷﻦ ﺩﺍﺭﺗﻠﻚ ﺑﺲ
ﺭﻫﻒ : ﻫﺬﺍ ﻛﻠﻪ ﻭﻣﺎﺩﺍﺭﺕ ﺷﻲ ... ﺷﻦ ﺗﺮﺟﻲ ﺍﺧﺮﻯ .. ﻭﺍﻻ ﺑﻌﺪ ﻣﺎﻣﺎ ﺍﺗﻤﻮﺕ ﻏﺎﺿﺒﺔ ﻋﻠﻰ ﺭﺅﻭﻑ ﺳﺎﻋﺘﻬﺎ ﺗﻌﺮﻓﻲ ﻛﻼﻣﻲ ﺣﻖ
ﺭﻭﺩﻳﻨﺔ ﺻﺒﺖ : ﺗﺮﺍ ﺑﺎﻟﻠﻪ ﻋﻠﻴﻚ ﺻﻜﺮﻱ ﻓﻤﻚ ﻭﺍﺭﻗﺪﻱ ﻣﺶ ﻧﺎﻗﺼﻨﺎ .. ﻭﺍﻧﺘﻲ ﻛﻼﻣﻚ ﻛﻠﻪ ﺳﻢ
ﻭﺳﻦ ﺗﺤﺮﻛﺖ ﺑﺴﺮﻋﺔ ﻭﺧﺸﺖ ﻟﺪﺍﺭ ﻋﻠﻰ ﺑﻨﺘﻬﺎ .. ﻗﺒﻞ ﺍﺗﺸﻮﻓﻬﺎ ﺭﻭﺩﻳﻨﺔ ﻃﺎﻟﻌﺔ ﻟﺤﻤﺎﻡ
ﺻﻜﺮﺕ ﺍﻟﺒﺎﺏ ﺑﺎﻟﺸﻮﻳﺎ .. ﻭﻫﻴﺎ ﻣﺨﻨﻮﻗﺔ ﺑﺪﻣﻮﻋﻬﺎ .. ﻭﻗﻠﺒﻬﺎ ﻣﻜﺴﻮﺭ .. ﻭﻣﺸﺖ ﺧﺸﺖ ﻣﻊ ﺑﻨﺘﻬﺎ .. ﺿﻤﺘﻬﺎ ﻭﺗﺒﻜﻲ
.
.
.
))************ ﺍﻟﻜﺎﺗﺒﺔ ﺍﻡ ﻧﺎﺻﺮ ((
.
.
.
ﻧﺪﻯ ﺍﻟﺼﺒﺢ ﻓﻲ ﺍﻟﺠﺎﻣﻌﺔ ﻣﻊ ﺻﺤﺒﺎﺗﻬﺎ .. ﻭﺟﻦ ﻳﻤﺸﻦ ﻣﻊ ﻭﺳﻂ ﺍﻟﺤﺮﻡ .. ﻓﻴﻪ ﺳﻴﺎﺝ ﻋﻠﻰ ﺣﺪﻳﻘﺔ ﺻﻐﻴﺮﺓ ﻭﺳﻂ ﺍﻟﺠﺎﻣﻌﺔ .. ﻛﺎﻧﻮﺍ ﻭﺍﻗﻔﻴﻦ ﻋﻠﻴﻬﺎ ﻣﺠﻤﻮﻋﺔ ﺷﺒﺎﺏ
ﺧﻄﻤﻦ ﻋﻠﻴﻬﻢ .. ﻭﺭﻛﺒﻦ ﻣﻦ ﺍﻟﺪﺭﻭﺝ ﻟﻤﻘﺎﺑﻠﻬﻢ .. ﺷﻮﺭ ﺍﻟﻘﺎﻋﺎﺕ ﻓﻮﻕ
ﻓﻴﺼﻞ ﻣﻊ ﺻﺎﺣﺒﻪ .. ﻣﻦ ﺿﻤﻦ ﺍﻟﺸﺒﺎﺏ ﺍﻟﻮﺍﻗﻔﻴﻦ .. ﺍﻭﻝ ﻣﺎﺷﺎﻓﻬﻦ ﻧﻐﺰ ﺻﺎﺣﺒﻪ : ﺍﻫﻲ ﺍﻟﺒﻨﺖ ﺍﻟﻠﻲ ﻗﺘﻠﻚ ﻋﻠﻴﻬﺎ
ﺻﺎﺣﺒﻪ : ﺍﻱ ﻭﺣﺪﺓ ﻓﻴﻬﻢ ؟
ﻓﻴﺼﻞ : ﺍﻻﺧﻴﺮﺓ ﻟﻘﺼﻴﺮﺓ ﺍﻟﻠﻲ ﺭﺍﻓﻌﺔ ﺧﺸﻤﻬﺎ .. ﻳﺎﻧﻌﻠﻴﺎ
ﺻﺎﺣﺒﻪ : ﺍﺍﺍﺍﺍﻫﺎ .. ﻫﺬﻩ ﻣﺎﺗﻌﺒﺶ ﺭﻭﺣﻚ .. ﻣﺴﺘﺤﻴﻞ ﺍﺗﺠﻴﺒﻬﺎ ﻟﻄﺮﻳﻖ
ﻓﻴﺼﻞ : ﻋﻴﺐ ﻋﻠﻴﻚ .. ﺗﺮﺍﻫﻦ ﻋﻠﻴﻬﺎ
ﺻﺎﺣﺒﻪ : ﻧﺮﺍﻫﻨﻚ ﻋﻠﻴﻬﺎ .. ﻣﺎﺗﺒﺤﺖ ﺣﺘﻰ ﻓﻴﻚ .. ﺗﻌﺮﻑ ﺷﻦ ﻣﺴﻤﻴﻨﻬﺎ ﻓﻲ ﺍﻟﺠﺎﻣﻌﺔ ؟
