فاقد الشيء يعطيه

الجزء 38

#فاقد_الشيء_يعطيه
#شمس
#بقلم_فريال
الجزء 38
فاتو ليام عادي خلص القاطو في اليوم الثالث وخلصو معاه ضياف تقول عرس مش عيد الله يبارك يجيو في بزاف، انا وعجوزتي بدينا نصومو هي تصوم يامات الصابرين وانا تاني بديت نرجع ياماتي وزدت كملت صمت معاها حتى هذاك صام معانا متوقعتهاش منو بصح فاجأني كي راهو شاد في صلاتو وصيامو (ميبانش بلي انسان يصلي ويصوم الي يشوفو يقول لاصلاة لا والو كيما يقولو المظاهر خداعة). ندى رجعتها ترقد معايا نحضنها ونرقد هذاك من نهار روحني من دارنا مازاد هدر معايا وش راح يقولي مثلا يواسيني؟ يحضني؟ يطيب بخاطري؟ اميد مايديرهاش امالا احسن حاجة يديرها يبقى بعيد عليا ويبلع فمو، كي كان يصوم مايدناش ليا جبناها سمانة مانحكيو مع بعض من بعد كي كمل صيامو رجع يتقرب ليا فليل انا نمدلو حقو كي يكمل ندوش ونجيب ندى نرقدها عندي وهو لايحاتو في ثقيل خليه يموت بالقنطة كيما كنت انا نعاني (كنت حابة ندير كيفو ونخليه يحس بواش حسيت بلاك يفطن ويتبدل بصح هيهات والو الي حيط يبقى طول عمرو حيط، ياجبل مايهزك ريح). فات على لعيد شهر لا جديد يذكر مكانش حاجة كبيرة صرات يما كيما كانت ماتبدلتش خلاص بالعكس حنيتها كل مالها تزيد ندى ولات تنطق شوي تقول مم (تقصد ماما متعرفش مليح)تقول ثاني نني(نرقد) بب(بابا) كل مانشوفها تضحك نحس بلي الدنيا ضحكتلي تاع صح نساتني  همومي ومشاكلي نلهي روحي بيها وبالشغل باش مانخمم مانتفكر والو. بالجمعة كنا قاعدين يزيد صلى في فالجامع وروح تغدينا غسلت لماعن وفرزت لحالة هو دخل لشومبرة يقعد منعرف وش يخدم ولا يخلط واصلا الجمعة دايرو نهار راحة وهكاك ميرتاحش فيه كيف لعباد (هو خدمتو في التجارة وعلى عام هاز تليفون ويعيط هذي سلعة دخلت خرجت)، جات صورية ويماها رحبنا بيهم ضيفتهم وقعدنا في صالو نقصرو ويزيد في شومبرة ماخرجش بكل، انا نكون لباس نشوف صورية يتقلب مخي نولي مش في حوالي قولو غيرة ولاكره ولا حقد ولا اي حاجة المهم انا منحملهاش ومنرتاحلهاش المخلوقة هذي زي الڨرادة لاصقة. ناضت هي قالت نروح لطوالات هي خرجت وطولت شوي انا كلاني قلبي عيت نركح علبالي بيها مهيش راح تركح وطان احساسي صح، روحت دراكت لشومبرة تاعي دخلت نلقى لالة صورية قاعدة فوق سرير ومدايرة رجل فوق رجل تقول راهي في دارها وراجلي لعزيز واقف قدامها ويهدر معاها انا جنوني حضرو لمزية لقيت لباب محلول تالي راني قتلتلهم تنفست مليح وستغفرت باش منهجمش عليا ونتفها ليوم.
#فريال