بنت القلب "سلسلة عالم المافيا"

توضيح - سفراء الظلام

#بوست_مهم
كلام مهم بخصوص رواية "سفراء الظلام"
في البداية هوضح كذا نقطة وهرد بردو على كل اللي سألني على الرواية اللي مكملتش والحاجات دي كلها بالتفصيل:

1- أنا في آخر رواية نزلتها "عمو الظابط" قولت اعتبروا الـ ١٠ فصول اللي نزلوا من رواية "مخطط سري" منزلوش وأنا هعتزل الكتابة (ومعرفش هل هيبقى دائم ولا مؤقت) حاطط الجملة بين قوسين أهو علشان اللي بيتكلموا ويقولوا رجعت ليه مش اعتزلت وبتاع، أنا عارف أنا كاتب ايه بالظبط وكاتب ده لأني مكنتش خدت قرار نهائي

2- سبب عدم تكميل الرواية أسباب كتير ومش حابب أتكلم فيها ورغم إن اللي دخل يحاول يقنعني ارجع هو شخص واحد فقط متأثرتش لأني عارف إن كتير ميعرفوش الخبر ده لأن قليل اللي كان متابع الرواية الأخيرة وبردو محبتش أنزل بوست خاص بالقرار علشان مكبرش الموضوع، اللي كان بيبعتلي يسأل مكملتش ليه بقوله مش هكمل الرواية

3- من ساعة ما أعلنت عن الرواية دي "سفراء الظلام" والتعليقات والرسايل طب خلص مخطط سري الأول وبعدين فكر نزل رواية جديدة وبتاع ومحدش صبر خالص علشان يعرف ايه هي الرواية دي أصلا مفيش غير تعليق واحد توقع الدنيا ومقطمش فيا (ده طبعا من الناس اللي بحبها وبحب تعليقاتها اسمه امير المصري وبشكره بجد لأنه من الناس القديمة وأي حاجة بيتوقعها علطول)

4- نيجي بقى للي مصبرتوش عليه😂 قولت بدل ما اسيب الرواية كدا ومكملهاش "مخطط سري" أنا زهقت من الاسم والغلاف الفقر دول وكمان الاسم من البداية مكانش عاجبني ولا معبر عن الأحداث مكنتش عارف دماغي كانت فين وأنا بختاره فقولت هغير الاسم وأخليه "سفراء الظلام" اللي معبر جدا عن الأحداث وفي نفس الوقت هعدل في أحداث الفصول اللي نزلت وبعدين هكمل عليها بس الأول هعلن عن الغلاف بشكل غامض وبعدين افاجئهم بإن هي دي "مخطط سري" بالوجه الجديد لكن التعليقات معظمها ما شاء الله فين مخطط سري كملها الأول، طب يا جدعان اتقلوا على رزقكم لا أبدا مفيش😂

5- زي ما قولت "سفراء الظلام" هي مخطط سري بس غيرت الاسم وبعض أحداث الفصول الأولى وقررت بردو قرار عجيب، قولت الرواية مش هتبقى جزء جديد من الروايات اللي قولت عليها، دي هتبقى سلسلة اسمها "سلسلة سفراء الظلام" هجمع فيها كل أبطال رواياتي اللي اقدر عليهم في رواية واحدة زي (كروس أوفر) كدا للروايات يعني يلتقوا في رواية واحدة واللي مش فاهم هسهلها عليكم. عارفين أفلام مارفيل؟ كل فيلم لوحده وبعدين اتعمل افنجرز جمع كل الأبطال في فيلم واحد، هي دي الفكرة بالظبط ومع ذلك تعتبر اجزاء جديدة من الروايات لأن علشان لو نزل جزء جديد من أي رواية لازم تشوف سفراء الظلام الأول🤷

6- بردو علشان محدش يتلخبط في ترتيب الروايات أنا نزلت الترتيب وهنزله تاني علشان اللي يقرأ يمشي على الترتيب الصح ومقرأش حاجة قبل حاجة وميحسش بتوهان🫣

7- سفراء الظلام حرفيا فوق التوقعات والخيال أصلا، من الأحداث مش هتعرف ده حقيقي ولا خيال وهتبقى طول الوقت عايش في توتر وخايف من اللي جاي وهتقول إزاي ده حصل وحصل قبله كدا؟ ايه اللي بيحصل، حرفيا الرواية في حتة تانية خالص وفيها صدمات بتاريخ روايات كتيرة😂

8- اللي هيفوت "سفراء الظلام" هيفوتوا أفضل رواية من حيث التشويق والغموض والأكشن بجد، الرواية دي من أقوى روايات الأكشن والغموض اللي كتبتها بجد ومش بقول كدا علشان تتابعوها لا أنتوا هتشوفوا ده بنفسكم من خلال الأحداث

9- الرواية هتنزل كل يوم مش زي زمان لما كنت بنزل فصل كل أسبوع ومعنى كدا إني هكتبها كاملة الأول قبل ما ابدأ نشر ودلوقتي أنا شغال عليها وخلصت جزء كبير منها وأول ما أخلصها بالكامل هعلن عن الميعاد

اتمنى تفاعلكم ودعمكم وتعليقاتكم علشان أكمل وأقدم لكم الأفضل
ملحوظة: من كتر الأحداث وقوة الرواية قولت هنشرها ورقي في كتاب ومش هنزلها إلكتروني لكني قولت لا طالما نزلت الأجزاء السابقة إلكتروني يبقى أنزل ده كمان علشان كدا قدروني بالتفاعل زي ما قدرتكم❤️

#سفراء_الظلام
#عبدالرحمن_الرداد
#قريبا