ﻓﻴﺼﻞ : ﺷﻨﻮ ؟
ﺻﺎﺣﺒﻪ : ﻟﺒﻨﻰ ﺍﻟﻤﺴﺘﺤﻴﻠﺔ
ﻓﻴﺼﻞ ﻋﺰﻕ ﺭﺍﺳﻪ ﻻﻭﺭﺍﺀ ﻭﻳﻀﺤﻚ ﺑﺼﻮﺕ
ﺻﺎﺣﺒﻪ : ﺍﺿﺤﻚ ﻣﺎﻫﻮ ﻣﺎﻓﻴﺶ ﻳﺎﻻﻙ ﻏﻴﺮ ﺍﻟﻀﺤﻚ
ﻓﻴﺼﻞ : ﻭﻛﺎﻥ ﺟﺒﺘﻬﺎ ﻟﻄﺮﻳﻖ .. ﻭﺧﻠﻴﺘﻬﺎ ﺗﺠﺮﻱ ﻭﺭﺍﻳﺎ ﻭﻗﻌﺪﺕ ﻟﺒﻨﻰ ﺍﻟﺴﺮﻳﻌﺔ
ﺻﺎﺣﺒﻪ ﺿﺤﻚ : ﻳﺎﻧﻌﻨﺠﺪ ﺩﻣﺎﻏﻚ
ﻓﻴﺼﻞ :
ﻓﻴﺼﻞ ﺗﺤﺮﻙ ﻣﻦ ﻣﻜﺎﻧﻪ : ﺍﻟﻤﻬﻢ ﺗﻮﺍ ﻓﻜﻨﻲ ﻣﻦ ﺍﻟﺴﻬﻮﻛﺔ .. ﺗﻌﺎﻟﻰ ﻧﻤﺸﻮﺍ ﻭﺭﺍﺀﻫﺎ
ﺻﺎﺣﺒﻪ : ﻫﻴﺎ .. ﻣﻊ ﺍﻧﻲ ﻋﺎﺭﻑ ﺍﺧﺮﺗﻬﺎ .. ﻟﻜﻦ ﺣﺎﺏ ﻧﺘﺸﻤﺖ ﻓﻴﻚ ﺑﻌﺪﻳﻦ
ﻓﻴﺼﻞ : ﺗﻲ ﻏﻴﺮ ﺗﻌﺎﻟﻰ .. ﺗﻮﺍ ﺍﻧﺸﻮﻓﻮﺍ ﺑﻌﺪﻳﻦ ﻣﻦ ﻳﺘﺸﻤﺖ ﻓﻲ ﻣﻦ
ﺭﻛﺒﻮﺍ ﻓﻴﺼﻞ ﻭﺻﺎﺣﺒﻪ ﺷﻮﺭ ﺍﻟﻘﺎﻋﺎﺕ .. ﻟﻤﺎ ﺟﻮﺍ ﻋﻨﺪ ﺍﻟﺠﻴﻬﺔ ﺍﻟﺜﺎﻧﻴﺔ .. ﻟﻘﻮﺍ ﺷﻠﺔ ﻧﺪﻯ ﻣﻊ ﺑﻌﻀﻬﻢ ﻳﻬﺪﺭﺯﻥ ﻋﻨﺪ ﺍﻟﻘﺎﻋﺔ
ﻓﻴﺼﻞ ﻭﻗﻒ ﺍﻳﺸﻮﻑ ﻟﺒﻨﺖ ﻣﻦ ﺑﻌﻴﺪ ﻭﻫﻴﺎ ﺗﺘﻜﻠﻢ ﻣﻊ ﺻﺤﺒﺎﺗﻬﺎ .. ﻭﺑﻌﺪﻳﻦ ﻓﺠﺎﺀﺓ ﻃﻠﻌﺖ ﻧﺪﻯ ﻣﻦ ﻭﺳﻄﻬﻦ .. ﻭﻣﺸﺖ ﻟﺰﺍﻭﻳﺔ ﺑﺮﻭﺣﻬﺎ ﻭﺭﺩﺕ ﻋﻠﻰ ﻓﻮﻧﻬﺎ
ﻓﻴﺼﻞ ﻋﻘﺪ ﺣﻮﺍﺟﺒﻪ : ﺣﻲ ﻋﻠﻤﻚ ﻭﺣﻲ .. ﻫﺬﻩ ﺍﻟﺒﻨﺖ ﺍﻟﻠﻲ ﻳﻮﻣﺘﻬﺎ ﻗﺒﻞ ﺿﺮﺑﺘﻬﺎ
ﻧﺪﻯ ﺭﺩﺕ : ﺍﻟﻮ
ﺭﺅﻭﻑ : ﺍﻟﻮ .. ﺻﺒﺎﺡ ﺍﻟﺨﻴﺮ
ﻧﺪﻯ : ﺻﺒﺎﺡ ﺍﻟﻨﻮﺭ
ﺭﺅﻭﻑ : ﺷﻦ ﺍﺧﺒﺎﺭﻙ ؟
ﻧﺪﻯ ﺳﻜﺘﺖ
ﺭﺅﻭﻑ : ﺍﻟﻮ .. ﻧﺪﻯ ﻧﻜﻠﻢ ﻓﻴﻚ .. ﺗﺴﻤﻌﻲ ﻓﻴﺎ ؟
ﻧﺪﻯ : ﻧﺴﻤﻊ ﻓﻴﻚ ﺍﺍﻫﺎ .. ﺑﺲ ﻣﺎﻧﺒﻴﺶ ﺍﻧﺮﺩ
ﺭﺅﻭﻑ : ﻭﻟﻴﺶ ؟
