#تسونامي
#الحلقة_41
.
.
.
لايك قبل تقري 😘 واليوم حلقتين هذه حلقة والثانية حتنزل بعدها طول
.
.
.
نوال بصدمة : شنو ؟!! حامل كيف يعني ؟
جمانة : حامل عادي زي الناس
نوال : عارفة زي الناس ..قصدي مش انتي وجهاد من زمان مافيش بينكم شي ومتفقين على الطلاق ..والا حمل جديد ؟!!
جمانة تنهدت : لا مش جديد ..حامل ليا شهرين وخاشة في الثالث
نوال : نهار اسود ..كيف هكي ..وليش ماعنديش العلم بيه 😰
جمانة : اسمعيني بس ..أنا ابروحي انصدمت في البداية ..طبعا انتي عارفة كيف الدورة مش منتظمة عندي وديما تتاخر ..هذا ليش في الاول مادورش شي ..بس بعد شهرين ولما شكيت في روحي ..مشيت درت تحليل وطلع حمل صاح
نوال : باهي ليش ماقلتيلي ؟
جمانة : ماهو انا ابروحي انصدمت ..بس الدكتورة قالت عادي ..بعد عملية الاجهاض ممكن ايصير حمل طول ..وانا بصراحة بعد مشاكلي مع جهاد ولما وصلنا للطلاق قررت نسكت ومانقولش لاحد ..وخاصةً انتي 😥
نوال : كيف خاصةً انا 😒
جمانة : ماهو نعرفك حتقعدي اتزني على راسي ..قولي لجهاد..قولي لجهاد ..وانا بصراحة مانبيش انقوله على شي
نوال : وليش ماتبيهش يعرف ياهمي ؟!
جمانة : لاني خفت انقوله اني حامل ...يتخيل اني نجبر فيه على القعدة معايا بالغصب ..كنت نبي كل شي يتصلح معاه وبعدين نتكلم
نوال : مش عارفة كيف اتفكري ! ماهو مصيره بيعرف ..لعند امتى بدسي عليه ؟!
جمانة : لعند ايتموا الست شهور ونطلق..ونمشي لحالي 😥
نوال : انتي عبيطة يابنتي ..مافيش طلاق وانتي حامل ..وبعدين جهاد لازم يعرف انك حامل
جمانة : لا نوال ..مانبيش يرد عليا عشان انا حامل ..نبيه ايرد عشاني وعشان ايحبني قبل
نوال : انتي مش قلتي انه متغير معاك ..والجو احسن من قبل ؟
جمانة : صاح ..بس مازال زعلان مني وماجاءش تفاهم معايا وحكى في شنو ايفكر ؟
نوال : باهي ليش ماأنتي اتحاولي تحكي معاه وتتفهموا ؟
جمانة : لا مانبيش ..ايسد طول عمري وانا مكسورة ونتحمل في روحي ..حتى جهاد ياما تحملت على خاطره ..ومن اول للقاء لنا وكيف كسر بخاطري ..وانا تحملت بس عشان دراستي ..وبعدين صار اللي صار وقعد جونا تمام ..مشى صار تسونامي وجهاد فقد الذاكرة ..وكان المطلوبة مني عشان انكون زوجة صالحة نتحمل طبع جهاد العصبي من بعد الحادث ...ونصبر عليه وانا عايشة في خوف ..لعند رجعت الذاكرة ..وحتى بعد تكلمت معاه مابش يصدقني وقرر ينفصل عني ..انا تعبت من الانكسار ..معاش نبي نضحي على خاطر حد ..جهاد لو يحبني صاح وشاريني المفروض ايحارب على خاطري مش من اول عثرة في طريقنا ..يقرر ينهي كل شي في للحظة
