فاقد الشيء يعطيه

الجزء 10

#فاقد_الشيء_يعطيه
#شمس
#بقلم_فريال
الجزء 10
نشفى لوقت هذاك كنا في شهر اوت واحد النهار دخل بابا ليا رمالي دراهم في حجري قالي هذا شرطك ورانا درنا الفاتحة (العقد الشرعي) فالجامع وجدي روحك بعد غدوة تعقدي ومنا على 15 يوم العرس تشوكيت حالتي ماهيش حالة عروس ماني موجدة والو حاجة مانسعاها وكيفاه هذي لعرس بعد 15 يوم كيفاه ندير لعمري انا ذوك، كي خرج بابا حسبت هذوك الدراهم لقيتهم 10 ملاين برك حرت علاه عطاوني غير 10 قلت الناس لباس بيهم كيفاش يعطولي 10 برك وحنا في منطقتنا يمدو 25 مليون شي عجب والله وش رايحة نشري بدراهم هذو مايجيبولي والو مانعرف نشري بيهم حاجة تاع ذهب ولا قش ولا فراشات ولا نوجد تصديرة ياربي كلش تلم عليا حاسة دنيا ضاقا بيا عيت تاع صح وين ماندور نلقاها مقفولة في وجهي، استغفرت وقلت البراكة فالقليل (أقلهن مهراً أكثرهن بركة) الصح فلهنا الدراهم يروحو ويجيو حاجة مادوم من غير راحة البال والاخلاق والمحبة والمودة اما الامور المادية غير كماليات (لوقت هذاك كنت نبرر على جال روحي باش يرتاح قلبي ومنبقاش نتقلق ونزيد نتشائم كثر ماراني متشائمة). فاتو يومين ووصل نهار العقد نضت الصباح وجدت روحي لبست ليكات مع سروال عدلت خيماري وخرجت مع بابا كرا طوموبيل ورحنا كي وصلنا للبلدية قعدنا نستناو فيهم وانا الخلعة تاكل فيا ماكلة وزدت حشمت اول مرة راح نشوف لعريس يادرا كيفاش داير راح نعجبو مثلا بلاك حتى هو مجبور على هاذ الزواج عليها المرا ااي فاتت مدخلش يشوفني بصح هو راجل كبير واحد مايقدر يفرض رأيو عليه مش كيفي انا لا حول ولا قوة الي جا يمشيني كيف مابغى ان شاء الله ميكونش كيفهم برك ويزيد يكمل الشي الي خلاه بابا ومرتو. نفضت مخي من الافكار السلبية وقولت الي فيها الخير ربي يجيبها. قعدنا لداخل نستناو فيهم قريب نص ساعة وانا مهبطة راسي منحبش نطلعو ونشوف في ناس ولا يشوفو فيا شوي هكا ونسمع في بابا قال اهلا وسهلا وش حوالك لباس طلعت راسي نلقى راجل يشوف فيا وعينيه منحاهمش مني بقيت نشوف فيه مام انا، علبالي تحبو تقرعجو خلي نوصفهولكم  جاي طويل وشعرو نوار ومطراسي اللحية(من جماعة الشكارة لازم يطراسي لحية عريس وجاي يعقد) جاي خمري عينيه نوار المهم بقيت ساكتة ونشوف معاه ماخصو والو علاه مبغاش يدخل لعندي لمرة الي فاتت هاو كامل مكمل، بقيت نطلع ونهبط ديجا انا نخمم غير فلبلايص الي ملازمش نشرد فيهم الله غالب الهم مخليني هكا. انا هكاك حتى يماه حكمتلي ذراعي قالتلي ماتسلميش عليا درت ليها نلقاها رافدة ندى(بنت وليدها الي راح يولي راجلي) سلمت عليها ورفدت ندى بقيت نبوس فيها ونحاول نحي فالحشمة كي بقيت نشوف فيه لقيتها تشبه لباباها بزاف هي بيضة عليه برك.
#فريال