အဓိကဇာတ်လိုက်ကငါ့ကိုစွဲလန်းနေတယ်

Chapter 87

"ဘယ်လောက်သတ္တိရှိလို့လဲကွ?"

ဒေါသသံသည် စင်္ကြန်ထဲတွင် ကျယ်လောင်စွာ ပျံ့လွင့်နေသည်။

မြို့စားကြီး ကိုင်လိုစ့်က သူ့ကုတ်အင်္ကျီကိုချွတ်ကာ ကြမ်းပေါ်လို့ပစ်ချလိုက်သည်။ ခုနက မြို့စားမင်းနှင့် ကြုံခဲ့ရသည့် အရှက်တကွဲဖြစ်မှုကြောင့် သူ့မျက်နှာမှာလည်း နီရဲနေသည်။

"ကိုယ့်ကိစ္စကိုတောင် သေချာမသိတဲ့ လူပါးဝတဲ့ကောင်!"

အံကြိတ်ထားရင်းနှင့်ပင် မကျေမချမ်းဖြစ်ကာ တိုင်ကိုပါ လက်သီးနှင့်ထိုးနေသည်။ ထိုးနှက်သံမှာ ကျယ်လောင်စွာ ပဲ့တင်ထပ်နေသည်။

"အရာရှိဒတ်စ်တာ အကြောင်းကို သူ့ပါးစပ်က ပြောထွက်တယ်ပေါ့!"

မြို့စားမင်းသည် ဘုရင်မင်းမြတ်ကို အရာရှိဒတ်စ်တာရဲ့ လာဘ်စားမှုအကြောင်း သတင်းပေးခဲ့ခြင်းဖြစ်သည်။ အရာရှိဒတ်စ်တာမှာ မြို့စားကြီး ကိုင်လိုစ့်၏ သစ္စာတော်ခံတစ်ဦး ဖြစ်ခဲ့သည်။ သို့ရာတွင် မြို့စားမင်းက အရာရှိဒတ်စ်တာအကြောင်းကို ဦးစွာ ထုတ်ဖော်ပြောခြင်းကို ကိုင်လိုစ့် မယုံကြည်နိုင်။

'ငါ့အပေါ် မြို့စားမင်းက အထင်သေးရင်တောင်မှ ပြောတာဆိုတာက အတိုင်းအတာတစ်ခုတော့ရှိရတယ်၊ ဒါပေမယ့် မြို့စားမင်းက ဘောင်ကျော်ရဲတယ်ပေါ့?!'

"ဒီကောင်လေးက စက္ကန့်မခြား ဘောင်ကျော်နေတာပဲ!"

'ငါ့ကိုလာ‌ထိ‌တာတော့ ဒင်း အကြီးအကျယ် နောင်တရသွားစေရမယ်!'

"ငါလုပ်ပြမယ်"

'ဒီနိုင်ငံမှာ မြို့စားကြီး အဆင့်ဆိုတာ ဘာလဲ သူသိအောင် ပြန်သတိပေးလိုက်မယ်'

"ဒီကောင် အသက်ရှူရပ်သွားစေရမယ်"

ကိုင်လို့စ်က အသက်ရှူကြပ်သည်အထိ ဒေါသထွက်ကာ မာန်တက်ပြီး ဆုံးဖြတ်ချက်ချလိုက်သည်။ သူ့လက်သီးများမှာ သွေးကြောများထောင်ထကာ တုန်ခါနေသည်။

ထိုအချိန်မှာပင်

"မြို့စားကြီး"

အနက်ရောင်အရိပ်တစ်ခုက စင်္ကြ့တွင် တစ်ယောက်ထဲရပ်နေသော ကိုင်လိုစ့်ထံ ချဉ်းကပ်လာသည်။