ﻧﺪﻯ : ﺗﺴﺄﻝ ﻓﻴﺎ ﻟﻴﺶ ؟ ! .. ﻣﺎﻫﻮ ﻟﻴﺎ ﻛﻢ ﻳﻮﻡ ﻧﺘﺼﻞ ﺑﻴﻚ ﻣﺎﺗﺮﺩﺵ ﻋﻠﻴﺎ .. ﺍﻧﺪﺯ ﻓﻲ ﺭﺳﺎﺋﻞ .. ﻧﺘﺼﻞ ﺑﻴﻚ ﻋﻠﻰ ﺍﻟﺨﺎﺹ ﻣﺎﺗﺒﻴﺶ ﺍﺗﺮﺩ .. ﺟﺎﻱ ﺍﻟﻴﻮﻡ ﺍﺗﻘﻮﻟﻲ ﻟﻴﺶ ﻣﺎﺗﺮﺩﻱ
ﺭﺅﻭﻑ : ﻓﺎﻫﻢ ﻭﻋﺎﺭﻑ ﺍﻧﻚ ﺯﻋﻼﻧﺔ ﻣﻨﻲ .. ﺑﺲ ﻭﺍﻟﻠﻪ ﻋﻨﺪﻱ ﻇﺮﻑ ﻭﻣﻌﺎﺵ ﻗﺪﺭﺕ ﻧﺤﻜﻲ ﻣﻌﺎﻙ .. ﻣﺎﻋﺮﻓﺘﺶ ﻛﻴﻒ ﻧﺪﻭﻳﻠﻚ
ﻧﺪﻯ : ﻻ ﻇﺮﻑ ﻭﻻ ﺷﻲ .. ﻣﺎﺗﻘﻮﻟﺶ ﺍﻟﺒﻨﺖ ﻫﺬﻩ ﺍﺗﺤﺲ .. ﻣﺎﺗﻘﻮﻟﺶ ﻋﻨﺪﻱ ﻗﻠﺐ ﻳﺨﺎﻑ ﻋﻠﻴﻚ .. ﻣﺎﺗﻘﻮﻟﺶ ﺍﻧﺮﺩ ﻋﻠﻴﻬﺎ ﺍﻧﻄﻤﻨﻬﺎ ﺣﺘﻰ ﺑﺮﺳﺎﻟﺔ
ﺭﺅﻭﻑ : ﻭﺭﺑﻲ ﺣﺘﻰ ﺍﻧﺎ ﻗﻠﺒﻲ ﻣﻠﻬﻮﻑ ﻋﻠﻴﻚ ﻭﺧﺎﻃﺮﻱ ﺍﻧﺸﻮﻓﻚ ﻭﻧﻬﺪﺭﺯ ﻣﻌﺎﻙ .. ﻳﺎﻧﺪﻯ ﻭﺃﻗﺴﻢ ﺑﺎﻟﻠﻪ ﻣﺮﺍﻳﻒ ﻋﻠﻴﻚ ﻭﺑﺎﻟﻲ ﻣﺸﻐﻮﻝ ﻭﻣﺎﻓﻴﺶ ﻓﻲ ﺑﺎﻟﻲ ﺃﻻ ﺃﻧﺘﻲ .. ﻟﻜﻦ ﺻﺎﺭﻥ ﻇﺮﻭﻑ ﻣﻌﺎﺵ ﻗﺪﺭﺕ ﻧﺤﻜﻲ ﻣﻊ ﺣﺪ ﻭﺑﺎﻟﺬﺍﺕ ﺍﻧﺘﻲ
ﻧﺪﻯ ﻓﻬﻤﺖ ﻋﻠﻴﻪ : ﻇﺮﻭﻑ ﺷﻨﻮ ؟
ﺭﺅﻭﻑ ﺗﻨﻬﺪ : ﻇﺮﻭﻑ ﻓﻲ ﺍﻟﺤﻮﺵ .. ﻣﺸﺎﻛﻞ ﻭﻗﺼﺺ ﻣﺎﻧﺒﻴﺶ ﻧﺤﻜﻲ ﻋﻠﻴﻬﻢ ﺑﺎﻟﺘﻠﻴﻔﻮﻥ .. ﻻﺯﻡ ﻧﺸﻮﻓﻚ ﻗﺒﻞ
ﻧﺪﻯ ﺗﺬﻛﺮﺕ ﻛﻼﻡ ﻋﻤﺘﻬﺎ ﻭﺧﺎﻓﺖ ﻣﻨﻬﺎ : ﺑﺲ ﺍﻧﺎ ﻣﻌﺎﺵ ﻧﺒﻲ ﻧﺸﻮﻓﻚ .. ﻣﻌﺎﺵ ﻧﺒﻲ ﻧﺤﻜﻲ ﻣﻌﺎﻙ ﺧﻼﺹ
ﺭﺅﻭﻑ ﻣﺴﺘﻐﺮﺏ ﻛﻼﻣﻬﺎ : ﻛﻴﻒ . ﻛﻴﻒ .. ﺷﻦ ﻗﺼﺪﻙ ؟ .. ﻭﺍﻻ ﻋﺸﺎﻥ ﺯﻋﻼﻧﺔ ﻣﻨﻲ ؟
ﻧﺪﻯ ﺑﻠﻌﺖ ﺭﻳﻘﻬﺎ ﻭﺗﻜﻠﻤﺖ ﺑﺎﻟﻐﺼﺐ : ﻻ ﺯﻋﻼﻧﺔ ﻭﻻ ﻏﻴﺮﻩ .. ﺍﻧﺎ ﺧﻼﺹ ﻣﻌﺎﺵ ﻧﺒﻴﻚ .. ﻭﻻ ﻧﺒﻲ ﺍﻧﺸﻮﻓﻚ ﻭﻻ ﻧﺤﻜﻲ ﻣﻌﺎﻙ .. ﺃﻧﺴﺎﻧﻲ ﻭﻃﻠﻌﻨﻲ ﻣﻦ ﺭﺃﺳﻚ ... ﻭﻣﻌﺎﺵ ﺗﻜﻠﻤﻨﻲ
