فاقد الشيء يعطيه

الجزء 26

#فاقد_الشيء_يعطيه
#شمس
#بقلم_فريال
الجزء 26
لحق رمضان بقالو 3 ايام يما قالت ليزيد خرجنا نشريو حوايج لرمضان انا وشمس ياي شحال فرحت كي قالتلو خرجها ملي تزوجت الباب تاع برا ماشفتوش كيفاش مداير هوما كامل يخرجو يما ساعات تروح لعند الجيران ولا لخواتاتها وندى يخرجها باباها غير انا بقيت مخزونة في دار مايخرجني مايخليني نخرج كي تقولو يما خليها تروح معايا تتنفس شوي اي ديما مخزونة في دار بزاف عليها هكا مايقبلش ديما يعاود نفس الجملة ماعندو مايخرجها ويسكت مايزيدش يناقشها ولا يخليلها المجال باش تناقشو يرفد روحو ويروح. المرة هذي منعرف كيفاه حتى قبل يخليني نخرج معاهم قاللها وجدو رواحكم ومكلاه تزواق اني منستناش في يدكم 10دقايق نلقاكم لتحت، قال كلامو وخرج انا زربت لبست جلابة ولحت خيمار على راسي رفدت ندى وهبطت نجري خفت يروح ويخليني وهو غير يتسبب. دانا لسونتر كوميرسيال قضينا وجبنا كل خير شرينا لماعين حتى وكاين في دار بصح حنا النسا نموتو عليهم لوكان نلقاو كل نهار نشريو وزيد في رمضان نحبو نبدلو (اصلا هو عندو دراهم خلي نشري ونزورق حق ماهو حابسني في دار). دخل علينا رمضان بالصحة والهنا انا مجانيش صعيب خلاص بالعكس وليت نلهي روحي بالشغل باش ننسى اهمال والديا ليا وكيفاه ماعيطو ماسقساو ومعاملة زوجي الحلوف ثاني تلعب دور، ليوم لول نضت كيما موالفة على 10قولت ياربي نبدا نوجد كلش ذوك خير باش لعشية نرتاح ونلتى بندى وكنت ديجا لبارح درت ميناج لدار (يدخل رمضان ميناج كبير وحتى ويكون كلش نظيف لازم نهبطو كلش العادات)، درت شوربة فريك وزدت طاجين لحلو (كل واحد وكيفاه يقولو هذاك الي يجي بالفواكه المجففة) درت بزاف قيس 4 ايام لانو ميفزدش وكل ماقعد فلفريجيدار تزيد البنة تاعو زدت طاجين الجبن وبوراك ماسيدوان سلاطة حميص وزدت درت خبز دار ماجيت نكمل حتى لحق العصر صليتو ورحت قريت شوي في المصحف وعاودت رجعت قولت كشما نزيد نديرلهم ولا خلي نسقسي لعجوز كشما تشهات نطيبلها، روحت ليها لقيتها حاطة ندى قدامها وتتفرج سقسيتها اذا كشما بغات نطيبلها قالتلي مكلاه كفيتي ووفيتي منتعبكش اليوم لول ديجا مناكلوش بزاف _ ايه عندك الحق. دخلت تسطحت شوي قيس مانرتاح من صباح وانا واقفة مبغيتش نرقد لانو بين العصر والمغرب نوض مخلطة ومش مليح رقاد لوقت هذاك. لحقت 18روحت خبزت كسرة نوجد طابلة انا هكاك وهو يدخل لاح سلام عليا لأول مرة اووو شبيه هذا بقيت نشوف معاه ونثبت بلاك بدلوه ومش هو ولا انا راني نتخيل مستحيل يزيد يدخل ويلوح عليا سلام، نطق قالي كشما بغيتي نجيبلك معايا _ وشنو _ قولتلك اذا كشما بغيتي نجيبلك معايا راني خارج ذوك _ لا مابغيت والو _ اوك براحتك فات دا ندى معاه وخرج.
#فريال