فاقد الشيء يعطيه

الجزء 06

#فاقد_الشيء_يعطيه
#شمس
#بقلم_فريال
الجزء 06
كان عرس وليد عم فضيلة رايحين يحنيو للعروسة قاتلي ديري حسابك راكي تروحي معايا قتلها خلي نروح كي يجيبو لعروسة انا وش داني لحنة لعروسة مهمش لافامي تاعي وحتى بابا مايقبلش قاتلي باباك خليه عليا انا نقنعو انت وجدي روحك برك، ياسيدي منين طاحت عليها هاذ الحنية باين تخطط باش تزوجني كيف عوايدها. كي جا بابا لعشية قاتلو نديها معايا مع لول رفض وهي بقات تتسيتتلو وتتعوج حتى قبل، كنا بنهار الاثنين والحنة بالاربعاء رحت لجارتي قدي فالعمر نتسلف كاش لبسة من عندها عطاتلي روب سواري جديدة لبستها ياربي زوج مرات جاتني تهبل، بالثلاثاء دوشت مليح غسلت شعري وخليتو ينشف انا شعري رطب كي ينشف يعود حرير بلا سيشوار ميتعبنيش خلاص، الغدوا منو لبست لاغوب ورحت لجارتي مولات الروبة دارتلي مكياج وطلقت شعري جيت نهبل بيا مانيش مالفة ندير نخلط في وجهي حتى في الاعراس ومانكثرش قالتلي اليوم يطيرو بيك الصراحة انا ماكنتش دايرة الزواج في بالي بصح من معيشة الميزيرية لي عايشيتها وخصوصا فالصيف هذا ماذبيا نلقى الانسان لي يحبني ويعوضني على وش شفت في حياتي وعشت .رحنا لدار عم فضيلة ومن عندهم رحنا نحنيو للعروسة دايرين عرس كبير فلاصال ناس عندهم مرفهين الله يبارك عليهم ويزيدلهم، قعدت قدام فضيلة شوي وهي تقولي نوضي تشطحي معايا كشما تتخطبي ونتهنى منك متلقايش كيف لافامي تاعنا زين ودين وطاعة لوالدين ومرفهين تتهناي ونتهناو معاك (لوكان جاو يصلحو راهي دات واحد منهم مش تدي بابا وهو مطلق ببنتو). نضت على سعدي ووعدي نشطح معاها  وهي تفوخ وتزوخ بنتي وشوفوها شحال شابة  واي كملت قرايتها وتهبل وشاطرة وكيفها مكانش وكل صبع بصنعة كاين الي قالولها ياك بنت راجلك مش بنتك وتطرطق فيهم بنت راجلي انا الي ربيتها وهذي بنتي والام الي تربي مش الي تولد متزيدوش تعاودو الهدرة هذي وعيب عليكم ومرت الاب ديما محڨورة ومهيش مليحة دير وش دير مايقبلوش خيرها ولوكان علبالي تقولولي هكا والله مانجي وهذو نتوما فاميلتي وقولتولي هكا البراني وش راح يقول عليا. دارت مندبة والميت فار لوكان غير كانت معتابرتني بنتها معليش بصح هي ماتحملنيش وتكذب فوقها بزاف هاذ الشي، انا سكت كيف عوايدي ماقولت حتى حاجة اولا لانو نخاف بزاف وشخصيتي ضعيفة وثانيا راني بين لافامي تاعها منعرفهمش ومعنديش الحق ننطق ولا نحكي وشكون راح يسمعلي كي نحكي اصلا.
#فريال