ﺭﺅﻭﻑ ﺗﻌﺼﺐ : ﺗﻲ ﺷﻦ ﺗﺤﻜﻲ ﺍﻟﻨﻢ ؟ ﺗﺴﻤﻌﻲ ﻓﻲ ﺭﻭﺣﻚ ﺷﻦ ﺗﻘﻮﻟﻲ؟ .. ﻟﻴﺶ ﻫﺬﺍ ﻛﻠﻪ
ﻧﺪﻯ : ﻫﻜﻲ ﻣﻌﺎﺵ ﻧﺒﻴﻚ .. ﻣﻌﺎﺵ ﻧﺤﺒﻚ .. ﻭﻣﻌﺎﺵ ﺍﺍﺍﺍ
ﺭﺅﻭﻑ ﺑﺼﻮﺕ ﻋﺎﻟﻲ ﻗﺺ ﻋﻠﻴﻬﺎ : ﺗﻌﺮﻓﻲ ﺻﻜﺮﻱ ﻓﻤﻚ ﻭﺍﻻ ﻻ ؟ ﻭﺍﻗﺴﻢ ﺑﺎﻟﻠﻪ ﺍﻧﺠﻴﻚ ﺗﻮﺍ ﻓﻲ ﺍﻟﺠﺎﻣﻌﺔ ﺍﻧﻜﺴﺮ ﺭﺃﺳﻚ
ﻧﺪﻯ ﺧﺎﻓﺖ ﻣﻨﻪ ﻭﺳﻜﺘﺖ
ﺭﺅﻭﻑ ﺗﻨﻬﺪ : ﻭﻳﻦ ﻗﺎﻋﺪﺓ ﺍﻧﺘﻲ ﺑﺎﻟﻀﺒﻂ ؟
ﻧﺪﻯ : ﻋﻠﻴﺶ ؟
ﺭﺅﻭﻑ : ﻧﺒﻲ ﺍﻧﺠﻲ ﺍﻧﺸﻮﻑ ﻭﺟﻬﻚ .. ﺍﻧﺸﻮﻑ ﺷﻦ ﻗﻠﺐ ﺣﺎﻟﻚ ﺑﺎﻟﻄﺮﻳﻘﺔ ﻫﺬﻩ ؟
ﻧﺪﻯ ﻣﺴﺤﺖ ﺩﻣﻮﻋﻬﺎ : ﻣﺎﻓﻴﺶ ﺩﺍﻋﻲ ﺍﺗﺠﻲ ﻻﻧﻲ ﻣﺶ ﺣﻨﻜﻲ ﻣﻌﺎﻙ .. ﻭﺍﻟﻠﻲ ﻋﻨﺪﻱ ﻗﻠﺘﻪ ﻟﻚ .. ﺧﻼﺹ ﺭﺅﻭﻑ ﺧﻠﻴﻨﻲ ﻓﻲ ﺣﺎﻟﻲ
ﺭﺅﻭﻑ : ﺗﻌﺮﻓﻲ ﻭﻛﺎﻥ ﺍﺍﺍﺍ ... ﺍﻟﻮ ... ﺍﻟﻮ .. ﻧﺪﻯ .. ﺍﻟﻨﻢ ﺍﻧﻌﺪ
ﻧﺪﻯ ﺻﻜﺮﺕ ﻋﻠﻴﻪ ﻭﺗﻤﺴﺢ ﻓﻲ ﺍﺩﻣﻮﻋﻬﺎ
ﻃﻠﻌﺖ ﻣﻦ ﻣﻜﺎﻧﻬﺎ ﻭﺑﺘﺮﺩ ﻟﺼﺤﺒﺎﺗﻬﺎ .. ﺧﺒﻄﺖ ﻓﻲ ﻓﻴﺼﻞ ﺍﻟﻠﻲ ﻛﺎﻥ ﻣﺘﻘﺼﺪ ﻳﻮﻗﻒ ﻓﻲ ﻃﺮﻳﻘﻬﺎ
ﻧﺪﻯ ﺷﺎﻓﺘﻠﻪ : ﺷﻮﻑ ﻗﺪﺍﻣﻚ
ﻓﻴﺼﻞ : ﻭﺍﻟﻠﻪ ﺍﻧﺘﻲ ﺍﻟﻠﻲ ﺷﻮﻓﻲ ﻗﺪﺍﻣﻚ .. ﺩﻳﻤﺎ ﺗﺠﺮﻱ ﻭﺗﺒﻜﻲ ﻫﻜﻲ
ﻧﺪﻯ ﺍﺳﺘﻐﺮﺑﺖ ﻛﻼﻣﻪ ﻭﺷﺎﻓﺖ ﻟﻮﺟﻬﻪ ﺣﺴﺖ ﺍﻧﻬﺎ ﺷﺎﻳﻔﺘﻪ ﻣﻦ ﻗﺒﻞ ﺑﺲ ﻣﺎﺟﻤﻌﺘﺶ ﺍﻟﺸﺨﺼﻴﺔ : ﻣﺘﺄﺳﻔﺔ ﻣﺶ ﻗﺼﺪﻱ
ﻭﻣﺸﺖ ﻣﻦ ﻗﺪﺍﻣﻪ ﻭﺩﻣﻌﺘﻬﺎ ﻋﻠﻰ ﺧﺪﻫﺎ
ﻓﻴﺼﻞ ﻳﺪﻩ ﻋﻠﻰ ﺭﻗﺒﺘﻪ ﻭﻳﺸﻮﻓﻠﻬﺎ ﻟﻌﻨﺪ ﺧﺸﺖ ﻭﺳﻂ ﺻﺤﺒﺎﺗﻬﺎ : ﻫﺬﻩ ﻛﻨﻬﺎ ﻻﺧﺮﻯ ﻏﻴﺮ ﺗﺒﻜﻲ ؟ !!
