فاقد الشيء يعطيه

الجزء 25

#فاقد_الشيء_يعطيه
#شمس
#بقلم_فريال
الجزء 25
انا ناكل في روحي وزادتلي يما كي قالتلي علاه تبدل وهو كان مخلي مرتو لولى تقابلو عادي جات في بالي بلي يغير عليا عليها دار هكا لانو مكان حتى تفسير لتصرفو هذا، بقيت نطلع ونهبط ونعاود نتفكر وش قال عليا فتنة وحكا على لاطاي تاعي وقال وين نديها لراس جبل اييي قلبي الصغير لا يتحمل لوكان غير يديرها ويديني لراس جبل على الاقل نتنفس شوي تخنقت من دار لهيت كاين شجر ولحجر نلقى راحتي. بعد المغرب حطت يما لعشا انا مخرجتش كامل من شومبرتي مبغيتش نقابلو خايفة يسبني ولا كشما يقولي. انا قاعدة هكاك حتى جا يزيد دخل لا احم ولا دستور ديراكت قالي نوضي تتعشاي مارديتلوش صمطو انا قولت ذوك يجي يشدني من شعري ويكركني بصح هو مادار والو رفد ندى وراحو مع بعض يتعشاو انا غطيت روحي ورقدت مافحتلي ندير والو ندى ذوك ترقدها لعجوز صاي خلي نرتاح والهامل هذاك والله ليلة مايدنى ليا نوريلو يضربمي ويجي يتوشيني اصلا مفهمتش انا وش جابو ليا نهار لول كعاد مش قابل بيا علاه يتزوجني. غدوا صباح نضت قبلو وماحبيتش نتحرك قولت خلي يخرج بلا فطور ليوم فوق ماني بونيشة عندو فنهار وفليل جارية ليه نزيد نتضرب حتى ومالفة بالضرب في دارنا بصح كي جات منو هو غاضتني روحي بزاف (الراجل كي يرفد يدو المرة لولى وانت تسكتيلو يزيد يتفرع كثر وكثر وفي كل دورة يضربك عادي لانو محبستيهش نهار لول). فات نهاري عادي كيما موالفة بين شغل دار وندى وشياخة مع يما هو مادخل حتى وقت المغرب كنت فالشومبرة دخل ليا عطالي صاشي وخرج ماقالي والو تقول عڨون يحكي بدراهم ولا بالكيروسين(بنزين الطائرات غالي بزاف). فتحت الصاشي نلقا باطة تاع تيليفون بالبيس تاعو باين بلي غالي الماركة تتحدث (جابلي سامسونج علبالي تموتو على تقرعيج) زعما يرضي فيا بالتليفون منعرفوش حاطني كيما نسا الي يحبو الهدايا الغالية انا كون قالي غير اسمحيلي نسمحلو ونرجع نحكي معاه عادي  بلا ماجيبلي تيليفون ويخسر روحو، انا عندي المهم عجبني تليفون خلي على الاقل نتونس بيه. فاتو ليام ومكان حتى جديد نفس الروتين يتعاود نوض صباح قبلو نوجدلو لفطور يفطر ويخرج نرجع نرقد ومن بعد نوض لشغالاتي مانكمل حتى وقت الظهر نصلي ونرقد انا وندى وهكاك نزيد نوجد لعشا نتعشاو نفرز ونغسل لماعن ونكون كملت خدمتي كي البونيشة وتبدا خدمتي كجارية ايه جارية منيش زوجة لانو لوكان جا معتابرني مرتو مايعاملني هكا كشما شفتو راجل يحب يتوشي مرتو يقولها وجدي روحك ويسكت كأنو يأمر فيا يحكمني مايطلقني حتى يشبع والي محيرني مايتعب ماينعس يسهر معايا للوحدة ولا 2 وصباح ينوض بكري وعندو نشاط زائد.
#فريال