فاقد الشيء يعطيه

الجزء 02

#فاقد_الشيء_يعطيه
#شمس
#بقلم_فريال
الجزء 02
الخاسر الوحيد فالحكاية هذي هي انا ماما كي تزوجت جابت لولاد وكملت حياتها عادي وبابا نفس الشي وانا بقيت معلقة بيناتهم (كي يطلقو الاهل ديما لولاد الي يدمرو ويتشتتو كاين الي ميخليوهش والديه يحس بالنقص ولا بالتغيير كأنو مزالهم مع بعض وكاين الي يدمروه ويحسسوه بلي هو جا غلطة وهوما ملزومين بيه ويستناو اي فرصة تجي باش يرميوه ويتهناو منو). فاتت ليام وانا بين لقراية وشغل الدار غير قولو كلش عليا كبرت وكبر همي ومسؤولياتي كنت مولات 15 سنة بصح رافدة الدار كامل على ظهري نعرف ندير كلش من صغري وانا نخدم دخلت الكوزينة على 6 سنين وهي كي شافتني نهرف ندير كلش جاتها على قلبها كي لعسل مادير والو تقول ماهي متزوجة وعندها مسؤولية دار وولاد وراجل. قرايتي مافرطتش فيها بالرغم من كل الظروف مافرطتش فيها خلاص وبقيت متمسكة فيها برجليا ويديا لأنو كنت مفكرة هي الي راح تخرجني من الهم هذا والحڨرة ونتهنى ولكن ليس كل ما يتمناه المرء يدركه تجري الرياح بما لا تشتهي السفن، مش كل حاجة نبغيوها تتحق ومش اي حاجة حاطينها في راسنا راح نفذوها بكل سهولة يقولو المكتوب مامنو مهروب وانا مكتوب عليا الهم والغم والشقا من صغر للكبر. وصلت للباك في 2014 كان عندي 18عام في هاذ ال18سنة الي عشتهم شفت كل انواع الذل والحڨرة ورخس ذقت كل انواع الضرب من عند بابا ومرتو تحرقت تكويت تضربت تسلخت تمرمدت جعت وماكليتش بردت ومادفيتش مرضت وماداويتش تعريت وماتكسيتش نلبس غير في فضلة الناس حتى المرا لي جابتني من نهار رماتني مازدت شفتها تقول كاش زبالة رماتها وتهنات عليها ماحنش قلبها عليا خلاص تقول مش بنتها، وش فات عليا كامل هكاك وزيني بقا طاغي وكل مانكبر كل مانزيد نحلى حتى وليت محسودة من بنات عمومي وبنات عماتي على زيني الي ورثتو من ماما لوكان جات في يدي نمدلهم زيني ويمدولي شوي زهر ولا يمدولي ام تكون حنينة عليا تحضني وترقدني عندها تسهر عليا كي نمرض توكلني كي نجوع تغسلي كي نتخمج دافع عليا كي نتحڨر نعيطلها ماما كيفي كيف باقي لبنات بصح للاسف منقدروش نملكو كلش ربي يمدلك حاجة وينحيلك حاجة واحد ماهو كامل فهاذ الدنيا الكمال لله سبحانه وتعالى فقط اما عبادو ناقصين حوايج كل واحد وكيفاه كاين الي ناقص رجل ولا يد عين وذن وكاين الي جسمو كامل بصح معندوش زين بصح تلقاو عندو الزهر واهل يحبوه وكاين الي عندو زين ومعندوش لحباب والوالدين كيفي انا لازهر لاميمون.
#فريال