فاقد الشيء يعطيه

الجزء 15

#فاقد_الشيء_يعطيه
#شمس
#بقلم_فريال
الجزء 15
غدوة من ذاك جابتني الفطنة على 10 نضت دوشت ولبست جبة خليجية فالباج ونوضت يزيد حتى هو دوش ولبس قشو لاحظتو مهوش من نوع الفوضوي مايحبش يكون قشو مكمش لازم كلش مريڨل على شعرا، لميت قشي ولوحتو في الفاليزة وخرجنا من الاوتال فوتني عند الحفافة مشطتلي سامبل وزادت طلستلي وجهي (تعرفو لعروس جديدة لازم تكون ديما عادلة وضاربة الحطة ومكياج هذاك ميخطيهاش). خرجت من عند الحفافة لقيتو يستنى فيا ركبت شاف فيا مليح ودور وجهو وديمارا طريق كامل وهو ساكت تقول يحكي بالدراهم، وصلنا للكارتي تاعهم جاي حي راقي وشباب يهبل حبسنا عند دار تهبل من برا جاية لتحت كامل ڨراجات والايطاج الاول سكنة، فتحلي الباب وطلعنا استقبلوني بالزغاريت لقيت شوي من لافامي تاعهم ماشي بزاف ومن جيهتي جات فضيلة برك منعرف كيفاه هداها ربي ورجعت. تغدينا وحزموني (هكا عاداتهم في صبوحي يحزمو لعروس يلبسولها محزمة تاع ذهب)، مع لعشية روحو كامل بقات غير خالة يزيد ويماه وبنتو قلت لعجوزتي وريلي شمبرتي نريح شوي داتني ليها عجبتني جاية شومبرة كبيرة فيها دوش وبالكون كاملة من كلش وباين بلي كلش فيها جديد (حاجة باينة مستحيل يخلي شومبرتو لقديمة الجديد يليقلو كلش جديد)، بدلت حوايجي ورقدت حتى جات ليا لعجوز قالتلي ارواحي تتعشاي معانا والسي راجلي ملي حطني مارجع ماعيط ماوالو. رحت تعشيت معاهم فالكوزينة تاع صح تهبل فيها كلش اي حاجة تحتاجيها وتسهل عليك الطبخ (حلم كل امرأة باش متتعبش بزاف)، تعشينا كملنا جيت نغسل لماعن مبغاتش تخليني خالتو قالتلي عندنا لعروس ماتدخلش للكوزينة حتى تلحق لسابع. هي غسلت لماعن وعجوزتي داتني وراتلي الدار كامل شمبرتها وشومبرة للقعاد فيها غير لاتيلي وزوج كنابيات و صالو كبير لنسا وواحد خلاف لرجال وشومبرة تاع ندى بنتو، دار كامل متولة كلش بالطبع وشان. قلتلها ندى ترقد وحدها_ ايه ترقد في شومبرتها وحدها، غاضتني طفلة مزالها بيبي لوكان جا عندها زهر راهي ترقد في حضن يماها تشبع من ريحتها وحنانتها وتشرب في حليبها ماش ترقد وحدها وترضع في حليب لباطة مافيه فايدة من غير غبرة وماء. يقولو مايحس بالجمرة غير ليكواتو هكذاك انا درك حاسة بكلش وعلبالي راح تكبر وهي تحس بهاذ الفراغ وراح تمرض وتبكي وتتوحش يماها كيما كنت انا نتوحش يما بصح انا مستحيل نخلي الشي الي عشتو وجاز عليا تعيشو ندى، واحد مايقدر يعوض بلاصة الام قد ماحاول الاب مستحيل يدي بلاصتها هي نبع الحنان والأمان كي تكوني في حضنها تنساي همومك تحسي بالدفء والخوف يبعد عليك لانو عندك ام تحميك وتحارب على جالك وانا راح نكون ام لندى ومنخليهاش تتمرمد وتعيش الي عشتو.
#فريال