ﺻﺎﺣﺒﻪ ﺟﺎﺀ ﻭﻗﺮﺏ ﻣﻨﻪ : ﻛﻴﻒ ﺻﺎﺭ ؟ ﻣﺶ ﻫﺬﻩ ﻟﺒﻨﻰ ﺭﺍﻫﻮ
ﻓﻴﺼﻞ ﺍﻧﺘﺒﻪ ﻋﻠﻴﻪ : ﺍﺍﺍﻫﺎ ﻋﺎﺭﻑ .. ﻫﺬﻩ ﺻﺤﺒﺘﻬﺎ
ﺻﺎﺣﺒﻪ : ﻧﻤﺸﻮﺍ ﻳﺎﺻﺎﺣﺒﻲ ؟
ﻓﻴﺼﻞ : ﻧﻤﺸﻮﺍ ﻳﺎﻣﺎﻥ
ﻭﻧﺰﻟﻮﺍ ﻣﻦ ﺟﻴﻬﺔ ﺍﻟﻘﺎﻋﺎﺕ .. ﻭﻓﻴﺼﻞ ﺑﺎﻟﻪ ﻋﻨﺪ ﻧﺪﻯ ﻭﺷﻦ ﺻﺎﻳﺮ ﻣﻌﺎﻫﺎ
.
.
.
))*********** ﺍﻟﻜﺎﺗﺒﺔ ﺍﻡ ﻧﺎﺻﺮ ((
.
.
.
ﺻﺒﺎﺡ ﺗﺒﻜﻲ ﻭﺗﺸﺪ ﻓﻲ ﺍﻳﺪﻳﻬﺎ ﻭﺣﺎﻳﺴﺔ ﻓﻲ ﻫﺬﻙ ﺍﻟﺸﻘﺔ
ﺧﺎﻟﺪ : ﻻ ﺣﻮﻝ ﻭﻻ ﻗﻮﺓ ﺍﻻ ﺑﺎﻟﻠﻪ .. ﺍﻟﻠﻪ ﺍﻟﻤﺴﺘﻌﺎﻥ .. ﺷﻦ ﻭﺿﻌﻪ ﺗﻮﺍ ؟
ﺻﺒﺎﺡ : ﻣﺶ ﻋﺎﺭﻓﺔ .. ﺧﻴﻲ ﻗﺎﻝ ﺍﻻﺻﺎﺑﺔ ﺧﻄﻴﺮﺓ .. ﻻﻥ ﺍﻻﻧﻔﺠﺎﺭ ﻛﺒﻴﺮ .. ﻭﻓﻲ ﻣﻮﺕ ﻭﺍﺟﺪ
ﺧﺎﻟﺪ : ﺭﺑﻲ ﻳﺸﻔﻴﻪ ﺇﻥ ﺷﺎﻟﻠﻪ .. ﻭﻳﻨﺘﻘﻢ ﻣﻨﻬﻢ ﻛﻼﺏ ﺍﻟﻨﺎﺭ
ﺻﺒﺎﺡ : ﺍﻧﺎ ﻻﺯﻡ ﻧﻤﺸﻲ ﻟﺒﻨﺎﻥ ﻧﻄﻤﻦ ﻋﻠﻴﻪ .. ﻣﺎﻧﻘﺪﺭﺵ ﻧﻘﻌﺪ ﻫﻨﺎ ﺣﺘﻰ ﺩﻗﻴﻘﺔ
ﺧﺎﻟﺪ ﻳﻬﺪﻱ ﻓﻴﻬﺎ : ﺣﺎﺿﺮ .. ﺣﺎﺿﺮ .. ﻏﻴﺮ ﻣﺎﻧﺒﻮﺵ ﺟﻨﻰ ﺗﻌﻠﻢ ﺑﺸﻲ ﺗﻮﺍ .. ﻣﺎﺻﺪﻗﻨﺎ ﻭﺿﻌﻬﺎ ﺗﻌﺪﻝ ﻭﻧﻔﺴﻴﺘﻬﺎ ﺗﺤﺴﻨﺖ
ﺻﺒﺎﺡ : ﺑﻌﺪﻙ ﺟﻨﻰ ﺍﺗﻤﻮﺕ ﻓﻲ ﺧﺎﻟﻬﺎ ﺑﺴﺎﻡ ﻭﻛﺎﻥ ﺍﺗﺼﻴﺮ ﻓﻴﻪ ﺣﺎﺟﺔ ﻣﺶ ﻋﺎﺭﻓﺔ ﺷﻦ ﺍﺩﻳﺮ
ﺧﺎﻟﺪ : ﻣﺎﻫﻮ ﻫﺬﺍ ﻟﻴﺶ ﻗﺘﻠﻚ ﻣﺎﺗﻘﻮﻟﻲ ﺷﻲ ﻟﻌﻨﺪ ﻧﺴﺎﻓﺮﻭﺍ ﻧﻄﻤﻨﻮﺍ ﻋﻠﻴﻪ ﻗﺒﻞ
ﺻﺒﺎﺡ : ﻭﺟﻨﻰ ﺷﻦ ﺗﺒﻲ ﺍﺗﻘﻮﻟﻠﻬﺎ ﻛﺎﻥ ﺳﺄﻟﺖ ﻟﻴﺶ ﻣﺴﺎﻓﺮﻳﻦ
ﺧﺎﻟﺪ : ﺟﻨﻰ ﻣﺎﻓﻴﺶ ﺩﺍﻋﻲ ﺍﺗﺴﺎﻓﺮ ﺍﺻﻼً .
