فاقد الشيء يعطيه

الجزء 33

#فاقد_الشيء_يعطيه
#شمس
#بقلم_فريال
الجزء 33
كي كملنا قالتي يما وجدي روحك نروحو لبيت سلفي لكبير الي هو عم يزيد (كل عيد هكا يتلمو في دار لكبيرة يقصرو ويضحكو تجوز هايلة اللمة تهبل) رحت لبست اونصومبل الي شراهولي غاجلي (زوجي العزيز الغالي المزعج خذ بيدي لمشفى المجانين ها واش بغيتو يديكم للمالديف ولا للفضاء) عدلت مكياجي ورشيت شوي بارفا مكثرتش بزاف غير قيس مانشمها انا عيب وحرام نكثر ومع هذاك الدب الي عندي والله يجيفني وهو غير كيما ركح وتبدل شوي منيش حاباتو يرجع كيف كان. خرجت لقيتهم يستناو فينا هزيت ندى وهبطت ركبت يما من قدام وانا وصورية ويماها من اللور وبنتي في حجري مانمدها لحتى وحدة تهزها. كي وصلنا هبطو هوما وانا قالي يزيد استناي هذيك معجبهاش لحال قالي بلاكي تنحي خمارك راهم مخلطين لداخل _ قولتلو هيه علبالي _ صحيتي هكا نبغيك (وشنو اويلي منسمعش مليح قالي هكا نبغيك يبغيني بالمعنى هذاك الي بين زوج وزوجتو ولا قالها برك على سياق الكلام). دخلنا لقينا لافامي تاعهم كامل هنا كل عيد يتلمو عند عمهم لكبير يتعشاو عندو ويسهرو ويروحو على عكسنا حنا واحد مايجي عند خوه تشناف وشرات ولخبيط وتعواج كارثة. جوزنا عشية هايلة نحيت على خاطري نقصر ونضحك معاهم ناس هايلين يدخلو للقلب مافيهمش لعقلية هذيك تاع لبراني منحكوش معاه ومندوروش بيه بالعكس يحكيو ويشايخو معايا تقول يعرفوني من سنين. رجعنا فالليل للدار يزيد حطنا وراح يوصل مرت عمو وبنتها انا تقلقت شوي بصح سكت خبيتها في قلبي حتى نطقت لعجوز قالتلي مديريش عليها هي من صغرها فمها خاطيها واذا بيك على حكاية لولاد يابنتي مزالك صغيرة وتجيبي وحتى وتكون بيك حاجة داوي وترفدي بإذن الله قولتلها ان شاء الله يا يما وش راح نقولها كثر من هك نقولها ولدك الي مش حاب لولاد مني وجابني باش نربي ونخدم وفليل نكون جارية ليه باش يشبع رغباتو ومداير احتياطاتو باش منرفدش منو (مداير العزل)، هي راحت لشومبرتها وانا هزيت ندى وحطيتها في سريرها كانت ديجا راقدة فت هزيت قشي ودخلت ندوش تعبت ليوم بزاف شهر كامل وانا واقفة في الكوزينة وزاد كمل عليا قاطو العيد والميناج تهلكت صاي لوكان نلقى نرقد سمانة مانوضش. كملت لبست بيجامة باش مكلاه يطمع ويقربلي علبالي يشوف طرف لحم باين مني يديرني تحتو ويجيب بيا ساعة ولا ساعتين وانا عيانة نخاف نموت تحتو (ويا هذيك البخصة تخيلو نموت ويقولو ناس ماتت مرتو تحتو قتلها كعاد تشوها وياربي ربي فضيحة من طيراز الرفيع هههههههه).
#فريال