#تسونامي
#الحلقة_2
.
.
.
نوال فتحت الباب وخشت : شن صار ؟
جمانة مازلت تحت تأثير الصدمة ..ومعصبة : حقير 😤
اختفت الابتسامة من ع وجه نوال وصكرت الباب : بسم الله الكريم ..كنك ؟ شن دار ؟!!
غمضت جمانة اعيونها وقمعزت على السرير تحاول تهداء
قربت نوال منها : شن قالك ؟ ليش معصبة ؟
هزت جمانة راسها : مافيش ..تعالي قمعزي
قمعزت نوال واعيونها معلقة على جمانة ...تستنى في جواب على سؤالها
شافت جمانة لصحبتها وتنهدت : مش قادرة نحكي شي توا
نوال شدت يد صحبتها : أهدي ياقلبي ...مش ضروري تحكي شي خليك براحتك
ابتسمت جمانة بحزن ...وشدت على يد نوال .
.
.
.
.
نزل جهاد فنجان القهوة ...ولو في يده ...يطلع بسرعة من المكان ...بس مايبيش مجدي ايشك في شي ..واضطر يجامله ويسايره
دقت منال على باب المدخل ...ناض مجدي وشال سفرة القهوة ...وطلع عليها
خذت منه السفرة : شن الوضع ؟
مجدي يدوي بصوت واطي : مش وقت دوة ..نحكوا بعدين
منال زمت فمها : باهي تمام ...خود السفرة
مجدي رفع سفرة الضيافة ..ورجع خش على جهاد ...ومنال ردت للمطبخ
ابتسم جهاد بتوتر : مافيش داعي لتعب ...عندي شغل ولازم نمشي
مجدي : مازال بدري ياراجل ...تفضل هيا ..بسم الله
تنهد جهاد وقرب من السفرة ...عقله مشوش ..وماعنداش نية لشي ...يبي يطلع من هنا بأسرع وقت .
.
.
.
***************(( الكاتبة أم ناصر ))
.
.
.
أمنة في المطبخ ..نقزت مرة وحدة ..لما حست بنغزة في جنبها : اييييه ..فجعتني الله يهديك
ضحك المعتصم ..وفتح الثلاجة : عارفة احسن شي فيك ديما سارحة ..وكل مرة نقدر نفجعك😂
أمنة ردت اتشكل في عجينة الحلو : أمتى تبي ادير عقل ..زي خوتك
شرب امية وصكر الثلاجة : اووووفه بالله عليك واحد منهم شر من لاخر ...واحد ايهز في رأسه لا يحل ولا يربط ...والثاني داير فيها مثقف ونابغة والاخير معصي اتقول بيخش حرب .اعععع
أمنة : تحشم ع وجهك
معتصم : فوتيهم ...شن قاعدة ادير أحسن أخت في العالم كله ؟
شافتله أمنة بشك : اممم ..اطلع على راس حاجتك ..شن تبي ؟
عبس المعتصم ونقز قمعز على الرخم : تي كنك ؟ نحكي جد
أمنة : عصومي مش فاضية للكذب امتاعك ...قول شن تبي ؟
خذا كمشة من المكسرات : تي شن هالعيلة اللي طحت فيها ...الواحد مايقدرش ايعنبر عن شعوره
