فاقد الشيء يعطيه

الجزء 23

#فاقد_الشيء_يعطيه
#شمس
#بقلم_فريال
الجزء 23
واحد النهار كنا انا ولعجوز قاعدين سمعنا لاصونات تاع الباب شافت عجوزتي فالكاميرة الي لاصقة في الباب(منعرفش اسمها) لقاتو وليد ختها فتحتلو وقاتلو اطلع ودارت ليا قالتلي وجدي القهوة والحقيني، هي دخلاتو لصالو وانا طيبت القهوة وقاطو رفدت السنيوة ودخلت لقيتو حاط ندى في حجرو ويلعب معاها لحت عليه سلام وسقسيتو على حوالو قعدت معاهم سربيتلهم القهوة انا جاتني عادي كعاد عجوزتي قالتلي ادخلي دخلت مادرت والو في بالي، حنا هكاك نشايخو حتى تفتح الباب ودخل يزيد شاف فينا مليح ولا نقول تخنزر حتى شبع ودخل سلم عليه قعدو يحكو بصح يزيد يشوف فيا بنظرة تخوف زربت خرجت روحت ندير لعشا حتى نسمع فالراجل يبقي فيهم على خير كنت حاطاتو راح يقعد يتعشا معانا، لباب تغلق وهو يدخل لعندي للكوزينة بدون سابق انذار عطالي كف حتى صونات وذني قالي هذي حق ماتقعدي قدام راجل وانت لابسة بيجامة راح تطرطق عليك  وبلا خيمار ثاني تقول ماكي متزوجة ماعندك راجل يحكم فيك نطقت يما وقالتلو وشبيك انت علاه تضربها من وكتاه ترفد يدك على نسا وزيد ياك وليد خالتك مش غريب علينا راه في مقام خوك ناض يعيط ويسب ماخلاليش بالتطياح قالي قحبة ومتسوايش وكلكم كيف بعض هات برك تلقاو فرصة تبداو تلعبو بذيلكم والي قال لمرا خداعة وبدالة مغلطش، سبني وقالي واحد لكلمات يعيفو انا بيني وبين روحي نحشم نقولهم وهو قدام يماه وقالهم كمل من عندي وزاد دار ليماه قاللها حتى ويكون خويا مانسمحلهاش تخرج قدامو هكا ويشوفها وحتى انت غالطة كيفاه تخليها تقابلو هكا بأي صفة يشوف مرتي ماهو خويا ما ز** ونزيد ندخل ونلقاها قاعدة ومقابلة اي راجل نكسرلها عظامها ونزيد نرجع عليك انت انا مخليها في امانتك وانت قاعدة تعري فيها وتخلي الكلاب يشوفوها _ ياوليدي ربي يهديك او ولد خالتك هذاك _ لا ولد خالتي لا نمي هذاك راجل ويبقى راجل ماتجيش انت توريلي تخمامهم انا الي نعرف الرجال كيفاه يخممو يشوفو مرا قدامهم يبداو يتخيلو في امور خامجين وهي مهيش عادية اي فتنة مشفتيهاش كيفاه زيانت الي يشوفها تعجبو وزادتلي برب لاطاي هذي ن** نخبي ر** فراس جبل واحد مايشوفك ولا يلمحك. انا خرجت روحت لشومبرتي نبكي غاضتني روحي وزاد كمل عليا بكلامو الي كيف سم صح مغلطش معنديش الحق نخرج قدام ولد خالتو بلبسة هذي كلش مفصل فيا بصح انا كي قالتلي عجوزتي جيبي لقهوة وارواحي دخلت بلا ماندير حساب لحتى حاجة وخلصتها بكف يحرق تقول ضربني لحديدة مش بيدو، انا هكاك نبكي حتى قدمت ليا ندى وبقات تمسحلي في دموعي وقالتلي ماما اول مرة تنطقها راهي قريب تقفل عامين هذا وين نطقت وقالتلي ماما حسيت بواحد الاحساس مقدرتش نوصفو كل هموم دنيا ولعذاب الي تعذبتو فيحياتي كامل تمسح وراح كلمة وحدة كانت كفيلة باش تفرحني كأنو ملكت دنيا طول عمري كنت حابة ننطق كلمة ماما وهاي جات بنتي نطقتها في بلاصتي وفرحتني، نسيت الكف والسب والرخس الي ديتو من عند يزيد عقلي بقا معلق في اللحظة الي عيتطلي ندى فيها ماما ، بقيت محضنتها ونبوس فيها ونبكي وهاذ المرة دموع الفرحة مش لحزن وهي ثاني تبوس فيا ومسحلي في دموعي بيديها كي نكون معاها ننسى دنيا ومافيها.
#فريال