فاقد الشيء يعطيه

الجزء 32

#فاقد_الشيء_يعطيه
#شمس
#بقلم_فريال
الجزء 32
لافامي تاعهم داخلين وخارجين وانا من صباح بالواقفة نطيب في القهوة ولحليب وتاي، جات مرت عمو وبنتها صورية ورجال كانو روحو بقينا غير حنا حتى يزيد قعد معانا وصورية مانحاتش عينيها منو شكيت تكون بيناتهم حاجة بصح يزيد مهوش مقيمها اصلا قاعد يلعب مع بنتو ويحكي مع مرت عمو كلمة وقص يعني هو خاطي هي الي لصقة وكلبة ماتحشم ماوالو، قعدنا مقصرين حتى نطقت مرت عمو قالتلي كشما بان عليك _ كيفاه مفهمتش _ اي قصدي كشما عندك في كرشك _ لا معنديش _ ربي يرزقك ويعمر حجرك مزالك صغيرة وهاي عندك طفلة كبيرها ومن بعد زيدي قالتلها سهيلة غير مكلاه هاي ندى تكفي وتوفي ولوكان جا يزيد حاب لولاد كون راهو زاد تزوج من قبل وجاب الي تولدلو وتعمرلو دارو هو تزوج على جال بنتو بغا الي تربيهالو مش الي تزيدلو هم فوق راسو، جيت نرد عليها ونسبها من بعد سكت عندها الحق جابني باش نربيلو بنتو ونقوم بيماه وبفراشو، قالتلها عجوزتي لوكان بغا كان جاب مربية بدراهمو تربيلو بنتو مايتزوج ماوالو بصح هو تزوج على جالو شاف طفلة عجباتو تزوجها وراهم متفاهمين واذا عليها لولاد شمس مزالها صغيرة تجيب وقت حبت (شح بردتلي يما قلبي فيها وجه لخلا مذلولة كلبة لصقة)، هكاك ومابردش قلبها حتى زادت قالت ليزيد وش يزيد انت راك غير ساكت الموضوع معجبكش ولا انا عندي الحق جاوبني انت تزوجت على جال بنتك ياك شاف فيها واحد شوفة تاع واحد قرفان ورايح يتقيى قالها تزوجت على جال بنتي ولا يما ولا على جالي انا امر خاص بيا وواحد ماعندو الحق يدخل. سكتت ضربة وحدة الكلبة حشمها بغات تبدل الموضوع زعما قالت ليما خالتي نروح نوجد لغدا كيما موالفة فالعيد انا لي نوجدلكم لغدا رديتلها انا قلتلها هذيك قبل مانجي ضرك راني هنا وغدايا راه واجد ( كنت ديجا موجدة الشخشوخة ولاصوص تاعها ولمثوم من صباح نضت بكري). رحت وجدت الطابلة حطيت كلش زدت وجدت سلاطة وعيطتلهم تغدينا مع بعض انا حاطة ندى في حجري وقدامي يزيد ومقابلتنا مرت عمو وبنتها ويما على صدر الطابلة، بقيت ناكل وندى تلوح في يديها لصدري هبطتلي الروبة ويزيد كان يلعب معاها كي شافها عراتني تخنزر فيا وقرب همسلي قالي استري روحك صدرك كامل متراسي مناش وحدنا _ مش انا ندى الي عراتني_ بنت باباها تعرف صلاحها معريلتي رزقي باش نشوف وانت ديما مغطياتو عليا بصح يا بنتي مش هنا تعريها كي نكونو في شومبرة وعري ماما براحتك _ عيب عليك الطفلة راهي بدات تحكي وانت تعلم فيها_ واحد مايفهم عليها هاتيها هنا ولمي خيرك عليا لا نغلط فيك. هو هز ندى وانا قعدت نعدل في روبتي كي طلعت راسي لقيت لالة تشوف وتتخنزر فيا تقول كليتلها ورث باباها، مديتهاش فيها خلاص كملنا تغدينا لميت لماعن غسلتهم ونقيت كوزينتي وهذيك غير تتخنزر فيا مش عاجبها الحال كعاد يما مخليتني ندير كلش وهي قالتلها اقعدي راكي ضيفة متعبيش روحك (غزلتها الكلبة شح شح والف شح) وانا شكوكي غير تزيد مشكيتش في يزيد لا هو مش مقيمها ونعرفو خاطيه النسا وتخلاط بصح هي تصروفاتها معجبونيش واحساس المرا عمرو يخيب.
#فريال