فاقد الشيء يعطيه

الجزء 05

#فاقد_الشيء_يعطيه
#شمس
#بقلم_فريال
الجزء 05
فاتو ليام وانا زي الخدامة عندهم ماتخلينيش نقرا خلاص نحط نحفظ ولا نحل تمارين توقف عند راسي وتعيط دار خامجة لفطور موجدش وانت قاعدة ويجي باباك نقولو ماديري والو وتلعبيها تقراي وانت تتلوهطي ومافيكش فايدة وخلي وخلي تسمعهملي كامل وانا باش نتفادا المشاكل نوض نخدم ونسكت وفليل نحط نقرا الشي الي قدرت عليه ونحاول قدر الامكان نكمل المقرر وننجح باش نتهنى من الهم تاعهم. لحق الباك جوزتو وتهنيت ونهار النتيجة رحت لجارتي عندها الانترنت نشوف نتيجتي وحاكمة قلبي الخلعة قاتلتني رايحة نموت والحمد لله تعبي ماراحش باطل تعبت ونلت جبتو ب 11 صح مش علامة كبيرة ومش كيف كنت متوقعة بصح هذاك هو مكتوبي لانو في الفترة الاخيرة مقريتش بزاف، سجلت في الجاميعة وقريت اقتصاد فاتو 3 سنين يجريو بين دار ومشاكل فضيلة وبين لقراية كنت نتعب بزاف بصح نقول كلش يفوت مبقاش بزاف فاتو سنين من حياتك وانت صابرة زيدي اليامات هذو وتتخرجي وتتهناي من وجوهم، وهذاك الي كان ديت لاليصونص كنت حابة نكمل ماستر ولكن كان للقدر رأي آخر ليس كل مانتمناه نجده، كنت معولة نكمل ماستر ومن بعد نخدم ونتهنى من ذلهم بصح تبدل كلش ومن العام هذا حكايتي دات مجرى ثاني وتغيرت حياتي كليا مانقولش للأحسن لأنو عمر الشقي باقي كيما قالو خاوتنا لمصاروة. في هذاك الصيف لي تخرجت فيه فضيلة كانت العرس لي تروح ليه تديني معاها تقولي بلاك تتخطبي ونتهنى منك ضرك خلاص لقراية كملت وانا بديت نكبر لازم تتخلص مني صح كانو يخطبو فيا وين مانروح بصح ماكنتش نقبل منيش حاطة زواج في راسي وكانت فضيلة توسوس في بابا باش يحبسني من لقراية ويزوجني تقولو زوجها اي كبرت وش دير بيها ذوك ومايجيك منها غير وجع الراس والمشاكل ولقراية هذي تندب بيها اخرتها تقعد مقابلاتك في دار، هو كان يرفض خلاني نكمل قرايتي منعرف كيفاه هداه ربي وخلاني نكملها باش نقدر نحقق احلامي وطموحاتي وزواج كان اخر همي اصلا شفت زواج ماما وبابا كيفاه كان من ثم عفتو ومن معاملة بابا ليا كرهت رجال كامل كانو يبانولي حڨارين وكلاب ورخاس وحتى كي كنت نقرا ديما يحاولو يتقربو مني ويدخصو وانا نرفضهم ونبعد مش حابة ندخل في اي علاقة حب اصلا بالنسبة ليا الحب تافه مافيه حتى فايدة من غير يحطم العبد شفت بابا كيفاه تحطم بعد ماطلقاتو ماما وحتى ماما كنت نشفى كي داتني معاها ليام لولين كانت تبات تبكي على جالو وهكاك سمحت فيه وفيا وكملت حياتها بكل بساطة وهذا دليل بلي محبتش من قلبها لانو الي يحب يصبر ويتنازل ويحاول يصلح الطرف الثاني ويعدلو مش يروح ويخليه مدمر  ومحطم.
#فريال