ﺻﺒﺎﺡ : ﺑﺲ ﺍﻧﺎ ﻣﺎﻧﺒﻴﺶ ﺍﻧﺴﻴﺐ ﺑﻨﺘﻲ
ﺧﺎﻟﺪ : ﺍﻟﻠﻪ ﻏﺎﻟﺐ ﻋﻨﺪﻫﺎ ﺟﺎﻣﻌﺔ ﺍﻟﺒﻨﺖ .. ﻭﻧﺤﻨﺎ ﻣﺎﻧﻌﺮﻓﻮﺵ ﻛﻢ ﻧﺒﻮﺍ ﻧﻐﻴﺒﻮﺍ ﻏﺎﺩﻱ
ﺻﺒﺎﺡ : ﻭﻛﻴﻒ ﺗﺒﻲ ﺍﺗﺴﻴﺒﻬﺎ ﺍﺑﺮﻭﺣﻬﺎ ؟ !
ﺧﺎﻟﺪ : ﻣﺶ ﻣﺴﻴﺒﻬﺎ ﺍﺑﺮﻭﺣﻬﺎ .. ﺑﻨﺨﻠﻴﻬﺎ ﻋﻨﺪ ﻋﻤﺘﻬﺎ ﺟﻤﺎﻧﺔ ﻟﻌﻨﺪ ﻧﻤﺸﻮﺍ ﻭﺍﻧﺠﻮﺍ .. ﻋﺸﺎﻥ ﺣﺘﻰ ﻟﺠﺎﻣﻌﺔ ﺗﻤﺸﻲ ﻣﻌﺎﻫﺎ
ﺻﺒﺎﺡ : ﻭﺍﻟﻠﻪ ﻣﺶ ﻋﺎﺭﻓﺔ .. ﺍﻧﺎ ﻋﻘﻠﻲ ﻣﺸﻮﺵ ﻭﻣﺶ ﻗﺎﺩﺭﺓ ﺍﻧﻔﻜﺮ ﺍﻛﻮﻳﺲ .. ﺑﺎﻟﻲ ﻣﺸﻐﻮﻝ ﻋﻠﻰ ﺑﺴﺎﻡ ﻭﺧﺎﻳﻔﺔ ﻋﻠﻴﻪ
ﺧﺎﻟﺪ : ﺇﻥ ﺷﺎﻟﻠﻪ ﺍﻛﻮﻳﺲ ﻭﻣﺎ ﻓﻴﻪ ﺍﻻ ﺍﻟﺨﻴﺮ .. ﺗﻮﺍ ﺗﻤﺸﻲ ﻭﺗﻄﻤﻨﻲ ﻋﻠﻴﻪ ﺍﺑﺮﻭﺣﻚ
ﺻﺒﺎﺡ : ﺇﻥ ﺷﺎﻟﻠﻪ ﻳﺎﺭﺏ
.
.
.
))****** ﺍﻟﻜﺎﺗﺒﺔ ﺍﻡ ﻧﺎﺻﺮ ((
.
.
.
ﺍﺑﺮﺍﺭ ﻣﻊ ﻛﻤﺎﻝ ﻓﻲ ﺍﻟﺴﻴﺎﺭﺓ ﻣﺘﺠﻬﻴﻦ ﻟﻠﻤﺴﺘﺸﻔﻰ ﻋﺸﺎﻥ ﺍﻟﺠﺮﻋﺔ ﺍﻟﺜﺎﻧﻴﺔ .. ﻭﺍﺑﺮﺍﺭ ﺗﺘﻜﻠﻢ ﻣﻊ ﻧﻮﺍﻝ ﻓﻲ ﺍﻟﻔﻮﻥ
ﺍﺑﺮﺍﺭ : ﺃﻧﺎ ﺗﻮﺍ ﻣﻊ ﻛﻤﺎﻝ ﻓﻲ ﺍﻟﻄﺮﻳﻖ ... ﺍﻧﺘﻲ ﻭﻳﻦ ؟
ﻧﻮﺍﻝ : ﺍﻧﺎ ﻛﻴﻒ ﻃﻠﻌﺖ ﻣﻦ ﺍﻟﺠﺎﻣﻌﺔ .. ﺑﻨﺠﻴﻚ ﻏﺎﺩﻱ
ﺃﺑﺮﺍﺭ : ﻧﺠﻚ ﻟﻴﺎ ﻣﺎﺗﺘﺄﺧﺮﻳﺶ ﻋﻠﻴﺎ .. ﻣﺎﻧﺒﻴﺶ ﺍﻧﺨﺶ ﻟﻠﻌﻼﺝ ﺍﺑﺮﻭﺣﻲ
ﻧﻮﺍﻝ : ﻣﺴﺘﺤﻴﻞ ﺍﻧﺨﻠﻴﻚ ﺍﺑﺮﻭﺣﻚ .. ﻭﻋﺪﺗﻚ ﺑﻨﻜﻮﻥ ﻣﻌﺎﻙ ﻭﺍﻧﺎ ﻋﻨﺪ ﻭﻋﺪﻱ
ﺍﺑﺮﺍﺭ : ﺗﻤﺎﻡ ﻳﺎﻗﻠﺒﻲ .. ﻧﺘﻼﻗﻮﺍ ﻏﺎﺩﻱ ﻣﻌﻨﺎﻫﺎ
ﻧﻮﺍﻝ : ﺗﻤﺎﻡ .. ﺍﻧﺎ ﻣﺴﺎﻓﺔ ﺍﻟﻄﺮﻳﻖ ﺑﺲ ﻭﺍﻧﻜﻮﻥ ﻋﻨﺪﻙ .. ﻣﺎﺗﺒﻴﺶ ﺷﻲ ﻭﺍﻧﺎ ﺟﺎﻳﺔ ؟
ﺍﺑﺮﺍﺭ : ﺳﻼﻣﺘﻚ
