فاقد الشيء يعطيه

الجزء 42

#فاقد_الشيء_يعطيه
#شمس
#بقلم_فريال
الجزء 42
قعدت انا مشوكية تاع صح صدمتني مكنتش متوقعة انو رافدة كل هاذ الحقد والكره في قلبها من جيهتي تحاسب فيا على غلطة غيري علاه انا كنت حابة والديا يطلقو ويما ترميني وتروح تتزوج وانا نتربى بعيدة عليا مشتاقة حنان وكلمة حلوة محتاجة اهتمام وحضن محتاجة واحد يجي يقولي وش خصك؟ راكي مليحة؟ كشما تحتاجي؟ لباس عليك؟ مابغيت حتى حاجة مادية كل الي بغيتو كلمة مليحة يطيبو بيها خاطري بصح للاسف مالقيت والو من غير السب والضرب والكلمات الجارحة من مرت بابا الي غايرة من يما وحاقدة عليها بلا ماتعرفها ومن بابا الي محملني ثمن طلاقو من يما وش ذنبي انا فلي صرا ياك كنت طفلة صغيرة مانعرف والو ماضريتهم بوالو طول عمري وانا عاقلة مانسب ماندير مشاكل صوتي مايسمعوهش كنت ديما نخدم الشغل باش يحبوني بصح والو كرهم كل مالو يزيد كثر وكثر، يقولو المكروه مكروه حتى ويفرش الارض بالذهب واحد مايحبو وهكاك انا ندير وش ندير مش راح يحبوني، مكفانيش كلام فضيلة الي زي السم زاد كمل عليا بابا كي دخل وقالي منحتاجكش في داري انا منقبلش تجي تعيشي عندي ذوك ترجعي لدار راجلك يضربك يسلخك يقتلك تحملي وتسكتي طلاق مكانش نوريلك خشونية الراس خارجة ليماك القحبة شوي برك تهربو تحوسي تطلقي وتقعدي فوق قلبي والله ماصرات هيا عيطيلو يجي يديك، ماحاولش اصلا يفهم المشكل ولا وش صرا حتى جيت ليهم والو جا داخل ديراكت يعرش ويسب عمراتو مرتو مليح. عمي مليح وزادلو لهوا وريح من بكري معنديش الزهر في عوض مايستقبلوني مليح لانو ربحو دراهم من ظهري هوما لا العكس حاوزوني من حق انا نحاسبهم كعاد باعوني بصح سكت وقولت معندو ماينفع العتاب واللوم لانو راسهم مغلوق بصح باش يحاوزوني ويهينوني وفوقها راجلي يسمع لا هنا تحبس. حشمت مت من يزيد كي حاوزتني فضيلة قدامو وزادت قالتلي الكلام هذاك الي زي السم وزاد فوقها بابا كمل عليا حاوزني واهاني مسح بيا لرض. حنا هكاك حتى نسمعو لباب يطبطب راح بابا يفتح لقاه يزيد دخلو لصالة وعيطلي روحت قدامو بعد قالي البسي حوايجك وطيري من داري منحتاجكش ودار شاف مع يزيد قالو وانت انا ماعطيتلكش الطفلة باش ترجعهالي بعد 4اشهر قالو يزيد وشكون قالك انا نسمح في مرتي ونرجعالهك مرتي تبقى عندي طول لحياة معززة مكرمة مايخصها والو وماتسحق منكم والو الي تبغيها توصلها في دقيقة، شاف فيا وقالي هيا راني نستنى فيك. رحت لبست حجابي وخرجنا طول الطريق وانا نبكي حسيت بالحقرة بالذل اذا بابا دار فيا هاك واش نستنى من ولد الناس قلت ضرك يزيد يدير فيا رايو كي شافهم حاوزوني عدت محشومة كنت زعما نتقلش عليه عشيت محاوزة ومبهدلة قدامو اسرار ومشاكل دارنا كامل عرفهم وفوقها كيفاه كنت عايشة وكيفاه يما رماتني وسمحت فيا ومرت بابا كانت معيشتني المر اكيد راح يخاف على بنتو مني كشما نديرلها ونعاملها كيما عاملوني في صغري.
#فريال