#تسونامي
#الحلقة_19
.
.
إبراهيم خش لشقة ينادي على وسن
طلعت بسرعة من دراها : نعم .نعم
إبراهيم قرب منها وبتفنيصة : مش قتلك ماتقوليش لامي شي 😡
وسن تراجعت للخلف بخوف : ماقلت شي 😣
إبراهيم هجم عليها ويضرب فيها : تكذبي عليا أنا ..املا أمي من وين عرفت أنك حامل 😤
وسن تهرب منه وتبكي : ماقلتلها شي ..بروحها عرفت اه ..ااه .ياماما 😭
وإبراهيم يجري وراءها ..خشت لدار وهو لاحقها يضرب ويسب لعند علم على جسمها ..وبعدين طلع وخلاها تبكي ابروحها
.
.
جنى في سريرها ..راقدة بملل وحزن واتفكر في عابد واللي صار بينهم الصبح
خالد دق على الباب وخش : خير ياجنتي
جنى ارتفعت وقمعزت اكويس : اهلين بابا
خالد قرب وقمعز جنبها على السرير : كنك يابابا ..ليش قاعدة ابروحك ؟
جنى بوجه غابت عنه الابتسامة : مافيش ..كسدت وقلت بالكي نرقد بدري اليوم
رن فونها وكان عابد ..بس الفون ع هزاز ..فصلت عليه😒
خالد ايشوفلها زين : استغربت انك لاجيتني ولا سألتي عليا قبل ترقدي ..مش عاويدك يعني !
جنى شدت في يده : والله غير مصدعة اشويا ..مش قصدي ..انتا تعرفني مانعرفش نرقد قبل مانشوفك وانهدرز امعاك اشويا
خالد مبتسم : بعيد السو عليك ...اليوم موعد تقصيص الاظافر وقلت شكلها نسيت عليا
جنى مسكت ايديه لاثنين واتشوفلهم بحزن : والله صاح ..تعرف راحت من بالي بكل ..مش مشكلة انقصصهم توا
بتفتح الدرج جنبها بس خالد شد يدها : لا خلاص توا ليل ..خليهم بكرا
جنى تنهدت بحزن : سامحني وربي مش قصدي 😥
خالد : ولايهمك يابابا ..بس وجهك اليوم مش عاجبني ..والا زعلانة لان خالو بسام يبي ايروح بكرا ؟
جنى هزت رأسها بالموافقة وخلاص ..ماتبيش بوها ايفكر في شي ثاني ويشغل باله بيها
خالد : ماتزعليش ...ماهو كل صيف نمشوا لبنان ...تكملي دراستك ونمشوا مع بعضنا
جنى : نجك ليا ..وربي انتا احسن أب في الدنيا كلها
خالد بأس يدها الصغيرة : وأنتي احسن بنت ربي رزقني بيها ..ربي يحفظك ليا
جنى ضمت بوها : أنتا اللي ربي مايحرمني منك ولا من حنانك عليا .مافيش حد في الدنيا كلها يفهم عليا غيرك انتا 🥺
خالد يمسح على شعر جنى : لاني حافظك حفظ ...ربيتك على ايديا هذين وكانت فرحتي بجيتك على الدنيا أكبر فرحة حسيت بيها طول عمري .عشت سنين ندعي ربي يرزقني بولد والا بنت نملا عيني بيهم ونسمع كلمة بابا كيف باقي أصحابي وأقاربي ..والحمدالله جيتي انتي وكنتي هدية من ربي ..انوض ونرقد وانا نحمد في ربي عليك كل يوم
