فاقد الشيء يعطيه

الجزء 18

#فاقد_الشيء_يعطيه
#شمس
#بقلم_فريال
الجزء 18
هي ناضت راحت تصلي وانا قعدت نلوم في روحي كيفاه حتى نقولها هكا ومكانش لازم عليا نحكيلها حتى وتكون حنينة وعاقلة بصح منعرفهاش مليح وملازمش نحكيلها على حياتي ونسب والديا قدامها هي تبقى برانية قادر يجي نهار وين تتقلب عليا وتعايرني مشاكل دارنا واسرارهم تبقى في دارنا ملازمش نحكيلهم ومن ليوم نعود نعس روحي ونشد لساني لازم نوزن كلامي مش نحكي برك (مهما كانو اهل راجلك ملاح وعاقلين ويتعاملو معاك مليح ملازمش تحكيلهم على داركم ومشاكلهم واسرارهم بالنهاية يبقاو برانية وهذوك اهلك ملاح ولا قباح يبقاو داركم ويجي نهار وين تتعايري بيهم لهذا اقفلي فمك ومتحكيش عليهم قدام اي شخص براني. نضت توضيت وصليت كي كملت تسطحت قولت نرقد شوي تعبت وعيت من تخمام ومكانش وش ندير يزيد خدام ويما دخلت لشومبرتها ترقد وندى ثاني رقدت ايا معنديش بواش نتلهى لا تليفون لا والو خلي نرقد نرتاح لبارح سهرت بزاف وصباح هذي نوضني الصامط هذاك بكري تقول رايحة نحارب ولوكان غير نوضني بطريقة مليحة لا هو ناض يعيط تقول خلات عليه مع صوتو الله يبارك تكوني تحت اللرض وتسمعيه. فطنت على صوت ندى تبكي نضت نجري ليها تقول مانعرف وش صرا الي يشوفني كيفاه تخطفت من بلاصتي يقول خلات ولا ضرب زلزال نهار هذاك، رفدتها وبقيت ندور بيها وهي مابغات تسكت قولت بلاك جيعانة درتلها بيبرونة ونفس الشي بقات تبكي حتى جات يما قالتلي وش بيها علاه راهي تبكي هكا حكيتلها قالتلي معليش تصرا مينذاك الطفل ينوض مخلوع ويبكي ذوك شوي وتسكت. بقيت محضنتها وندور بيها ونقرالها في القرآن حتى هدات وسكتت يدها تحطها فوق صدري ودخل راسها في رقبتي تقول خايفة نروح ونبعد عليها مسكينة حاسنة عونها وفاهمتها بغات تحس بالحنان وملقاتوش. كي سكتت حطيتها تلعب وروحت صليت العصر كان ديجا آذن كي كملت روحت طيبت القهوة شربت انا ولعجوز وكان ديجا بقا لقاطو تاع لعرس حطيناه، بقينا نحكيو ونقصرو سقسيتها وش ندير للعشا قالتلي ياك بقا تاع لغدا مكلاه تزيدي _ وهو ياكل عادي معندوش مشكل _ايه ياكل والف بيا نطيب مرة في نهار ياكل ويسكت الحاجة لمليحة فيه مايشرطش بصح ميحبش يلقى حوايجو مرمين ومخلطين يحب النظافة وكلش يلقاه مرتب اما على الماكلة الي درتيها ياكلها انا ربيتو هكا مايشرطش ومايتكبرش على النعمة كاين ناس مشتاقينها وملقاوهاش _ ايه عندك الحق يا يما. بقينا نشايخو حكاتلي على لافامي تاعهم كامل تعرفو النسا كي يتلاڨاو مايخلاصوش الحكايات تاعهم يحكيو في كلش حتى سياسة ويفوتولها.
#فريال