#تسونامي
#الحلقة_10
.
.
.
.
لايك قبل تقري 😘
.
.
.
ظافر ايشوف لوجهه رحمة بأستغراب ..بس رحمة مش واعية
هز رأسه وطلع بالسيارة ...كان خلاص قريب من الحوش ..وقف السيارة ..ونزل بسرعة خش لحوشهم ينادي على امنة
امنة زي العادة في المطبخ ..طلعت بسرعة : نعم ..نعم شن في ؟
ظافر : تعالي شوفي البلا اللي في سيارة كنها ؟
امنة : اي بلا ؟!!
ظافر يسحب فيها من يدها : غير تعالي شوفيها بسرعة
امنة تجري معاه ومش فاهمة شي 😨
طلعوا للسور وامنة وقفت : اصبر الستر ..وين طالع بيا للشارع ؟
ظافر : البنت طاحت عليا وماعرفتش كنها ؟
عقدت امنة حواجبها : بنت من ؟! وين طاحت عليك ؟!
ظافر زاد فتح الباب : اهي في السيارة ..اطلعي شوفيها ..مش ناقصني هم الزح
أمنة اتساوي في وشاحها ..وطلعت راسها ببطى اتشوف داخل السيارة ..لعند شافت وجهه رحمة ...انصدمت وتلفتت على ظافر : هذه شن جابها هنا ؟! 😰
ظافر ايدف فيها : ماهو قتلك طاحت عليا ...اطلعي هيا مش وقت دوة
طلعت امنة بسرعة ..وفتحت باب السيارة وقربت من رحمة ....مدت يدها لوجه رحمة ..مسحته واتهز فيها براحة
امنة : رحمة ...حومي ..هيا حبيبتي نوضي ...كنك شن صارلك ؟
رحمة تطلع منها في همهمة وجفونها ايتحركوا ..بس مازلت غائبة عن الوعي
ظافر واقف برا السيارة وايشوفلهم بقلق ...امنة تلفتت عليه : عدي جيب امية من جوا
ظافر قرب منها : في شيشة عندك ..شوفيها
مدت امنة يدها جنب الكرسي وطلعت شيشة امية ...رشت منها على وجهها رحمة ..وفتحت وشاحها عشان تتنفس
رحمة نقزت وفتحت اعيونها ...فمها جاف ..ومازلت حاسة بدوخة ..تلفتت لاقت أمنة جنبها
غمضت اعيونها وادموعها نزلوا : ابلة أمنة 😭
امنة تمسح في وجهها : ماتخافيش حبيبتي ..اكيد السكر هبط عندك
رحمة ايديها يرجفوا واتحاول اتصحصح
امنة شافت لظافر اللي واقف ويشوف من برا وخلاص
أمنة : عدي جيب كباية امية وسكر بسرعة
ظافر : عليش ؟!
امنة : عدي بسرعة بس
شاف لرحمة في حضن امنة...وخش بسرعة ...خلط سكر في امية ..وطلع برا اعطى امنة الكباية ونزل راسه ايشوف لرحمة
امنة قربت الكباية من فم رحمة : هيا اشربي حومي
رحمة ترعش ..ومدت يدها ترجف ومسكت الكباية وبدأت تشرب مع امنة