ﻧﻮﺍﻝ : ﻳﺴﻠﻤﻚ .. ﻫﻴﺎ ﺑﺎﻟﺴﻼﻣﺔ .. ﻧﺘﻼﻗﻮﺍ
ﺍﺑﺮﺍﺭ : ﻣﻊ ﺍﻟﺴﻼﻣﺔ
ﺻﻜﺮﺕ ﺍﺑﺮﺍﺭ ﻭﺗﻨﻬﺪﺕ .. ﻭﺷﺎﻓﺖ ﻟﻜﻤﺎﻝ ﻣﺒﺘﺴﻤﺔ ﺑﺘﻮﺗﺮ ﻭﺧﻮﻑ
ﻛﻤﺎﻝ ﺷﺎﻓﻠﻬﺎ : ﺗﺮﻳﺤﺘﻲ ﺗﻮﺍ ؟
ﺍﺑﺮﺍﺭ : ﺗﻮﺍ ﻛﻴﻒ ﺗﺮﻳﺤﺖ .. ﺍﻟﻤﺮﺓ ﺍﻻﻭﻟﻰ ﻛﺎﻧﺖ ﻣﻌﺎﻳﺎ ﺗﺸﺠﻌﺖ ﺑﻴﻬﺎ .. ﺣﺘﻰ ﺍﻟﻴﻮﻡ ﻧﺒﻴﻬﺎ ﻣﻌﺎﻳﺎ .. ﻻﻧﻲ ﺧﺎﻳﻔﺔ
ﻛﻤﺎﻝ ﺷﺪ ﻳﺪﻫﺎ ﻭﺍﺑﺘﺴﻢ : ﻣﺎﻓﻴﺶ ﺧﻮﻑ ﺑﺎﺫﻥ ﺍﻟﻠﻪ .. ﺍﻃﻤﻨﻲ
ﺃﺑﺮﺍﺭ : ﺇﻥ ﺷﺎﻟﻠﻪ ... ﺍﺍﺍﺍﻫﺎ ﻛﻤﺎﻝ .. ﺑﺎﻟﻠﻪ ﻭﻗﻒ ﺧﻮﺫﻟﻲ ﻣﻨﺎﺩﻳﻞ ﻋﺎﺩﻳﺔ ﻭﻣﻌﻄﺮﺓ
ﻛﻤﺎﻝ : ﺗﻤﺎﻡ .. ﺍﺳﺘﻨﻲ ﺍﻭﻝ ﻣﺤﻞ ﻧﻮﻗﻒ ﻋﻠﻴﻪ
ﻣﺸﻰ ﻛﻤﺎﻝ ﺑﺎﻟﺴﻴﺎﺭﺓ ﻭﻗﻒ ﻋﻨﺪ ﺍﻭﻝ ﻣﺤﻞ .. ﻓﺘﺢ ﻗﺠﺮ ﺍﻟﺴﻴﺎﺭﺓ ﺧﺬﺍ ﻓﻠﻮﺱ ﻭﻧﺰﻝ ﺧﺶ ﻟﻠﻤﺤﻞ
ﺍﺑﺮﺍﺭ ﺳﺎﺭﺣﺔ ﻭﻓﺠﺎﺀﺓ ﻧﻘﺰﺕ ﻋﻠﻰ ﺻﻮﺕ ﺑﻨﺖ ﺻﻐﻴﺮﺓ ﺍﺩﻕ ﻋﻠﻰ ﻗﺰﺍﺯ ﺍﻟﺴﻴﺎﺭﺓ
ﺍﺑﺮﺍﺭ ﻓﺘﺤﺖ ﺍﻟﺮﻭﺷﻦ : ﻧﻌﻢ ﻳﺎﻣﺎﻣﺎ
ﺍﻟﺒﻨﺖ : ﺭﺑﻲ ﻳﺨﻠﻴﻚ ﻭﻳﻄﻮﻝ ﻓﻲ ﻋﻤﺮﻙ .. ﺍﻋﻄﻴﻨﻲ ﺍﻱ ﺣﺎﺟﺔ ﻟﻮﺟﻪ ﺍﻟﻠﻪ .. ﺭﺑﻲ ﻳﺮﺯﻗﻚ ﻭﻳﻔﺮﺡ ﻗﻠﺒﻚ ﻳﺎﺭﺏ .. ﺍﻱ ﺣﺎﺟﺔ ﺍﻟﻠﻪ ﻳﺨﻠﻴﻚ
ﺍﺑﺮﺍﺭ : ﺣﺎﺿﺮ . ﺣﺎﺿﺮ . ﻟﻠﺤﻈﺔ ﺑﺲ
ﻓﺘﺤﺖ ﺷﻨﻄﺘﻬﺎ ﻓﺘﺸﺖ ﻓﻴﻬﺎ ﻣﺎﻓﻴﺶ ﻓﻠﻮﺱ ﻛﻠﻬﻢ ﺧﻤﺴﻴﻨﺎﺕ ﻣﻊ ﺑﻌﻀﻬﻢ ... ﻓﺘﺢ ﻗﺠﺮ ﺍﻟﺴﻴﺎﺭﺓ ﻭﺷﺎﻓﺖ ﻓﻴﻪ .. ﻻﻗﺖ ﻣﺤﻔﻈﺔ ﻃﻠﻌﺘﻬﺎ ﻭﺗﺒﻲ ﺍﺗﺸﻮﻑ ﻓﻴﻬﺎ .. ﻟﻜﻦ ﻻﻗﺖ ﻓﻠﻮﺱ ﺩﺍﺧﻞ ﺍﻟﻘﺠﺮ .. ﺧﺬﺕ ﻣﻨﻬﻢ ﻭﻣﺪﺕ ﻟﻠﺒﻨﺖ
ﺍﺑﺮﺍﺭ : ﺍﺩﻋﻠﻴﻠﻲ ﺑﺎﻟﺸﻔﺎﺀ
