فاقد الشيء يعطيه

الجزء 04

#فاقد_الشيء_يعطيه
#شمس
#بقلم_فريال
الجزء 04
نسمع في فضيلة قالتلها ايه وعلاه لالا ماتلقاش خير من وليد عمتها يصونها ويعزها يديها هو خير مايديها البراني كشما يديرلها ويحڨرها (هي اكيد مابيهاش مصلحتي ومش من حبها ليا وانما باش تتهنى مني برك وتقعد وحدها تقول قاعدة فوق راسها ولوكان نجيو لصح انا راني مهنيتها من شغل دار هكاك ومش حامدة ربي وجايبتها عڨابي).بردلي بابا قلبي وقاللها ماعنديش بنات للزواج شوفي جيهة خلاف وياربي ربي قريب نوض نزغرت اففف تهنيت منو وجه البق نكمل قرايتي ونتهنى خير من زواج الهم الي بلا فايدة وديجا عمتي مش قابلة وراح تشربلي لمرار وانا مش ناقصني الي عشتو يكفي ويوفي، حتى بابا ماهميتوش انا هو رفض لانو مايحملش عمتي استخسرني فيهم ومبغاش يناسبهم وكعاد جات بالسيف عليها وبالرغم من مشاكلهم عرف بلي ضغط عليها ولدها وحاب يهينها وهذاك الي كان قدر يردها كيف ماجات، انا مايهمنيش السبب الي خلاه يرفض يمدني المهم ماقبلش وراح نكمل قرايتي وبس الباقي بحر عليهم.
خرجت عمتي قبل ماتشرب القهوة وبعد ماسمعتهم وسخ وذنيهم لبابا وفضيلة رخستهم ترخاس وحتى من بابا مسكتش هو فم وهي فم عايراتو قالتلو لوكان جات فيك فايدة ماطلقك مرتك وترميلك بنتك وهي تكمل باين عافاتك وشربت لمرار معاك انت عزرين وميحملكش ومش انت الي ميشرفكش تمدلي بنتك ياااو انا الي ميشرفنيش ندي بنتك وندخلها لداري بنت الكلب شدها عندك خليها تخدم عليك وعلى مرتك ياعرة رجالة بو وذينة يا الي تمشيه مرتو على رايها يا الي جبد على خاوتو وفاميلتو على جال لفعى، قالتلها فضيلة شكون لفعى _ انت شكون من غيرك ملي دخلتي لدارو ماشاف ربح قاعدة كي سوسة تنكشي فيه وتلعبيها عاقلة قدامنا وانت سم يقطر منك يبالك معلبالناش وش درتي في شمس نهار كامل وهي تدمر عليك وتقولي لناس هي بغات تخدم _ معندو مدخلك بنت راجلي وهو قابل ومهدرش انت شادخلك _ حاجة باينة يقبل ماعندوش الراي يتبع فيك زي الهجالة حتى يلقى روحو وحدو الله لاتربحكم في زوج كلاب ، نهار هذاك ناضت كحلة بيناتهم الي كان في قلبهم كامل خرجوه وبعدها عمتي روحت لدارها وفضيلة دارت لبابا كلاتو ماكلة علاه متمدهاش ووش نديرو بيها وراهي كبرت وانا كرهت منها قاعدة فوق قلبي وي الجمرة وحابة نتهنى في داري وحدي مع ولادي سكتها وقالها نهار لول كي خطبتك قولتلك عندي طفلة وانت قبلتي امالا اسكتي عليا انا لوكان تهبط السما علىلرض منمدش بنتي لولد ختي _ بصح _ لا بصح لا ر** اخطي عزريني ليوم، قال كلامو وخبط لباب وخرج وهي جات ليا سسمتني بكلامها كيف لعادة يا الكلبة بنت الكلبة يماك هاملة وعايشة حياتها وانا حاصلة فيك ووكتاه نتهنى منك وراني تعبت ولوكان غير تموتي، خليتها تنبح زي الكلب وحدها وانا درت ندير فلعشا كي تعبت من لعياط دخلت لشومبرتها. كان علبالي بلي مستحيل تسكت وتفوتها بالساهل هي اذا مضربتنيش تخلي بابا يضربني ومدام كبرت راح تبقى عڨابي حتى تزوجني وتتهنى مني ولوكان تلقى تمدني لراجل مايصلح لوالو باش يكمل يمرمدني كثر وكثر، مفهمتش علاه تكرهني لدرجة هذي ملي جات وهي عڨابي وانا كلمة قودي مانقولهالهاش نسكت ونخبي في قلبي نقول عيب مرا كبيرة مجاياش تقابحيها بصح هي والو متفهمش كا ماتكبر كل ماتطغى.
#فريال