#فاقد_الشيء_يعطيه
#شمس
#بقلم_فريال
الجزء 07
بعد ماكملت الدراما تاعها زادت ناضت تشطح انا بقيت حايرة فيه لهاذ الدرجة راني مضيقة عليها وراهي مزروبة باش تتهنى مني وترتاح،
نضت شطحت وزهيت وفرغت لي في قلبي كامل حتى رجليا وجعوني خلي نزهى ياك الهم فيها فيها، رجعنا لبلاصتنا حتى جاتنا واحد لعجوزة تكون فال65 من عمرها هكاك بدات تتعرف على فضيلة ولالة مش قليلة لاعبتها عاقلة وتحبني وتتعوج في الهدرة من كلمة لكلمة قالتلها لعجوز انا عجبتني بنتك اذا تعطيهالي لوليدي عندي عوينة وحدة وحابة نفرح بيه ونتهنى عليه قبل مايدي ربي أمانتو فضيلة ضرسة لعقل بانتلها من الفرحة لبروجي لي جات على جالو نجحت فيه وراح تتهنى مني وتزوجني وتفضالها الساحة. تبادلو النوامر قالتلها لعجوز او بيناتنا التيليفون نشاور وليدي ونعيطلك، الصراحة تقال لعجوزة هذي دخلت لقلبي باينة بلي عاقلة لحنانة تقطر منها كي تقعدي معاها ترتاحيلها وتتمناي ماتنوضش خلاص، قالتلي فضيلة شوفي المرة هذي تقبلي بالسيف عليك قرايتك كملتيها صاي روحي شدي دارك وقعدي قلتلها الي فيها الخير ربي يقدمو. رجعنا للدار وزدنا غدوا منو رحنا جبنا لعروسة بصح ماتلاقيناش بهذيك لعجوزة على حساب وش قالتلي فضيلة فاميلت لعروس من بعيد برك على هذيك حضرت للحنة برك وروحت .فات شهر ملي خلاص هذاك العرس وانا كيف عوايدي نهاري يفوت غير تهنبير وبخص ورخس، عيطت لعجوز لفضيلة وقالتلها حابين نزوروكم اذا قابلين قالتلها اكيد مرحبا بيكم في كل وقت عطاتلها لادراس وين نسكنو قالتلها بالجمعة مور الصلاة نجو ليكم اذا كتب ربي _ ان شاء الله متشرفين بيكم وبمعرفتكم _ تعيشي. مع كوبات فضيلة راحت تجري لبابا تعيط مصطفى مصطفى _ غير الخير _ راهم جايين خطابة لشمس _شكون هوما _ وحدة تلاقيت بيها في عرس وليد عمي حبت تزوج ولدها قالتلي بالجمعة نجو وش رايك _ خلي كي يجو ونهدرو _اعطيلي دراهم كشما نوجد قاطو ولشمس تشري حاجة تلبسها. ناض يعيط ويسخط بابا على الدراهم مايعرفش يماه بعد اخربيلو في كلش ومتخربيلوش في جيبو، هذا وش تعرفو جيب جيب ماتحسنوش كامل عوني متقولوش راجل معندوش مش لاحق هات برك تشدو لعبد تعريوه بقات غير بنت الكلبة ماخسرتش عليها دراهمي، تحجرو الدموع في عينيا وغاضتني عمري قلت في قلبي هذي المرة نقبل بالخطاب الي جاي ونروح نشوف حياتي بلاك الدنيا تضحك في وجهي ونتهنى من هاذي المعاناة ونرتاح شوي في حياتي لانو تاع صح عيت وتعبت كبروني قبل وقتي كلش عشتو وجربتو هو صح لااعتراض على مشيئة الله وحكمه بصح القلب لحمة ويحس بكلش يحمل يحمل ويجي نهار وين يتفلڨ من ضغط، هكاك صاريلي انا راني حاملة وساكتة نشد ونخبي في قلبي حتى تفرج عليا .
#فريال
أنت تقرأ
فاقد الشيء يعطيه
General Fictionمعاناة طفلة صغيرة تخلت عنها امها وكانت امنيتها في هذه الحياة انت تقول كلمة ماما ولكن للاسف لم تجد حنان الام ولا الاب وعاشت محرومة منه