ﺍﻟﺒﻨﺖ ﺷﺎﻓﺖ ﻟﻠﻔﻠﻮﺱ ﻭﻗﻌﺪﺕ ﺗﺪﻋﻴﻠﻬﺎ : ﺭﺑﻨﺎ ﻳﺸﻔﻴﻚ ﻭﻳﻌﺎﻓﻴﻚ ﻭﻳﻤﺪﻙ ﺑﺎﻟﺼﺤﺔ ﻭﺑﻄﻮﻝ ﺍﻟﻌﻤﺮ .. ﻭﻳﺠﺒﺮ ﺑﺨﺎﻃﺮﻙ ﺯﻱ ﻣﺎﺟﺒﺮﺗﻲ ﺑﺨﺎﻃﺮﻱ .. ﺍﻟﻠﻪ ﻳﺤﻔﻈﻚ ﻭﻳﺮﻋﺎﻙ ﻭﻭﻭﻭﻭﻭ
ﻭﺍﺧﺘﻔﺖ ﺍﻟﺒﻨﺖ ﻭﻫﻴﺎ ﻣﺎﺯﻟﺖ ﺗﺪﻋﻲ ﻻﺑﺮﺍﺭ ﺑﺼﻮﺕ ﻋﺎﻟﻲ .. ﻭﺍﺑﺮﺍﺭ ﺗﺮﺩﺩ ﻭﺭﺍﺀﻫﺎ : ﺃﻣﻴﻦ ﻳﺎﺭﺏ ﺍﻟﻌﺎﻟﻤﻴﻦ
ﺗﻨﻬﺪﺕ ﺑﺤﺰﻥ ﻭﺭﺩﺕ ﺑﺎﻗﻲ ﻟﻔﻠﻮﺱ ﻟﻘﺠﺮ ﻭﺑﺘﺮﺩ ﺍﻟﻤﺤﻔﻈﺔ ﺷﺎﻓﺖ ﻓﻴﻬﺎ ﺍﻭﺭﺍﻕ ﻭﺻﻮﺭ .. ﻓﺘﺤﺘﻬﺎ ﻭﻗﻌﺪﺕ ﺍﺗﻔﺘﺶ ﻓﻴﻬﺎ .. ﻻﻗﺖ ﺻﻮﺭ ﻟﻜﻤﺎﻝ ﻭﻫﻮﺍ ﺑﺎﻋﻤﺎﺭ ﻣﺨﺘﻠﻔﺔ .. ﻗﻌﺪﺕ ﺗﺘﻔﺮﺝ ﻭﻣﺒﺘﺴﻤﺔ ﺗﻀﺤﻚ ﻋﻠﻰ ﺷﻜﻠﻪ ﻛﻞ ﻣﺮﺓ ﻣﺘﻐﻴﺮ .. ﻭﺧﺎﺻﺔ ﺍﻟﺼﻮﺭ ﺍﻟﻘﺪﻳﻤﺔ
ﻭﻓﻲ ﻭﺳﻂ ﺍﻟﺼﻮﺭ .... ﻛﺎﻧﺖ ﻓﻲ ﺻﻮﺭﺓ ﺑﺮﻭﺣﻬﺎ .. ﻣﺤﻔﻮﻇﺔ ﺑﺸﻜﻞ ﺧﺎﺹ .. ﻃﻠﻌﺘﻬﺎ ﻭﻛﺎﻧﺖ ﺍﻟﺼﺪﻣﺔ
ﺃﺑﺮﺍﺭ ﺍﺗﺸﻮﻑ ﻟﺼﻮﺭﺓ ﻭﻳﺪﻫﺎ ﺗﺮﻋﺶ ﻗﻠﺒﺖ ﺍﻟﺼﻮﺭﺓ ﻭﻗﺮﺃﺕ ﺍﻟﻜﻼﻡ ﺍﻟﻠﻲ ﻣﻜﺘﻮﺏ ﻭﺭﺍﺀﻫﺎ :
.
.
.
.
ﺭﺅﻭﻑ ﻣﺮﻭﺡ ﻟﻠﺤﻮﺵ ﺍﻟﺼﺒﺢ ... ﻭﻗﻒ ﺳﻴﺎﺭﺗﻪ ﻋﻨﺪ ﺍﻟﻜﺮﺍﺝ .. ﻭﻧﺰﻝ ﺍﻳﺪﻭﺭ ﻋﻠﻰ ﻣﻔﺎﺗﻴﺢ ﺍﻟﺤﻮﺵ .. ﺭﻓﻊ ﺭﺍﺳﻪ ﻋﻠﻰ ﺻﻮﺕ ﺍﻟﺒﺎﺏ ﺍﻟﺮﺋﺴﻲ ﺍﻧﻔﺘﺢ ﺑﺎﻟﺸﻮﻳﺎ .. ﻗﻌﺪ ﻭﺍﻗﻒ ﺍﻳﺸﻮﻑ .. ﻟﻌﻨﺪ ﻃﻠﻌﺖ ﻭﺳﻦ ﺑﺎﻟﺸﻮﻳﺎ ﻻﺑﺴﺔ ﻋﺒﺎﻳﺔ ﻭﺷﺎﻳﻠﺔ ﺑﻨﺘﻬﺎ ﻓﻲ ﺣﻀﻨﻬﺎ .. ﻭﻓﻲ ﻳﺪﻫﺎ ﺷﻨﻄﺔ ﻛﺒﻴﺮﺓ ﻭﻗﻌﺪﺕ ﺍﺗﺼﻜﺮ ﻓﻲ ﺍﻟﺒﺎﺏ
ﺭﺅﻭﻑ ﻗﺮﺏ ﻣﻨﻬﺎ : ﻭﻳﻦ ﻣﺎﺷﻴﺔ ؟ !
ﻭﺳﻦ ﺍﻟﺘﻔﺖ ﻋﻠﻴﻪ ﺑﺨﻮﻑ :
.
.
.
******* ﻧﻬﺎﻳﺔ ﺍﻟﺤﻠﻘﺔ 46#
.
.
